O Vakabauta na Cakamana e Volatukutukutaki ena iVolatabu?

KE DUA e talanoataka vei iko e dua na italanoa veivakurabuitaki, na nona daudina ena vakatau beka kina na nomu vakabauta na ka e talanoataka? Na nomu vakabauta na ka e tukuna ena sega wale ga ni vakatau ena iwalewale ni nona italanoa, ena vakatau tale ga ena nona daudina tiko mai ena veigauna sa oti. Ke sa vakayabaki na nona dau tukuna vei iko na ka dina, qai sega ni dau lasutaki iko, o na vakabauta na ka e talanoataka.

E va tale ga qori na cakamana e volatukutukutaki ena iVolatabu. Sega ni dua vei keda a donuya na gauna a yaco kina na cakamana kece qori. Ia eda rawa ni vakadeitaka ni rawa ni vakabauti na itukutuku ena iVolatabu, e tukuna tale ga na ka dina. Ena sala cava? Qo e vica na vuna eda na vakabauta sara ga kina na itukutuku ni cakamana ena iVolatabu.

E levu na cakamana a vakayacori e matanalevu. Ena so na gauna, e vica vata na udolu se vica vata na milioni era raica sara ga. (Lako Yani 14:21-31; 19:16-19) A sega ni vunitaki vei ira na lewenivanua na kena vakayacori.

E sega ni vereverea na cakamana. E rawarawa ga na ka e vakayagataki kei na ka e caka, e sega tale ga ni caka eso na iba me veivakasesei. E levu na cakamana e volatukutukutaki ena iVolatabu a tawanamaki na kena yaco qai vakayacori ena nodra kerekere eso. (Marika 5:25-29; Luke 7:11-16) Koya gona, e sega ni rawa ni tukuni ena gauna qori ni lewa o koya e cakamana na ka e yaco.

Sega ni nodra inaki o ira era cakamana mera vaqara rogo, raici cake se mera vutuniyau kina. Ia me vakalagilagi ga kina na Kalou. (Joni 11:1-4, 15, 40) Ena cudruvi o koya e via saga me rawaka mai na kaukaua ni cakamana.​—2 Tui 5:15, 16, 20, 25-27; Cakacaka 8:18-23.

Na levu ni cakamana e volatukutukutaki ena iVolatabu e dusia ni sega ni cakacaka ni tamata. Kena ivakaraitaki, a maravu na wasawasa qai ruru na cagi, a veisau na wai me waini, a tarovi qai tekivu tale na uca, nodra vakabulai na tauvimate, era rai tale ga na mataboko. Na cakamana kece oya kei na levu tale e dusia ni veivakamuai kina e dua na kaukaua e uasivia na kaukaua ni tamata e lewa na veikabula kece.​—1 Tui 17:1-7; 18:41-45; Maciu 8:24-27; Luke 17:11-19; Joni 2:1-11; 9:1-7.

O ira mada ga na dauveitusaqati era raica na cakamana, era sega ni vakatitiqataka na ka a yaco. Na gauna a vakaturi Lasarusa kina o Jisu na nona itokani, era sega ni bau vakataroga na nona meca, era iliuliu ni lotu, ni a mate dina o Lasarusa. Na cava na vuna? Ni sa va na siga nona bulu tu o Lasarusa. (Joni 11:45-48; 12:9-11) Ni oti mada ga e vica vata na senitiuri nona mate o Jisu, era tukuna tu ga o ira na vola na Jewish Talmud ni tiko dina vei Jisu na kaukaua me cakamana. Ia era dau vakataroga ga na ivurevure ni nona kaukaua. E va tale ga kina na gauna erau kau kina na tisaipeli i Jisu ena nodra mataveilewai na Jiu, a sega ni tarogi vei rau, “Drau dau cakamana?” Ia erau a tarogi ga: “Ena kaukaua i cei se yaca i cei drau cakava tiko kina na ka qo?”​—Cakacaka 4:1-13.

Koya gona, o vakabauta na ka e tukuna na iVolatabu me baleta na cakamana? Mai na ka eda sa dikeva, e matata kina ni rawa ni vakabauti na itukutuku ena iVolatabu me baleta na cakamana. E tiko eso tale na vuna eda rawa ni vakabauta kina na itukutuku qori ena iVolatabu. Kena ivakaraitaki, ena gauna e dau talanoataka kina na iVolatabu e dua na ka, e dau tukuna vei keda na gauna, na vanua, kei na yacadra o ira era vakaitavi kina. O ira mada ga na dauvakalewa na iVolatabu era qoroya ni donu vinaka na itukutuku matailalai ni gauna makawa era kune ena iVolatabu. E sa vakayacori e vica vata na drau na parofisai ena iVolatabu, sa vakayacori mada ga na ka matailalai a tukuni ni na yaco. Kuria qori, e tu ena iVolatabu e levu na ivakasala me baleta na ka mera cakava na tamata mera veimaliwai vinaka kina​—na ivakasala e sa vukei ira e levu e duidui na nodra yabaki ni bula, e duidui tale ga na nodra isususu. E sega ni vakatauvatani rawa na ivakasala e kune ena iVolatabu me baleta na noda veimaliwai na tamata.

Ke o se bera ni vakabauta na ka e volatukutukutaki ena iVolatabu, vakacava mo vakayagataka e vica na gauna mo dikeva vakavinaka kina? Na levu ni nomu kila na ka e tukuna, na levu tale ga ni nomu nuitaka. (Joni 17:17) O na raica ni o rawa ni vakabauta na ka e tukuna me baleta na cakamana a yaco ena gauna sa oti. Ni o sa vakabauta na itukutuku kece qori, ena rawarawa mo vakabauta na ka e tukuna na iVolatabu me baleta na ka ena yaco ena gauna se bera mai.

