Na Veika ena Yaco ena Siga i Jiova

“Ena lako mai na siga i Jiova me vaka na daubutako, . . . ena vakamai na vuravura kei na ka e tu kina.”​—2 PITA 3:10.

1, 2. (a) Ena vakarusai vakacava na ivakarau ca ni vuravura qo? (b) Na taro cava eda na veivosakitaka?

E YAVUTAKI na ivakarau ca ni vuravura qo ena dua na lasu levu, ya ni rawa ni liutaka vinaka na vuravura na tamata qai sega ni gadreva na veidusimaki i Jiova. (Same 2:​2, 3) Ena tudei me tawamudu e dua na ka e yavutaki ena lasu? Dravusakulukulu! Eda na sega ni waraka me rusa ga vakataki koya na vuravura e lewa tu qo o Setani. Ia ena veivakarusai na Kalou ena nona gauna lokuci, ena sala tale ga e vinakata me cakava kina. Na ka ena cakava qori na Kalou ena vuravura ca qo ena qai laurai vinaka kina nona lewadodonu kei na nona loloma.​—Same 92:7; Vkai. 2:​21, 22.

² A vola na yapositolo o Pita ni na “lako mai na siga i Jiova me vaka na daubutako, ena takali kina vakasauri na lomalagi, ena vadugu vaka na kurukuru na kena rorogo, ena waicala tale ga na ka era tu e lomalagi kei vuravura, ena vakamai na vuravura kei na ka e tu kina.” (2 Pita 3:10) Na cava na “lomalagi” kei na “vuravura” e tukuni tiko e ke? Na cava “na ka era tu e lomalagi kei vuravura” ena vakawaicalataki? Na cava a vakaibalebaletaka o Pita ena nona tukuna, “na vuravura kei na ka e tu kina” ena “vakamai”? Na noda kila na isau ni taro qo ena yaga ena noda vakavakarau ina veika rerevaki sa voleka sara tiko qo ni yaco.

Na Lomalagi kei na Vuravura ena Takali

3. Na cava na “lomalagi” e tukuni ena 2 Pita 3:​10, era na takali vakacava?

³ Ni vakayagataki vakaivakatakarakara ena iVolatabu na vosa “lomalagi” e dau dusi ira na veiliutaki, o ira qo era cecere vei ira na vakarurugi ena nodra lewa. (Aisea 14:​13, 14; Vkta. 21:​1, 2) ‘Na takali ni lomalagi’ e vakatakarakarataka na veiliutaki vakatamata ena vuravura tawavakalou. Ni tukuni “ena vadugu vaka na kurukuru na kena rorogo” na nodra takali​—se vaka na “qolou ni qaqa” ena dua tale na ivakadewa​—qo e rawa ni dusia na totolo ni nodra vakawabokotaki.

4. Na cava na “vuravura,” ena vakarusai vakacava?

⁴ Na “vuravura” e dusia na kawatamata e yawaka na Kalou. O ira na mataqali kawatamata va qori, era bula tale ga ena gauna i Noa, ra qai vakarusai ena Waluvu a vakarota na Kalou. “Ena vosa vata ga ya e maroroi kina na lomalagi kei na vuravura ni gauna qo me qai vakamai, e vakalaivi tale ga me yacova na siga ni lewa mera vakarusai kina o ira na sega ni doka na Kalou.” (2 Pita 3:7) Ena dua ga na gauna era vakarusai kece kina ena Waluvu na tamata ca, ia na veivakarusai sa voleka qo ena yaco vakaiwasewase ena “veivakararawataki levu.” (Vkta. 7:14) Ena imatai ni iwasewase ni veivakararawataki qori, na Kalou ena uqeti ira na iliuliu vakapolitiki ni vuravura qo mera vakarusai “Papiloni na Ka Levu,” me ivakaraitaki ni nona cata na isoqosoqo vakalotu saqamua. (Vkta. 17:​5, 16; 18:8) Ena iotioti ni iwasewase ni veivakararawataki levu na ivalu na Amaketoni, o Jiova ena vakarusa kece kina na vo ni vuravura i Setani.​—Vkta. 16:​14, 16; 19:​19-21.

“Ena Waicala . . . na ka Era tu e Lomalagi kei Vuravura”

5. Na cava e okati ena ka era tu e lomalagi kei vuravura?

⁵ Na cava “na ka era tu e lomalagi kei vuravura” ena “waicala”? Na ka e tukuna o Pita me baleta “na ka era tu e lomalagi kei vuravura” e dusia na veika era vakavuna na itovo ni vuravura, na kena rai, ivalavala, kei na ka era vakabibitaka. Na “ka era tu e lomalagi kei vuravura” e okati kina na “yalo ni vuravura,” era “kilai kina na luve ni talaidredre.” (1 Kor. 2:12; wilika Efeso 2:​1-3.) Na yalo qori se “cagi” e takalevu ena vuravura e lewa tu qo o Setani. E moica na vakasama ni tamata, nodra lalawa, vosa, qai cakava na ka e vakaraitaki kina na rai i Setani, ni “iliuliu e lewa tu na cagi,” e dokadoka qai talaidredre.

