Sala E Tuberi Keda Tiko Kina O Jiova
“Tuberi au e na sala dodonu.”—SAME 27:11.
1, 2. (a) Na sala cava e tuberi ira tiko kina nona tamata ena gauna oqo o Jiova? (b) Ni tukuni meda vakayagataka vinaka na soqoni, na cava na kena ibalebale?
E IVUREVURE ni rarama kei na dina o Jiova, me vaka eda raica mai na ulutaga sa oti. Na nona Vosa e vakararamataka na noda sala nida lakova tiko na sala dodonu. E tuberi keda o Jiova ena nona vakavulici keda ena nona sala. (Same 119:105) Me vakataki koya na daunisame ena gauna makawa, eda soli keda me tuberi keda o Jiova da qai masuta: “Ni vakavulici au, Jiova, e na nomuni sala, ka tuberi au e na sala dodonu.”—Same 27:11.
2 Dua na sala e vakavulici keda kina o Jiova ena gauna oqo na soqoni vakarisito. Eda vakayagataka tiko beka vakavinaka na nona isolisoli vakayalololoma oqo ena noda (1) sega ni calata, (2) noda lai vakarorogo vinaka, kei na (3) noda vakaitavi sara ni kerei meda vakaitavi na vakarorogo? Kena ikuri, eda dau marau beka meda ciqoma e so na ka e vakaturi mai me vukei keda meda muria tiko ga “na sala dodonu”?
Vakacava Sara Mada Nomu Dau Tiko Ena Soqoni?
3. E rawa vakacava ni mai nona ivalavala e dua na italatala vakatabakidua me sega ni dau calata na soqoni?
3 E so na dautukutuku ni Matanitu ni Kalou era se tekivu lakova sara na soqoni nira se lalai. “Ni keitou se ka lalai kei iratou na taciqu ena 1930 vakacaca,” e vakasamataka lesu e dua na italatala vakatabakidua ni iVakadinadina i Jiova, “keitou sega tale ni qai dau tarogi rau neitou itubutubu se keitou na lako ina soqoni se sega. Keitou kila ni kevaka wale ga keitou tauvimate keitou sa na sega ni qai lako ina soqoni. Sega ni dau calata na soqoni na neitou vuvale.” Me vakataki Ana na parofita yalewa, na tacida yalewa oqo e “sega ni lako tani” mai na vanua e qaravi kina o Jiova.—Luke 2:36, 37.
4-6. (a) Na cava era dau calata kina na soqoni e so na dautukutuku ni Matanitu ni Kalou? (b) Na cava e bibi kina meda kua ni calata na soqoni?
4 Dua beka o iko o sega ni dau calata na soqoni vakarisito, se dua o iko na dau vakalutu soqoni? E so era nanuma nira sega ni dau vakalutu soqoni era a qai vinakata mera vakadeitaka. Vica na macawa nodra toqa toka na soqoni kece era tiko kina. Oti e dua na gauna sa ra qai railesuva, dua na ka nodra kurabui nira raica na levu ni nodra dau vakalutu soqoni.
5 ‘Sa rauta ga,’ ena kaya beka e dua. ‘Na bula dredre ena gauna oqo ena sega kina ni rawa vua e dua me lakova kece na soqoni.’ E dina, eda bula ena gauna dredre. Kena ikuri ni veika dredre eda sotava ena qai levu ga. (2 Timoci 3:13) Ia, sega li ni sa qai vakaraitaka ga na kena bibi meda kua ni calata na soqoni? Ke da sega ni kania vakawasoma na kakana vakayalo, ena sega ni rawa meda namaka meda vosota na veika dredre ena iotioti ni veisiga oqo. E dina, ke da sega ni dau veimaliwai kei ira na tacida, e rawa nida temaki meda kua sara ga ni muria “na sala dodonu”! (Vosa Vakaibalebale 4:18) Ena sega beka ni lomada meda lako ina soqoni nida lesu i vale ni oti e dua na siga ni cakacaka kaukaua. Ia, nida vosota na wawale meda lako ga ina soqoni, eda na vakila o keda na kena yaga, eda na vakayaloqaqataki ira rawa tale ga kina na noda itokani lotu Vakarisito ena Kingdom Hall.
