‘Me Liu Oqo, Mo Dou Veilomani Vakalevu’

‘Sa voleka na ivakataotioti ni ka kece ga. Ia na ka me liu oqo, mo dou veilomani vakalevu.’​—1 PITA 4:7, 8.

E KILA o Jisu ni bibi na iotioti ni vica na aua e vakayagataka kei iratou na nona yapositolo. E kila tu na veika eratou na vakarau sotava. E vinakati me ratou cakava e dua na cakacaka vakaitamera, ia eratou na cati, eratou na vakacacani tale ga me vaka ga a yaco vua. (Joni 15:18-20) E vakadreti iratou kina vakavica ena iotioti ni bogi eratou tiko vata kina ena bibi ni nodratou “veilomani.”​—Joni 13:34, 35; 15:12, 13, 17.

² A matata vinaka vua na yapositolo o Pita na ivakasala i Jisu, ni a tiko tale ga ena bogi oya. Ni volavola ena vica na yabaki e muri, ni bera toka ga ni vakarusai o Jerusalemi, e vakaraitaka kina o Pita na bibi ni veilomani. A vakasalataki ira na lotu Vakarisito: ‘Sa voleka na ivakataotioti ni ka kece ga. Ia na ka me liu oqo, mo dou veilomani vakalevu.’ (1 Pita 4:7, 8) E yaga vakalevu vei keda na lotu Vakarisito eda bula tiko ena “iotioti ni veisiga” ni ituvaki kei vuravura oqo na vosa i Pita oya. (2 Timoci 3:1, NW) Na cava na ibalebale ni ‘veilomani vakalevu’? Na cava e bibi kina vei keda na loloma vaka oya? Eda vakaraitaka vakacava ni tiko vei keda na loloma oqo?

Na Cava na iBalebale ni ‘Veilomani Vakalevu’?

³ Levu era nanuma nida sega ni lewa o keda na loloma oqo, ena qai basika ga mai vakataki koya. Ia e duatani na mataqali loloma e tukuna tiko i ke o Pita. E tukuna tiko na loloma e toka sara e cake na kena ivakatagedegede. Na “loloma” ena 1 Pita 4:8 e vakadewataki mai ena vosa vakirisi na a·gaʹpe. E vakaibalebaletaki ina loloma dina e lewai vinaka. E kaya e dua na ivola ni “loloma oqo e lewai, baleta e sega wale ga ni yalo luluvu, ia e okati kina na vakatulewataki ni ka me caka.” Ni noda ivalavala meda dau nanumi keda ga, e dodonu gona meda dau dusimaki tiko ina kena gadrevi meda veilomani ena sala e vakalou.​—Vakatekivu 8:21; Roma 5:12.

⁴ E sega ni kena ibalebale oqo meda raica na noda veilomani me vaka e icolacola. Na loloma na a·gaʹpe e veikauaitaki. E kaya o Pita ni dodonu meda ‘veilomani vakalevu’ [oya meda “vakarabailevutaka noda veilomani,” Kingdom Interlinear].a Ia, e dodonu meda sasagataka na veilomani oqo. E kaya e dua na dauvakadidike me baleta na vosa vakirisi e vakadewataki me “vakalevu”: “E vakatauvatani kei na nona vakayagataka na vo ni nona kaukaua e dua na daucici qai tadre kece sara ga na nona masela ena nona saga me yacova na tepi.”

⁵ Meda kua gona ni vakaraitaka na noda loloma ena gauna ga e rawarawa kina vei keda, se meda vakaraitaka ga vei ira e lewe vica. E dodonu meda vakarabailevutaka na noda loloma ena gauna mada ga e dredre kina. (2 Korinica 6:11-13) E macala ni mataqali loloma oqo e dodonu meda saga tiko ga meda vakaitovotaka, me vaka ga na kena vinakati vua na daucici me vakaukaua yago tiko ga me toroya cake kina nona totolo. E bibi sara me tiko vei keda na loloma vaka oya. Baleta? Oqo e tolu mada ga na vuna.

Na Cava Meda Veilomani Kina?

