Na Sala me Vakaibalebale Cake Kina na Nomu Bula

E KAYA e dua na vosa vakaibalebale makawa: “Mo kakua ni vakaceguocataki iko mo vutuniyau: mo kua ni vakararavi ki na nomu vuku. A cava beka ko sa wanonova kina na ka sa sega? Ni sa cakava vakaidina na tabana nai yau; ka vuka tani me vaka na ikeli vaka ki lomalagi.” (Vosa Vakaibalebale 23:​4, 5) E kena ibalebale ni sega ni ka vukutaki meda vakaocai keda wale meda vutuniyau, ni rawa ni vakayali na noda iyau me vaka ni vukataka yani na taba ni ikeli.

Me vaka e vakaraitaka na iVolatabu, e rawa ni seavu yani vakasauri na iyau vakayago. E rawa ni yali vakasauri ena vuku ni dua na leqa tubukoso, kasura ni bula vakailavo, se so tale na leqa tawanamaki. O ira sara mada ga na rawati ira vinaka era dau raica ni ilavo e sega ni vakavulomavakacegu. Vakasamataki Jone mada, e okati ena nona cakacaka na vakamarautaki ira na daunipolitiki, dauqito rogo, kei ira na kawa vakatui.

E kaya o Jone: “Au solia na noqu vinaka taucoko ina noqu cakacaka. Au tu vinaka vakailavo, au dau tiko ena veiotela sau levu, au vodo waqavuka vakaitaukei niu lai cakacaka ena so na gauna. Au marautaka niu se qai tekivu, ia lakolako sa madra mai. E vaka nira raica tu ga vakamamada na ka na tamata au dau maliwai ira. E sega sara ga ni vakaibalebale na noqu bula.”

Me vaka e qai raica rawa o Jone, ni sega ni kune na lomavakacegu ena bula e sega kina na veika vakayalo. Ena nona iVunau rogolevu ena Ulunivanua, e vakaraitaka kina o Jisu Karisito na sala me rawati kina na marau dina. E kaya: “Era marau o ira era kauaitaka na nodra gagadre vakayalo, ni sa nodra na matanitu vakalomalagi.” (Maciu 5:​3, NW) E macala e ke ni ka vakayalomatua me vakaliuci na veika vakayalo ena noda bula. Ia e tu tale na veika e so ena vakuria me vakaibalebale cake kina na bula.

E Bibi na Nomu Vuvale, Kei Ira Nomu iTokani

O na marautaka li na bula ke o sega ni veitaratara kei iratou na nomu vuvale, qai sega na nomu itokani voleka? Ena sega. A buli keda na noda Dauveibuli meda dau loloma, meda lomani tale ga. Oqo e dua na vuna a vakabibitaka kina o Jisu ‘mo lomana na kai nomu me vaka o lomani iko.’ (Maciu 22:39) E dua na isolisoli vakalou na vuvale, e vanua veiganiti meda vakaraitaka kina noda veilomani dina.​—Efeso 3:​14, 15.

Ena veivuke vakacava na noda vuvale me vakaibalebale cake kina na noda bula? Ena rawa ni vakatauvatani na vuvale e duavata kei na dua na loganisenikau rairai totoka e solia na vakacegu dina ena bula osooso ni veisiga. E vaka kina na vuvale, ni rawa ni kunei kina na veimaliwai veivakacegui e qai kauta tani na galili. Ia ena sega ni sa na rawarawa tu ga vaka oya na vakacegu e kune ena dua na vuvale. Nida vaqaqacotaka na isema ni vuvale, eda na veivolekati kina, sa qai marautaki cake kina na bula. Me kena ivakaraitaki, na gauna eda solia vua na watida, kei na noda kauaitaki koya, e vaka na maroroi iyau ena veisiga, e muri eda na qai tauca na vuana.​—Efeso 5:​33.

Ke da vakaluveni, e dodonu meda saga e dua na ivakarau ni veisusugi vinaka. Ena taura toka e dua na iwase ni noda gauna nida veimaliwai kei ira, me dolavi tiko na wa ni noda veivosaki, kei na noda tuberi ira ena veivakavuvuli vakayalo. Ena rawa ni vu ni lomavakacegu dina vei keda na sasaga oqori. Na itubutubu era rawata oqori era wiliki ira na luvedra mera vu ni veivakalougatataki, nira isolisoli ni Kalou, e dodonu mera vakamareqeti.​—Same 127:3.

Era vu ni lomavakacegu tale ga o ira na noda itokani vinaka, nira vakuria me vakaibalebale na noda bula. (Vosa Vakaibalebale 27:9) Ena rawa ni levu na noda itokani vinaka mai na noda dau veikauaitaki dina. (1 Pita 3:8) Era na tuberi keda na noda itokani dina ena gauna eda tarabe kina. (Dauvunau 4:​9, 10) Ni “wekana na tamata . . . sa vaka na tacina e na gauna ni rarawa.”​—Vosa Vakaibalebale 17:17.

