E Bula na Vosa i Jiova
Veitikina Bibi Mai na iVola na Joni kei na Juta
NA TOLU na ivola i Joni, a rairai volai ena 98 S.K. mai Efeso, e iotioti toka ni vica na ivola me volai ena iVolatabu. Ena imatai ni rua nona ivola, a uqeti ira kina na lotu vaKarisito mera dau muria na rarama ra qai vorati ira na vukitani. Ia ena ikatolu ni nona ivola, a uqeti ira kina mera dei ena ka dina, ra qai duavata.
A rairai volai ena 65 S.K. mai Palesitaina na nona ivola o Juta, na taci Jisu vakacabecabe, qai vakasalataki ira kina na itokani lotu vaKarisito mera qarauni ira na tamata ca era curu mai ena ivavakoso, dusimaki ira tale ga ena ka mera cakava mera kua ni vakamuai cala kina. Noda vakasamataka na itukutuku ena tolu na ivola i Joni kei na ivola i Juta ena vakayaloqaqataki keda meda dei tiko ga ena vakabauta, dina ni na yacovi keda na veika dredre.—Iper. 4:12.
MURIA TIKO GA NA RARAMA, LOLOMA KEI NA VAKABAUTA
Na imatai ni vola i Joni e baleti ira kece na imuri i Karisito, kei na ivakasala yaga mera vakarautaki kina na lotu vaKarisito mera vorati ira na vukitani, ra qai dei ena dina kei na ivalavala dodonu. E vakabibitaki kina meda muria tiko ga na rarama, loloma, kei na vakabauta.
“Kevaka eda sa ia nai valavala ni rarama, me vaka sa tu e na rarama ko koya [na Kalou],” e vola o Joni, “eda sa qai duiveiwekani vata.” Ni vu ni loloma na Kalou, e tomana na yapositolo: “Me da veilomani” tiko ga. Na noda ‘lomana na Kalou’ ena uqeti keda meda “muria na nona vunau,” eda na rawai vuravura ena “noda vakabauta” na Kalou o Jiova, nona Vosa, kei na Luvena.—1 Joni 1:7; 4:7; 5:3, 4.
Saumi na Taro Vakaivolatabu:
2:2; 4:10—E “[i]bulubulu ni nodai valavala ca” vakacava o Jisu? Me buluti se kau tani vakadua na noda ivalavala ca ena vinakati e dua na isoro e veiganiti. Nona cabora o Jisu na nona bula uasivi e vaka nona sa buluta na noda ivalavala ca. Ena vuku ni isoro ya, e lomani keda kina na Kalou qai vosota na nodra ivalavala ca na vakabauti Jisu.—Joni 3:16; Roma 6:23.
2:7, 8, VV—Na ivakaro cava e tukuna tiko o Joni ni “makawa” kei na kena e “vou”? E vakaibalebaletaka tiko o Joni na ivakaro me baleta na veilomani dina vakaveitacini. (Joni 13:34) A cavuta qori o Jisu ni sivi e 60 na yabaki ni bera ni vola o Joni na imatai ni nona ivola uqeti vakalou, e tukuna kina ni “makawa.” Ia o ira na vakabauta era kila na ivakaro qo “mai na i vakatekivu” ni nodra bula vaKarisito. E “vou” na ivakaro baleta ni sega ni yalani ga ena noda ‘lomani ira na wekada,’ ia e okati kina noda dau veinanumi.—Vunau 19:18; Joni 15:12, 13.
3:2—Na cava e “sega ni rairai [“matata,” VV]” vei ira na lotu vaKarisito lumuti, era na raici cei ena ‘matadra dina’? E se bera ni matata vei ira na kedra ituvaki nira vakaturi ena yago vakayalo i lomalagi. (Fpai. 3:20, 21) Ia, era kila ‘ni na rairai mai [na Kalou] ra qai tautauvata nira na raica e matadra dina’ o koya “na Yalo.”—2 Kor. 3:17, 18, NW.