6. E vakavotui vakacava na yalo ni vuravura?

⁶ Se ra mani kila se sega, o ira na rawai ena yalo ni vuravura era vakalaiva me moica o Setani na nodra vakasama kei na lomadra, mera vakatotomuria kina nona nanuma kei na nona itovo. Oya na vuna era cakava kina na ka era vinakata, era sega ni kauaitaka na loma ni Kalou. Era vakatulewa ena dokadoka se tawaveinanumi, era dau saqata na veiliutaki, ra qai vakamalumalumu tale ga ina ‘gagadre ni yago kei na gagadre ni mata.’​—Wilika 1 Joni 2:​15-17.a

7. Na cava meda ‘vakatawa kina na lomada’?

⁷ E bibi gona meda ‘vakatawa na lomada’ ena noda muria na ivakatagedegede i Jiova, meda vakatulewataka kina vakavuku na noda ilala, ka eda wilika, na ka ni veivakamarautaki, kei na Web site eda raica ena Internet! (Vkai. 4:23) A vola na yapositolo o Paula: “Ni qarauna: de dua e tagavi kemuni bulabula ena vuku vakavuravura kei na vosa ni veicavilaki e yavutaki ena ivakavuvuli vakatamata kei na ivakavuvuli e vakabibitaki e vuravura, e sega ni salavata kei na ivakavuvuli i Karisito.” (Kolo. 2:8) Sa qai bibi ga na ivakaro qori ni sa voleka na siga i Jiova, ni na sega ni vakatauvatani rawa na kena ‘katakata’ ena vakawaicalataki kece kina “na ka era tu e lomalagi kei vuravura” ena vuravura i Setani, qai laurai votu nodra sega ni vorata rawa na katakata i Jiova. Eda lai nanuma kina na ka e tukuni ena Malakai 4:1: “Sa lako mai na siga ko ya, ena waqa me vaka na lovo; ia ko ira kece era viavialevu, kei ira kece sa caka ca, era na vaka na vu-ni-sila: ia ena vakamai ira na siga ko ya sa lako mai.”

“Ena Vakamai na Vuravura kei na ka e tu Kina”

8. Ena “vakamai” vakacava na vuravura kei na ka e tu kina?

⁸ Na cava a vakaibalebaletaka o Pita ena nona vola ni na “vakamai na vuravura kei na ka e tu kina”? Na vosa “vakamai” e rawa ni vakadewataki tale ga me “kilai” se “vakavotui.” A vakaibalebaletaka o Pita ni na vakavotuya o Jiova ena veivakararawataki levu na ka e cakava tiko na vuravura i Setani, nona saqati Jiova kei na nona Matanitu, qai veiganiti me vakarusai. Qo na ka e parofisaitaki ena Aisea 26:21 me baleta na gauna ya: “Sa lako mai ko Jiova mai na nona yasana me cudruvi ira na kai vuravura e na vuku ni nodrai valavala ca; ia ko vuravura ena vakaraitaka na kena dra, ka sega ni ubi ira tiko na nona moku mate.”

9. (a) Na cava meda cata, cava na vuna? (b) Na cava meda vakaitovotaka, cava na vuna?

⁹ O ira e moici ira na vuravura kei na kena yalo ca era na qai vakaraitaka ena siga i Jiova nodra roka dina ni bula, era na veivakamatei mada ga vakataki ira. E rawa ni tukuni ni iwiliwili levu ni ka ni veivakamarautaki voravora e takalevu tu ena gauna qo, e sa vakamua sara tiko ga nodra vakasama e levu ina gauna era na ‘dui laveta kina na ligadra vua na nodra itokani.’ (Saka. 14:13) E bibi gona meda cata na ka kece​—se mani iyaloyalo, ivola, qito ena vidio, kei na so tale​—ena uqeta na ivalavala e cata na Kalou, me vaka na dokadoka kei na vinakata na ivalavala kaukaua! (2 Sam. 22:28; Same 11:5) Ia meda vakaitovotaka na itovo era umani ena vua ni yalo tabu ni Kalou, ni itovo qori ena taqomaki keda meda vakabulai mai na warumisa vakaivakatakarakara ni siga i Jiova.​—Kala. 5:​22, 23.

