Qarauna na Vakayagataki Vakatani ni iVolatabu
“E BULA na vosa ni Kalou qai kaukaua.” (Iper. 4:12) E vakabibitaka na yapositolo o Paula ena veivosa qori na kaukaua ni vosa ni Kalou me uqeta na lomadra na tamata qai veisautaka na nodra bula.
Ia ena gauna era sa takali kina na yapositolo qai vakayacori na parofisai me baleta na vukitani, sa raici vakatani na mana ni itukutuku ni iVolatabu. (2 Pita 2:1-3) Ni toso na gauna era sa tukuna na iliuliu ni lotu ni tiko ena Vosa ni Kalou na kaukaua vuni. A vola o Parofesa Harry Y. Gamble ni “mana na vakayagataki ni iVolatabu vaKarisito.” E tukuna ni a vakatututaka o Church Father Origen ena ikatolu ni senitiuri ni “rawa ni yaga na kena rogoci e daliga na vosa tabu: ke mana na vosa e dau cavuti ena cakaiba ni lotu butobuto, sa na qai wacava na kena mana na vosa ni kalou ena iVolatabu.” E vola o John Chrysostom ena icavacava ni ikava ni senitiuri “ni na sega sara ga ni via torova na tevoro e dua na vale e tu kina na Kosipeli.” E tukuna tale ga ni so era dau taubena tu eso na tikinivolatabu mai na Kosipeli me vaka tu e dua na taube mana. E kuria tale o Parofesa Gamble ni o Augustine na daunicioloji ni lotu Katolika “e raica ni vinaka vua e dua e mosi na uluna me biuta e dua na ilavelave ni Kosipeli i Joni ena ruku ni ilokoloko ena gauna e moce kina”! Koya gona, sa dau vakayagataki na iVolatabu ena kena nanumi ni tiko kina na kaukaua vuni. Vakacava o raica na iVolatabu me iyaya mana o rawa ni kalougata kina qai taqomaki iko mai na ka ca?
E kena irairai ni dau vakayagataki cala na iVolatabu ena dua na iwalewale e vakatokai me bibliomancy. Qori na kena cegai ga e dua na tabana e rawa qai wiliki na imatai ni tikina e raici, ni vakabauti ena veidusimaki ena ka e vinakati me caka. Kena ivakaraitaki, e tukuna o Parofesa Gamble ni a rogoca ena dua na gauna o Augustine ni tukuna tiko e dua na gone ena dua na vale voleka: “Taura qai wilika, taura qai wilika,” e raica qori o Augustine me ivakaro vakalou me cega na iVolatabu qai wilika na imatai ga ni tikina e raica.
O bau kila eso era masu vua na Kalou nira sotava na leqa ra qai cega na iVolatabu ena nodra vakabauta ni imatai ga ni tikina era raica ena vukei ira mera vosota na veika dredre? De dua e vinaka na inaki ni nodra cakava qori, ia e sega ni dodonu mera cakava qori na lotu vaKarisito nira qara na veidusimaki ena iVolatabu.
E vakadeitaka o Jisu vei ratou na nona tisaipeli ni na tala mai “na dauveivuke, na yalo tabu.” E tomana: “Ena qai vakavulica vei kemudou na ka kece, ena vakalesuya tale ga ina nomudou vakasama na ka kece au tukuna vei kemudou.” (Joni 14:26) Ia e sega ni vinakati ena bibliomancy na veika eda kila mai na iVolatabu.
E takalevu na kena muri na bibliomancy kei na so tale na sala e vakayagataki kina vakatani na iVolatabu. Ia na Vosa ni Kalou e vakacala na kena qarai ni ivakatakilakila vuni. (Vunau 19:26; Vkru. 18:9-12; Caka. 19:19) “E bula na vosa ni Kalou qai kaukaua,” ia e dodonu meda kenadau ena kena vakayagataki. Na vakayagataki ni kilaka dodonu mai na iVolatabu ena vakavinakataka na ivakarau ni noda bula, sega ni noda vakayagataka na ivola qori ni nanumi ni tiko kina na kaukaua vuni. Nodra rawata e levu na kilaka qori e sa vukei ira me vinaka na nodra itovo, mera biuta laivi na nodra ivakarau ca, me dei nodra bula vakavuvale, ra qai bucina e dua na veiwekani voleka kei koya e vakavuna na volai ni iVolatabu.
[iYaloyalo ena tabana e 3]