Saga Vagumatua na Veivakalougatataki i Jiova

‘Na Kalou ena vakaicovitaki ira era vakasaqarai koya ena yalogu.’​—IPER. 11:6.

1, 2. (a) Era saga vakacava e levu nikua me vakalougatataki ira na Kalou? (b) Na cava eda gadreva kina na veivakalougatataki i Jiova?

“ME VAKALOUGATATAKI iko mada ga na Kalou!” Qori e dau cavuti vei ira na vakarau gole e vanua tani. O ira na veiliuliu ni lotu era dau vosa vakalougatataki ira na tamata, manumanu, kei na ka e sega ni bula. O ira na dau gade ena so na vanua era na rairai temaki mera gole ena vanua ni sokalou ena nodra nanuma nira na vakalougatataki. Era dau kerea o ira na daunipolitiki na veivakalougatataki ni Kalou ena vuku ni nodra matanitu. O nanuma ni veiganiti na nodra kerea mera vakalougatataki? A mana nodra kerekere? O cei ga era vakalougatataki tiko vua na Kalou, na cava na vuna?

² A parofisaitaka o Jiova nira na vunautaka na itukutuku vinaka ni Matanitu ni Kalou ena iotioti ni veisiga o ira na tamata savasava ra qai veiyaloni. Era na cakava qo ena vuravura taucoko, ia era na cati ra qai vakacacani. (Aisea 2:​2-4; Maciu 24:14; Vkta. 7:​9, 14) O keda kece na ciqoma na itavi meda vakayacora na parofisai oya, eda vinakata​—eda gadreva tale ga na nona veivakalougatataki na Kalou. Ke sega na nona veivakalougatataki, eda na sega ni qarava rawa na noda itavi. (Same 127:1) Eda na rawata gona vakacava na nona veivakalougatataki na Kalou?

Era Vakalougatataki na Talairawarawa

3. Ke ra talairawarawa na Isireli, na cava ena yaco?

³ Wilika na Vosa Vakaibalebale 10:​6, 7. Ni bera nira curuma na vanua yalataki na Isireli, a tukuna o Jiova nira na tiko vakacegu ra qai taqomaki ke ra talairawarawa ena nona vosa. (Vkru. 28:​1, 2) E sega wale ga nira na vakalougatataki na tamata ni Kalou, ia ena “vauci” ira sara ga na nona veivakalougatataki. Koya gona, era na vakalougatataki vakaidina o ira na talairawarawa.

4. Na cava e okati ena talairawarawa e vu mai lomada?

⁴ Me vakacava na ivakarau ni nodra talairawarawa na Isireli? E tukuni ena Lawa ni Kalou ni na rarawa o Jiova ke ra sega ni qaravi koya ‘ena marau kei na yalo e reki.’ (Wilika Vakarua 28:​45-47.) E sega ni vinakata o Jiova me dua wale ga na ivakarau ni talairawarawa, me vaka era dau cakava qori na manumanu kei na timoni nira talairawarawa ga ena ka e dau vakaroti vei ira. (Mari.1:27; Jeme. 3:3) E ivakaraitaki ni loloma na noda talairawarawa vua na Kalou mai vu ni lomada. Qori na marau e vu mai ena noda vakabauta ni sega ni icolacola bibi na ivunau i Jiova, da qai vakabauta ni na “vakaicovitaki ira tale ga era vakasaqarai koya ena yalogu.”​—Iper. 11:6; 1 Joni 5:3.

