Na iCavacava kei Vuravura​—Rere, Nanamaki, Sega ni Via Kauai

Na cava mada nomu rai me baleta na tikinisiga 21 Tiseba, 2012 ena nodra ivolanivula na Maya, era tukuna kina e levu ni na yaco e dua na veisau e vuravura? Vakatau ena ka o namaka, de dua o na lomavakacegu, rarawa, se o na sega tale ni via kauai kina. Vakacava, qori e dua ga vei ira na na parofisai lasu me baleta na kena vakarusai na vuravura?

Vakacava na “icavacava kei vuravura” e tukuni tu ena iVolatabu? (Maciu 24:​3, King James Version) Eso era rerevaka ni na vakamai na vuravura. Eso era nanamaki tu mera raica na ka ena rawa ni yaco ni vakarusai na vuravura. E levu era sa vuturi ena nodra rogoca tiko ni sa voleka na icavacava. E rawa beka ni yavutaki na mataqali rai va qori ena italanoa lasu?

De dua o na kurabuitaka sara ga na ka e tukuna na iVolatabu me baleta na icavacava kei vuravura. E sega wale ga ni tukuna na iVolatabu na vuna meda rai vakanamata kina ena kena vakarusai na vuravura, e tukuna tale ga ni so era na oca ena wawa ni berabera tale na kena yaco na icavacava. Meda raica mada eso na taro e dau tarogi wasoma me baleta na icavacava kei vuravura kei na kena isau vakaivolatabu.

Ena vakamai na vuravura?

KENA ISAU VAKAIVOLATABU: “Sa vakataudeitaki vuravura [na Kalou] e na kena yavu, me kakua ni yavala rawa ka sega ni mudu.”​—SAME 104:5.

Ena sega ni vakamai na vuravura, se vakarusai ena dua tale na ka. Ia e vakavulica na iVolatabu ni vuravura qo e noda itikotiko dei na kawatamata. E kaya na Same 37:29: “Era na taukena na vanua ko ira na yalododonu, ka tiko kina ka sega ni mudu.”​—Same 115:16; Aisea 45:18.

Ni bulia oti na Kalou na vuravura a kaya ni “sa ka vinaka sara,” e se va qori tiko ga na nona rai. (Vakatekivu 1:31) E sega sara ga ni nona inaki me na vakarusa, e yalataka ga ni na “vakawabokotaki ira . . . na vakarusai vuravura tiko,” ena sega tale ga ni vakalaiva me vakarusai.​—Vakatakila 11:18.

O na rairai lomatarotarotaka na ka e tukuna na 2 Pita 3:7. E tukuna na tikinivolatabu qori: “E maroroi . . . na lomalagi kei na vuravura ni gauna qo me qai vakamai.” Vakacava e vakaibalebaletaka tiko na tikinivolatabu qori ni na vakamai na vuravura? E dau vakayagataka ena so na gauna na iVolatabu na matavosa “lomalagi,” “vuravura,” kei na ‘kama’ me vakatakarakarataka e dua na ka. Kena ivakaraitaki, ni tukuna na Vakatekivu 11:1: “A sa gusu vata ko vuravura taucoko,” e vakayagataka na vosa “vuravura” me vakaibalebaletaka na kawatamata.

Koya gona, na veitikina wavolita ni 2 Pita 3:7 e vakaraitaka ni lomalagi, vuravura, kei na kama era ivakatakarakara ga. Ena tikina e 5 kei na 6 e vakatauvatani tiko kei na Waluvu ena siga i Noa. Ena siga ya a vakawabokotaki na vuravura makawa, ia a sega ni vakarusai na vuravura qele. Na “vuravura” a vakarusai ena gauna ya, e dusi ira na kawatamata ca qai voravora. (Vakatekivu 6:11) E vakarusai tale ga na “lomalagi”​—e vakaibalebaletaki ira na tamata era veiliutaki tu e vuravura ena gauna ya. E va qori tale ga na ka e parofisaitaki ena 2 Pita 3:​7, e dusia ni na vakarusai vakadua na kawatamata ca kei na veiliutaki ca me vaka ga e vakamai.

Na cava ena yaco ena icavacava kei vuravura?

KENA ISAU VAKAIVOLATABU: “Sa takali tiko yani na vuravura kei na kena gagadre, ia o koya e cakava na loma ni Kalou ena tu ga me sega ni mudu.”​—1 JONI 2:17.

“Na vuravura” ena vakarau takali yani e sega ni vuravura qele, e dusi ira ga na lewe i vuravura kece era sega ni muria na loma ni Kalou. Me vaka ga na nona rawa ni vakabula e dua e tauvimate na dauveisele ena nona seleta laivi e dua na kenisa e tubu tiko e yagona, na Kalou tale ga ena ‘muduka tani’ na tamata ca mera marautaka kina na bula e vuravura na tamata vinaka. (Same 37:9) Ena vakasama vata qori, “na icavacava kei vuravura” ena kauta mai e dua na ka vinaka.

Me vaka ni na tiko eso na kawatamata era na bula sivita na icavacava qai sega ni vakarusai na vuravura qele, ena veiganiti gona me tarava mai e dua na itabagauna vou, kei na ituvaki vou. E tukuna na iVolatabu ni na yaco dina qori, baleta ni dau cavuta na “gauna se bera mai.”​—Luke 18:30.

E tukuna o Jisu me baleta na gauna se bera mai ni na “vakavoui na ka kece.” Ena gauna ya ena vakalesuya tale o Jisu na ka a nakita taumada na Kalou vei keda na kawatamata. (Maciu 19:28) Eda na marautaka kina

• Na vuravura parataisi ena vakilai kina na bula sautu kei na vakacegu.​—Aisea 35:1; Maika 4:4.

