“O Cei Mada na Dauveiqaravi Yalodina e Vuku?”

1, 2. O cei e vakayagataka o Jisu meda vakani kina nikua, na cava e bibi kina meda kila vinaka na ituvatuva qo?

“RA VEITACINI, au sega ni tukuna rawa na levu ni ulutaga oni dau vakarautaka mai e ganiti au sara ga, ra dau qai yaco mai ena kena gauna donu.” Qori nona ivola ni vakavinavinaka e dua na tacida yalewa vei ira na tacida era veiqaravi ena itikotiko liu. Vakacava o duavata kei na ka e tukuna? Levu vei keda eda duavata kei na nona rai. Ia e sega ni dodonu me kurabuitaki qori.

² Na kakana vakayalo eda ciqoma ena kena gauna donu, e vakadeitaka ni dina ena nona yalayala o Jisu na Ulu ni ivavakoso me vakani keda. O cei gona e vakayagataka tiko o Jisu? Ni vakamacalataka tiko o Jisu na ivakatakilakila ni nona tiko, a tukuna ni na vakayagataka “na dauveiqaravi yalodina e vuku” me vakarautaka na ‘kakana ena kena gauna donu’ vei ira na nona tamata.a (Wilika Maciu 24:​45-47.) O Jisu e vakayagataka na dauveiqaravi yalodina mera vakani kina na nona imuri dina ena gauna ni ivakataotioti qo. E bibi gona meda kila vinaka na dauveiqaravi yalodina, ni vakatau ena ituvatuva qori na noda bula vakayalo kei na noda veiwekani kei na Kalou.​—Maciu 4:4; Joni 17:3.

3. Na cava e dau vakamacalataki tu ena noda ivola me baleta na vosa vakatautauvata ni dauveiqaravi yalodina?

³ Na cava gona na ibalebale ni vosa vakatautauvata i Jisu me baleta na dauveiqaravi yalodina? Qo na ka e dau vakamacalataki tu ena noda ivola: Ena Penitiko 33 S.K., a lesia o Jisu na dauveiqaravi yalodina me qaravi ira na nona tamata. Na dauveiqaravi e dusi ira vakailawalawa na lotu vaKarisito lumuti kece era bula e vuravura ena itabagauna cava ga me yacova mai nikua. Na tamata ena vosa vakatautauvata i Jisu e dusi ira yadudua na lumuti qori. Ena 1919, a lesia o Jisu na dauveiqaravi yalodina me lewa “na ka kece e taukena”​—na ka kece e vauca na Matanitu ni Kalou e vuravura. Ia ni dikevi vinaka tale na tikina qori, vakasamataki vakatitobu qai masulaki, e laurai ni veiganiti me vakamatatataki na ka eda kila me baleta na dauveiqaravi yalodina e vuku ena vosa i Jisu. (Vkai. 4:18) Meda dikeva mada na vosa vakatautauvata qori kei na sala eda vauci tale tiko ga kina, se da nuitaka na bula e lomalagi se vuravura.

VAKAYACORI NINAICA NA VOSA VAKATAUTAUVATA?

4-6. Na cava eda tukuna kina ni a vakayacori na vosa vakatautauvata i Jisu me baleta na dauveiqaravi yalodina ni sa tekivu na otioti ni veisiga ena 1914?

⁴ E laurai mai na veitikina yavolita ena vosa vakatautauvata ni dauveiqaravi yalodina e vuku, ni na vakayacori qori ena gauna ni ivakataotioti qo, sega ni Penitiko 33 S.K. Meda raica mada se vakamatatataka vakacava qori na iVolatabu.

⁵ Na vosa vakatautauvata me baleta na dauveiqaravi yalodina, e tiki ni parofisai i Jisu me baleta na ‘ivakatakilakila ni nona tiko kei na ivakataotioti ni veika vakavuravura.’ (Maciu 24:3) Na imatai ni iwasewase ni parofisai e volai ena Maciu 24:​4-22, e vakayacori ena rua na itabagauna​—kena imatai ena veiyabaki ni 33 S.K. ina 70 S.K. Na kena ikarua ena vakayacori ena ivakatagedegede levu sara ena noda gauna. Kena ibalebale qori ni na vakayacori tale ga vakarua na vosa i Jisu me baleta na dauveiqaravi yalodina? Sega.

⁶ Ena Maciu 24:​29, a cavuta e liu o Jisu na veika ena yaco ena noda gauna. (Wilika Maciu 24:​30, 42, 44.) Ni vakamacalataka na veika ena yaco ena veivakararawataki levu, a tukuna ‘nira na raica na tamata nona lako mai na Luve ni tamata ena o kei lomalagi.’ Sa qai cavuta na vosa e baleti ira sara ga na bula ena iotioti ni veisiga, a uqeti ira mera yadra tiko ena nona kaya: “Dou sega ni kila na siga ena lako mai kina nomudou Turaga.” A kaya tale ga: “Dou sega ni kila na aua ena lako mai kina na Luve ni tamata.”b Ena ikotokoto qo, a vakayagataka sara ga o Jisu na vosa vakatautauvata ni dauveiqaravi yalodina ena nona vakamacalataka tiko na ka ena yaco ena iotioti ni veisiga. Eda rawa gona ni tukuna ni vosa i Jisu me baleta na dauveiqaravi yalodina a vakayacori ni sa tekivu na otioti ni veisiga ena 1914. E donu vinaka na ivakamacala qori. Cava na vuna?