5. Ena yaga vakacava nona vakabauta e dua na vosa ni yalayala i Jiova me muri kina na lawa ena Vakarua 15:​7,8?

⁵ Meda raica mada na sala e vakaraitaki kina ni vakabauta ena kena muri na lawa ena Vakarua 15:​7, 8. (Wilika.) Ke muri tu ga vakavoraki na lawa oya, era na bau vakacegui toka kina na dravudravua, ia vakacava ena vinaka kina na nodra veimaliwai na dauveiqaravi ni Kalou? O koya e bibi duadua, na ka era cakava oya ena vakaraitaka beka nira vakabauti Jiova ni dau vakarautaka na ka era gadreva na nona dauveiqaravi, ra qai vakavinavinakataki koya ni rawa mera vakatotomuria na nona daulomasoli? Sega sara ga! E kila vinaka na Kalou o koya e lomasoli mai vu ni lomana. E yalataka tale ga ni na vakalougatataka na nona cakacaka kei na cakacaka kece ga ni ligana. (Vkru. 15:10) Nida vakabauta na yalayala oya, ena uqeti keda meda sasaga rawa qo me rawa nida na vakalougatataki kina vakalevu.​—Vkai. 28:20.

6. Na cava e vakadeitaka vei keda na Iperiu 11:6?

⁶ Me ikuri ni noda vakabauta ni o Jiova e dau vakaicovitaki ira na tamata, e vakabibitaki ena Iperiu 11:6 e dua tale na itovo ena gadrevi me rawati kina na veivakalougatataki ni Kalou. Nanuma tiko o Jiova e vakaicovitaki ira ga era “vakasaqarai koya ena yalogu.” Na vosa taumada e vakayagataki eke e vakaibalebaletaka na sasaga vakaukaua. E vakadeitaka qo vei keda na sala e rawati kina na veivakalougatataki. E vakarautaka kece qo na Kalou dina duadua ga, “o koya e sega ni lasu rawa.” (Taito 1:2) A vakaraitaka ena vica vata na udolu na yabaki sa oti ni ka e yalataka e dau nuitaki vakaoti. E sega ni daro vakadua na nona vosa, ena yaco dina. (Aisea 55:11) Ke tiko vei keda na vakabauta dina, eda nuidei ni na Vakaicovitaki keda o koya.

7. Na cava meda cakava meda vakalougatataki kina mai na “kawa” i Eparama?

⁷ E vakadinadinataka o Jisu ni o koya e imatai ni wase ni “kawa” i Eparama. O ira na lotu vaKarisito lumuti era ikarua ni wase ni “kawa” oya. Era lesi mera ‘tukuna yani na lagilagi i koya e kacivi ira mai na butobuto ina nona rarama uasivi.’ (Kala. 3:​7-9, 14, 16, 26-29; 1 Pita 2:9) Ke da sega ni vakamalumalumu vei ira e lesia o Jisu me qarava na ka e taukena, ena sega tale ga nida rawa ni veiwekani vinaka kei Jiova. Eda na sega ni kila vinaka kece na ka eda wilika mai na iVolatabu ke sega ni veivuke kina na “dauveiqaravi e yalodina e vuku,” eda na sega tale ga ni kila na sala me muri kina na ka e wiliki qori. (Maciu 24:​45-47) Nida muria na ka eda vulica tiko mai na iVolatabu, ena vakalougatataki keda kina na Kalou.

Nanuma Dei na Loma ni Kalou

8, 9. Me salavata kei na nona kerekere, na sasaga cava a cakava na peteriaki o Jekope?

⁸ Me baleta na kena gadrevi na sasaga vagumatua me rawati kina na veivakalougatataki ni Kalou, eda lai nanuma kina na peteriaki o Jekope. A sega ni kila na sala ena vakayacori kina na yalayala i Jiova vei Eparama, ia a vakabauta ni o Jiova ena vakalevutaka na kawa i tukana me dua na matanitu levu. Ena 1781 B.S.K., a gole e Karana o Jekope me qara kina e dua na watina. A sega ni qara wale ga e dua me itokani vinaka, a qara sara ga e dua na yalewa matua vakayalo e qaravi Jiova, me rawa ni susugi ratou vinaka na luvena.