6 E vakaraitaka na Iperiu 10:25 e dua tale na vuna vinaka meda kua kina ni dau calata na soqoni. E kea e vakauqeti ira kina nona itokani lotu Vakarisito na yapositolo o Paula mera dau soqoni vata tiko ga, ‘vakalevu nira raica ni sa toro voleka mai na siga.’ Io, meda kua ni guilecava ni sa voleka sara na “siga ni Kalou” o Jiova. (2 Pita 3: 12) Ke da nanuma ni se yawa sara na icavacava ni ivakarau ni veika ni gauna oqo, eda na vakalaiva na veika ga e baleti keda me vakaruguta na veika vakayalo, me vaka na tiko ena soqoni. Sa na qai dina kina na ka e kaya o Jisu, ena qai “yaco vakidacala kina vei kemudou na siga ko ya.”—Luke 21:34.
Dau Vakarorogo Vinaka
7. Na cava e bibi kina vei ira na gone mera dau vakarorogo ena soqoni?
7 Na noda lai tiko ena soqoni e sega ni sa o koya ga oya. Dodonu meda lai vakarorogo vakavinaka, meda katona na veika e tukuni mai. (Vosa Vakaibalebale 7:24) Era wili tale ga e ke na gone. Ni lako i vuli e dua na gone, e dodonu me lai vakarorogo vei qasenivuli, veitalia mada ga ke sega ni taleitaka, se dredre vua e dua na lesoni. E kila o qasenivuli ni na bau yaga mada ga vua e so na ka ke tovolea me vakarorogo. Sega li ni dodonu vaka kina mera dau vakarogoca na ka e cauraki mai na soqoni na gone era sa vuli, me kua ni sa vakalaivi tu ga mera moce ni se qai tekivu na soqoni? E macala ni so na ka dina e tiko ena iVolatabu e “dredre me kilai.” (2 Pita 3:16) Ia, e sega ni dodonu meda beca na levu ni ka e rawa nira katona na gone. E sega ni beci ira na Kalou. Ena gauna vakaivolatabu, ni vakaroti ira nona dau veiqaravi gone ‘mera rogoca, mera vuli, mera rerevaki Jiova, ra qai cakava na vosa kece ga ni vunau,’ e sega ni vakabekataki ni a dredre vei ira na gone mera kila e so na ivakaro. (Vakarua 31:12; vakatauvatana Vunau ni Soro 18:1-30.) Sega li ni oqo tale ga na ka e namaka o Jiova vei ira na gone ena gauna oqo?
8. Na cava era cakava e so na itubutubu mera dau vakarorogo vinaka cake kina na luvedra ena soqoni?
8 Era kila na itubutubu lotu Vakarisito ni nodra gagadre vakayalo na luvedra e vakacegui tale ga ena ka era vulica ena soqoni. O koya gona, e so na itubutubu era vakamoceri ira rawa yani na luvedra ni bera na soqoni me rawa nira bulabula, ra tu vakarau tale tu ga mera vakarorogo nira yaco yani ina Kingdom Hall. E so na itubutubu era vakalailaitaka, se ra vakuai ira sara ga na luvedra mai na sara retioyaloyalo ena bogi ni soqoni. (Efeso 5:15, 16) O ira tale ga na itubutubu vaka oqori era dau qarauna me kua ni dua na ka e vakaosota nodra vakasama na gone, era uqeti ira ga mera vakarorogo, mera vuli ena kena levu era rawata me vakatau ena nodra yabaki.—Vosa Vakaibalebale 8:32.
9. Na cava meda cakava meda dau vakarorogo vinaka cake kina?
9 A vosa tiko vei ira na uabula o Jisu ena gauna e kaya kina: “Dou qai qarauni kemudou, e na nomudou rogoca.” (Luke 8:18) Ena gauna oqo, e sega ni ka rawarawa meda dau vakarorogo. Sega ni dua e vakacala ni ka dredre na vakarorogo, ia e rawa nida vakavulici keda meda dau vakarorogo. Ni o rogoca tiko e dua na vunau vakaivolatabu se dua na itavi ena soqoni, saga me matata vei iko na tikina bibi. Vakilakila na ka ena rairai tukuna tarava o koya e vosa tiko. Vaqara e so na tikina e rawa mo vakayagataka ena nomu cakacaka vakaitalatala se mo taurivaka ena nomu bula e veisiga. Railesuva yadua ena nomu vakasama na tikina e so e tukuni mai. Vola vakaleleka ga na veitikina bibi.
10, 11. Era uqeti luvedra vakacava e so na itubutubu mera dau vakarorogo vinaka, ia na iwalewale cava o sa vakadinadinataka o iko ni mana?
