Veivosaki kei Taukeinivale​—Era Lako Kece i Lomalagi na Tamata Vinaka?

ERA dau marau na iVakadinadina i Jiova mera veivosakitaka kei ira na itaukeinivale na iVolatabu. E tiko e dua na taro vakaivolatabu o dau lomatarotarotaka? O dau vaqaqa na ka era vakabauta se na nodra ivakarau ni sokalou na iVakadinadina i Jiova? Ke vaka kina, vakaraitaka qori vei ira nira veisiko tale yani ena dua na gauna. Era na marau mera veivosakitaka kei kemuni na ka oni dau lomatarotarotaka.

Qo e dua na ivakaraitaki ni ka e rawa ni veivosakitaka kei taukeinivale e dua na iVakadinadina i Jiova. Kaya mada e gole yani ina vale nei Ropate, o Marika e dua na iVakadinadina.

Cava Era na Lai Cakava o Ira na Lai Bula i Lomalagi?

Marika: Na cava o nanuma me baleta na nodra inuinui na tamata vinaka ena gauna se bera mai?

Ropate: Ke sega mada ga ni vinaka na bula ena vuravura qo ena gauna qori, au vakabauta nira na vakaicovitaki ga na tamata vinaka. Era na lai bula dina i lomalagi.

Marika: Qori e dua dina na inuinui totoka. E vakamacalataka vakalevu na iVolatabu na ituvaki me baleti lomalagi kei na noda rawa ni lai bula ekea. O bau vakasamataka na cava era na lai cakava o ira na lai bula i lomalagi?

Ropate: Eda na lai bula vata kei na Kalou da qai vakacaucautaki koya me tawamudu.

Marika: E dua na ka totoka qori meda namaka. Ia na iVolatabu e sega ni tukuna wale ga na ka ni veivakalougatataki era na vakila o ira na lai bula i lomalagi, e tukuna tale ga na itavi dokai era na vakacolati kina.

Ropate: Na itavi cava oya?

Marika: Na itavi qori e vakamacalataki ena Vakatakila 5:10, e tukuni kina ni o Jisu ena lesi ira “mera dua na matanitu, mera bete vua na noda Kalou, mera tui, mera liutaka na vuravura.” O sa kila na itavi era na vakacolati kina na lai bula i lomalagi?

Ropate: E kaya na tikina qori nira na tui mera liutaka na vuravura.

Marika: Dua dina na vakasama bibi ya, se vakaevei?

Era na Liutaki Cei?

Marika: Ke ra lai veiliutaki vakatui o ira na lai bula e lomalagi, o vakadinata ni tiko eso era na vakarurugi ena nodra veiliutaki? Ena vaka ga e dua na matanitu, ena sega ni yaga na nodra veiliutaki ke sega ni tiko eso mera vakarurugi ena nodra veiliutaki.

Ropate: Oi, au sa qai taura rawa.

Marika: E vinaka gona meda taroga, Era na liutaki cei?

Ropate: De dua eda na liutaki ira era se bula tiko e vuravura kei ira na se bera ni lako i lomalagi.

Marika: Ena dina na vakasama qori ke ra lako kece i lomalagi na tamata vinaka. Ia vakasamataka mada ke ra sega ni lako i lomalagi eso na tamata vinaka, vakacava e rawa ni yaco qori?

Ropate: Au se sega ni rogoca me dua na lotu vaKarisito me vakabauta qori.

Marika: Na vuna au taroga kina na taro ya baleta na ka e tukuni ena Same 37:29. O marautaka mo wilika na tikinivolatabu qori?

Ropate: Io. E kaya: “Era na taukena na vanua ko ira na yalododonu, ka tiko kina ka sega ni mudu.”

Marika: Vinaka. Mai na tikinivolatabu qori, era na lai bula e vei na tamata vinaka?

Ropate: E kaya na tikina ya nira na bula ena vanua.