E vakalomavakacegutaki keda na veitokani dina! Sa qai totoka ga na dromu ni siga, maleka na ikanakana ni kakana, qai kamica na ivakatagi nida wasea vata kei na dua na noda itokani vinaka. Ia na vuvale veivolekati, kei na veitokani dau veikauaitaki, e rua wale ga na sala ena vakaibalebale kina na bula. Na isolisoli cava tale sa vakarautaka tu na Kalou ena vakaibalebale cake kina na noda bula?

Na Vakacegui ni Noda Bula Vakayalo

Me vaka sa cavuti oti mai, ni semai rau vata o Jisu Karisito na marau kei na kauaitaki ni veika vakayalo. Eda buli vata kei na gagadre ni veika vakayalo kei na muri ni itovo vinaka. Oqo na vuna e tukuni kina ena iVolatabu “na tamata vakayalo” kei “na ka vakayalo ni tamata e loma.”​—1 Korinica 2:​15, NW; 1 Pita 3:​3, 4, NW.

E kaya na Expository Dictionary of New Testament Words, e vola o W. E. Vine, ni uto ivakatakarakara e vakaibalebaletaka “na vakasama kece kei na lewaeloma ni dua na tamata, wili kina na yalona.” Sa qai kuria o Vine ena nona tasereka: “E kena ibalebale oqo ni vakayagataki vakaivakatakarakara na uto me baleta na veika era vuni tu ena loma ni dua na tamata, ra qai lewa na nona bula.” E kaya tale ga na ivola oqo “ni kena tiko sara e loma na uto, e vauci kina ‘na veika vuni ni tamata,’ . . . na veika dina me baleti koya.”

Eda na rawa ni vakaceguya vakacava na gagadre ‘ni tamata vakayalo,’ se “na veika vuni ni tamata” o koya “na ka vakayalo ni tamata e loma”? Eda na rawata oqo kevaka eda taura e dua na ikalawa bibi, oya meda duavata kei na ka e tukuna na daunisame me rawa ni vakacegui kina na noda gagadre vakayalo: “Dou kilai Jiova ni sa Kalou ko koya; sai koya ga sa buli keda, ka segai koi keda: eda sa nona tamata, kei na sipi ni nona vanua.” (Same 100:3) Ke da vakabauta oqo, sa na rawa nida raica ni dodonu ga meda saumitaro vua na Kalou. Ke da via wili meda “nona tamata, kei na sipi ni nona vanua,” e dodonu meda muria na nona Vosa, na iVolatabu.

Ena vakaleqai keda beka? E sega, e sa na qai vakaibalebale ga na noda bula ke da kila ni Kalou e kauaitaka na noda itovo. Ena uqeti keda meda tamata vinaka cake​—e dua na isausau totoka dina. “Sa kalougata [se, “ena marau,” NW] na tamata sa rerevaki Jiova, o koya sa rekitaka vakalevu na nona vunau,” e kaya na Same 112:1. Nida rerevaka dina na Kalou eda qai talairawarawa ina nona ivunau ena rawa ni qai vakaibalebale cake kina na noda bula.

Na cava eda lomavakacegu kina nida talairawarawa vua na Kalou? Baleta ni tiko na noda lewaeloma, e dua na isolisoli ni Kalou vua na kawatamata. Na lewaeloma e dau vakadikeva na itovo, me vakadonuya se sega na ka eda sa cakava, se eda na via cakava. Eda sa sotava kece na lomaleqa e vu mai na kena beitaki keda tiko na noda lewaeloma. (Roma 2:​15) Ia e rawa ni vakavinakataki keda tale ga na noda lewaeloma. Eda lomavakacegu, da marau tale ga nida soli keda vua na Kalou, da qai caka vinaka vei ira na wekada. Eda kunea kina “ni veivakalougatataki vakalevu me[da] soli ka, ka vakalailai ga me[da] taura na ka.” (Cakacaka 20:35) E tiko na vuna vinaka e dina kina oqo.

E buli keda na noda Dauveibuli me tarai keda na nodra gagadre kei na veika e baleti ira na tani. E vakamarautaka na lomada nida vukei ira na tani. Me kena ikuri, ni vakadeitaka vei keda na iVolatabu ni kevaka eda vukea e dua e leqa tu, e wilika na Kalou ni vaka e caka tiko vua.​—Vosa Vakaibalebale 19:17.

Me ikuri ni noda na lomavakacegu kina, ena yaga beka vei keda na noda kauaitaka na noda bula vakayalo? E dua na daunibisinisi ena Tokalau e Loma, na yacana o Revoni, e vakabauta ni rawa. “Na noqu isausau ga meu vutuniyau,” e kaya. “Ia mai na gauna au sa vakadeitaka kina ni dua tiko na Kalou kei na kena sa tuvanaki tu ena iVolatabu na lomana, sa veisau sara ga kina na lomaqu. Sa mai ikarua kina ni ka na noqu saga na ka meu bula kina. Ena noqu saga meu vakamarautaka na Kalou, au sa galala kina mai na mosi ni yalo e vu mai na veicati. Dina ni a mate o tamaqu ena dua na veivala, sa sega ni noqu inaki meu sauma lesu vei koya e cakava.”

