Taro na Dauwiliwili . . .

Ena vakarusai beka na vuravura?

▪ Eso era vakabauta ni na vakarusai na vuravura ena 21 Okotova, 2011. Ia a sega ni yaco qori. A sega tale ga ni yaco na nona parofisai o Harold Camping e dua na daukakaburaki ena retio mai Merika. A tukuna ni na yaco na Siga ni Lewa ena 21 Me, 2011​—ena kurei vuravura e dua na uneune vakaitamera, oti e lima na vula ena qai rusa na vuravura ena 21 Okotova.

Ena sega ni rusa na vuravura. Ena sega ni vakatara qori o koya e bulia na vuravura. E tukuna na nona Vosa: “O ni a vakataudeitaki vuravura, ka sa tu ga.”​—Same 119:90.

Eso na dauwili iVolatabu era na rairai nanuma ni na vakamai na vuravura qo. Nodra ile e yavutaki ena 2 Pita 3:7, 10: “Ia ena vosa vata ga ya e maroroi kina na lomalagi kei na vuravura ni gauna qo me qai vakamai, e vakalaivi tale ga me yacova na siga ni lewa mera vakarusai kina o ira na sega ni doka na Kalou. . . . Ia ena lako mai na siga i Jiova me vaka na daubutako, ena takali kina vakasauri na lomalagi, ena vadugu vaka na kurukuru na kena rorogo, ena waicala tale ga na ka era tu e lomalagi kei vuravura, ena vakamai na vuravura kei na ka e tu kina.” A vakaibalebaletaka dina e keri na yapositolo o Pita ni na kama na vuravura?

Sega. Eda kila vakacava qori? Me rawa nida kila na kena ibalebale dina, e bibi meda vakatauvatana na ka e vola o Pita kei na ka e tukuni ena iVolatabu taucoko. Ke vakayacori dina na ka e vola o Pita, ena vakamai na lomalagi kei na vuravura​—na bilioni vakabilioni na kalokalo kei na so tale na ibulibuli baleta ni dua wale ga na yasana lailai era tiko kina na tamata ca. O na vakarusa beka e vica na maile na baravi nuku baleta wale ga ni o sega ni taleitaka e dua na mataninuku? E ka vakalialia qori! Ena sega tale ga ni vakarusa o Jiova na ka kece e bulia baleta wale ga ni talaidredre e dua na nona ibulibuli.

Na rai ya e veicalati kei na vosa i Jisu Karisito ni a tukuna: “Era marau na yalomalua, nira na taukena na vuravura.” (Maciu 5:5; Same 37:29) Ena rawa beka vua e dua na tama dauloloma me tara e dua na vale vei ratou nona vuvale oti me qai vakama? (Same 115:16) Ena dredre meda vakasamataka ni na cakava ya! O Jiova e sega wale ga ni Dauveibuli, e tama dauloloma tale ga.​—Same 103:13; 1 Joni 4:8.

A vakayagataka na vosa “vuravura” o Pita me vakaibalebaletaka na kawatamata​—o ira na tamata ca. Dikeva ni a vakatauvatana qori o Pita kei na waluvu ena siga i Noa. (2 Pita 3:5, 6) Ena gauna oya era vakarusai ga na tamata ca, a sega ni vakarusai na vuravura, na turaga yalododonu o Noa kei na nona vuvale. Na “lomalagi” tale ga e tukuna o Pita e vakatakarakarataka e dua na ka. E vakaibalebaletaka na veiliutaki vakatamata. O ira gona na tamata ca era sega ni veivutuni era na vakarusai, o ira tale ga na veimatanitu ca era na vakawaicalataki ena qai sosomitaki ira na Matanitu vakalomalagi ni Kalou.​—Taniela 2:44.

Ena rusa beka na vuravura qo? Sega. Ena rusa ga na vuravura vakaivakatakarakara, ya o ira na tamata ca. Ena tu ga me tawamudu na vuravura qo kei ira na yalododonu.​—Vosa Vakaibalebale 2:21, 22.