Marika: Qori sara ga—​ia sega ni dua ga na gauna lekaleka. E kaya na tikina ya: ‘Era na tiko kina me tawamudu.’

Ropate: De dua qori e vakaibalebaletaka tiko nira na bula tu ga e vuravura na tamata vinaka. Ena gauna eda mate kina da qai lako i lomalagi, ena sosomitaki keda eso tale na tamata vinaka era na qai sucu e muri.

Marika: E levu era rairai vakamacalataka va qori na tikina ya. Ia vakacava ke duatani na ibalebale ni tikinivolatabu qori? E vakaibalebaletaka beka nira na bula tawamudu e vuravura na tamata vinaka?

Ropate: Au sega ni taura rawa na ka o vakamacalataka tiko.

Na Vuravura Parataisi ena Gauna se Bera Mai

Marika: Oi sa donu, ia raica tale mada e dua na tikina ena iVolatabu e vakamacalataka na bula e vuravura ena gauna se bera mai. Daru wilika mada na Vakatakila 21:4. E tukuna na tikinivolatabu qo me baleti ira na bula ena gauna qori: “Ena qusia tale ga [na Kalou] na wainimata kece mai na matadra, sa na sega tale na mate, na lolosi, na tagiyaso, kei na mosi. Sa sega na veika e dau yaco e liu.” Qori e dua dina na ka totoka meda namaka, se vakacava?

Ropate: Io. Ia au vakabauta ni qori e vakamacalataka tiko na ivakarau ni bula e lomalagi.

Marika: E macala ga nira na vakila tale ga na veivakalougatataki qori o ira na lai bula e lomalagi. Ia raica tale mada na tikinivolatabu ya. Na cava e tukuna me baleta na mate?

Ropate: E tukuna ni “na sega tale na mate.”

Marika: Qori sara ga. Me rawa ni vakawabokotaki e dua na ka ena vinakati me yaco rawa tiko, au kila o na duavata kina.

Ropate: Io.

Marika: Ia se bera ni dua e mate mai lomalagi, se vakacava? Ena vuravura ga qo e se yaco tiko kina na mate.

Ropate: Umm. Au na vakasamataka tale mada na tikina qori.

Marika: O sa qai raica Ropate ni iVolatabu e vakavuvulitaka ni tiko eso na tamata vinaka era na lai bula i lomalagi, ia e levu era na bula tawamudu ena vuravura qo. Au kila ni o sa rogoca na vosa kilai levu qo: “Era kalougata na yalomalua; nira na taukena na vuravura.”​—Maciu 5:5, King James Version.

Ropate: Io, au sa rogoca ni wiliki vakalevu e valenilotu na tikinivolatabu qori.

Marika: Ke ra taukena na vuravura na yalomalua, vakacava e vakaraitaka qori nira na bula ena vuravura na tamata? O ira na bula e vuravura era na vakila na veika totoka e parofisaitaki ena Vakatakila. Era na raica ni na veisau vakadua o vuravura baleta ni na vakaotia na Kalou na ka ca kece​—wili kina o mate.

Ropate: Au sa taura rawa na ka o via tukuna tiko, ia au sega ni vakadeitaka ni dua se rua ga na tikinivolatabu qori e vakadinadinataka na ka o tukuna.

Marika: E dina qori. E levu sara ga na tikinivolatabu e vakamacalataka na bula ena vakilai ena vuravura qo ena gauna se bera mai. E vinaka meu vakaraitaka mada vei iko e dua vei ira na tikinivolatabu au dau taleitaka, vakacava o marautaka meu na vakaraitaka vei iko?

Ropate: Io.

“Ena Qai Takali na Tamata Ca”

Marika: Daru a wilika mai e liu na Same 37 tikina e 29, e vinaka me daru raica tale mada. Ia qo daru wilika na tikina e 10 kei na 11. Au kerea ke o rawa ni wilika mai vei kedaru.