5:5-8, VV—E ivakadinadina vakacava na wai, dra, kei na yalo tabu ni “Luve ni Kalou ko Jisu”? E ivakadinadina na wai ni a papitaiso ena wai o Jisu, qai vakaraitaka sara ga o Jiova ni vakadonui Luvena. (Maciu 3:17) Na dra i Jisu, se nona bula a soli “me kedrai voli na tamata kecega,” e vakaraitaka tale ga ni o Jisu na Luve ni Kalou. (1 Tim. 2:5, 6) E vakadinadinataki ni Luve ni Kalou o Jisu ena yalo tabu a mai toka vua me vaka na ruve ena siga a papitaiso kina, rawa gona ni lako voli o Jisu “ka daucaka vinaka, a sa vakabulai ira kecega sa vakasaurarataki ira na tevoro.”—Joni 1:29-34; Caka. 10:38.
Na Ka Eda Vulica:
2:9-11; 3:15. Ke dua na lotu vaKarisito e vakalaiva e dua na ka se me dua e vakaleqa na nona dau vakaraitaka na loloma vakaveitacini, sa lakova sara tiko ga qori na butobuto vakayalo qai sega ni kila na vanua sa lakova tiko.
‘MURIA TIKO GA NA DINA’
E kaya o Joni ena itekivu ni ikarua ni nona ivola: ‘Mai vua na qase ina marama sa digitaki kei ira na luvena.’ E marau vakalevu ni raica ‘ni so na luvena [na marama] era muria tiko ga na ivakavuvuli dina.’—2 Joni 1, 4.
E vola o Joni ena nona veiuqeti me bulataki na loloma: “Oqo na loloma, me da muria na nona vunau.” A veivakaroti tale ga me baleti ira “na dauveivakacalai kei na meca i Karisito.”—2 Joni 5-7.
Saumi na Taro Vakaivolatabu:
1, 13—O cei “na marama sa digitaki”? E rawa ni vakaibalebaletaka o Joni e dua na yalewa e kacivi ena Kyria, na vosa vaKirisi ni “marama.” Se, a vakayagataka tiko e dua na vosa vakatakarakara me baleta e dua na ivavakoso mera kua ni kila na dauveivakacacani. Ke vaka kina, kena ibalebale nira lewe ni ivavakoso ya o ira na luvena, ena yasana adua o ira na ‘luve ni wekana yalewa’ e dusi ira tiko na lewe ni dua tale na ivavakoso.
7, NW—Gauna cava e tukuna tiko qo o Joni ni na “lako mai” kina o Jisu, na cava era “sega ni vakatusa” kina na dauveivakacalai? Nona “lako mai” e sega ni vakaibalebaletaki ina nona na lako tawarairai mai. Ia e dusia tiko nona lako mai me bula vakatamata kei na nona lumuti me Karisito. (1 Joni 4:2, NW) Era sega mada ga ni vakabauta na dauveivakacalai ni a mai bula vakatamata o Jisu. De dua era cakitaka tale ga ni a bula dina o Jisu, se ra sega ni vakabauta ni a lumuti ena yalo tabu.
Na Ka Eda Vulica:
2, 4. Na noda mai kila ‘na dina’—oya na ivakavuvuli kece ni lotu vaKarisito e umani vata ena iVolatabu—kei na noda muria e bibi ena noda vakabulai.—3 Joni 3, 4.
8, VV, 9-11. Meda rawa ni tiko ga ena ‘loloma, yalololoma kei na vakacegu ni Kalou na Tamada, kei na Turaga o Jisu Karisito’ vaka kina na noda veimaliwai kei ira na tacida dauloloma, e dodonu meda ‘qarauni’ keda vakayalo da qai kua ni tokoni ira na sega ni “tu dei e nai vakavuvuli kei Karisito.”—2 Joni 3.
MEDA “CAKACAKA VATA ENA DINA”
Na ikatolu ni ivola i Joni e vola vei Keo na nona itokani. “Sa ka levu na noqu reki e na vuku ni ka e dua bauga oqo,” e vola, “ni’u sa rogoca era muria [tiko ga] na dina ko ira na luvequ.”—3 Joni 4.
E vakavinavinakataki Keo o Joni ena nona “yalo dina . . . ena cakacaka” ni vakacegui ira na mataveitacini era vulagi. “E noda itavi meda vakacegui ira era sa vaka kina,” e kaya na yapositolo, “meda cakacaka vata ena dina.”—3 Joni 5-7, VV, 8, NW.
Saumi na Taro Vakaivolatabu:
11—Na cava era caka ca kina e so? Nira sega ni mareqeta na ivakavuvuli vaKarisito, so era sega kina ni kila na Kalou. Nira sega ni raica na Kalou ena matadra, era nanuma kina ni sega ni raica o koya na ka era cakava tiko.—Isik. 9:9.
