Marau Nida Waraki Jiova
O SA bau kania na vuata e se bera ni dreu? Sega ni vakabekataki ni o cata na kena ikanakana. E dau taura na gauna me qai dreu na vuata, ia ena yaga dina ke o waraka me yaco oqori. So tale ga na ituvaki e yaga dina kina na wawa. “Sa kilikili kaya na tamata me nuitaka, ka me waraka vakayalomalua talega na veivakabulai maivei Jiova,” e kaya na iVolatabu. (Lele i Jeremaia 3:26; Taito 2:13) Sala cava soti era na waraki Jiova kina na lotu Vakarisito? Ena yaga vakacava noda waraki koya tiko?
Na Cava e Okati ena Noda Waraka na Kalou?
Nida lotu Vakarisito eda na “dauwaraka ka daugadreva sara na kena yaco mai na siga ni Kalou.” Eda rai vakanamata ina bula vakacegu ena gauna ena ‘vakarusai ira kina na tamata tawalotu’ o Jiova. (2 Pita 3:7, 12) E vinakata sara ga o Jiova me tinia na ca, ia e yalovosovoso voli me rawa nira vakabulai na lotu Vakarisito ena sala ena vakalagilagi kina na yacana. E kaya na iVolatabu: “Sa vinakata na Kalou, me vakaraitaka na nona cudru, me vakatakila talega na nona kaukauwa, a sa vosota vakadede sara kina na veibilo ena cudruvi sa vakarau tu me rusa: me vakatakila talega na kena levu ni nona vinaka ki na veibilo sa lomani.” (Roma 9:22, 23) Me vaka ga a cakava ena siga i Noa, e kila o Jiova na gauna dodonu me vakabulai ira nona tamata edaidai. (1 Pita 3:20) O koya gona, noda waraka na Kalou e vauci kina noda waraka na gauna ena yavala kina.
Nida waraka tiko na siga i Jiova, de dua eda na rarawataka ena so na gauna na torosobu ni ivakarau ni vuravura. Ena gauna vaka oqori, e vinaka meda vakasamataka na veivosa a vola o Maika na parofita ni Kalou: “Sa yali sara mai na vanua na tamata yalololoma: ia na tamata yalododonu sa sega ga vei ira na tamata.” A tomana: “Ia koi au, ka’u na rai ga vei Jiova; ka’u na waraki koya na Kalou, na noqui vakabula.” (Maika 7:2, 7) Nida “waraki koya” tiko, na yalo cava meda bucina? Na wawa e dua na ka e dau vakatuburarawa, ia e rawa vakacava meda marau nida waraka tiko na Kalou?
Marau Nida Wawa Tiko
Eda vulica vei Jiova na rai donu. E dau kilai ni “Kalou mamarau.” (1 Timoci 1:11, NW) E marau o koya ni wawa tiko baleta ni cakacaka tiko ga ena kena vakayacori na nona inaki, oya me toroya cake na ivakarau ni nodra bula na tamata era lomana na Kalou ena ivakatagedegede e uasivi, me vaka ga a nakita taumada ena gauna a buli ira kina. (Roma 5:12; 6:23) E raica na Kalou ni sa vakavatukana na nona cakacaka, oya na nodra tabili mai ina sokalou dina e vica na milioni na tamata. A kaya o Jisu: “Sa cakacaka tikoga ko Tamaqu, koi au talega, au sa cakacaka.” (Joni 5:17) Dua na ka bibi e dau vakavumarau oya noda cakava na ka ena vukudra tale na so. (Cakacaka 20:35) Ena vakasama oqori, era sega gona ni wawa wale tu ga na lotu Vakarisito dina. Era cakacaka tiko ga ena nodra vukei ira tale e so mera kila na inaki ni Kalou me baleta na kawatamata.
Era dau lomavakacegu na tamata yalodina mera vakacaucautaka na Kalou nira waraka tiko na gauna me yavala kina. Kena ivakaraitaki na daunisame o Tevita. A vakararawataki Tevita na nona tui, a lawakitaki koya na nona itokani voleka, qai bukiveretaki koya na luvena tagane. Ena ituvaki yadudua oqori, ena marau tiko beka ga o Tevita me waraka na veivakabulai ena gauna lokuci i Jiova? E kaya na Same 71, kena irairai ni a vola o Tevita: “Koi au, ka’u na vakanuinui tikoga, ka vakavinavinaka vakalevu cake tiko vei kemuni. A gusuqu, ena tukuna tikoga na nomuni cakacaka dodonu, kei na bula sa maivei kemuni e na siga ka bogi.” (Same 71:14, 15) A sega ni wawa tu ena voraki o Tevita, ia a vakaraitaka ga nona marau ni vakaogai koya ena vakacaucautaki Jiova, kei na nona vakauqeti ira tale e so mera dei ena sokalou dina.—Same 71:23.