“Na Lomalagi Vou kei na Vuravura Vou”

10, 11. Na cava na “lomalagi vou” kei na “vuravura vou”?

¹⁰ Wilika 2 Pita 3:13. Na “lomalagi vou” ya na Matanitu vakalomalagi ni Kalou, a tauyavu ena 1914 “ni sa oti nodra gauna lokuci na veimatanitu.” (Luke 21:24) Qori e dua dina na Matanitu, e kena Tui o Jisu Karisito ra qai veiliutaki vata kei koya na le 144,000, e levu vei ira qori era sa taura oti nodra icovi ni bula e lomalagi. O ira na digitaki qori era vakamacalataki ena Vakatakila me “koro tabu, o Jerusalemi Vou, ni lako sobu mai vua na Kalou mai lomalagi, e ukucavu me vaka na yalewavou e uku me lako vei watina.” (Vkta. 21:​1, 2, 22-24) Na matanitu e Isireli makawa a tiko e Jerusalemi, ia o Jerusalemi Vou kei na Taganevou erau na veiliutaki ena matanitu e lewa na ituvaki vou. Na koro lagilagi qo ena vaka ga e ‘lako sobu mai lomalagi’ ni na lewa mai na vuravura.

¹¹ Na “vuravura vou” e dusi ira na isoqosoqo vou ni kawatamata e vuravura era vakamalumalumu mai vu ni lomadra ina Matanitu ni Kalou. Ena gauna mada ga qo eda marautaka tiko na tamata ni Kalou na parataisi vakayalo, ni na qai uasivi sara ena “vuravura e se bera mai.” (Iper. 2:5) Eda na bula vakacava ena ituvaki vou ya?

Vakavakarau ina Siga Levu i Jiova

12. Na cava ena vakidacalataki ira kina na sega ni qaravi Jiova na yaco mai ni nona siga?

¹² Erau tukuna ruarua o Paula kei Pita ni siga i Jiova ena yaco mai “me vaka na daubutako”​—ena yaco lo mai, ena gauna tale ga e sega ni namaki. (Wilika 1 Cesalonaika 5:​1, 2.) O keda mada ga na lotu vaKarisito eda namaka tiko na siga ya, eda na kurabuitaka na kena yaco vakidacala. (Maciu 24:44) Ia o ira na sega ni qaravi Jiova era na kurabui vakalevu cake. A vola o Paula: “Ena gauna era kaya kina [o ira na yawaki Jiova]: ‘Na vakacegu kei na sautu!’ ena qai yaco vakidacala vei ira na veivakarusai me vaka ga na taratara ni yalewa bukete; era na sega ni dro rawa.”​—1 Ces. 5:3.

13. Na cava meda cakava meda kua kina ni vakacalai ena kacivaki ni “vakacegu kei na sautu!”?

¹³ Na kacivaki ni “vakacegu kei na sautu!” e dua ga na lasu era vakavuna na timoni; ia eda na sega ni vakacalai kina na tamata i Jiova. A vola o Paula:“Oni sega ni tiko ena butobuto, ena sega kina ni yaco vakidacala vei kemuni na siga ya me vaka vei ira na daubutako, ni oni luve ni rarama kece, oni luve ni siga tale ga.” (1 Ces. 5:​4, 5) Koya gona, meda tiko ga ena rarama, da yawaka sara na butobuto ni vuravura i Setani. A vola o Pita: “Kemuni na wekaqu lomani, ni oni sa kila rawa qo, moni qarauna de oni vakasesei vata kei ira [na dau vakavuvuli lasu ena loma ni ivavakoso vaKarisito] ena nodra veivakacalai na dau murilomadra, oni qai sega ni tudei.”​—2 Pita 3:17.

14, 15. (a) E dokai keda vakacava o Jiova? (b) Na vosa uqeti vakalou cava meda raica vakabibi?

¹⁴ E sega ni tukuna ga vei keda o Jiova meda ‘qaqarauni’ me qai sega ni cakava kina e dua na ka. Ni dokai keda, e vakarabailevutaka kina nona ivakamacala meda “kila rawa qo” na veika ena yaco ena gauna se bera mai.

¹⁵ E ka ni rarawa ni so era sega ni kauaitaka se ra vakatitiqataka na veivakadreti meda yadra tiko. Era na rairai kaya: ‘Sa vicavata na senitiuri keimami rogoca tiko mai kina na veivakadreti vata ga ya.’ Ia mera nanuma tiko ni ivosavosa va qori e sega ni vakaraitaka ga nira vakatitiqataka na dauveiqaravi yalodina, ia era vakatitiqataki rau tale ga o Jiova kei na Luvena. “Mo waraka ga,” a kaya o Jiova. (Apak. 2:3) A kaya tale ga o Jisu: “Mo dou yadra tiko ni dou sega ni kila na siga ena lako mai kina nomudou Turaga.” (Maciu 24:42) A kuria o Pita ena nona vola: “E dodonu moni yalosavasava, moni qarava tale ga na Kalou, ni oni waraka tiko oni namaka tiko na kena lako mai na siga i Jiova!” (2 Pita 3:​11, 12) Ena sega vakadua ni raica vakamamada na vosa dina qori na dauveiqaravi yalodina kei na kena iLawalawa Dauvakatulewa!