⁶ iMatai, “ni sa mai vua na Kalou na loloma.” (1 Joni 4:7) O Jiova, na ivurevure ni idivi oqo, e lomani keda taumada. E kaya na yapositolo o Joni: “Sa vakaraitaki vei keda na loloma ni Kalou e na nona a tala mai ki vuravura na Luvena e dua bauga ka a vakatubura me rawa ni da bula e na vukuna.” (1 Joni 4:9, VV) E ‘talai mai’ na luve ni Kalou me mai bula vakatamata, vakayacora nona cakacaka vakavunau, me yacova ni mate ena kaunirarawa, ‘me rawa kina nida bula.’ Na cava e dodonu meda cakava kevaka eda vakavinavinakataka na loloma vakaitamera oqo ni Kalou? E kaya o Joni: “Kevaka sa lomani keda vaka oqo na Kalou, sa dodonu sara tale ga me da veilomani.” (1 Joni 4:11, VV) Dikeva na ka e vola o Joni, “Kevaka sa lomani keda vaka oqo na Kalou”​—sega ni o iko ga, o keda kece. E matata vakasigalevu na tikina oqo: Kevaka e lomani ira eda sokalou vata na Kalou, e dodonu meda lomani ira tale ga.

⁷ iKarua, e bibi meda veilomani vakalevu sara ena gauna oqo me rawa kina nida qai vukei ira na tacida era gadreva na veivuke baleta ni ‘sa roro mai na ivakataotioti ni veika kece.’ (1 Pita 4:7, VV) Eda sa bula tiko ena “gauna lewalewai dredre.” (2 Timoci 3:1, NW) Na ituvaki kei vuravura ena gauna oqo, na leqa tubukoso, kei na noda tusaqati, e vakadredretaka vakalevu na noda bula. Nida sotava na veika dredre, e bibi meda toro voleka sara vei ira na tacida. Ena qai vauci keda sara na noda veilomani vakalevu, ena uqeti keda tale ga meda dau “veinanumi.”​—1 Korinica 12:25, 26.

⁸ iKatolu, e dodonu meda veilomani baleta kevaka e sega, eda sa na ‘vakarawarawataka vua na tevoro’ me vakaleqai keda. (Efeso 4:27) E dau totolo sara nona vakayagataka o Setani na nodra malumalumu kei na nodra cala na tacida me coriti keda kina. Ena vakavuna beka meda biuta na ivavakoso na nodra vosa sabalia se nodra ivalavala tawaveinanumi na tacida? (Vosa Vakaibalebale 12:18) Ena sega sara ni yaco oqo kevaka eda veilomani vakalevu. Na loloma oqori ena vakavuna meda veiyaloni da qai duavata tiko nida qarava na Kalou “e na lomavata.”​—Sefanaia 3:9.

O na Vakaraitaka Vakacava ni O Dau Veilomani?

⁹ Me tekivu e vale na veilomani. E kaya o Jisu nira na kilai tani na nona imuri dina ena nodra veilomani. (Joni 13:34, 35) Meda kua ni vakaraitaka ga noda veilomani ena ivavakoso, ia me laurai sara ga e vale, vei rau na veiwatini kei na kedra maliwa na itubutubu kei luvedra. E sega ni veiganiti ga meda kaya tiko nida lomani ira na lewe ni noda vuvale, ia e vinakati meda vakaraitaka sara ga.

¹⁰ Rau na vakaraitaka vakacava na veiwatini nodrau veilomani? Na tagane vakawati e lomani watina dina ena vakaraitaka na nona vakamareqeti watina ena itautau ni nona vosa kei na ka e cakava, ena matanalevu se ni rau tiko taurua. Ena dokai watina qai kauaitaka tale ga na ka e nanuma kei na nona rai. (1 Pita 3:7) Ena kauaitaka vakalevu na veika e vinakata qai saga me dau vakaceguya na lomana, me vakarautaka tale ga na veika e gadreva vakayago, vakayalo tale ga. (Efeso 5:25, 28) Na yalewa vakawati e lomani watina dina ena ‘vakarokorokotaki’ koya, dina ga ni sega ni cakava o watina e so na ka e namaka. (Efeso 5:22, 33) Ena tokoni watina qai talairawarawa vua, ena sega ni sivia tale na veika e vinakata, ia ena dau tokoni koya ena nodrau vakaliuca na veika vakayalo.​—Vakatekivu 2:18; Maciu 6:33.

¹¹ Vei kemuni na itubutubu, oni na vakaraitaka vakacava ni oni lomani ira na luvemuni? Na nomuni tu vakarau mo ni cakacaka vakaukaua mo ni solia vei ira na veika mera bula kina vakayago e ivakaraitaki ni nomuni lomani ira na luvemuni. (1 Timoci 5:8) Ia era sega ni gadreva ga na gone na kakana, isulu, kei na vale mera tiko kina. Me rawa nira qai lomana ra qai qarava na Kalou dina, e dodonu mera vakavulici ena veika vakayalo. (Vosa Vakaibalebale 22:6) Ena vinakati kina mo ni lalawataka na gauna mo ni vulica kina vakavuvale na iVolatabu, mo ni vakaitavi vata ena cakacaka vakavunau, kei na nomuni lakova na soqoni vakarisito. (Vakarua 6:4-7) Me rawa ni oni cakava wasoma na veika oqo, ena vinakati sara ga vei kemuni na sasaga, vakauasivi ena gauna lewalewai dredre oqo. Na nomuni kauai kei na nomuni sasaga mo ni vakarautaka na veika vakayalo vei ira na luvemuni e vakaraitaka na nomuni lomani ira dina. E dina oqo baleta oni vakaraitaka kina ni bibi duadua vei kemuni na nodra bula tawamudu.​—Joni 17:3.

