Kila na Ka e Dodonu Mo Kaya

O SA bau raica na waicevata era dau ciri tu ena wasawasa batabata? Rawa ni o sega ni kila na kedra levu dina baleta ni vo ni yagodra e dromu tu e lomaniwai. So na taro era vaka sara ga oya ni rawa nida sega ni kila na vuna se inaki era tarogi kina.

Ke kaukaua sara mada ga nona via kila na isaunitaro o koya e taro, e bibi ga mo na vakasamataka se mo na sauma vakacava. Oqo ena okati kina na levu ni ka mo na tukuna, kei na yasana ga mo na vakamacala mai kina. (Joni 16:12) So na gauna, me vaka e vakaraitaka o Jisu vei iratou nona yapositolo, e rawa ni dua e taroga na ka e sega ni dodonu me kila, se sega na betena vua.—Caka. 1:6, 7.

E vakasalataki keda na iVolatabu: “Me ia tikoga na nomudou vosa e na yalovinaka, ka vakatuituinataki e na masima, mo dou kila kina se cava sa dodonu mo dou kaya tale vei ira na tamata yadua.” (Kolo. 4:6) Ni bera gona nida sauma e dua na taro, e bibi meda vakasamataka na ka eda na tukuna, vaka kina na kena itukutukuni.

Saga Mo Kila na iNaki i Koya e Taro

Era saga na ilawalawa i Setoki mera coriti Jisu ena dua na taro me baleta na nona vakaturi e dua na yalewa e sa vica vata na watina. Ia, e kila o Jisu nira sega ni vakabauta dina na veivakaturi. Ena nona sauma gona nodra vosa, e tara tale ga na nona ivakamacala na nodra rai cala, ni oqo e yavutaki sara tiko ga mai kina nodra taro. Ena nona vakamacala maqosa kei na nona vakayagataka e dua na itukutuku vakaivolatabu e matata vinaka vei ira, e dusia kina vei ira o Jisu e dua na tikina era se sega ni bau vakasamataka—na ivakadinadina matata ni na vakaturi ira dina na mate na Kalou. Era drukataka na kena meca nona sauma nodra taro, era sega tale kina ni doudou mera tarogi koya tale.—Luke 20:27-40.

Dodonu mo kila na nodra nanuma o ira era tarogi iko, mo kila tale ga na ka e vakavuna nodra taro, me matata kina vei iko na ka mo tukuna. Kena ivakaraitaki, kaya mada ke tarogi iko e dua drau vuli vata se drau cakacaka vata, se cava o sega ni dau marautaka vata kina kei ira na Kirisimasi. Na cava e vu ni nona taro? E via kila dina na vuna, se nanuma o koya ni vakatabuya noda lotu na soqo ni marau kece ga? Mo kila oqo, de vinaka mo tarogi koya se cava e vu ni nona taro. Ni o sa kila, sa na qai rawa ni o sauma vinaka nona taro. O rawa ni vakayagataka tale ga na gauna oqori mo vakaraitaka kina ni muri ni idusidusi mai na iVolatabu e taqomaki keda mai na so na olodei sa vakavuna tu nodra rarawa kei na oca e levu nikua.

Ia, vakacava ke o sureti mo vakamacalataki keda na iVakadinadina i Jiova vei ira e so na gonevuli. Ni o vakamacala oti, de dua era na taroga e so na taro. Ke ra taro ga mai vakadodonu qai taro dina ni via kila, ena daumaka me saumi ga vakadodonu, vakarawarawa tale ga. Ia, ke yavutaki na taro ena nodra rai cala, ena vinaka mo vakamacalataka vakalekaleka mada e liu na vuna e vaka kina oya na nodra rai e levu, kei na vuna era digitaka kina na iVakadinadina i Jiova mera muria ga na ka e kaya na iVolatabu, ni bera ni o sauma na taro. Kua ni raica mera taro ni veiba na taro vaka oya—veitalia ke rogorogo veiba na kena itautau—mo marau ga nira vakaraitaka mai na ka era kauaitaka vakalevu. O koya gona, na nomu sauma nodra taro e gauna vinaka vei iko mo vakarabailevutaka kina nodra rai, mo vakasavuya kina vei ira na itukutuku dodonu, mo vakamacalataka tale ga kina na yavu vakaivolatabu ni noda vakabauta.

