Meda Veitaratara kei Cei?

E LESIA na Kalou Kaukaua Duadua na itavi eso vei ira na agilosi. Me kena ivakaraitaki, e vakacolata vei Jisu Karisito na liutaki ni vuravura, qai lesi ira na agilosi yalodina mera veivuke ena kena dusimaki na kacivaki ni itukutuku vinaka. (Vakatakila 14:6) Ia e duidui na masu, ni sega ni lesia vua e dua tale me rogoca. Na noda masu e dodonu me vakamuai ga vua na Kalou.

E “daurogoca na masu” o Jiova. (Same 65:2) Ena rogoca qai vakayacora na ka eda kerea. A vola na yapositolo o Joni vei ira era qaravi Jiova vata me baleta na masu: “Eda kila se cava ga eda kerea me salavata kei na nona inaki, ena rogoci keda o koya [Kalou]. Kena ikuri, ke da kila ni dau rogoca na cava ga eda kerea vua, eda kila nida na rawata na ka eda kerea vua.”​—1 Joni 5:​14, 15.

Era sega gona ni vinakata na agilosi yalodina meda masu se veitaratara kei ira. Era kila ra qai muria na ituvatuva ni Kalou me baleta na masu, ena so na gauna e vauci ira tale ga. Ena sala cava? Ni masulaka na parofita o Taniela na kena laladidi tu o Jerusalemi, a rogoca o Jiova na nona masu ni tala na agilosi o Keperieli me vakaukauataki koya.​—Taniela 9:​3, 20-22.

Meda Veitaratara kei Ira na Mate?

E dodonu beka meda veitaratara kei ira na mate? E levu na italanoa e dau rogoci me baleta na nodra veivosaki eso kei ira na mate. E dua na dauvakacuru a veitaratara kei na dua na marama mai Ailadi, qai tukuna ni a veivosaki kei Fred na watina ena bogi. Ia o Fred sa mate ena vica na macawa sa oti. Na dauvakacuru qo, e tukuna na ka e kaya vua o “Fred,” na veika e nanuma o watina o koya duadua ga e kila. Ena rawarawa sara vei wati Fred me nanuma ni bula tiko o Fred ena vuravura ni yalo qai saga me veitaratara kei koya ena nona veivosaki kei na dauvakacuru. Ia qo e veicalati kei na ka e tukuna vakamatata na iVolatabu me baleta na kedra ituvaki na mate.​—Raica na kato e ra.

Ena vakamacalataki gona vakacava na italanoa va qo? E dua na sala era vakaisini keda kina na timoni ena nodra lai waqawaqa mai nei koya e mate, me vaka a caka ena ivakaraitaki i Fred. Na cava e kena inaki? Me kua nida vakabauta kina na ka e vakavulica na iVolatabu, me vakamalumalumutaka na noda vakabauta kei na noda nuitaki Jiova. E sega gona ni lomatarotarotaki ni o Setani kei ira na timoni era vakacala tiko na kawatamata ena “veimataqali cakacaka veivakurabuitaki, na ivakatakilakila lasu kei na cakamana ena nona vakayagataka na ka tawadodonu kece me vakacalai ira na vakarau vakarusai.”​—2 Cesalonaika 2:​9, 10.

Era vakabauta gona na dauvakacuru kei ira era dau lakovi ira nira veitaratara dina tiko kei ira na mate. Ia ke ra veitaratara kei na dua, sa macala tu ga ni oya o ira na agilosi ca era saqati Jiova. E vakatale ga kina o ira era vakabauta ni vakadonuya na Kalou na nodra sokalou, ia e cala na nodra nanuma. Na yapositolo uqeti vakalou a vola na ivakaro warumisa qo: Na “ka era cabora na veimatanitu era cabora vei ira na timoni, era sega ni cabora vua na Kalou.”​—1 Korinica 10:​20, 21.

Na cava meda masuta kina e dua tale nida kila ni rawa nida masu vua e Cecere Duadua, e lomani keda, e kauaitaki keda tale ga? Koya gona e veivakacegui dina na tikinivolatabu qo: “Sa veiraiyaki na mata i Jiova e vuravura taucoko, me totaki ira vakaidina sa dodonu na lomadra vua.”​—2 Veigauna 16:9.