¹² E bibi tale ga mera lomani luvedra na itubutubu ena nodra vakaceguya na lomadra. Era ka malumalumu na gone, e rawarawa nira vakaleqai; saga mera kila ni o lomani ira dina. Tukuna vei ira ni o lomani ira vakaraitaka tale ga, era na vakila kina nira yaga, ra lomani tale ga. Vakavinavinakataki ira, era na kila kina ni o raica tiko na nodra sasaga, o kauaitaka tale ga. Vakadodonutaki ira ena loloma, nira na kila ena veivakadodonutaki vaka oqo ni o kauaitaka na vanua era sa malele tiko kina. (Efeso 6:4) Na ivakaraitaki kece ni loloma oqori ena vaqaqacotaka na vuvale me rawa kina ni tu vakarau me vosota na tarabi ni veika e sotava ena iotioti ni veisiga oqo.

¹³ Nida dau loloma eda na sega ni kauaitaka nodra malumalumu na tacida. Ni vakaroti ira na wilika na nona ivola mera ‘veilomani vakalevu,’ e vakaraitaka tale ga o Pita na vuna e bibi kina: “Ni na ubia nai valavala ca e vuqa na loloma.” (1 Pita 4:8) Na ubi ni ivalavala ca e sega ni kena ibalebale na vunitaki ni ivalavala ca bibi. Na ivalavala ca bibi e dodonu me vakaraitaki vei ira era qaravi keda tiko ena ivavakoso. (Vunau ni Soro 5:1; Vosa Vakaibalebale 29:24) E sega sara ga ni ivakaraitaki ni loloma, e sega ni vakaivolatabu tale ga, na nodra vakalaivi tiko na dau vakayacora na ivalavala ca bibi mera vakaleqai ira vakayalo e so na lewe ni ivavakoso.​—1 Korinica 5:9-13.

¹⁴ Dau vakalevu ga me sega so ni bibi na cala era cakava na tacida vakayalo. Eda dau cala kece, ni so na gauna e dau sakasaka na ka eda tukuna se cakava. Oqo e dau vakavuna na rarawa kei na mosi. (Jemesa 3:2) E dodonu beka meda dau talanoataka na nodra malumalumu e so tale? Oqori ena vakavu veisei wale ga ena loma ni ivavakoso. (Efeso 4:1-3) Kevaka eda dau loloma, eda na sega ni “kaseti” ira eda sokalou vata. (Same 50:20) Me vaka ga ni ubia na lalaga ni vale sukusukura na palasita kei na iboro, na loloma e ubia tale ga na nodra malumalumu na tacida.​—Vosa Vakaibalebale 17:9.

¹⁵ Na loloma ena uqeti keda meda vukei ira era leqa dina. Ni sa qai ca tiko ga na iotioti ni veisiga oqo, ena tiko beka na gauna era na gadreva kina na tacida vakayalo na veivuke vakayago. (1 Joni 3:17, 18) Me kena ivakaraitaki, bau dua beka na lewe ni noda ivavakoso e leqa vakailavo se vakacegui mai na nona cakacaka? Ke da rawa ni veivuke, de vinaka meda vukei koya vakayago. (Vosa Vakaibalebale 3:27, 28; Jemesa 2:14-17) E vinakati beka me vakavinakataki nona vale e dua na yada sa qase? Ena vinaka meda kua ni waraka me kere veivuke sara vei keda da qai lai cakava na cakacaka oya.​—Jemesa 1:27.

¹⁶ Eda na sega ni vakaraitaka ga na noda loloma vei ira eda tiko veivolekati. So na gauna eda dau rogoca na kena tarai ira na tamata ni Kalou ena so na vanua na vakacaca ni cagi kei na waluvu, uneune, kei na tiko yavavala. De ra gadreva vakalevu na kakana, isulu, kei na iyaya tale e so. Veitalia ke ra mani matatamata tani. Eda na ‘lomani ira na tacida kece.’ (1 Pita 2:17, NW) Me vakataki ira ga na ivavakoso ena imatai ni senitiuri, eda tu vakarau meda na tokona na cakacaka ni vakacoko. (Cakacaka 11:27-30; Roma 15:26) Nida vakaraitaka vaka oqori na noda loloma, eda sa vaqaqacotaka tiko na ivau e vakaduavatataki keda tiko ena iotioti ni veisiga oqo.—Kolosa 3:14.