10 Ena vinaka sara na noda dau vakarorogo ke da vulica yani nida se lalai. E so na itubutubu era vakauqeti ira na luvedra era se bera mada ga ni vulica na wilivola kei na volavola, mera dau “vola na veitikina bibi” ena gauna ni soqoni. Era dau vola e dua na itoqa ena tikinipepa nira rogoca e so na vosa kilai levu me vaka na “Jiova,” “Jisu,” se “Matanitu ni Kalou.” Ena sala oqo, era vulica kina na gone mera dau vakarogoca vinaka na ka e cavuti mai ena buturara.
11 O ira sara mada ga na luveda qase cake e dau vinakati vei ira ena so na gauna mera vakauqeti mera dau vakarorogo. Ni raica e dua na ulunivale ni vaka e ciriyawa tu na vakasama i luvena tagane yabaki 11 ena dua na soqo ni tikina, sa qai solia vua e dua na iVolatabu qai kerei koya me cega tiko na veitikinivolatabu e cavuta mai o koya e vunau. A volavola tiko o tamana, ia e sa qai raici luvena ni taura na iVolatabu. Tekivu mai kea nona vakamuria toka mai na soqo ni tikina, lako vata kei na nona taleitaka.
Tabalaka Mai na Domomu
12, 13. Na cava e bibi kina meda dau lagasere ena ivavakoso?
12 A lagata o Tui Tevita: “Ka’u na vakavolivolita vakakina na nomuni cabocabo-ni-soro, I Jiova: me’u vakarogoya voli e na domo ni vakavinavinaka.” (Same 26:6, 7) Na soqoni ni iVakadinadina i Jiova e gauna vinaka meda tabalaka kina na domoda ena noda tusanaka noda vakabauta. Dua na sala e rawa nida vakayacora kina oqo na noda vakaitavi ena lagasere ena ivavakoso. Oqo e dua na tiki bibi ni noda sokalou, ia e rawarawa sara nida vakawalena.
13 E so na gone era se sega ni wilivola era dau saga mera kila taucoko na qaqanisere ena vakayagataki ena soqoni e veimacawa. Dua na ka nodra dau marau nira lagasere rawa vata kei ira na qase. Ia, nira tubu cake tiko na gone, e rawa ni yaco mera sega ni taleitaka soti mera dau lagasere ena soqoni. E so tale ga na uabula era dau mamadua na lagasere ena gauna ni soqoni. Ia, na lagasere e tiki ni noda sokalou me vaka ga na cakacaka vakaitalatala, ni tiki tale ga ni noda sokalou. (Efeso 5:19) Eda dau solia noda vinaka taucoko meda vakacaucautaki Jiova ena cakacaka vakaitalatala. E rawa tale beka ga nida vakacaucautaki koya ena noda tabalaka na domoda ena sere—se da domo vinaka se da sega soti ni domo vinaka?—Iperiu 13:15.
14. Na cava e vinakati kina meda vakarautaka vakavinaka na ulutaga eda dau vulica vata vakaivavakoso?
14 Eda vakacaucautaka tale ga na Kalou ena noda ivakamacala veivakauqeti ena itavi e so ena soqoni e dau kerei kina meda vakaitavi. Oqo ena vinakati kina na vakavakarau. E taura na gauna na noda vakananuma na veika titobu ena Vosa ni Kalou. E kila vinaka oqo na yapositolo o Paula, e dua na gonevuli gugumatua ni iVolatabu. E vola: “A ka vakaidina na kena titobu ni nona vutu ni vuku kei na nona yalomatua na Kalou!” (Roma 11:33) Kemuni na ulunivale, e bibi mo ni vukei ira na lewe ni nomuni vuvale yadua mera vakelia na vuku ni Kalou e tu ena iVolatabu. Biuta vakatikitiki e dua na gauna ena nomudou vuli vakavuvale mo vakamacalataka kina na tikina dredre e so, mo vakarautaki iratou tale ga kina nomu vuvale ina soqoni.
15. Na cava e so na ka e vakaturi me rawa ni vakamacala kina e dua ena soqoni?
15 Ke o vinakata mo vakamacala vakawasoma ena soqoni, vakacava mo vakasamataka mada e liu na ka mo na tukuna? Sega ni tukuni me so sara na ka titobu. Mo wilika beka ga vakabulabula e dua na tikinivolatabu, ena daumaka tale ga ke o cavuta sara ga mai lomamu e so na vosa e digitaki vinaka. E so na dautukutuku era dau kerei koya ena taura na itavi me qai digi ira mera saumitaro ena dua na parakaravu era sa vakatakilakilataka, me rawa kina nira vakaitavi ena nodra tusanaka tale ga na nodra vakabauta.
