Qarauna na iNaki ni Lomada

E vakasalataki keda na iVolatabu: “E vu mai na loma ni tamata na vakanananu ca, na laba, na veibutakoci, na veidauci, na butako, na lasu, na vosavakacaca.” (Maciu 15:19) Na lomada e rawa ni vakaisini keda qai vakavuna na noda soli ulubale meda cakava kina na ka e veisaqasaqa kei na loma ni Kalou. Eda qai dau liaca qori nida sa cakava e dua na ka lialia. Na cava ena vukei keda meda kila na inaki ni lomada meda kua ni cakava kina na ka ca?

KILA NA INAKI NI LOMAMU

Wilika e veisiga na iVolatabu qai vakasamataka vakatitobu.

A vola na yapositolo o Paula: “E bula na vosa ni Kalou qai kaukaua, e gata cake mai na iseleiwau batirua, e suaka me wasea na yagoda kei na lomada.” Na itukutuku ni Kalou ena iVolatabu e rawa ni “vakavotuya na nanuma kei na inaki ni lomada.” (Iper. 4:12) Na noda dikevi keda ena ka e tukuna na iVolatabu e dua na ivukevuke yaga meda kila kina na inaki ni lomada. E bibi dina meda wilika e veisiga na Vosa ni Kalou qai vakasamataka vakatitobu na ka e tukuna, eda na kila kina na nanuma kei na rai i Jiova!

Na noda ciqoma na ivakasala vakaivolatabu kei na noda muria na ivakavuvuli vakaivolatabu ena yaga ena noda lewaeloma e dau ‘ivakadinadina.’ (Roma 9:1) Na veidusimaki ni noda lewaeloma e rawa ni tarova na noda vakaiulubaletaka na ka ca. E volai tale tu ga ena iVolatabu na ivakaraitaki e rawa ni “ivakasala vei keda.” (1 Kor. 10:11) Na ka eda vulica mai keri e rawa ni tarovi keda mai na noda cakava na ka ca. Na cava e dodonu meda cakava?

Kerea na Kalou me vukei iko mo kila na inaki ni lomamu.

O Jiova e “dauvakatovolea na yalo.” (1 Vei. 29:17) E “uasivia na lomada na Kalou, e kila tale ga na ka kece.” (1 Joni 3:20) Na Kalou e sega ni rawa ni vakaisini. Ke da talaucaka vakadodonu vua ena masu na ka eda leqataka, na lomada, kei na noda gagadre, ena rawa ni vukei keda o Jiova meda kila na inaki ni lomada. Eda rawa mada ga ni kerea na Kalou me ‘bulia vei keda na yalo e savasava.’ (Same 51:10) Me kua gona ni raici vakamamada na masu ke da via kila na inaki ni lomada.

Dau vakarorogo vinaka ena soqoni.

Na noda dau vakarorogo ena soqoni vaKarisito e rawa ni vukei keda meda dikeva vinaka na lomada. Eda na rairai sega ni rogoca ena soqoni kece na itukutuku vou, ia na noda tiko kina ena veivuke ena noda kila vinaka na ivakavuvuli vakaivolatabu kei na veivakadreti ena yaga ena noda vakalewa na inaki ni lomada. E yaga tale ga ena noda vakasavasavataka na lomada na nodra ivakamacala na tacida. (Vkai. 27:17) E rawa ni veivakaleqai na noda dau tawasei keda kei na noda sega ni soqoni wasoma kei ira na tacida vaKarisito. Ena rawa ni vakavuna na noda ‘cakava ga na ka eda vinakata.’ (Vkai. 18:1) E ka vakayalomatua gona meda taroga, ‘E dau noqu ivakarau meu tiko ena soqoni kece, meu vuli tale ga kina?’​—Iper. 10:​24, 25.

ENA DUSIMAKI KEDA ENA CAVA NA LOMADA?