⁹ Eda kila ni rau qai sota o Jekope kei na wekana o Rejeli. E lomani Rejeli sara vakalevu o Jekope qai vakadonuya me cakacaka vei Tamana o Lepani me vitu na yabaki me rawa kina ni watina. Qo e sega ni dua ga na italanoa ni veidomoni. A kila vinaka o Jekope na yalayala a cakava na Kalou Kaukaua vua na tukana o Eparama, ni a tukuni tale ga na yalayala qo vei Aisake na tamana. (Vkte. 18:18; 22:​17, 18; 26:​3-5, 24, 25) A tukuna tale ga o Aisake vei Jekope na luvena: “Me vakalougatataki iko na Kalou Kaukauwa, ka qisi iko mo vakaivakawa, ka vakalewevuqataki iko, mo tubu me tamata lewe vuqa sara; ka vakayacora vei iko na veivakalougatataki i Eparaama, io, vei iko, kei ira talega na nomu kawa; mo taukena na vanua ko sa tiko vulagi kina, ka solia vei Eparaama na Kalou.” (Vkte. 28:​3, 4) Koya gona, na sasaga e cakava o Jekope me qara e dua na watina vinaka me dua kina na nona vuvale, e vakaraitaka ni vakabauta dina na vosa i Jiova.

10. Na cava e taleitaka kina o Jiova me vakalougatataki Jekope?

¹⁰ A sega ni qara iyau o Jekope me qarava kina na nona vuvale. A nanuma dei tiko ga na yalayala i Jiova me baleti ira na nona kawa. A nanuma matua tiko ga na kena vakayacori na inaki i Jiova. A vakadeitaka o Jekope me saga ena nona vinaka taucoko me rawata na veivakalougatataki ni Kalou, dina ni sotava kina e levu na ka dredre. A tiko ga vua na rai qori me yacova ni sa qase, qai vakalougatataki koya kina o Jiova.​—Wilika Vakatekivu 32:​24-29.

11. Me salavata kei na kena vakatakilai na loma ni Kalou, na sasaga cava e dodonu meda cakava?

¹¹ Me vakataki Jekope, eda sega ni kila sara vakamatailalai na sala ena vakayacori kina na inaki i Jiova. Ia nida vulica na Vosa ni Kalou, eda kila kina vakacaca na ka me namaki ena “siga i Jiova.” (2 Pita 3:​10, 17) Me kena ivakaraitaki, eda sega ni kila na tikinisiga, ia eda kila ga ni sa voleka. Eda vakabauta na ka e kaya na Vosa ni Kalou me baleta na noda vunau sara vakavinaka ena gauna lekaleka sa vo qo, nida na vakabulai kina kei ira tale ga na vakarogoci keda.​—1 Tim. 4:16.

12. Na cava eda rawa ni vakadeitaka?

¹² Eda kila ni na tawanamaki na icavacava, ena sega tale ga ni waraka tiko o Jiova mera rogoca na itukutuku vinaka na tamata kece e vuravura. (Maciu 10:23) Eda dau dusimaki vakavinaka tale ga ena sala me vuavuaivinaka kina na noda vunau. Ni tu vei keda na vakabauta, eda na cakava na cakacaka qo ena kena vinaka duadua, ena noda vakayagataka vakavinaka na ka e vakarautaki ena vukuda. Era na taleitaka e levu na tiko ena yalava na itukutuku eda vunautaka tiko? Eda na sega ni kila rawa qori. (Wilika Dauvunau 11:​5, 6.) E noda itavi ga meda vunau, nida vakabauta ni o Jiova ena vakalougatataki keda. (1 Kor. 3:​6, 7) Eda rawa ni vakadeitaka ni kila vinaka tu o koya na noda sasaga vagumatua, ena vakarautaka na veidusimaki eda gadreva ni vakayagataka na yalona tabu.​—Same 32:8.

Kerea na Yalo Tabu

13, 14. E veidusimaki vakacava na yalo tabu ni Kalou vei ira na nona dauveiqaravi?