Ena Vuku o Koya e Sega ni Vuku
16, 17. Na ivakasala cava a tukuna e dua na qase vua e dua na dauveiqaravi vakaitalatala, na cava e yaga kina na ivakasala oqo?
16 Ena soqoni ni iVakadinadina i Jiova, eda dau vakadreti meda wilika e veisiga na Vosa ni Kalou. Oqo ena vakabulabulataki keda sara ga. Ena vukei keda tale ga meda vakatulewa vinaka, meda vakavinakataka e so noda malumalumu, meda vorata na veitemaki, meda kaukaua tale vakayalo ke da butucala.—Same 19:7.
17 Era dau tu vakarau tale ga na qase matua ena ivavakoso mera vukei keda ena ivakasala vakayalo e ganiti keda. Na ka ga meda cakava meda “takiva mai” ena noda qara na nodra ivakasala vakaivolatabu. (Vosa Vakaibalebale 20:5) Dua na siga, a kerea e dua na dauveiqaravi vakaitalatala gugumatua vua e dua na qase, me tukuna vua e so na ka me cakava me yaga kina vakalevu ena ivavakoso. E kilai koya vinaka na cauravou oqo na qase, e cereka sara nona iVolatabu ena 1 Timoci 3:3 (NW), e tukuni kina ni o ira na tagane digitaki e dodonu mera “yalomatua.” E tukuna vakayalovinaka vua na cauravou oqo na sala e rawa ni vakaraitaka kina na yalomatua ena nona veimaliwai kei ira na tani. E levataka beka na cauravou oqo na ivakasala a tukuni sara ga vakadodonu vua? Sega sara! “E vakayagataka na qase na iVolatabu,” e kaya o koya, “au raica kina ni oya na ivakasala i Jiova.” E marau na dauveiqaravi vakaitalatala oqo ena nona sa muria sara ga na ivakasala, sa laurai tale ga vua na veisau.
18. (a) E rawata vakacava e dua na itabagone me vorata na veitemaki e koronivuli? (b) Na tikinivolatabu cava soti e dau vu mai nomu vakasama ni o temaki?
18 Na Vosa ni Kalou e rawa tale ga ni vukei ira na itabagone mera “dro tani mai na gagadre ca vakacauravou.” (2 Timoci 2:22) E dua na iVakadinadina i Jiova goneyalewa se qai tuvaitutu oti ga mai na koronivuli torocake e vorata rawa ga na veitemaki ena nona gauna kece ni vuli ena nona dau vakananuma na veitikinivolatabu kei na nona dau muria sara ga na ka e kaya. E dau vakananuma vakalevu na ivakasala e tukuni ena Vosa Vakaibalebale 13:20: “Ena vuku mai ko koya sa malele vata kei ira na vuku.” Oqo e vakavuna me dau qarauna me volekati ira ga era dau doka vakatitobu na ivakavuvuli vakaivolatabu. E tomana: “Au sega ni kaya tiko niu uasivi cake vei ira na tani. Keu na coko ina ilawalawa cala, au na via vakamarautaki ira ga na noqu ilala, oya ena rawa ni vakavuleqa sara ga.” E vukei koya tale ga na ivakasala i Paula e volai ena 2 Timoci 1:8. E vola o Paula: “Kakua ni maduataka na kenai tukutuku ni noda Turaga, . . . ia mo vosota na veivakararawataki e na vuku ni tukutuku-vinaka me vaka na kaukauwa ni Kalou.” Me lako vata kei na ivakasala oqo, e sega ni dau madua kina o koya me vota yani na nona vakabauta yavutaki vakaivolatabu vei ira nona lewenikalasi ena gauna veiganiti kece. Ni lesi me vosa vei ira na lewenikalasi, e dau digitaka ga na ulutaga ena rawa ni vakacuruma kina na itukutuku ni Matanitu ni Kalou.
19. Na cava a sega ni vorata rawa kina na veitemaki ni vuravura oqo e dua na cauravou, ia na cava e qai vakaukauataki koya tale vakayalo?