Vakacava ke sega ni vakatara o nomu boso nomu kerea mo tiko ena soqo ni tikina? Vakasamataka mada na vuna e rairai vaka kina oya na nona lewa. De dua ena kena iwali ga mo vakaraitaka vua ni o bole mo cakacaka bogi me kena isosomi! De dua ena veisau na lomana ke o vakamacalataka vua ni veika eda vakavulici kina ena soqo ni tikina ena vukei keda meda tamata cakacaka yalodina, qai nuitaki! Ke raica o koya ni o kauaitaka na ka e leqataka, de dua ena kauaitaki iko tale ga ni sa na raica rawa na ka e bibi ena nomu bula. Ia, vakacava ke vinakata mo lawaki? Sega ni vakatitiqataki ni na yaga ke o tukuna vakamatata vua ni o na sega ni rawa ni vakayacora, qai kuria ena nomu vakaraitaka na vuna vakaivolatabu. Ia, ena rairai yaga sara ke o vakamacalataka e liu vua ni tamata e bolea me lasu se butako ena vukuna, ena rawa ni lasutaki koya se butakoci koya tale!

Ke o gonevuli, o na sega beka ni via vakaitavi ena veika e caka e koronivuli e veisaqasaqa kei na iVolatabu. Kua ni guilecava ni rawa ni duatani na rai nei qasenivuli, e nona itavi tale ga me raica mera vakarorogo na lewenikalasi. Oqo gona e so na ka e bibi: (1) mo nanuma na ka e kauaitaka o qasenivuli, (2) mo veidokai ni o vakamacalataka na ka e baleti iko, (3) mo qai dei ena ka o kila ni na vakamarautaki Jiova. Me mana nomu ivakamacala, ena sega beka ni veirauti ke o vakamacalataka ga vakadodonu nomu vakabauta. (Vkai. 15:28) Ke o se gone, e sega ni vakabekataki ni na vukei iko o Ta se o Na ena ka mo tukuna.

Dua beka na gauna o na kacivi mo vakamacala ena vuku ni nona beitaki iko e dua e veiliutaki. Ena vakarota beka e dua na ovisa, vakailesilesi ni matanitu, se dua na turaganilewa, mo mai saumitaro me baleta na muri ni dua na lawa, nomu itutu me baleta na tawaveitovaki ni lotu Vakarisito, se nomu rai me baleta na ivalavala se soqo e vakacerecerei kina na vanua se matanitu. O na sauma vakacava? E veivakasalataki na iVolatabu meda sauma “e na yalomalumalumu kei na rere.” (1 Pita 3:15) Tarogi iko tale ga se cava era kauaitaki kina na veika oqo, qai vakaraitaka vei ira na vakailesilesi ni o doka na nodra rai kei na vuna era kauai kina. Cava mo qai cakava ni oti oya? A vakamacalataka na yapositolo o Paula na yavu e taqomaki koya kina na lawa ni matanitu o Roma, de o na via dusia tale ga o iko na yavu vakalawa e taqomaki iko. (Caka. 22:25-29) De dua ena vakarabailevutaka na nona rai na vakailesilesi vakamatanitu ke kila na ka era a cakava na lotu Vakarisito taumada ena ituvaki vaka oqo, kei na ka tale ga era cakava ena ituvaki vaka oqo na iVakadinadina i Jiova ena veiyasa i vuravura. Se o rawa ni dusia ni nona talairawarawa e dua ina lawa ni Kalou e vakavuna me na saga me talairawarawa tale ga kina ina lawa dodonu e bulia na tamata. (Roma 13:1-14) Ena ituvaki vaka oqo, ena rawa ni rogoci nomu ile ke o vakamacalataka na tikina mai na iVolatabu e yavutaki kina nomu vakatulewa.

