Na Vuravura Vou e Yalataka na Kalou

E SOLIA vei keda na inuinui na iVolatabu, na Vosa volai ni Kalou, ni kaya: “Ia koi keda, me vaka na nona vosa ni yalayala, eda sa waraka na lomalagi vou kei na vuravura vou, sa tiko kina nai valavala dodonu.”​—2 Pita 3:13.

Na cava na “lomalagi vou”? Na iVolatabu e dau vakatauvatana na lomalagi kei na veiliutaki. (Cakacaka 7:49) Na “lomalagi vou” e vakaibalebaletaki ena dua na matanitu vou ena liutaki vuravura mai. E vou baleta ni na sosomitaka na ituvaki ni veiliutaki e vuravura ena gauna oqo; e vou tale ga baleta ni a sega ni tiki ni inaki taumada ni Kalou. Oqo na Matanitu a tukuna o Jisu meda masuta. (Maciu 6:10, VV) Ni vakavuna na kena tauyavutaki na Kalou, qai vakaitikotiko o koya mai lomalagi, e vakatokai kina na matanitu oqo me “matanitu vakalomalagi.”​—Maciu 7:21.

Na cava na “vuravura vou”? Oqo e sega ni duatani tale na vuravura, baleta ni vakamatatataka na iVolatabu ni vuravura oqo ena tawani tu ga. Na “vuravura vou” e dua na ilawalawa tamata vou. E vou baleta nira sa na muduki tani na tamata ca. (Vosa Vakaibalebale 2:21, 22) O ira kece era bula ena gauna oya era na rokova ra qai talairawarawa vua na Dauveibuli, ena salavata tale ga na nodra bula kei na ka e vinakata. (Same 22:27) Era sa sureti tiko na lewe ni veimatanitu mera vulica na veika e vinakata na Kalou, mera bulataka sara ena gauna sara ga oqo. O sa cakava tiko oya?

Era na vakarorogo ina veiliutaki ni Kalou na tamata kece era na bula ena vuravura vou. E uqeti iko beka na nomu lomana na Kalou mo talairawarawa vua? (1 Joni 5:3) E vakilai beka oqo e vale? ena vanua o cakacaka kina? e koronivuli? E vakilai beka ena ivakarau ni nomu bula?

Era na duavata na tamata kece ena vuravura vou oya ena nodra qarava na Kalou dina. O sa qaravi koya tiko na Dauveibuli ni lomalagi kei vuravura? Vakacava na nomu qarava na Kalou, e sa vakaduavatataki iko dina tiko beka kei ira na tacimu vakayalo mai na veimatanitu, veimatatamata, kei na duivosavosa?​—Same 86:9, 10; Aisea 2:2-4; Sefanaia 3:9.

[Kato ena tabana e 17]

O Cei na Kalou e Yalataka na Veika Oqo?

E bulia o koya na lomalagi kei na vuravura. A tukuni koya o Jisu Karisito me “Kalou dina duaduaga.”​—Joni 17:3.

Levu nikua era rokova ga na kalou era dui bulia. Vica vata na milioni era cuva ina matakau. So era sa lai raica cake tale vakasivia na veisoqosoqo vakatamata, na ivakavuvuli vakatamata, se na veika era dui vinakata. E levu mada ga vei ira na vakayagataka na iVolatabu era sega ni doka na yaca i koya e vakatoka na iVolatabu me ‘Kalou dina.’​—Vakarua 4:35.

E kaya na Dauveibuli me baleti koya: “Koi au ko Jiova; sai koya oqo na yacaqu.” (Aisea 42:5, 8) Na yaca oqo e voleka ni kunei vaka 7,000 ena iVolatabu, ena vosa a volai taumada kina. A vakavulici ira nona imuri o Jisu Karisito mera masuta: “Tama i keimami mai lomalagi, me vakarokorokotaki na yacamuni.”​—Maciu 6:9.

Na cava e so na ka e kilai tani kina na Kalou dina? E vakamacalataki koya me Kalou ‘yalololoma qai daulomasoli, vosovoso vakadede, qai levu nona yalovinaka kei na dina,’ e sega tale ga ni dau vosoti ira na nakita nodra beca na nona ivakaro. (Lako Yani 34:6, 7) Na veika sa cakava ena veitabagauna sa oti vei ira na kawatamata e vakaraitaka na dina ni ivakamacala oya.

E dodonu me vakarokorokotaki se lagiti na yaca ni Kalou kei na itaukei ni yaca oya. Ni Dauveibuli qai Turaga Sau ni lomalagi kei vuravura, sa dodonu ga meda talairawarawa da qai sokalou vakatabakidua vua. O sa cakava tiko oya?

[Kato/iYaloyalo ena tabana e 18]

Na Veisau Cava ena Kauta Mai na “Lomalagi Vou kei na Vuravura Vou”?

Veisau na vuravura me Parataisi Luke 23:43

Taleitaki na cakacaka, levu na kakana Aisea 25:6; 65:17, 21-​23

[Kato/iYaloyalo ena tabana e 19]

O na Tauca na Kena Yaga?

E sega ni lasu rawa na Kalou!​—Taito 1:2.

E kaya o Jiova: “Na noqu vosa . . . ena sega ni lesu tale wale vei au, ena vakayacora mada ga na ka ka’u sa vinakata, ka daucaka yaco e na ka ka’u a tala kina.”​—Aisea 55:11.

Sa bulia tiko o Jiova na “lomalagi vou kei na vuravura vou.” Sa veiliutaki tiko na matanitu vakalomalagi. Sa vakarautaki oti na yavu ni “vuravura vou.”

Ni vakaraitaka oti na Vakatakila e so na veika totoka ena kauta mai vua na kawatamata na “lomalagi vou kei na vuravura vou,” sa qai dusia na vosa e cavuta sara ga na Kalou, na Turaga Sau ni lomalagi kei vuravura: “Raica au sa vakavouya na ka kecega.” E kaya tale: “Vola mada: ni sa vosa mana oqo ka dina.”​—Vakatakila 21:1, 5.

Oqo na taro bibi, Eda sa cakava tiko beka na veisau e gadrevi me rawa kina nida lewe ni “vuravura vou” ena veiliutaki kina na “lomalagi vou”?