19 Ke mani dua na gauna eda tiva tani mai “na nodra sala na yalododonu,” na Vosa ni Kalou e rawa ni vukei keda me dodonu tale na noda ilakolako. (Vosa Vakaibalebale 4:18) E vakadinadinataka na tikina oqo e dua na cauravou mai Aferika. A sikovi koya yani e dua na iVakadinadina i Jiova, vakadonuya sara me vuli iVolatabu. E taleitaka dina na ka e vulica tiko, ia sega ni dede, sa coko ena vakailala ca e koronivuli. Ni toso na gauna, e lai tini sara me vakaitavi ena ivalavala vakasisila. “E vakaleqai au tiko ga na noqu lewaeloma, yaco meu sega tale ni qai lako ina soqoni,” e kaya o koya. Oti sa qai lakova tale na soqoni. Tukuna sara na cauravou oqo: “Au raica rawa ni ka kece oqo e yaco ga baleta niu sa waloloi tu vakayalo. Au sa sega ni qai dau vuli vakataki au. Oya na vuna au sega ni vorata rawa kina na veitemaki. Au sa qai tekivu wilika Na Vale ni Vakatawa kei na Yadra! Lakolako au sa qai kaukaua tale vakayalo, au vakasavasavataka tale ga na noqu bula. Oqo e ivakadinadina vinaka sara ga vei ira na raica na veisau au vakayacora. Au papitaiso, nikua, au sa mamarau tu.” Na cava a vakaukauataki koya na cauravou oqo me vorata kina nona malumalumu vakayago? E kaukaua tale vakayalo ena nona dau vulica wasoma vakataki koya na iVolatabu.
20. Ena rawa vakacava vua e dua na itabagone me sabaya na kabakoro i Setani?
20 Kemuni na itabagone lotu Vakarisito, oni sa sagai sara tiko ga nikua! Ke oni vinakata mo ni sabaya na kabakoro i Setani, e dodonu mo ni kania wasoma na kakana vakayalo. E kila vinaka oqo na daunisame, rairai cauravou tale ga o koya. E vakavinavinakataki Jiova ni vakarautaka mai na nona Vosa, baleta ni rawa kina vua na ‘cauravou me vakasavasavataka nona ivalavala.’—Same 119:9.
Keimami na Muria na Kalou Ena Vanua e Tuberi Keimami Kina
21, 22. Na cava meda kua kina ni nanuma ni sa rui dredre na sala ni ka dina?
21 O Jiova a tubera na matanitu o Isireli mai Ijipita ina Vanua Yalataki. Mai na rai vakatamata, ena nanumi ni digitaka o koya na sala dredre mera muria. Ni rawa nira muri ravita ga na wasawasa na Mediterranean, baleta ni sala lekaleka, sa qai kauti ira tu nona tamata o Jiova mera muria na sala dredre ni vanua dravuisiga. Ia, oqo e vakaraitaka na loloma ni Kalou. E dina ni lekaleka na sala kadua, na sala e wai ena rawa nira lai sotavi ira kina na kai Filisitia dauvala o ira na Isireli. Ena nona digitaka o Jiova e dua tale na sala, a taqomaki ira kina na nona tamata mera kua ni sota mamaca kei ira na kai Filisitia.
22 Ena gauna tale ga oqo, na sala e tuberi keda tiko kina o Jiova e rawa ni nanumi ni sala dredre. Ena veimacawa, sa tu na ituvatuva vakarisito meda muria, wili kina na soqoni vakaivavakoso, vuli vakataki keda, kei na cakacaka vakavunau. E rawa ni nanumi ni rawarawa e so tale na sala. Ia, eda na yaco bula ga ina vanua eda saga tiko meda lakova ke da vakamalumalumu ina veituberi ni Kalou. O koya gona, meda rogoca tiko mada ga na veika kece e dusimaki keda tiko kina o Jiova, da qai dei tiko ga “e na sala dodonu” me tawamudu.—Same 27:11.
E Rawa Mo Vakamacalataka?
• Na cava e rui bibi kina meda kua ni dau calata na soqoni vakarisito?
• Na cava e rawa nira cakava na itubutubu mera vukei ira kina na luvedra mera dau vakarorogo ena soqoni?
• Na cava e okati ena vakarorogo vinaka?
• Na cava e rawa ni vukei keda meda vakamacala ena soqoni?
[iYaloyalo ena tabana e 16]
Ena vukei keda meda nanuma dei tiko na siga i Jiova na noda dau tiko ena soqoni vakarisito
[iYaloyalo ena tabana e 18]
E levu na sala e rawa nida vakacaucautaki Jiova kina ena soqoni vakarisito