Wase e 113

Yalomalumalumu ena iOtioti ni Lakosivia

ERAU sa tadu ki Jerusalemi, ko Pita kei Joni ena i vakaro i Jisu, e rau sa vakarautaka sara na veika ni Lakosivia. Eratou rairai yaco yani e muri ko Jisu kei iratou na le tini na i apositolo, ena kena yakavisiga. Sa laki dromu yani na matanisiga ena vunilagi ni ratou sirova sobu mai na Ulunivanua ni Veiolive ko Jisu kei iratou na nona i lawalawa. Oqo e sa i otioti ni siga ena nona sarava sobu na koro mai na ulunivanua oqo me yacova na nona vakaturi mai na mate.

E sega ni dede sa ratou yaco mai na koro ko Jisu kei na nona i lawalawa ka ratou lako yani ki na vale eratou laki solevutaka kina na Lakosivia. Eratou cabeta yani na i kabakaba ki na rumu ena i tabavale e cake, eratou sa kunea ni sa vakarautaki oti tu na veika me ratou na solevutaka kina vakataki iratou na Lakosivia. A vakanamata tu ko Jisu ena kena vakayacori, ni kaya: “Au a gadreva vakalevu me’u ia mada eliu kei kemudou na kana vata ni lakosivia oqo, me’u qai mate emuri.”

E dau kena i valavala, me ra gunuva o ira era tikova na Lakosivia e va na bilo waini. E kena i rairai ni sa taura na i katolu ni bilo, sa qai vakavinavinaka ko Jisu ka kaya: “Taura oqo, ka vota vei kemudou: ni’u sa kaya vei kemudou, Au na sega tale ni gunuva na vua ni vaini, ka malua me yaco mada na matanitu ni Kalou.”

Ni sa caka tiko na i vakayakavi, sa tucake mai ko Jisu, ka luvata na nona i sulu e sau, ka taura e dua na i tauwelu, ka vakasinaita na beseni ena wai. E dau kena i valavala me raica o koya na i taukei ni soqo ni sa vui na yavadra na vulagi. Ia ena gauna oqo e sega ni tiko na i taukei ni soqo, e sa mani cakava ko Jisu na i valavala ni veiqaravi oqo. A rawa ni dua vei iratou na i apositolo me a vakayacora rawa oqo; ia, ena vuku ni se tikoga vei iratou na veiqati, e mani sega ni dua vei iratou e cakava. Oqo eratou madua ni sa tekivu vuya ko Jisu na yavadratou.

Ni sa lako vei Pita ko Jisu, e sega ni vinakata o koya: “Kemuni na sega sara ni vuya na yavaqu.”

“Kevaka ka’u sa sega ni vui iko, ko sa sega ni rawata e dua na ka vei au,” e kaya ko Jisu.

“Noqu Turaga,” e sauma yani ko Pita, “me segai walega na yavaqu, a ligaqu talega kei na uluqu.”

“Ko koya sa sili oti,” e sauma yani ko Jisu, “sa yaga vua me vuya na yavana ga, a sa savasava taucoko: ia dou sa savasava, ka dou sa segai kece.” E kaya oqo ni sa kilai Jutasa Isikarioti ni sa nakita me soli koya yani.

Ena gauna sa vuya oti kina ko Jisu na yavadratou na lewe 12, bau talega kina na yava i Jutasa o koya ena soli koya yani, sa daramaka tale na nona i sulu e sau ka dabe tale ena teveli. Sa qai taroga: “Dou sa kila na ka ka’u sa kitaka vei kemudou, se segai? Dou sa vakatokai au me’ui Vakavuvuli, me’u Turaga talega: ia dou sa vosa dina; ni’u sa vakakina. Ia kevaka ka’u sa vuya na yavamudou, koi au na Turaga kei nai Vakavuvuli, sa dodonu talega mo dou veivui yava: ni’u sa solia e dua na i vakarau vei kemudou, mo dou kitaka me vaka ka’u sa kitaka oti vei kemudou. E dina, e dina, au sa kaya vei kemudou, Sa sega ni levu na tamata ka lailai na nona turaga; se levu ko koya sa talai ka lailai ko koya sa talai koya. Kevaka dou sa kila na veika oqo, dou sa kalougata kevaka dou sa kitaka.”

Sa ka ni vuli vinaka dina ni veiqaravi vakayalomalumalumu! Sa dodonu vei iratou na i apositolo me ratou kakua ni vakasaqara na i tutu me ratou vakaliuci, me ratou nanuma kina ni ratou sa rui bibi ni dodonu me ra qaravi iratou e so tale. Sa gadrevi me ratou muria na i vakarau e kotora ko Jisu. Oqo e sega ni i vakarau wale tu ga vakalotu ni veivui yava. E sega, ia sa i koya na nona lomasoli e dua me veiqaravi ka sega ni veivakaduiduitaki, ka veitalia ga se cakacaka beci beka se sega ni taleitaki. Maciu 26:20, 21; Marika 14:17, 18; Luke 22:14-18; 7:44; Joni 13:1-17.

▪ Na cava e duatani kina na i tovo ni nona raici Jerusalemi ko Jisu ni sa curuma yani me solevutaka na Lakosivia?

▪ Donuya na Lakosivia, na bilo cava a rairai veisoliyaka yani ko Jisu vei iratou na lewe 12 na nona i apositolo ni sa masulaka oti?

▪ Na i valavala ni veiqaravi cava era dauvakayacora na i taukei ni soqo ena nona a tiko voli e vuravura ko Jisu, ia ena vuku ni cava e sega ni vakayacori kina ena gauna sa solevutaka kina ko Jisu kei iratou na i apositolo na Lakosivia?

▪ Na cava na i naki i Jisu ena nona vakayacora na cakacaka beci ena nona vuya na yavadratou na nona i apositolo?