[Tikina bibi ena tabana e 9]

Na cava meda masuta kina e dua tale nida kila ni rawa nida masu vua e Cecere Duadua, e lomani keda, e kauaitaki keda tale ga?

[Kato/​iYaloyalo ena tabana e 8]

Dina se Lasu

E BULA DINA TIKO O SETANI: DINA

“O Setani . . . e dau vukici koya tiko ga me agilosi ni rarama.”​—2 Korinica 11:14.

“Moni yalomatua, ni yadra tiko. E veilakoyaki voli na kemuni meca, na Tevoro, me vaka na laione e tagi, e vakasaqara e dua me basuraka.”​—1 Pita 5:8.

“O koya e valavala ca tiko ga e tovata kei na Tevoro, baleta ni se valavala ca tiko mai na ivakatekivu na Tevoro.”​—1 Joni 3:8.

“O koya gona, moni vakamalumalumutaki kemuni vua na Kalou; moni vorata na Tevoro, ena qai dro tani vei kemuni.”​—Jemesa 4:7.

“Na Tevoro . . . E daulaba o koya mai na ivakatekivu, e sega ni dei ena dina, ni sega ga vua na dina. Ni vosa lasu, e vosataka ga na ka e tu e lomana, baleta ni daulasulasu, e tama ni lasu kece.”​—Joni 8:44.

NIDA MATE EDA LAI BULA KECE I LOMALAGI: LASU

“E na buno ni matamu ko na kania kina na kemu kakana, ka yacova na siga ko na suka tale kina ki na qele; ni ko a buli maikina eliu: ni ko sa kuvu ni qele ga, ia ko na suka tale mo kuvu ni qele.”​—Vakatekivu 3:19.

“Ni ra sa kila ko ira sa bula ni ra na mate: ia ko ira na mate era sa sega ni kila e dua na ka.”​—Dauvunau 9:5.

“A ka kecega sa vakaitavi kina na ligamu, mo kitaka ga e nomui gu; ni sa sega na cakacaka, se na vakasama, se na kila ka, se na vuku, e nai bulubulu, o koya ko sa lako tiko kina.”​—Dauvunau 9:10.

“Sa lako tani na nonai cegu, a sa suka ko koya ki na kena qele; e na siga dina ko ya sa oti na ka e vakanananu kina.”​—Same 146:4.

ERA KAUAITAKI KEDA NA AGILOSI YALODINA: DINA

“Na agilose i Jiova, sa tiko vakavolivoliti ira era sa rerevaki koya, ka sa vakabulai ira.”​—Same 34:7; 91:11.

“Era [agilosi] sega beka ni yalo dauveiqaravi o ira kece qo, era talai yani mera qaravi ira era na rawata na icovi ni bula?”​—Iperiu 1:14.

“Au qai raica e dua tale na agilosi ni vuka voli e macawa, e kacivaka tiko na itukutuku vinaka tawamudu vei ira era tiko e vuravura, vei ira na veimatanitu, na veiyavusa, na duivosavosa, kei na tamata kece, e kaya ena domolevu: ‘Moni rerevaka na Kalou, moni vakalagilagi koya.’”​—Vakatakila 14:​6, 7.

ERAU TAUTAUVATA O JISU KEI NA KALOU: LASU

“Au vinakata moni kila ni ulu ni tagane yadua o Karisito, e ulu ni yalewa na tagane, e ului Karisito na Kalou.”​—1 Korinica 11:3.

“Ni sa na vakamalumalumutaki na ka kece vua, ena qai vakamalumalumutaki koya tale ga na Luvena vei koya a vakamalumalumutaka na ka kece vua, me rawa ni ka kece ga na Kalou vei ira na tamata kece ga.”​—1 Korinica 15:28.

“Au tukuna vakadodonu vei kemuni, e sega ni dua na ka e cakava ga vakataki koya na Luvena, na ka ga e raica ni cakava o Tamana.”​—Joni 5:19.