14, NW—O cei e tukuni tiko e ke nira “itokani”? Qo e sega ni o ira wale ga era veikilai vinaka, ia e vakaibalebaletaki vei ira kece na itokani ena vakabauta.
Na Ka Eda Vulica:
4. Era marau na matua vakayalo ena ivavakoso nira “muria [tiko ga] na dina” na itabagone. Sega tale ga ni vakatauvatani rawa nodrau marau na itubutubu ni yaga nodrau veituberi mera qaravi Jiova na luvedrau!
5-7, VV, 8, NW. Era cakacaka vakaukaua na ivakatawa dauveilakoyaki, daukaulotu, ira na veiqaravi e Peceli se valenivolavola ni tabana kei ira na painia nira lomani Jiova kei ira na mataveitacini. E yaga nida vakatotomuria nodra vakabauta, qai dodonu meda tokoni ira vakayalololoma.
9-12. Dodonu meda vakatotomuria na ivakaraitaki ni yalodina nei Timitirio, ia meda kua ni muria na ivakaraitaki ca i Tiotirifi, e dau kakase qai dau vosavakacaca.
‘TIKO GA ENA LOLOMA NI KALOU’
E vakamacalataka o Juta nira curu mai ina ivavakoso e so na ‘dau vosakudrukudru, ra daudidi, ra qai muria nodra gagadre ca.’ Era “vosataka na vosa vakaviavialevu sara na gusudra, a ra sa daudokai ira na tamata eso.”—Juta 4, 16.
Eda na vorata vakacava na lotu vaKarisito na veiuqeti cala? A vola o Juta: “Koi kemudou sa lomani, dou nanuma na vosa era sa tukuna eliu ko ira nai apositolo ni noda Turaga ko Jisu Karisito.” E tomana: ‘Tiko ga ena loloma ni Kalou.’—Juta 17-21.
Saumi na Taro Vakaivolatabu:
3, 4, VV—Na cava e uqeti ira kina na lotu vaKarisito o Juta mera gumatua sara na “taqomaka na vakabauta”? Baleta ‘nira na curu lo mai e so na tamata tawalotu’ ina ivavakoso. O ira qo era na ‘vakatanitaka na loloma ni Kalou mera ivakarau vakasisila kina.’
20, 21, VV—Eda na ‘tiko ga’ vakacava ‘ena loloma ni Kalou’? E tolu na sala e rawa nida cakava kina qo: (1) noda tara cake noda “vakabauta savasava sara” ena noda vulica vinaka na Vosa ni Kalou da qai gumatua ena vunau; (2) noda dau masu “e na Yalo Tabu,” se muria na kena veidusimaki; kei na (3) noda vakabauta na veika ena rawati kina na bula tawamudu—na isoro ni veivoli i Jisu Karisito.—Joni 3:16, 36.
Na Ka Eda Vulica:
5-7. Era na rawa beka ni drotaka na tamata ca na vakataulewa i Jiova? Sa macala tu ga ena tolu na ivakaraitaki e vola o Juta nira na sega ni drotaka rawa.
8-10. Meda vakatotomuria na ivakaraitaki i Maikeli na agilosi uasivi da qai rokovi ira e digia o Jiova mera liutaki keda.
12, NW. Era vakarerevaki sara ina noda vakabauta o ira na vukitani e dau veivakaisini na nodra loloma, era vaka ga na vatu era tu vuni e lomaniwai ni rawa nira vakaleqa na waqa se o ira na dauqalo. Era na rairai yalovinaka tu beka o ira na dauveivakavulici lasulasu, ia era vaka na o mamaca ni sega vei ira na ka dina vakayalo. Era vaka tu na vunikau mate e sega na vuana ena vulaibotabota. Era na vakarusai me vaka na vunikau e cavuraki tani. Ka vakayalomatua meda qarauni ira na vukitani.
22, 23. Era na cata na ka ca na lotu vaKarisito dina. Ni sagai mera vakabulai ‘e so na lomalomarua’ mai na rusa tawamudu, era na veivuke na sa matua tu vakayalo ena ivavakoso—vakauasivi o ira na liutaka tiko na cakacaka. E kena inaki me na kaukaua tale kina nodra vakabauta na lomalomarua tiko.
[iYaloyalo ena tabana e 28]
E ivakadinadina na wai, yalo tabu, kei na dra ni “Luve ni Kalou ko Jisu”