¹³ Vakacava ke da nanuma nida sega ni qarava rawa e dua na itavi, se meda vunau? Meda kerei Jiova me solia na yalona tabu me vakavinakataka kina na noda vakayagataka na noda taledi ena noda veiqaravi vua. (Wilika Luke 11:13.) Na yalo tabu ni Kalou e rawa ni uqeta e dua me rawata na itavi dokai, se mani vakacava na ituvaki ni nona bula se ka e sotava ena dua na gauna sa oti. Kena ivakaraitaki, nira goletani mai Ijipita na Isireli, era sega ni kila na veika vakaivalu o ira na ivakatawa ni sipi kei na bobula, ia na yalo tabu i Jiova e vakaukauataki ira mera vakamalumalumutaka na nodra meca. (Lako 17:​8-13) Ni oti oya, na yalo tabu vata ga oya a uqeti Pisalieli kei Aoliapi me rau muria na peleni ni vale e uqeti vakalou me baleta na valenisoro.​—Lako 31:​2-6; 35:​30-35.

¹⁴ Na yalo qori a dusimaki ira na dauveiqaravi ni Kalou ena noda gauna mera qarava kina na veika e baleta na isoqosoqo i Jiova, qori na gauna a gadrevi kina me dua na vanua ni tabaivola. Ena dua na ivola, a vola kina o R. J. Martin, na tacida a ovasia ni valenitabaivola ena gauna oya, a vakamacalataka kina na ka sa rawati ena 1927. “Ena kena gauna donu, a dolava na katuba na Turaga; sa qai dua na neimami misini levu ni tabaivola, keitou sega ni kila mada ga na ka ena cakava rawa kei na kena cicivaki. Ia e kila na Turaga na sala mera vukei kina o ira era nakita mera solia na nodra vinaka kece vua. . . . Ni oti e vica na macawa, sa rawa ni keitou kila na kena cakacaka na misini ni tabaivola; e se cakacaka tiko ga, e cakava sara tiko ga na cakacaka era sega mada ga ni bau kila o ira na bulia na misini qo.” E se vakalougatataka tiko ga o Jiova na sasaga vagumatua qo me yacova mai nikua.

15. E veiuqeti vakacava na Roma 8:11 vei ira era vakatovolei?

¹⁵ E levu sara na sala e veidusimaki kina na yalo tabu i Jiova. E tu vakarawarawa na yalo tabu vei ira kece na dauveiqaravi ni Kalou, qai veidusimaki mera vosota kina na ituvaki dredre. Vakacava ke vakamalumalumutaki keda na veivakatovolei? E rawa ni vakaukauataki keda na vosa i Paula ena Roma 7:​21, 25 kei na 8:11. Io, na “yalo i koya e vakaturi Jisu mai na mate” e rawa ni dusimaki keda tale ga, me vakaukauataki keda meda qaqa nida vorata na gagadre vakayago. A volai na yatuvosa qori me baleti ira na lotu vaKarisito lumuti, ia na kena ivakavuvuli e yaga tale ga vei ira kece na dauveiqaravi ni Kalou. Eda na rawata kece na bula ke da vakabauti Karisito, ena noda vakamatea na gagadre vakayago, kei na noda muria na veidusimaki ni yalo tabu.

16. Na cava meda cakava meda rawata kina na yalo tabu ni Kalou?

¹⁶ Meda namaka beka me solia vakarawarawa tu ga na Kalou na yalo tabu, da qai sega ni cakava kina e dua na ka? Sega. Eda na sega wale ga ni kerea ena masu, e dodonu meda vulica vagumatua na Vosa uqeti vakalou. (Vkai. 2:​1-6) Kena ikuri, na yalo tabu ni Kalou e cakacaka ena ivavakoso vaKarisito. Noda tiko wasoma ena soqoni e vakaraitaka nida gadreva meda “rogoca sara na ka e tukuna na yalo tabu ina ivavakoso.” (Vkta. 3:6) E bibi gona meda ciqoma ena yalomalumalumu na ka eda vulica. E vakasalataki keda na Vosa Vakaibalebale 1:23: “Dou saumaki mai e na noqu vunau: raica, ka’u na sovaraka na Yaloqu vei kemudou.” Koya gona, na Kalou e solia na yalona tabu vei ira era “talairawarawa vua.”​—Caka. 5:32.

