• Sa Bula ko Jisu!
    Na Tamata Rogo Duadua A Bau Bula

    • Wase e 128

      Sa Bula ko Jisu!

      NI RATOU raica na yalewa sa lala na i bulubulu i Jisu, e cici sara yani ko Meri na yalewa ni Makitala me laki tukuna vei Pita kei Joni. Ia, e kena i rairai ni ratou tiko voli ga ena i bulubulu na vo ni yalewa. Sa qai rairai vakasauri mai e dua na agilosi ka sureti iratou yani ki loma.

      Eratou raica mai loma na yalewa e dua tale na agilosi, sa qai kaya vei iratou e dua vei rau na agilosi: “Dou kakua ni rere: ni’u kila ni dou vakasaqarai Jisu tiko, ko koya e a vakoti. Sa sega e ke ko koya: ni sa tu cake tale, me vaka na nona vosa. Dou lako mai, mo dou raica na yasana ka a koto kina. Dou lako vakatotolo ka tukuna vei iratou na nona tisaipeli ni sa tu cake tale mai na mate ko koya.” Ena rere kei na marau levu, eratou cici talega yani na yalewa oqo.

      Ena gauna oqo sa kunei Pita kei Joni ko Meri, sa kaya vei rau: “Era sa kauta tani na Turaga mai na i bulubulu, ia keitou sa sega ni kila na vanua era sa la’ki vakotori koya kina!” E sega ni bera nodrau cici yani na rua na i apositolo. E totolo sara vei rau ko Joni​—e rairai gone vei rau o koya​—ka liu sara ki na i bulubulu. Eratou sa lesu ena gauna oqo na yalewa, ka sega tale ni dua e tiko e kea. Ni cuva sobu ko Joni ka iro yani ki loma ni i bulubulu, e raica ga na i sole lineni, ia e tiko ga e tuba.

      Ni yaco yani ko Pita, e sega tale ni lomalomarua ni curu sara ki loma. E raica ga na i sole lineni kei na i sulu a viviraki ena ulu i Jisu. E lobi tani koto ga ena dua na vanua. Sa qai curu yani ko Joni ki na i bulubulu, ka vakadinata o koya na i tukutuku i Meri. Ia, e sega mada ga ni bau macala vei Pita se ko Joni ni sa tu cake ko Jisu e dina ga ni dautukuna vakawasoma vei iratou o Koya ni na tu cake mai na mate. Ena nodrau veilecayaki, e rau mani lesu tale ki na nodrau vale, ia e lesu tale mai na i bulubulu ko Meri, ka tikoga kina.

      Sa ratou lako vakariri yani na vo ni yalewa me ratou laki tukuna vei ira na tisaipeli ni sa vakaturi ko Jisu, me vaka a vakaroti iratou kina na agilosi me ratou tukuna. Ena nodratou cici yani e sala ena kena totolo duadua eratou rawata, sa tavaki iratou ko Jisu ka kaya: “Dou sa bula.” Eratou cuva ki yavana, ena nodratou vakarokoroko vua. Sa qai kaya ko Jisu: “Dou kakua ni rere, dou la’ki tukuna ga vei ira na wekaqu me ra lako ki Kalili, era na raici au mai kea.”

      Ena gauna a uneune kina na vanua ka rairai mai na agilosi, era sautaninini na sotia ka ra yaco me ra vakataki ira na mate. Ni ra sa kilai yalodra tale, sa ra qai lako yani ki na koro ka laki tukuna vei ira na bete i liuliu na veika sa qai yaco. Ni ra bosea oti kei ira na nodra “qase” na Jiu, sa qai lewai me sagai me vunitaki na ka sa yaco ena nodra vaqumi na sotia. Sa qai vakaroti vei ira: “Dou kaya vaka oqo, Era a lako mai na nona tisaipeli e na bogi ka butakoci koya ni dou moce tu.”

      Me vaka e rawa ni ra totogi mate na sotia ni Roma ni ra moce ena vanua era yadrava, sa ra qai yalataka na bete: “Ia kevaka e mani la’ki rogoca [na i tukutuku ni nomuni moce] na kovana, keitou na tukuna vakavinaka vua, ka taqomaki kemudou.” Me vaka ni levu sara na i lavo ni veivaqumi, era sa qai vakayacora na sotia na veika era a vakasalataki kina. Sa qai yaco me tete rabailevu na i tukutuku lasutaki ena kedra maliwa na Jiu ni a butakoci na yago i Jisu.