Nona Raica na iVolatabu o Koya e Taro

De dua ena vinakati mo kila se raica vakacava na iVolatabu o koya e tarogi iko, mo kila kina se mo sauma vakacava nona taro. A cakava oqo o Jisu ni sauma tiko na nodra taro na Setoki me baleta na veivakaturi. E kila rawa o Jisu nira vakabauta duadua ga na ivola i Mosese, mani vakayagataka o koya na ivola ga i Mosese me sauma kina nodra taro. E kaya ena itekitekivu ni nona vosa: “Ia na nodra vakaturi cake tale na mate, e a sa vakatakila sara tale ga ko Mosese.” (Luke 20:37, VV) Ena veilauti tale beka ga nomu isaunitaro ke o vakayagataka e so na tikinivolatabu e kila o koya e rogoci iko tiko, e vakabauta tale ga.

Ia, vakaevei ke sega ni vakabauta na iVolatabu o koya e vakarogoci iko? Raica na ka a cakava na yapositolo o Paula ena nona vunau ena vanua cecere nei Arisi, e volatukutukutaki ena Cakacaka 17:22-31. E dina ni sega ni wilika sara ga vakadodonu vei ira na iVolatabu, ia e wiligusutaka ga vei ira. Rawa ni o cakava tale ga oqo ke o nanuma ni veiganiti. E so ena vica vata toka na nomu veivosaki kei ira sa na qai rawa ni o gole vakadodonu ina iVolatabu. Ena imatai ni gauna o vakayagataka kina na iVolatabu, de o na via vakaraitaka na yalomatua ena nomu vakamacalataka mada ga na vuna ena yaga kina me dikevi, me kua ni nomu ile sara ni oya na Vosa ni Kalou. Ia, me nomu inaki mo vakamatatataka vua na ka e vauca na inaki ni Kalou, me yaco tale ga na gauna me sa raica kina vakataki koya na ka e kaya na iVolatabu. Se mani vakacava na momona ni noda vosa, ena sega ga ni sivia na iVolatabu ena kena cakayaco.—Iper. 4:12.

“Vosa e na Yalovinaka”

E Kalou yalovinaka o Jiova, e veiganiti kina mera vakaroti tale ga na nona tamata me ia tiko ga na nodra “vosa e na yalovinaka, ka vakatuituinataki e na masima”! (Kolo. 4:6; Lako 34:6) Kena ibalebale oqo nida na saga tiko ga meda vosa ena yalovinaka, veitalia ke ra veivakacudrui o ira eda veivosaki. E dodonu me dau tau malumu noda vosa, me kua ni kaukaua se sabalia.

Dua na ka na dredre ni bula era sotava tu e levu, ra dau kana vosa tale ga e veisiga. Nida sikovi ira yani na tamata vaka oqo, e rawa nira vosa kaukaua mai. Cava meda cakava? E kaya na iVolatabu: “A vosa vakayalovinaka sai vakamalumu ni cudru.” Na vosa malumu vaka oya e rawa ni veisautaka na nona rai e dua na dauveitusaqati. (Vkai. 15:1; 25:15) Vei ira era sotava na bula rarawa e veisiga, na noda ivalavala kei na noda ivosavosa malua e rawa ni tarai ira mera rogoca kina na itukutuku vinaka eda kauta yani.

E sega ni lomada meda veiba kei ira era sega ni doka na ka dina. E noda inaki ga meda vakamacalataka na iVolatabu vei ira era solia nodra gauna mera rogoci keda. Veitalia se ituvaki vakacava eda sotava, meda nanuma tiko ni dodonu meda tukuna ena yalovinaka kei na yalodina ni rawa ni nuitaki na vosa ni yalayala talei ni Kalou.—1 Ces. 1:5.

