Ena Yaco Ninaica na iValu na Amaketoni?

“Au qai raica e dua na isoqosoqo levu, e sega ni dua na tamata e wilika rawa, mai na veimatanitu, veiyavusa, veimatatamata, kei na duivosavosa . . . era bula sivia na veivakararawataki levu.”​—VAKATAKILA 7:9, 14.

A VAKARAU cabolo na ivalu na Amaketoni. Eda kila vakacava?

Era sa tiko rawa e vuravura nikua e dua na ilawalawa era qaravi Jiova ra qai muria na ivakatagedegede cecere ni iVolatabu. Ena veidusimaki ni Kalou sa ra soqoni kina e vica vata na milioni mai na veimatanitu, yavusa kei na duivosavosa mera mai lewe ni dua na mataveitacini era veiyaloni ra qai veilomani. E laurai na mataveitacini qori vei ira na iVakadinadina i Jiova.​—Joni 13:35.

Sa voleka sara me soqoni ira na nona mataivalu o Setani, mera na qai vakacacani ira ena kena ivakatagedegede levu duadua na ilawalawa era veiyaloni voli ga qai vaka mera sega tu ni taqomaki. (Isikeli 38:8-12; Vakatakila 16:13, 14, 16) O na vakadeitaka vakacava na itukutuku dina qori? E vakatakila na iVolatabu na veika ena yaco me vukei keda meda kila na gauna ena yaco kina na ivalu na Amaketoni. E levu na ka e tukuna na iVolatabu sa vakayacori oti.

Veika sa Yaco Tiko

Eratou tarogi Jisu na nona tisaipeli se na kilai vakacava na gauna ena yaco kina na “ivakataotioti ni veika vakavuravura.” (Maciu 24:3) A sauma na nodratou taro o Jisu ni vakamacalataka e dua na gauna “era na veivaluvaluti na veivanua kei na veimatanitu, ena vakilai na leqa ni kakana qai yaco tale ga na uneune ena levu na vanua.” Oti sa qai kaya: “Na ka kece qo era itekitekivu ga ni veika rarawa.” (Maciu 24:7, 8) A vakamacalataka tale ga na yapositolo o Paula na gauna qori me “iotioti ni veisiga, ena vakilai kina e levu na ka dredre.” (2 Timoci 3:1) O nanuma ni vakaibalebaletaka na veika sa yaco tu nikua na parofisai qori?

Na cava ena vakilai kina e levu na ka dredre? A vakamacalataka na yapositolo o Joni na vuna. A parofisaitaka ni na “lekaleka . . . [na] gauna” me vakayacori kina e vuravura na sasaga i Setani kei ira na nona timoni. E tukuni ni o Setani e “cudru vakalevu” ena gauna qori. (Vakatakila 12:7-12) O sa raica na nodra cudru kei na nodra voravora na tamata e veiyasa i vuravura nikua?

A tukuna tale ga o Jisu ni na vakayacori tiko ena gauna dredre qo e dua na cakacaka bibi. E kaya: “Ena vunautaki mada na itukutuku vinaka ni matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava.” (Maciu 24:14) Sa ra vunautaka tiko na iVakadinadina i Jiova nikua na itukutuku vinaka me baleta na Matanitu ni Kalou, ena sivia na 235 na vanua kei na sivia na 500 na vosa. Na ivola vakaivolatabu era vakarautaka, Na Vale ni Vakatawa kei na Yadra!, e kilai me ivola e veisoliyaki vakalevu duadua e vuravura. Era vakadewataka tale ga na iVolatabu na iVakadinadina ena rauta na 100 na vosa. E sega ni saumi na nodra cakacaka, e tokoni ga ena cau. Sa vakayacori tiko beka na parofisai i Jisu ena nodra cakacaka vakavunau?

E vakamacalataki tale ga ena iVolatabu na veika ena yaco veitaravi, sa na qai valuti ira na kena meca na Kalou o Jiova. Meda dikeva mada e tolu na parofisai ena vakayacori.

Veika sa Vakarau Yaco

iMatai ni Parofisai. E kaya na iVolatabu nira na kacivaka na veimatanitu na “vakacegu kei na sautu.” Nira tukuna oti oya era na rairai nanuma nira sa voleka ni walia na leqa lelevu e yaco tu nikua. Ia e cala sara ga na nodra nanuma, ena sega ni vakilai na vakacegu.​—1 Cesalonaika 5:1-3.

iKarua ni Parofisai. Era na qai saqati ira na veisoqosoqo lotu nikua e levu na veimatanitu. O ira na matanitu qori era vakatayaloyalotaki ena iVolatabu mera manumanu kila; na lotu lasu e vuravura e vakatayaloyalotaki ena yalewa e vodoka tiko na manumanu kila qori. (Vakatakila 17:3, 15-18) Ena vakayacora sara ga na manumanu kila vakaivakatakarakara qori na ka e vinakata na Kalou, me vakarusai ira na lotu era lasutaka tiko nira matataka na Kalou.

E vakamacalataka vakaivakatakarakara na yapositolo o Joni na ka ena yaco: “Na tini na ileu o raica kei na manumanu kila, era na cata na saqamua, era na ravuti koya, era na vakaluvawaletaki koya, era na kania na lewena, ra qai vakamai koya ena bukawaqa me yavu sara. E qai uqeta na lomadra na Kalou mera cakava na nona inaki.”​—Vakatakila 17:16, 17.

iKatolu ni Parofisai. Ni ravuti oti o lotu lasu, ena liutaki ira na veimatanitu o Setani mera vakacacani ira na sokaloutaka na Kalou o Jiova.​—Vakatakila 7:14; Maciu 24:21.

Ena Tarai Iko Vakacava Qori?

O na rairai lomalomaruataka na kena vakayacori na veika kece sa tukuni oti mai ke o se sega ni vulica vinaka na iVolatabu. Ia e tiko na vuna vinaka me vakabauti kina ni na yaco kece qori, ena vakayacori tale ga ena dua na gauna ga qo. E vakadeitaki qori ena levu na parofisai ena iVolatabu sa vakayacori oti.a

Vakacava mo vulica na vuna era vakabauta kina na iVakadinadina i Jiova ni sa voleka na “ivalu ni siga levu ni Kalou Kaukaua Duadua” kei na vuna mo kua ni rerevaka kina? Mo kerei ira mera vakamacalataka vei iko na ka e kaya na iVolatabu mo cakava mo dua tale ga vei ira ena taqomaka na Kalou o Jiova. (Vakatakila 16:14) Na ka o na vulica ena rairai veisautaka nomu rai me baleta na veigauna se bera mai.

[iVakamacala era]

[Tikina bibi ena tabana e 8]

E rawa beka ni tukuni ni vakayacori na parofisai vakaivolatabu ena nodra cakacaka na iVakadinadina i Jiova?