      E luvuci vakalevu ena rarawa ko Meri na yalewa ni Makitala ni se tiko voli ga ena i bulubulu. E vei mada na vanua ena tiko kina ko Jisu? Ena nona cuva sobu ka iro yani ki loma ni i bulubulu, e raica e rua na agilosi e rau vakaisulu vulavula, e rau rairai tale mai! E dua e dabe toka ena vanua a koto kina na ulu i Jisu ka dua tale ena yavana. “Yalewa, a cava ko tagicaka tiko?” e rau taroga.

      E sauma ko Meri: “Ni ra sa kauta tani na noqu Turaga, ka’u sega ni kila se ra vakotori koya evei.” Sa qai vuki o koya ka raica e dua tale na tamata e taroga na taro vata ga o ya: “Yalewa, a cava ko tagicaka tiko?” A taroga talega: “Ko vakasaqarai cei?”

      Ena nona nanuma ni i vakatawa ni loga ni senikau na tamata oqo ena vanua e tiko kina na i bulubulu, e kaya sara vua ko Meri: “Kevaka ko ni sa kauti koya tani, ni tukuna saka vei au na vanua ko ni sa vakotori koya kina, me’u na laki kauti koya.”

      “I Meri!” e kaya vua na tamata. Ia sa kila sara mai na i tovo ni nona dauvosa vua, ni sa i Jisu oqori. “Raponai!” (a kenai balebale Vakavuvuli) e tukuna ko Meri. Ia ena levu ni nona reki, sa qai tauri Jisu. Ia e kaya ko Jisu: “Kakua ni tarai au; ni’u sa bera ni lako cake vei Tamaqu: ia mo lako vei ira na wekaqu, ka kaya vei ira, Au sa lako cake vei koya na Tamaqu, ka Tamamudou; vei koya sa noqu Kalou, ka nomudou Kalou.”

      Sa qai cici yani ko Meri ena vanua era soqoni tiko kina na i apositolo kei ira na vo ni tisaipeli. E laki kuria na i tukutuku ko Meri ena veika era se qai tukuna oti ga e so tale na yalewa ena nodra a raici Jisu vakaturi oti. Ia, o ira na i lawalawa tagane oqo era sega ni vakadinati iratou na i matai ni yalewa, ka rairai sega talega ni vakadinati Meri. Maciu 28:3-15; Marika 16:5-8; Luke 24:4-12; Joni 20:2-18.

      ▪ Ni sa raica ko Meri na yalewa ni Makitala ni sa lala na i bulubulu, na cava e qai cakava, ia na cava era sotava na vo ni yalewa?

      ▪ Na cava e rau cakava ko Pita kei Joni ni sa lala na i bulubulu?

      ▪ Na cava na veika eratou sotava na vo ni yalewa ni ratou sa lako me ratou laki tukuna vei ira na tisaipeli ni sa vakaturi ko Jisu?

      ▪ Na cava era sotava na matasotia yadra, ia na cava na kena i sau mai vei ira na bete ena vuku ni ka era tukuna?

      ▪ Na cava sa qai yaco ena nona tiko duadua voli ko Meri na yalewa ni Makitala ena i bulubulu, ia e vakacava nodra ciqoma na tisaipeli na nodra i tukutuku na yalewa?

  • Rairai Tale Vakavica
    Na Tamata Rogo Duadua A Bau Bula

    • ERA lomabibi voli ga na tisaipeli. Era lecava na i balebale ni sa lala na i bulubulu, ka ra sega ni vakadinata na ka eratou mai tukuna na yalewa. Ena yakavisiga ni Siga Tabu, e rau mani biuti Jerusalemi ko Kaliopasa kei na dua tale na tisaipeli ka lako ki Emeo, e rauta ni tinikadua na kilomita na kena yawa.

      E rau veivosakitaka voli ena nodrau i lakolako na veika e yaco ena siga o ya, e mai salavata sara kei rau e dua na vulagi. A mani taroga: “Ai tukutuku cava oqo drau sa veivosakitaka, ni drau sa lako tu?”

      E rau tu vakadua na tisaipeli, ni veveku na matadrau, ka sauma ko Kaliopasa: “O iko duadua beka na vulagi mai Jerusalemi, ka sega kina ni kila na veika sa qai yaco kina e na gauna oqo?” A taroga o koya: “A ka cava?”