E levu na ituvaki ena noda bula e rawa ni vakamuai keda cala kina na lomada dauveivakaisini. Meda raica mada qo e va: na qarai ni iyau vakayago, na vakayagataki ni alakaolo, na noda digitaka na noda ilala, kei na ka eda cakava ena noda gauna galala.

Qarai ni iyau vakayago.

E sega ni cala na noda vinakata me vakacegui na noda gagadre vakayago. Ia a veivakasalataki o Jisu me baleta na leqa ni kena kauaitaki vakasivia na iyau vakayago. A veiuqeti o Jisu ena dua na nona vosa vakatautauvata meda vakasamataka na turaga vutuniyau e sinai rawa tu na nona lololo. Sa sega gona ni dua na vanua me maroroi kina na ka e tamusuka ena dua tale na gauna e vakalewe vinaka kina na nona were. A vinakata na turaga qori me basuka na nona lololo qai tara eso e levu cake. Qo na ka e nanuma: “Me maroroi kina na noqu witi kei na noqu iyau kece; au na qai kaya: ‘Sa levu na noqu iyau me rauta na veiyabaki se bera mai; meu se tei vakacegu mada, meu kana, meu gunu, meu marau.’ ” Ia e guilecava tiko na turaga vutuniyau qori na ka dina e rawa ni yaco: A rawa sara ga ni mate ena bogi ga ya.​—Luke 12:​16-20.

Ni toso tiko na yabaki ni noda bula, eda na rairai kauaitaka vakalevu na kena vakarautaki na veika vakayago me baleta na gauna eda sa na qase kina, sa rawa nida soli ulubale meda cakacaka ovataim ena bogi ni soqoni se tekivu vakawalena eso na noda itavi vaKarisito. Sega beka ni dodonu meda qarauna na ivakarau ni rai va qori? Ena dua tale na ituvaki, de dua eda se itabagone da qai kila ni sega ni dua na ka e uasivia ena cakacaka vakatabakidua. Ia vakacava eda lokuyarataka tiko na noda painia, nida nanuma me vinaka mada e liu na noda bula vakailavo? Sega beka ni dodonu meda cakava na ka kece eda rawata ena gauna qo meda vutuniyau kina ena mata ni Kalou? O cei e kila eda na bula tiko nimataka se sega?

Vakayagataki ni alakaolo.

E kaya na Vosa Vakaibalebale 23:20: “Mo kakua ni tiko kei ira era daugunu waini.” Na kaukaua ni nona vinakata na alakaolo e dua, e rawa ni soli ulubale kina me gunu wasoma. Ena rairai tukuna ni gunu me vakacegu kina, sega ni mateni. Ke gadrevi na alakaolo meda vakacegu kina, e rairai kena gauna sara ga qo meda dikeva vinaka kina na inaki ni lomada.

Noda digitaka na noda ilala.

Na noda veimaliwai kei ira era sega ni vakabauta ena sega ni levei rawa ena so na ituvaki, me vaka e koronivuli, vanua ni cakacaka, kei na cakacaka vakaitalatala. Ia e dua tale na ka na noda lakovi ira meda lai veimaliwai, meda lai veitokani voleka sara kei ira. Eda dau vakaiulubaletaka na vakailala va qori ena noda tukuna ni levu na nodra itovo vinaka? E veivakasalataki na iVolatabu: “Ni kua ni vakaisini kemuni. Na ilala ca e vakacacana na itovo vinaka.” (1 Kor. 15:33) Me vaka ga na kena rawa ni vakadukadukalitaka na wai savasava e dua wale ga na duka lailai, na noda veitokani kei ira era sega ni qarava na Kalou e rawa ni vakadukadukalitaka na noda bula vakayalo, eda na rawa ni vakatotomuria tale ga kina na rai ni vuravura, isulusulu, ivosavosa, kei na itovo.

Ka eda cakava ena noda gauna galala.