Noda waraki Jiova e sega ni vakatuburarawa me vaka na noda waraka na basi e bera mai. Ia e vaka na nodrau waraka ena marau na itubutubu na tubu cake ni luvedrau me dua na tamata matua erau na sakitaka. Ena veiyabaki e tubu cake tiko kina o luvedrau erau na oga voli ena veidusimaki, veivakavulici, kei na nodrau veivakadodonutaki me rawati kina na nodrau inaki. E vaka kina na noda waraki Jiova, eda na marau nida vukei ira tale e so mera toro voleka vua na Kalou. Eda na vinakata tale ga na veivakadonui ni Kalou, qai kena itinitini meda rawata sara na bula.
Meda Kua ni Datuvu
Noda waraki Jiova e dusia na noda na tomana tiko ga noda veiqaravi kei na noda lomani koya da qai sega ni na datuvu. Oqo e dua na ka dredre. Ni levu vei ira na tamata ni Kalou nikua era bula tu ena itikotiko era dau vakalialiai kina baleta nira yavutaka na nodra bula ena nodra vakabauta na vosa ni yalayala ni Kalou. Ia, dikeva mada na nodra ivakaraitaki na Isireli yalodina era sega ni datuvu ena gauna era tu kina mai Papiloni me 70 na yabaki. Na cava a vukei ira me qaqaco tiko ga kina na nodra inuinui? Sega ni vakabekataki ni vakaukauataki ira na nodra wilika na same. A veivakauqeti e dua na same a rairai volai ena gauna oya, e kaya: “Ka’u sa nuitaka me na yaco na nona vosa. Sa yadrava vakalevu na Turaga na yaloqu ka vakalailai na nodra yadrava na mataka nai vakatawa: io, na nodra yadrava na mataka nai vakatawa. Me ra nuitaki Jiova ko ira na Isireli.”—Same 130:5-7.
E makare vinaka tu vei ira na Jiu na nodra inuinui baleta nira wilika ra qai tukuna yani, ra mani vakalougatataki ni bale o Papiloni ena gauna a valuti kina. Totolo ga nodra lako i Jerusalemi e vica na udolu na Jiu yalodina. Me baleta na gauna oya, a volai: “Ni sa vakalesuya tale ko Jiova na bobula ni Saioni, . . . sa qai ka levu na dredre e na gusuda.” (Same 126:1, 2) Era a sega ni datuvu na Jiu oya, ia era a vaqaqacotaka tiko ga na nodra vakabauta. Ra sega tale ga ni cegu na vakalagilagi Jiova ena sere.
Me salavata oqori, era saga na lotu Vakarisito dina mera vaqaqacotaka tiko ga nodra vakabauta nira waraka tiko na Kalou ena “iotioti ni veisiga ni ituvaki kei vuravura.” Ra vulica na Vosa ni Kalou, era vakauqeti ira na tacidra vakayalo, ra qai vakacaucautaki Jiova nira vunautaka na itukutuku vinaka ni nona Matanitu.—Maciu 24:3, NW, 14.
Waraka na Yaga ni Nona Veivakavulici na Kalou
A vola o Jeremaia na parofita ni Kalou: “Sa kilikili kaya na tamata me nuitaka, ka me waraka vakayalomalua talega na veivakabulai maivei Jiova.” (Lele i Jeremaia 3:26) A vakaibalebaletaka o Jeremaia ni na vinaka vei ira na tamata ni Kalou mera kua ni vosa kudrukudrutaka na sala e vakavulici ira kina o Jiova ena nona vakalaiva me vakarusai o Jerusalemi. Ia, e dodonu mera vuli ena ka era sotava, oya mera vakasamataka vakabibi na nodra talaidredre kei na kena gadrevi mera veisautaka na nodra rai.—Lele i Jeremaia 3:40, 42.