      “Na ka sa baleti Jisu na kai Nasareci,” e rau sauma. “Era a soli koya na bete levu kei ira na neimami turaga me la’ki lewai me mate, ka ra a mani vakoti koya. Ia keimami a nuitaka tu ni sa i koya sara ga e na mai sereki Isireli.”

      E rau sa qai vakamacalataka ko Kaliopasa kei na nona i tokani na ka veivakurabuitaki a yaco ena siga o ya​—⁠na i tukutuku ni rairai mai ni agilosi kei na kena sa lala na i bulubulu​—⁠ia e rau vakatusa na nodrau lecava na i balebale ni veika oqo. Sa qai vunauci rau na tamata vulagi: “Drau sa sesewa, ka sega ni via vakabauta na ka kecega sa tukuna ko ira na parofita! E sega beka ni kilikili kei koya na Karisito me vosota mada na veika oqo, me qai curu ki na nonai ukuuku?” Sa qai vakamacalataka vei rau na tikina e so ena i Vola Tabu me baleta na Karisito.

      Ni ratou sa volekati Emeo yani, sa vaka me lako sara yani na vulagi. Ni levu na ka e rau se via rogoca, e rau sa qai cikeva na tisaipeli: “Ni tiko ga vei keirau, ni sa qai yakavi.” E mani tiko kina me vakayakavi. Ena nona masu ka dovia na madrai ka solia yani vei rau, rau sa qai kila ni ko Jisu dina ga o ya ka vakamataliataki koya ena yago vakatamata. Ia a qai takali tani vakasauri vei rau.

      Sa qai macala oqo vei rau na vuna e kila kina e levu na ka na vulagi! “Sa sega li ni katakata sara na yalodaru,” e rau veikayaka, “ni datou sa veivosaki kaya e na gau-ni-sala, ni sa vakamacalataka talega vei kedaru nai Vola Tabu ko koya?” E sega ni bera ni rau sa tu cake ka lesu vakusakusa yani ki Jerusalemi, rau kunei iratou kina na i apositolo kei ira tale na so era sa soqoni vata tiko. Ni bera ni rau qai vosa ko Kaliopasa kei na nona i tokani, era sa tukuna ena marau na kena vo: “Sa tucake dina na Turaga, ka sa rairai oti vei Saimoni!” E rau sa qai vakamacalataka na lewe rua na i valavala ni nona rairai vei rau ko Jisu. Oqo na i kava ni gauna ena siga tikoga oya me rairai kina vei ira nona dui tisaipeli.

      E vakasauri na nona rairai ko Jisu ena i kalima ni gauna. E dina ga ni sogo vinaka tu na katuba ni vale ena nodra rerevaki ira na Jiu na tisaipeli, e curu ga yani o koya ka laki duri tu ena kedra maliwa, ka kaya: “Dou vakacegu ga.” Eratou rere, ni ratou nanuma ga ni ratou sa raica e dua na yalo. Ena nona vakamacalataka o koya ni sega ni yalo e sikavotu, e kaya kina ko Jisu: “Dou sa kidroa ena vuku ni cava? ka sa tubu na vakanananu e na lomamudou e na vuku ni cava? raica na ligaqu kei na yavaqu, sai au dina ga: tarai au, ka raica; ni sa sega ni vakalewena se vakasuina na yalo, me vaka dou sa raica vei au.” Era sega tikoga ni vakabauta rawa.

      Me vukea nodratou vakadinata ni ko Jisu dina o ya, sa qai taroga: “E tiko vei kemudou e so na ka me laukana?” Ni taura e dua na tiki ni ika tavu ka kania, sa qai kaya: “Oqo na vosa ka’u a daukaya vei kemudou ni’u a tiko kei kemudou [ni bera na noqu mate], ni na yaco kecega na vosa sa tukuni au, sa volai e na vunau i Mosese, kei na nodrai vola na parofita, kei na Same.”

      Ena nona tomana nona vosa ko Jisu, ka vaka ga me ra sa vuli i Vola Tabu tiko o iratou, a qai kaya kina: “Sa volai vakaoqo, ni sa kilikili kei koya na Karisito me vosota vakakina, me tu cake talega mai na mate e nai katolu ni siga; me vunautaki talega na veivutuni, kei na vakabokoci ni i valavala ca, e na vuku ni yacana, vei ira na lewe ni veivanua kecega​—me vakatekivu e Jerusalemi. Ia koi kemudou, dou na dautukutuku e na veika oqo.”