Era sa tu vakarawarawa ena iyaya vovou nikua na veimataqali ka ni veivakamarautaki, e levu e sega ni veiganiti se tawakilikili vua na lotu vaKarisito. A vola o Paula: ‘Me kua mada ga ni cavuti ena kemuni maliwa na ka tawasavasava.’ (Efeso 5:3) Vakacava ke dau malele na lomada ina saravi se rogoci ni ka e tawasavasava? Eda na rairai tukuna nida dau vinakata kece eso na gauna na ka ni veivakamarautaki se cakava eso na ka ena noda gauna galala, e vakatau tale ga vua e dua na ka e digia se cakava. Ia meda muria vinaka sara na ivakasala i Paula da qai kua ni vakalaiva me raica na matada se rogoca na daligada na ka tawasavasava.

RAWA NIDA VEISAU

Ke da sa rawai ena veivakamuai ni lomada dauveivakaisini, sa noda ivakarau tale ga meda vakaiulubaletaka na ivalavala ca, se rawa ga nida veisau. (Efeso 4:​22-24) Raica mada qo e rua na kena ivakaraitaki ena gauna qo.

A vinakati vei Maikelia me veisautaka na nona rai me baleta na iyau vakayago. E kaya: “Keitou cavutu vakavuvale mai na dua na vanua e raici sara kina vakabibi na iyaya vovou qai vinaka duadua, vaka kina na tiko vinaka vakayago. Ena dua na gauna, au solibula ena noqu sasagataka na levu ga ni iyau au rawata, au qai nanuma niu na sega ni domodomoiyau niu cakava ya. Au qai liaca ni qarai ni iyau vakayago e vaka na gaunisala e sega na kena itinitini. Au masulaka vei Jiova na noqu ivakarau ni rai kei na inaki ni lomaqu, au vakaraitaka tale ga vua ni keitou via qaravi koya vinaka sara vakavuvale. Keitou qai vakatulewataka me keitou bula rawarawa ga, keitou toki tale ga ina dua na vanua e gadrevi vakalevu kina na veivuke. Sega ni dede keitou sa rawa ni painia. Keitou sa qai raica ni sega ni gadrevi e levu na iyau vakayago me qai vakilai na vakacegu kei na marau.”

E laurai ena ivakaraitaki i Lee ni nona dikeva tale nona ivakarau ni bula e vukei koya me vakanadakui ira na ilala ca. E tukuna o Lee: “Au veimaliwai wasoma kei ira na dauvolivolitaki mai vanuatani ena vuku ni noqu cakacaka. Au kila ni dau caka na gunu sivia ena gauna keimami bose kina, ia dua na gauna marautaki vei au ya. Au voleka sara ga ni mateni ena levu na gauna, ia au dau veivutuni tale e muri. A vinakati meu dikeva vinaka sara na lomaqu. Au qai liaca mai na ivakasala ena vosa ni Kalou kei na nodratou vakatutu na qase niu a qara tiko ga na ilala era sega ni lomani Jiova. Ena gauna qo, sa levu ga na gauna au veitaratara ena talevoni me baleta na noqu bisinisi, au vakalailaitaka tale ga na noqu veimaliwai kei ira na dauvolivolitaki au cakacaka vata.”

E bibi meda dikevi keda vinaka sara da qai saga meda kila na inaki ni lomada. Nida cakava qori, e dodonu meda kerea na veivuke i Jiova ena masu da qai nanuma tiko ni ‘kila na ka vuni ni lomada.’ (Same 44:21) E vakarautaka tale ga na Kalou na nona Vosa, e rawa ni vaka na noda iloilo. (Jeme. 1:​22-25) E yaga tale ga na veivakadreti kei na ivakasala e dau tasereki ena noda ivola kei na gauna ni soqoni! Na isolisoli va qori e rawa ni vukei keda meda taqomaka na lomada qai muria tiko ga na sala ni yalododonu.