• Na cakacaka e marautaki qai vakainaki kina na bula. ​—Aisea 65:​21-23.

• Ni sa na oti vakadua na tauvimate.​—Aisea 33:24.

• Ni sa na sega tale na bula vaqase.​—Jope 33:25.

• Nira na vakaturi na mate.​—Joni 5:​28, 29.

Ke da cakava na “loma ni Kalou” kei na ka e vinakata, eda na sega ni rerevaka na icavacava kei vuravura, eda na rai vakanamata ga kina.

Sa voleka dina na icavacava kei vuravura?

KENA ISAU VAKAIVOLATABU: “Ni dou raica ni sa yaco na ka kece qo, dou kila sara ni sa voleka na matanitu ni Kalou.”​—LUKE 21:31.

E vola o Parofesa Richard Kyle ena ivola The Last Days Are Here Again, “na kena yaco vakasauri na veiveisau kei na nodra tiko yavavala na lewenivanua, e vakavuna mera vakamacalataka kina e levu na ka e rawa ni yaco ena icavacava kei vuravura.” Vakabibi ke sega ni vakamacalataki rawa na vuna e yaco tiko kina na veiveisau kei na tiko yavavala.

Ia eso na parofita ena iVolatabu era parofisaitaka na icavacava kei vuravura, era sega ni tukuna na veika ca e yaco tiko ena nodra gauna. Ia e uqeti ira na Kalou mera vakamacalataka na ituvaki e dusia ni sa voleka sara na icavacava kei vuravura. Raica mada eso na parofisai qori qai saga mo vakadeitaka ke sa yaco tiko nikua.

• iValu, leqa ni kakana, uneune, kei na matetaka e rawa ni veivakamatei.​—Maciu 24:7; Luke 21:11.

• Levu tiko ga na basulawa.​—Maciu 24:12.

• Nodra vakacacana tiko na vuravura na kawatamata. ​—Vakatakila 11:18.

• Nodra lomani ira ga na tamata, lomana na ilavo kei na marau ra qai sega ni lomana na Kalou.​—2 Timoci 3:​2, 4.

• Leqa ni vuvale.​—2 Timoci 3:​2, 3.

• Sega ni kauaitaki na ivakadinadina ni sa voleka na icavacava.​—Maciu 24:​37-39.

• Vunautaki ni itukutuku vinaka ni Matanitu ni Kalou e veiyasa i vuravura.​—Maciu 24:14.

Me vaka e tukuna o Jisu, nida raica na “ka kece qo” e dusia ni sa voleka na icavacava kei vuravura. (Maciu 24:33) Era vakabauta na iVakadinadina i Jiova ni sa yaco dina tiko na ivakatakilakila kece, ra qai wasea na ka era vakabauta vei ira eso tale ena nodra vunau ena 236 na vanua.

Ni sega ni yaco na ka e namaki me baleta na icavacava, e kena ibalebale ni na sega ni yaco?

KENA ISAU VAKAIVOLATABU: “Ena gauna era kaya kina: ‘Na vakacegu kei na sautu!’ ena qai yaco vakidacala vei ira na veivakarusai me vaka ga na taratara ni yalewa bukete; era na sega ni dro rawa.”​—1 CESALONAIKA 5:3.

Na iVolatabu e vakatauvatana na rusa ni vuravura kei na nona taratara e dua yalewa bukete​—e sega ni tukuni rawa na mosi nei tina, qai yaco vakasauri. Na gauna e bukete tu kina e dua e tautauvata sara ga kei na gauna e voleka kina na icavacava, ni na kila vinaka o tina e levu na ivakatakilakila ni sa na vakarau vakasucu. De dua ena tukuna vua o vuniwai na gauna e namaki vua me na vakasucu kina; ia ke berabera mada ga na gauna qori, ena vakadeitaka ga o koya ni na sucu na luvena. E va tale ga qori na kena sega ni yaco na ka e namaki me baleta na icavacava, eda na vakadeitaka ga nida sa bula dina tu ena “iotioti ni veisiga.”​—2 Timoci 3:1.

De dua o na taroga: ‘Ke sa matata tu na ivakatakilakila nida sa volekata yani na icavacava, na cava ga era sega ni kidava kina e levu?’ E vakamacalataki ena iVolatabu ni levu era na sega ni kauaitaka na ivakadinadina ni sa voleka na icavacava. E levu era sega ni vakabauta ni sa qai ca tiko ga na ituvaki kei vuravura ena iotioti ni veisiga qo, ia era dau vakalialiai ira ga na tamata ena nodra tukuna: “Mai na gauna era mate kina na tukada, e duadua tu ga na ka kece me vaka mai na gauna e buli kina na vuravura.” (2 Pita 3:​3, 4) Kena ibalebale, sa matata vinaka tu na ivakatakilakila ni otioti ni veisiga, ia e levu era na vakalecalecava.​—Maciu 24:​38, 39.

Eda raica ena ulutaga qo e vica wale ga na ivakadinadina vakaivolatabu ni sa voleka na icavacava.a O via kila e levu tale na kena isau vakaivolatabu? Ke o vinakata, vakacava mo raici ira na iVakadinadina i Jiova qai ciqoma nodra veisureti mo vulica wale na iVolatabu? E rawa sara ga me vakayacori na vuli ena nomu vale, ena vanua o nanuma ni ganiti iko, se vakayacori mada ga ena talevoni. E vinakati wale ga na nomu gauna, ia na ka o na rawata kina ena talei sara.