Wase e 112

Roro Mai na iOtioti ni Lakosivia i Jisu

NI SA voleka me mai cava na Siga Tusiti, 11 Naisani, sa tinia na nona vakatavulici iratou na i apositolo ko Jisu mai na Ulunivanua ni Veiolive. Sa siga osooso ka veivakaocai dina! Ia, e rairai ratou sa lesu tale yani ki Pecani me ratou laki moce kina, sa qai tukuna vei iratou na nona i apositolo: “Sa vo ga e rua na siga, me vaka dou sa kila, me yaco na kanavata ni lakosivia, ka sa na soli yani na Luve ni Tamata me lauvako.”

E vakayagataka beka ko Jisu na siga ka tarava, Siga Vukelulu, 12 Naisani, me vakacegu kina kei iratou na nona i apositolo. Ni bera na siga oqo, e a vunauci ira na i liuliu vakalotu ena matana levu, ka kila ni ra saga voli me ra vakamatei koya. Ena Siga Vukelulu e sega ni via vakaraitaki koya yani ena matana levu, ni sega ni gadreva me yaco e dua na ka me vakaleqa na nona solevutaka ena yakavibogi ka tarava na Lakosivia vata kei iratou na nona i apositolo.

Sa ra qai soqoni vata mai ena gauna oqo o ira na bete i liuliu kei ira na qase ena rara ni vale i koya na bete levu, ko Kaiafa. Nodra rarawataka na vosa a tauca vei ira ko Jisu ena siga yani e liu, era sa qai bosea ena nodra bukia vakailawaki na kena vere me ra vesuka ka vakamatea. Ia era kaya tikoga: “Me kakua ga e na gauna ni kanavata, de ra uwe kina na tamata.” Era rerevaki ira na tamata, ni o ira oqo era taleitaki Jisu.

Nodra vakasaga voli na i liuliu ca vakalotu me ra vakamatei Jisu, sa basika yani vei ira e dua na vulagi. Ena levu ni nodra kurabui, ni dua sara ga vei iratou na i apositolo i Jisu, ko Jutasa Isikarioti, a bucina e lomana ko Setani na vakasama me solia yani na nona Turaga! Sa ka levu dina na nodra marau ni vakataroga ko Jutasa: “A cava dou sa via solia vei au, kevaka ka’u na soli koya yani vei kemudou?” Era marau me ra sauma e 30 na tiki ni siliva, na i sau ni dua na bobula ena veiyalayalati ni Lawa i Mosese. Mai na gauna oqori ka lako yani, sa vakaraica ko Jutasa e dua na gauna vinaka me soli Jisu yani kina vei ira me ra yali na lewe vuqa.

Sa tekivutaki oqo na 13 Naisani ni dromu na siga ena Siga Vukelulu. A yaco yani mai Jeriko ena Siga Vakaraubuka ko Jisu, ia oqo e sa i kaono ka i otioti ni bogi me tiko voli kina mai Pecani. Na siga ka tarava, na Siga Lotulevu, sa i otioti ni vakavakarau me baleta na Lakosivia, ka tekivutaki ni dromu na siga. Oqori na gauna me na vakamatei kina na lami ni Lakosivia ka me vavi taucoko. Eratou na laki solevutaka e vei na kanavata oqori, ia o cei me na laki vakarautaka?

E se bera ni vakamacalataka vinaka ko Jisu na tikina oqori, rairai me tarovi Jutasa me kakua ni laki vakatakila vei ira na bete i liuliu me ra vesuki Jisu ena gauna e solevutaki kina na Lakosivia. Ia oqo, rairai sa yakavisiga ni Siga Lotulevu, sa talai Pita yani kei Joni ko Jisu mai Pecani, ka kaya, “Mo drau lako ka vakarautaka na kakana ni lakosivia, me da kania.”

“E vei na tikina ko ni sa vinakata me keirau vakarau kina,” e rau tarogi koya.

“Ni drau sa curu ki na koro,” sa qai vakamacalataka ko Jisu, “drau na sota kaya e dua na tamata sa colata e dua na saqa wai; muri koya ki na vale e curu kina. Ka mo drau kaya vua na i taukei ni vale, E tukuna mai na i Vakavuvuli, me tukuni vei kemuni e vei na tiki ni vale me keitou kania kina na kakana ni Lakosivia kei iratou na noqu tisaipeli? E na qai vakaraitaka vei kemudrau e dua na rumu levu e na i taba vale e cake sa vakaiyaya tu; drau la’ki vakarau kina.”

E sega ni vakabekataki ni dua vei ira na tisaipeli i Jisu na i taukeinivale ka rairai sa nanamaki tiko mai ena koro i Jisu ena kena vakayagataki na nona vale ena vuku ni soqo lavotaki oqo. Ia veitalia o ya, ni rau yaco yani ki Jerusalemi ko Pita kei Joni, e rau kunea na veika e kea me vaka ga sa tukuna vakailiu vei rau ko Jisu. E rau laki vakadeitaka na lewe rua me vakarautaki na lami kei na veika vakarautaki tale e so e gadrevi me baleti iratou na lewe 13 eratou na laki solevutaka na Lakosivia, ko Jisu kei iratou na lewe 12 na nona i apositolo. Maciu 26:1-5, 14-19; Marika 14:1, 2, 10-16; Luke 22:1-13; Lako Yani 21:32.

▪ Na cava mada e rairai vakayacora ko Jisu ena Siga Vukelulu, ia ena vuku ni cava?

▪ Na cava e laki bosei ena vale ni bete levu, ia na cava na i naki ni nona sikovi ira na i liuliu vakalotu ko Jutasa?

▪ O cei a tala yani ko Jisu ki Jerusalemi ena Siga Lotulevu, ka cava na kena i naki?

▪ Na cava e rau kunea na talai yani oqo ka baci vakatakila tale na kaukauwa ni cakamana e tu vei Jisu?