¹⁷ E uqeti keda na loloma meda tukuna na itukutuku vinaka ni Matanitu ni Kalou vei ira tale e so. Vakasamataka mada na ivakaraitaki i Jisu. Na cava e vunau qai veivakavulici kina? E “lomani ira” na lewenivanua era vakaloloma tu vakayalo. (Marika 6:34) O ira na ivakatawa ni lotu lasu era vakacalai ira na lewenivanua, ra qai sega ni kauaitaki ira. A dodonu mera vakavulici ira na lewenivanua ena veika dina vakayalo me dua kina nodra inuinui, ia era a sega ni vakayacora oqo. Ena levu gona ni nona loloma kei na veinanumi, e vakacegui ira kina na lewenivanua o Jisu ena ‘itukutuku vinaka ni Matanitu ni Kalou.’​—Luke 4:16-21, 43, VV.

¹⁸ Era le levu tale ga nikua era sega ni kauaitaki vakayalo ra qai vakamuai cala, me sega kina na nodra inuinui. Kevaka eda vakataki Jisu ena noda kauaitaka tale ga na nodra veika vakayalo na se sega ni kila na Kalou dina, ena uqeti keda na noda loloma kei na noda veinanumi meda tukuna tale ga vei ira na itukutuku vinaka ni Matanitu ni Kalou. (Maciu 6:9, 10, VV; 24:14) Ni rui lekaleka na gauna sa vo, sa qai vinakati ga vakalevu me vakatotolotaki na kena vunautaki na itukutuku ni veivakabulai.​—1 Timoci 4:16.

‘Sa Voleka na iVakataotioti ni Ka Kece Ga’

¹⁹ Nanuma ni a dolava o Pita na nona ivakaro me baleta na noda veilomani ena veivosa oqo: ‘Sa voleka na ivakataotioti ni ka kece ga.’ (1 Pita 4:7) Sa voleka ni sosomitaka na vuravura ca oqo na vuravura vou ni Kalou e tiko kina na ivalavala dodonu. (2 Pita 3:13) Sa sega kina ni gauna ni vakawelewele oqo. E vakasalataki keda o Jisu: “Dou qarauni kemudou mo dou kakua ni vakasinaita na nomudou bula e na kana kei na marau vakalialia, kei na mateni, kei na lomaocaocataka na ka ni bula oqo, de na qai yaco vakidacala vei kemudou na siga ko ya me vaka na cariba ni dai.”​—Luke 21:34, 35, VV.

²⁰ O koya gona, meda “yadra tiko,” ena noda kila ni sa lekaleka na gauna. (Maciu 24:42, VV) Meda taqomaki keda tiko ga mai na veitemaki i Setani e rawa ni vakamuai keda tani. Me kua ni uqeti keda na yalo ni vuravura tawaloloma oqo me tarova na noda lomani ira tale e so. Kena ilutua, meda toro voleka tiko ga vua na Kalou dina o Jiova. Sega ni dede ena qai mai vakayacora nona inaki me baleta na vuravura na nona Matanitu Vakamesaia.​—Vakatakila 21:4, 5.

[iVakamacala e ra]

TARO NI VULI

• Na cava a tataunaka o Jisu vei iratou na nona tisaipeli? Eda kila vakacava ni matata vei Pita na itatau oya? (Para. 1-2)

• Na cava na ibalebale ni ‘veilomani vakalevu’? (Para. 3-5)

• Na cava meda veilomani kina? (Para. 6-8)

• O na vakaraitaka vakacava ni o lomani ira tale e so? (Para. 9-18)

• Na cava e sega kina ni gauna ni vakawelewele na gauna oqo? Na cava ga e dodonu meda cakava? (Para. 19-20)

[iYaloyalo ena tabana e 29]

Na vuvale e veivolekati ena rawarawa cake nona vosota na tarabi ni veika e sotava ena iotioti ni veisiga oqo

[iYaloyalo ena tabana e 30]

Na loloma e uqeti keda meda vukei ira era leqa dina

[iYaloyalo ena tabana e 31]

E ivakaraitaki ni loloma na noda tukuna yani na itukutuku vinaka ni Matanitu ni Kalou