16. Na rai cava me kua ni tiko vei keda, cava na vuna?

¹⁶ E tukuna tiko na “dauveiqaravi ca” ni berabera na Turaga. (Maciu 24:48) Na dauveiqaravi ca qori e maliwai ira na ilala e tukuni ena 2 Pita 3:​3, 4. A vola o Pita: “Nira na lako mai ena iotioti ni veisiga na dauveivakasewasewani . . . era cakava ga na ka era vinakata” nira vakasewasewani ira era talairawarawa nira namaka tiko na siga i Jiova. Io, o ira na dauveivakasewasewani qori era sega ni vakaliuca na ka e vauca na Matanitu ni Kalou, era vakaliuci ira ga kei na nodra gagadre kocokoco. Meda kua sara ni vakatotomuria na yalo ni talaidredre kei na rai rerevaki va qori! Ia meda “okata na nona dauvosota na noda Turaga me sala eda vakabulai kina,” nida ogaoga tiko ga ena cakacaka vakavunau kei na veivakatisaipelitaki. Meda kua gona ni nuiqawaqawataka vakasivia na gauna e sa lokuca tu o Jiova ena nona lewa.​—2 Pita 3:15; wilika Cakacaka 1:​6, 7.

Nuitaka na Kalou e Dauveivakabulai

17. Na cava era cakava na lotu vaKarisito yalodina ina ivakasala i Jisu mera dro laivi mai Jerusalemi, cava na vuna?

¹⁷ Nira kabai Jutia na mataivalu ni Roma ena 66 S.K., era muria na ivakasala i Jisu na lotu vaKarisito yalodina mera dro laivi mai Jerusalemi ena gauna totolo duadua. (Luke 21:​20-23) Na cava era vakatulewa qai yavala totolo kina va ya? Sega ni vakabekataki nira nanuma vinaka tiko na ivakasala i Jisu. Me vaka ga sa vakasalataki ira kina o Karisito, era kila nira na sotava eso na dredre ena nodra vakatulewa. Ia era kila tale ga ni na sega ni laivi ira nona tamata yalodina o Jiova.​—Same 55:22.

18. E tara vakacava nomu rai na vosa i Jisu ena Luke 21:​25-28, me baleta na veivakararawataki levu sa roro tiko mai qo?

¹⁸ Ni tekivu na veivakararawataki levu duadua ena itukutuku ni kawatamata, e bibi tale ga meda nuitaki Jiova vakatabakidua ni o koya ga ena vakabulai keda. Ena loma ni gauna ni tekivu na veivakararawataki levu, ni bera tale ga ni tauca nona lewa o Jiova ena veika me baleta na vuravura, “era na cibati ira na tamata ena nodra domobulataka na veika ena vakarau yaco e vuravura.” Era na sautaninini ena nodra domobula na meca ni Kalou, ia era na sega ni rere na dauveiqaravi yalodina i Jiova. Era na marau ga nira kila nira sa voleka ni vakabulai.​—Wilika Luke 21:​25-28.

19. Na cava ena tasereki ena ulutaga tarava?

¹⁹ Io, na bula totoka e se bera mai era namaka o ira era dei mera kua ni veitokani kei vuravura kei na “ka era tu e lomalagi kei vuravura”! Me vaka ena tasereki ena ulutaga tarava, e sega ni gadrevi ga meda cata na ka e ca ke da via bula. E bibi meda vakaitovotaki keda ena itovo e vakamarautaki Jiova, da qai cakava na ka e taleitaka.​—2 Pita 3:11.

[iVakamacala e ra]

Vakamacalataka Mada

• Na cava e vakatakarakarataka . . .

na ‘lomalagi kei na vuravura’ ni gauna qo?

“na ka era tu e lomalagi kei vuravura”?

na ‘lomalagi vou kei na vuravura vou’?

• Na cava meda nuitaka kina vakatabakidua na Kalou?

[iYaloyalo ena tabana e 5]

O na rawa vakacava ni “vakatawa na lomamu” o qai dei ena nomu sega ni vakavuravura?

[iYaloyalo ena tabana e 6]

Eda na vakaraitaka vakacava nida “okata na nona dauvosota na noda Turaga me sala eda vakabulai kina”?