Noda Dui Vakatulewa kei na Ka e Vauca na Lewaeloma

Ke dua na vuli iVolatabu se tacida e taroga se cava me cakava ena dua na ituvaki, mo sauma vakacava? O na kila beka o iko na ka o na cakava. Ia, na tamata yadua e dodonu me vakatulewataka ga vakataki koya na nona bula. (Kala. 6:5) E vakamacalataka na yapositolo o Paula ni dau vakauqeti ira e vunau vei ira mera “vakabauta ka talairawarawa.” (Roma 16:26) Oqo e ivakaraitaki vinaka dina meda muria. Na vulivolatabu e tauca nona lewa me vakamarautaki wale ga kina o nona qasenivuli se dua tale na tamata, e qaravi tamata, e sega ni bula tiko ena vakabauta. (Kala. 1:10) O koya gona, ena sega ni vinaka vei koya e taro mo tukuna vua na ka me cakava.

Ia, mo sauma vakacava na nona taro me salavata kei na ivakavuvuli vakaivolatabu? De dua o na via vakamacalataka e so na ivakavuvuli vakaivolatabu kei na so na ivakaraitaki mai na iVolatabu. E so ena vinaka mo vakaraitaka vei ira na iwalewale ni vakekeli me rawa nira lai vaqara ga vakataki ira na ivakavuvuli vakaivolatabu oqori. E rawa sara ni drau veivosakitaka na ivakavuvuli vakaivolatabu oqori kei na yaga ni so na ivakaraitaki, ia mo kua ga ni tukuna vua na kedra ivakavakayagataki ena ituvaki e sotava tiko. Tarogi koya drau veivosaki tiko ke sa raica e dua na tikina ena vukei koya me vakatulewa kina vakavinaka. Vakauqeti koya me vakasamataka vakavinaka na ivakavuvuli kei na ivakaraitaki vakaivolatabu sa dikeva oti me raica rawa se cava me na cakava me vakamarautaki Jiova kina. Ena nomu cakava oqo, o sa vukei koya tiko me ‘vakavulica na lomana me rawa ni vakaduiduitaka na vinaka mai na ca.’—Iper. 5:14, VV.

Vakamacala ena Soqoni

Na soqoni ena noda ivavakoso vakarisito e gauna vinaka meda tusanaka kina e matanalevu noda vakabauta. Dua na sala eda vakayacora kina oqo na noda vakamacala ni tarogi e so na taro. Me vakacava na noda ivakamacala? Me noda inaki meda vakalagilagi Jiova, meda vakacaucautaki koya ena ka eda tukuna. Oqori sara ga na ka e cakava na daunisame o Tevita ni maliwai ira tiko “nai soqosoqo” ni Isireli. (Same 26:12) Me vakayaloqaqataki ira na tacida na noda ivakamacala, me yavalati ira mera “dauloloma kai valavala vinaka,” me vaka e veivakauqeti kina na yapositolo o Paula. (Iper. 10:23-25) Eda na cakava rawa oqo ke da vulica e liu na itavi ena soqoni.

Me rawarawa noda vosa, matata, qai lekaleka, ke da digitaki meda vakamacala. Kua ni vakamacalataka na parakaravu taucoko; tukuna ga e dua na vakasama. Sauma ga vakatikina na taro, ni o cakava oqo o sa solia kina na galala vei ira tale e so mera vakamacala. E dau yaga dina meda vakayagataka na tikinivolatabu e vakarautaki ena ivola ni vuli. Ia, ni o cakava oqo, vakabibitaka ga na tikina mai na tikinivolatabu e vauca na ka e veivosakitaki. Vulica mo vakamacala ena nomu vosa ga, kua ni wiliwili mai na parakaravu. Kua ni yalolailai ke o sega ni tukuna na ka o a nanuma mo tukuna. Oqori e dau yacovi keda kece.

E macala ni noda kila na ka e dodonu meda kaya e sega ni yala wale ga ena noda kila na isaunitaro dodonu. E bibi na yalomatua. Ia, eda na lomavakacegu ni vu mai lomada na noda ivakamacala, qai tara tale ga na lomadra na rogoci keda!—Vkai. 15:23.