Me vaka e sa mai raica rawa o Revoni, ena kena qarauni vinaka na veika e baleta “na tamata vakayalo,” ena rawa ni vakamamadataka na mavoa ni lomada. Ia, ena sega nida lomavakacegu sara kevaka eda sega ni valuta rawa na veika dredre eda sotava e veisiga.

E Rawa Nida Taukena “na Vakacegu ni Kalou”

Ena vuravura ni lomaocaoca oqo, e vica wale ga na siga eda donuya me sega ni sotavi kina na leqa. E sotavi na vakacalaka, baya na veika e lalawataki, era vakararawataki keda tale ga na tamata. Era na kauta tani na noda marau na veileqa vaka oqo. Ia, vei ira era qaravi Jiova na Kalou, e yalataka na iVolatabu na vakacegu dina ni lomadra​—“na vakacegu ni Kalou.” Eda na rawata vakacava na vakacegu oqo?

E vola na yapositolo o Paula: “Dou kakua sara ni lomaocaoca; ia e na ka kecega me vakatakilai vua na Kalou na nomudou kerekere e na masu kei na dau cikecike kei na vakavinavinaka. Ia na vakacegu ni Kalou, sa uasivia na ka kecega e kilai rawa, ena vakataudeitaka na yalomudou kei na lomamudou e na vuku i Karisito Jisu.” (Filipai 4:​6, 7) Meda kakua ni via colata ga vakataki keda na noda icolacola, ni vinaka meda dau masu vagumatua, meda vakataqara vua na Kalou na noda leqa ni veisiga. (Same 55:22) Ni sauma na noda vakamamasu ena vuku i Luvena, o Jisu Karisito, ena tubu na noda vakabauta, eda na toso tale ga vakayalo nida raica na veivuke ni Kalou.​—Joni 14:​6, 14; 2 Cesalonaika 1:3.

Nida sa vakanuinui dei vua na Kalou o Jiova, na ‘Daurogo masu,’ ena vakarawarawataka noda vosota na veika dredre, me vaka na tauvimate vakabalavu, na malumalumu nida sa qase, se na lolosi. (Same 65:2) Ia, me vakaibalebale dina sara na noda bula, meda nanuma tale tiko ga na veigauna mai muri.

Rekitaki na iNuinui

Sa yalataka tu na iVolatabu “na lomalagi vou kei na vuravura vou,” e dua na matanitu vakalomalagi ni yalododonu dau veikauaitaki ena liutaka e dua na matatamata talairawarawa. (2 Pita 3:​13) Ena vuravura vou yalataki vakalou oqori, ena sosomitaka na ivalu kei na veivakalolomataki na bula sautu kei na vakatulewa dodonu. Oqo e sega ni ka me divi tu ga, ni toso na siga e toso vata na kaukaua ni vakanuinui oqo. Sa dua dina na itukutuku vinaka e dodonu sara ga meda marautaka.​—Roma 12:12; Taito 1:2.

E sa nuidei nikua o Jone, o koya e sa cavuti oti, ni sa qai vakaibalebale cake na nona bula. “Dina niu sega sara ni a daulotu, ia au dau vakabauta tu ga na Kalou,” e kaya. “Ia au a sega ni cakava kina e dua na ka me yacova ni rau sikovi au mai e rua na iVakadinadina i Jiova. Au sa qai veitarataravitaka vei rau na taro, me vaka, ‘Na cava na ibalebale ni noda tu oqo e vuravura? Eda lako tiko i vei?’ Na nodrau isaunitaro veivakacegui vakaivolatabu e vakavuna me sa qai vakaibalebale kina ena imatai ni gauna na noqu bula. Oqori na kena itekitekivu ga. E sa qai vakavurea vei au na noqu taleitaka na ka dina, e vakavuna tale ga meu veisautaka na veika meu vakabibitaka. Dina ga niu sa sega tale ni vutuniyau vakavuravura, au sa vaka ga e dua na milionea ena veika vakayalo.”

Me vakataki Jone, de dua e sega tu ni yavalati na nomu gadreva dina na veika vakayalo ena veiyabaki sa sivi. Ia, ena nomu bucina na “lomavuku,” ena rawa ni qai vakabulabulataki cake kina. (Same 90:​12, NW) Ke o saga vagumatua, o na rawa ni taukena na marau dina, na vakacegu, kei na inuinui. (Roma 15:13) Io, sa na qai rawa ni vakaibalebale cake kina na nomu bula.

[iYaloyalo ena tabana e 6]

E rawa ni solia “na vakacegu ni Kalou” na masu

[iYaloyalo ena tabana e 7]

O kila se cava ena kauta mai na lomavakacegu ina bula vakavuvale?