17. Eda na vakatauvatana vakacava na veivakalougatataki i Jiova kei na noda sasaga?

¹⁷ E vinakati na sasaga vagumatua me rawati kina na veivakalougatataki ni Kalou, ia me nanumi tiko ni sega ni rawati ga na veivakalougatataki i Jiova mai na nodra gugumatua na nona dauveiqaravi. Nona vakalougatataka na noda sasaga e rawa ni vakatauvatani ena kena yaga ina yagoda na kakana bulabula. E bulia na yagoda na Kalou meda marautaka kina na kakana qai yaga tale ga na ka eda kania. E vakarautaka tale ga na kakana. Eda sega ni kila vinaka na vanua e kauta mai kina na kakana na ka e vakabulabulataki ira se nutrient, e levu tale ga era sega ni vakamacalataka rawa se rawata vakacava na yagoda na kaukaua mai na kakana eda kania. Eda kila ga ni yaga na kakana, oya na vuna eda kana kina. Ke da digitaka meda kania na kakana bulabula, ena yaga sara vakalevu vei keda. O Jiova tale ga e vakarautaka na ka e vinakati me rawati kina na bula tawamudu, qai vakarautaka na veivuke meda rawata kina na ka e vinakati qori. Macala gona eke ni o Jiova ga e vukei keda sara vakalevu, e veiganiti kina me vakacaucautaki. E dodonu meda tokoni koya ena noda cakava na ka e salasalavata kei na lomana, ni qo eda na vakalougatataki kina.​—Akeai 2:​18, 19.

18. Na cava o vakadeitaka mo cakava, na cava na vuna?

¹⁸ Koya gona, mo solia na nomu vinaka kece ena nomu cakava na itavi kece o lesi kina. Mo rai tiko ga vei Jiova mo qarava rawa kina qori. (Mari. 11:​23, 24) Ni o cakava qori, nanuma tiko ni “o koya e vaqaqara ena kunea.” (Maciu 7:8) Era na vakalougatataki na lotu vaKarisito lumuti ena “isala ni bula” e lomalagi. (Jeme. 1:12) O ira na ‘so tale na sipi’ i Karisito era sasagataka tiko mera vakalougatataki ena vuku ni kawa i Eparama, era na marautaka mera rogoci Jisu nona tukuna: “Ni lako mai, sa vakalougatataki kemuni o Tamaqu moni taukena na matanitu e sa vakarautaki me nomuni mai na ivakatekivu kei vuravura.” (Joni 10:16; Maciu 25:34) Io, “era na taukena na vanua ko ira sa vakalougatataki mai vua [na Kalou] . . . ka tiko kina ka sega ni mudu.”​—Same 37:​22, 29.

O Rawa ni Vakamacalataka?

• Na cava e okati ena talairawarawa e vua mai lomada?

• Na cava ena vinakati me vakalougatataki keda kina na Kalou?

• Eda na rawata vakacava na yalo tabu ni Kalou, na cava ena cakava ena vukuda?

[iYaloyalo ena tabana e 9]

A veimulomulo o Jekope kei na dua na agilosi me rawa ga kina ni vakalougatataki.

E va tale ga qori nomu dau sasaga vagumatua?

[iYaloyalo ena tabana e 10]

Na yalo tabu ni Kalou e dusimaki Pisalieli kei Aoliapi me rau qarava vinaka kina na nodrau itavi