Ropate: Sa donu: “Malua mada vakalailai, ena qai takali na tamata ca; Io, ko na vakananuma na nona yasana, ia sa na yali kina ko koya. Ia ko ira na yalomalumalumu era na taukena na vanua; ka na daumarau tiko e na veivakacegui vakaidina.”

Marika: Vinaka. Ke o raica na tikina e 11, na vanua cava era na lai bula kina na “yalomalumalumu” se tamata vinaka?

Ropate: E tukuni kina nira na “taukena na vanua.” Ia vaka vei au na tikina qo e baleti keda tiko ena gauna qo, baleta nira bula tiko na tamata vinaka e vuravura nikua.

Marika: E dina qori, ia e tukuna tale ga na tikinivolatabu qori ni o ira na tamata vinaka era na marautaka na “veivakacegui vakaidina.” Nikua eda sega ni raica na bula vakacegu e vuravura, se vakacava?

Ropate: Io.

Marika: Ena vakayacori gona vakacava na yalayala qori? De vinaka meu vakatauvatana mada va qo: Kaya mada ke o taukena e dua na tabavale. Eso vei ira na vakaitikotiko kina era tamata vinaka​—era dau qarava vinaka na rumu, ra qai saga mera dau caka vinaka vei ira era tiko veitikivi. Dua na ka nomu marau ni o solia mera rede kina. Ia eso tale era sega ni tamata vinaka, era dau vakacacana na rumu, era sega tale ga ni dau caka vinaka vei ira na tiko veitikivi. Ia ke ra sega ni via veisautaka nodra ivalavala, na cava o na cakava?

Ropate: Au na cemuri ira.

Marika: Qori sara ga na ka ena cakava na Kalou vei ira na tamata ca eda bula vata tu qo. Raica tale mada na tikina e 10. E tukuni kina: “Ena qai takali na tamata ca.” Kena ibalebale qori na Kalou ena “cemuri” ira era dau vakavu ca vei ira eso tale. Era na qai marautaka na bula vakacegu e vuravura na tamata vinaka. Au kila na vakasama qo me baleta na nodra bula tawamudu na tamata e vuravura ena rairai duidui mai na ka o sa vakavulici kina ena gauna e liu.

Ropate: Io, au se bera vakadua ni rogoca qori ena noqu valenilotu.

Marika: Me vaka o sa tukuna oti, ena sega ni vinaka me daru raica ga e dua se rua na tikinivolatabu me baleta na ulutaga qo. Ena vinakati sara ga me daru dikeva kece na ka e tukuna na iVolatabu me baleta na nodra bula na tamata vinaka ena gauna se bera mai. Ia mai na tikinivolatabu daru sa wilika nikua, o nanuma ni rawa nira lai bula e lomalagi eso na tamata vinaka, ena gauna vata qori e levu tale ga na tamata vinaka era na bula e vuravura?

Ropate: E sega mada ni macala, ia mai na tikinivolatabu o wilika, kena rairai ni na yaco dina qori. Au kila meu na vakasamataka tale mada vakavinaka.

Marika: Ni o dikeva tale vakavinaka na ulutaga qo, o na rairai lomatarotarotaka eso na ka. Kena ivakaraitaki, vakacava o ira na tamata vinaka era bula ena gauna eliu? Era sa lako kece e lomalagi? Ia ke sega, e vei na vanua era sa tu kina qo?

Ropate: Taro vinaka sara ga qori.

Marika: Raica e rua na ka au na cakava. Kena imatai, au na vola eso na tikinivolatabu me baleta na ulutaga qori.a Kena ikarua, au na taleitaka meu lesuvi iko mai me daru mai veitalanoataka na tikinivolatabu qori ena gauna o sa wilika oti kina, qai vakasamataka tale ga. Vakacava sa donu ya?

Ropate: Sa donu, vinaka.

[iVakamacala e ra]