[iYaloyalo ena tabana e 7]

Era sega ni vakatitiqataka o ira era dau saqati Jisu ni a mate o Lasarusa

Cakamana Era na Vakarau Yaco

KAYA mada ke tukuni me caka vei iko e dua na veisele vereverea, o qai kila ni o koya ena seleti iko e se bera vakadua ni cakava e dua na veisele vereverea va qori. Ena macala ga ni o na lomaleqa, se vakacava? Ia vakacava ke o kila ni o koya na dauveisele qori sa kenadau ena veisele, sa cakava tale ga vakavinaka e vica vata na drau na veisele vereverea e tautauvata kei na kena ena vakarau caka vei iko? O na nuitaki koya ni na vukei iko?

Na Kalou o Jiova e vaka e dua na vuniwai sa kenadau ena veisele kei na vuravura e vaka na tamata tauvimate e vinakati me caka vua e dua na “veisele” levu. E yalataka na Kalou o Jiova ena nona Vosa na iVolatabu ni na vakalesuya mai na Parataisi ena vuravura qo. (2 Pita 3:13) Ia me rawa ni yaco qori, ena vinakati me vagalalataki mada qai vakawabokotaki vakadua na ka ca. (Same 37:9-11; Vosa Vakaibalebale 2:21, 22) E dodonu me muduki na veika ca kece eda raica tu ena gauna qo ni bera ni vakalesui mai na parataisi. Me yaco qori ena gadrevi kina na cakamana!​—Vakatakila 21:4, 5.

Era vakabauta na iVakadinadina i Jiova ni sa voleka na gauna me yaco kina na veisau lelevu qori. Na vuna? Baleta na cakamana e sa vakayacora oti na Kalou o Jiova e vakadinadinataka ni tu vua na kaukaua me vakayacora na ka sa yalataka. Dikeva mada qo e ono na cakamana e volatukutukutaki ena iVolatabu qai raica na ka e yalataki tu kina me baleta na gauna se bera mai.

Tomana tiko ga nomu vulica na veika e yalataka tu na iVolatabu me baleta na noda gauna se bera mai. Ni o vakaukauataka tiko ga nomu vakabauta, ena dei kina na nomu inuinui​—na inuinui ni nomu na vakadinadinataka sara ga na yaga ni cakamana ena vakayacora o Jiova.

[Kato/​iYaloyalo ena tabana e 9, 10]

CAKAMANA:

A VAKANIA O JISU E VICA VATA NA UDOLU ENA VICA NA MADRAI KEI NA IKA​—MACIU 14:13-21; MARIKA 8:1-9; JONI 6:1-14.

YALAYALA:

“Ena qai vuataka na vuana ko vuravura; Ena qai vakalougatataki keda na Kalou, io, na noda Kalou.”​—SAME 67:6.

KENA IBALEBALE:

ENA SEGA TALE NI DUA ENA WALOKAI.

CAKAMANA:

A VAKABULAI IRA NA MATABOKO O JISU.​—MACIU 9:27-31; MARIKA 8:22-26.

YALAYALA:

“Ena qai rai na matadra na mataboko.”​—AISEA 35:5.

KENA IBALEBALE:

ERA NA RAI KECE NA MATABOKO.

CAKAMANA:

A VAKABULAI IRA NA LOKILOKI O JISU.​—MACIU 11:5, 6; JONI 5:3-9.

YALAYALA:

“Ena qai ladelade na lokiloki me vaka na me kila.”​—AISEA 35:6.

KENA IBALEBALE:

ERA NA VAKABULAI KECE O IRA ERA VAKALEQAI NA ITUVAKI NI YAGODRA.

CAKAMANA:

LEVU NA VEIMATAQALI TAUVIMATE A WALIA O JISU.​—MARIKA 1:32-34; LUKE 4:40.

YALAYALA:

“Na lewe ni koro ena sega ni kaya, Ka’u sa tauvi mate.”​—AISEA 33:24.

KENA IBALEBALE:

SA NA SEGA TALE NA TAUVIMATE. EDA NA MARAUTAKA NA BULA UASIVI.

CAKAMANA:

A LEWA O JISU NA DRAKI.​—MACIU 8:23-27; LUKE 8:22-25.

YALAYALA:

“A ra na tara vale, ka tiko kina; era na tea eso na were-ni-vaini, ka kania na vuana, era na sega ni oca walega.”​—AISEA 65:21, 23.

“Ena yawa ga vei iko na veivakararawataki, ni na sega na ka mo rerevaka; kei na taqaya, ni na sega ni torovi iko.”​—AISEA 54:14.

KENA IBALEBALE:

ENA SEGA TALE NA LEQA TUBUKOSO.

CAKAMANA:

A VAKATURI IRA NA MATE O JISU.​—MACIU 9:18-26; LUKE 7:11-17.

YALAYALA:

‘O ira kece na tu ena ibulubulu era na tucake mai.’​—JONI 5:28, 29.

“E qai solia mai o wasawasa na mate era tu vua, erau solia tale ga mai o mate kei Etesi na mate e tu vei rau.”​—VAKATAKILA 20:13.

KENA IBALEBALE:

ERA NA VAKATURI O IRA NA WEKADA LOMANI ERA SA MATE.