Setani

E bula dina o Setani?

“Na gata makawa, e vakatokai na Tevoro se o Setani, . . . e vakacala tiko na vuravura taucoko.”​—Vakatakila 12:9.

KA ERA TUKUNA ESO

Eso era vakabauta ni sega ni bula dina na Tevoro o Setani, e vakatakarakarataka ga na ka ca e tu e lomada.

KA E KAYA NA IVOLATABU

E bula dina o Setani. E dua na agilosi talaidredre a saqata na Kalou. E vakatokai koya na iVolatabu me “turaga ni vuravura qo.” (Joni 12:31) E dau ‘veivakacalai’ qai vakayagataka na “ivakatakilakila lasu” me yaco kina na nona inaki.​—2 Cesalonaika 2:​9, 10.

E tukuna na iVolatabu ni rau a veivosaki mai lomalagi o Setani kei na Kalou. Ke sa vosa na Kalou vei Setani, ena sega ni vakaibalebale ke vosa tiko ga ena dua na ka ca e lomana, ni loma ni Kalou e uasivi qai savasava. (Vakarua 32:4; Jope 2:​1-6) Koya gona, e bula dina o Setani, e sega ni vakatakarakarataka na ka ca eda cakava.

VUNA MO KAUAI KINA

E vinakata o Setani mo vakabauta ni sega ni bula dina, e vaka ga e dua na daubasulawa e veiveisautaka na kena itukutuku me kua kina ni tobo. Ia mo taqomaki iko mai vei Setani, e bibi mo kila ni bula dina o koya.

E tiko e vei o Setani?

“[E]na rarawa na vuravura . . . ni sa lako sobu vei kemudrau na Tevoro.”​—Vakatakila 12:12.

KA ERA TUKUNA ESO

E levu era vakabauta ni tiko mai eli o Setani, ena lomadonu kei vuravura. Eso tale era vakabauta ni bula tiko e lomadra na tamata ca.

KA E KAYA NA IVOLATABU

E ka bula vakayalo o Setani, eda sega gona ni raica na vanua e bula kina. Ena dua na gauna a soli tu vei Setani na galala me veilakoyaki voli ena vanua era vakaitikotiko kina na agilosi yalodina kei na Kalou. (Jope 1:6) Ia qo sa vakatalai tani kei ira na vo ni agilosi ca mai na itikotiko ni Kalou, era sa mai vakaitikotiko ga ina dua na vanua voleka e vuravura.​—Vakatakila 12:12.

Kena ibalebale beka qori ni a bula o Setani ena dua ga na vanua e vuravura? Kena ivakaraitaki, o na rairai wilika ni siti makawa o Perikamo e “itikotiko i Setani.” (Vakatakila 2:13) Ia na vosa qori e vakaibalebaletaka ni dau vakaliuci o Setani ena ivakarau ni sokalou e caka e kea. E sega ni dua na nona itikotiko dei e vuravura. E tukuna ga na iVolatabu ni taukena na “matanitu kece e vuravura.”​—Luke 4:​5, 6.

E rawa ni veivakamavoataki se lewai ira na tamata o Setani?

“E lewa tiko na Vunica na vuravura taucoko.”​—1 Joni 5:19.

KA E KAYA NA IVOLATABU

E levu era sa rawai ena nona veivakacalai o Setani, sa lewai ira tale ga. (2 Korinica 11:14) Qori na vuna e sega ni walia rawa kina na kawatamata na leqa e tarai vuravura tiko.

E tukuni tale ga ena iVolatabu eso na ituvaki a curumi ira kina na tamata o Setani se o ira na yalovelavela, e lai vakavuna mera mavoa.​—Maciu 12:22; 17:​15-18; Marika 5:​2-5.

KA O RAWA NI CAKAVA

Mo kua ni rerevaka na ka e cakava o Setani. Ke o sega ni vinakata mo rawai, e bibi mo kila na sala e dau veivakacalai kina, mo kua kina ni “lecava na nona ilawaki.” (2 Korinica 2:11) Ni o wilika na iVolatabu, o na kila na ivadi e dau vakayagataka, qai sega ni vakacalai.

Mo vakarusa na iyaya kece era sema ina vakatevoro. (Cakacaka 19:19) Me vaka na taube, qato, itaba, vidio, sere, kei na so na porokaramu ni kompiuta e uqeta na vakatevoro se cakaisausau.

E kaya na iVolatabu mo “vorata na Tevoro, ena qai dro tani vei kemuni.” (Jemesa 4:7) Ni o talairawarawa ena ivakasala vuku vakaivolatabu, o na vorata na ivadi i Setani.​—Efeso 6:​11-18.