Na yaga ni nona veivakavulici o Jiova e rawa ni vakatauvatani kei na sala e matua kina na vuata. E kaya na iVolatabu me baleta na veivakavulici ni Kalou: “Emuri sa qai vuataka na vua ni yalododonu era sa vakacegui kina ko ira sa caka vei ira.” (Iperiu 12:11) Me vaka ni taura na gauna me qai matua na vuata, ena taura tale ga na gauna meda veisautaka kina na noda rai me salavata kei na nona veivakavulici na Kalou. Taura mada, kevaka eda caka cala da qai vakacegui mai ena so na itavi ena ivavakoso, na noda tu vakarau meda waraka na Kalou ena vukei keda meda kua ni yalolailai se soro koso. Ena ituvaki oqori, e veivakayaloqaqataki na vosa uqeti vakalou i Tevita: “Na nona cudru [na Kalou] sa ka lekaleka sara; e na nona loloma sa tu kina na bula: sa ia na tagi e na bogi ia sa yaco e na mataka na marau.” (Same 30:5) Kevaka eda wawa da qai bulataka na ivakasala e solia na Vosa ni Kalou kei na nona isoqosoqo, ena yaco dina mai na gauna meda “marau” kina.
Taura na Gauna Meda Matua Vakayalo
Ke o dua na itabagone se o sa qai papitaiso ga, ena rairai gu na yalomu mo colaitavi ena ivavakoso vakarisito. Ia, ena taura toka na gauna mo matua vakayalo mo rawa kina ni colaitavi. Koya gona, biuta sara ga e dua na itekitekivu vinaka mo rawa ni matua kina vakayalo. Me kena ivakaraitaki, na gauna vakaitabagone e gauna vinaka mo wilika taucoko kina na iVolatabu, mo bucina na itovo vakarisito, qai vulica na iwalewale ni veivakatisaipelitaki. (Dauvunau 12:1) Ke o wawa ena yalomalumalumu, ena yaco dina mai na gauna ena lesia kina o Jiova vei iko e so tale na itavi.
Na cakacaka ni veivakatisaipelitaki e gadrevi tale ga kina na yalovosovoso. Me vaka ni gadrevi vua na dauteitei me vakasuasuataka tiko ga na sorenikau me yacova nona vakatubura na Kalou, e vaka kina na cakacaka ni veivakatisaipelitaki. (1 Korinica 3:7; Jemesa 5:7) E rawa ni taura e vica vata na vula se yabaki na kena bucini na vakabauta ena lomadra na vuli iVolatabu kei na nodra vakavinavinaka vei Jiova, e gadrevi kina na yalovosovoso. Noda waraki Jiova e okati kina na sasaga, kevaka mada ga e se sega ni laurai vei ira na vuli iVolatabu na veisau. Ia ke laurai mada ga vakalailai vei ira na yalo ni vakavinavinaka, oqo e rairai dusia ni cakacaka tiko vei ira na yalo tabu i Jiova. Ke o yalovosovoso, o na marautaka ni raica ni o Jiova ena vukea na nomu gonevuli me dua na tisaipeli i Karisito.—Maciu 28:20.
Noda Wawa e iVakaraitaki ni Loloma
Na noda wawa e vakaraitaka na noda loloma kei na nuidei. Dikeva mada na ivakaraitaki ni dua na iVakadinadina sa kena marama sara e vakaitikotiko ena vanua dravuisiga ena Andes, mai Sauca Amerika. O koya ga kei na dua tale na marama erau iVakadinadina i Jiova ena koro oya. Vakasamataka mada na nodrau dau nanamaki mera veisiko yani na tacidrau lotu Vakarisito. Dua na gauna, a gole yani e dua na ivakatawa dauveilakoyaki ena imatai ni gauna me sikovi rau, ia a mani lakosese. A lesuva tale na sala a muria, mani bera yani ena vica na aua. Sa oti makawa na tinikarua ena bogi e sa qai raica rawa na koro. Me vaka ni sega ni vakalivaliva na yasayasa oya, a kurabui ni raica e dua na cina e waqa tu. Ni sa voleka yani, e dua na ka na nona marau ni raica ni oya na rarama ni cinadabe a taura toka na tacida sa kena marama oya! A kila deivaki na tacida oya ni na lako mai na ivakatawa, a mani wawa.
Me vaka tale ga oya na noda yalovosovoso ena noda waraki Jiova ena marau. Eda kila deivaki ni na vakayacora na nona vosa ni yalayala. Me vakataki koya na ivakatawa dauveilakoyaki oya, eda marautaka na nodra loloma e so nira waraki keda. E sega gona ni kurabuitaki, ni Kalou e rekitaki ira na waraki koya. Ni kaya na iVolatabu: “Sa rekitaki ira ko Jiova . . . ko ira era sa nuitaka [“waraka,” NW] na nona loloma.”—Same 147:11.
[iYaloyalo ena tabana e 18]
O ira era oga ena vakacaucautaka na Kalou era marau nira waraki Jiova