7. Na taro bibi cava e basika ni tekivu na gauna ni tatamusuki, na cava na vuna?

⁷ Vakasamataka mada na taro qo: “O cei mada na dauveiqaravi yalodina e vuku?” Ena imatai ni senitiuri, a sega sara ga ni dua e vakatitiqataka na tikina qori. Eda sa dikeva mai ena ulutaga sa oti nira dau cakamana na yapositolo, era vakadewa mada ga na isolisoli ni cakamana me vakadinadinataka nira tokoni vakalou. (Caka. 5:12) A matata vinaka gona ena gauna ya o koya e lesia o Jisu me liutaka na cakacaka. Ia e duidui sara na 1914. A tekivu ena yabaki qori na gauna ni tatamusuki qai kena gauna me tawasei kina na co ca mai na witi. (Maciu 13:​36-43) Ni sa tekivu na tatamusuki, a basika e dua na taro bibi: Ena kilai vakacava o ira na lotu vaKarisito lumuti era vaka na witi, ni levu era kaya voli nira imuri dina i Karisito? Ena saumi qori ena vosa vakatautauvata ni dauveiqaravi yalodina. O ira ga na imuri lumuti i Jisu era na vakani vinaka vakayalo.

O CEI NA DAUVEIQARAVI YALODINA E VUKU?

8. Na cava e veiganiti kina me dauveiqaravi yalodina ga o ira na lotu vaKarisito lumuti?

⁸ E dodonu me dauveiqaravi yalodina ga o ira na lotu vaKarisito lumuti e vuravura. Era vakatokai o ira qo mera “matabete vakatui” qai nodra ilesilesi mera “tukuna yani na lagilagi i koya e kacivi [ira] mai na butobuto ina nona rarama uasivi.” (1 Pita 2:9) E veiganiti kina mera vakaitavi sara ga na lewe ni “matabete vakatui” ena veivakavulici ni ka dina.​—Mala. 2:7; Vkta. 12:17.

9. Vakacava era dauveiqaravi yalodina o ira kece na lumuti? Vakamacalataka.

⁹ Vakacava era dauveiqaravi yalodina o ira kece na lumuti e vuravura? Sega. Era sega ni vakaitavi kece na lumuti ena kena vakarautaki na kakana vakayalo vei ira na tacidra ena veiyasa i vuravura. Eso na lumuti era dauveiqaravi se qase ena nodra ivavakoso era okati tale ga mera witi. Era vunau e veivale, veivakavulici ena ivavakoso, era tokona tale ga ena yalodina na veidusimaki mai na itikotiko liu. Ia era sega ni vakaitavi ena vakarautaki ni kakana vakayalo vei ira na mataveitacini e veiyasa i vuravura. Era lumuti tale ga eso na tacida yalewa yalomalumalumu, era sega ni via siova na itavi ni veivakavulici ena ivavakoso.​—1 Kor. 11:3; 14:34.

10. O cei na dauveiqaravi yalodina e vuku?

¹⁰ O cei gona na dauveiqaravi yalodina e vuku? Me salavata ga kei na ivakarau ni nona vakani ira e levu o Jisu ena nona vakayagataki ira e le vica, na dauveiqaravi tale ga e dusia e dua ga na ilawalawa lailai era tacida tagane lumuti. Era vakaitavi sara ga ena kena vakarautaki kei na votai ni kakana vakayalo donuya nona tiko o Karisito. Ena iotioti ni veisiga era sa veiqaravi vata voli mai ena itikotiko liu na lumuti era dauveiqaravi yalodina. Ena veigauna sa oti era dau kilai tu na dauveiqaravi qori me iLawalawa Dauvakatulewa ni iVakadinadina i Jiova. Me nanumi tiko, na vosa “dauveiqaravi” ena vosa vakatautauvata i Jisu e le dua ga, e dusia qori ni dua ga na ilawalawa. Kena ibalebale, era na duavata na iLawalawa Dauvakatulewa nira vakatulewa.

O CEI NA TAMATA ENA VOSA VAKATAUTAUVATA?

11, 12. (a) Na rua na itavi cava e lesi vua na dauveiqaravi yalodina e vuku? (b) Gauna cava e lesia kina o Jisu na dauveiqaravi yalodina me qarava na nona tamata, o cei a digitaka?

¹¹ Me nanumi tiko ena vosa vakatautauvata i Jisu, a lesi vua na dauveiqaravi yalodina e vuku e rua na itavi bibi. Na imatai e lesi me qaravi ira na tamata; na kena ikarua me lewa na ka kece e taukena na nona turaga. Ena qai vakayacori ga na vosa vakatautauvata qori ena iotioti ni veisiga qo, kena ibalebale ni itavi ruarua qori ena qai lesi ni sa tiko o Jisu me veiliutaki vakatui ena 1914.

¹² Gauna cava a lesia kina o Jisu na dauveiqaravi yalodina me qaravi ira na nona tamata? Me saumi qori, meda lesu mada ena 1914​—na itekitekivu ni gauna ni tatamusuki. Eda sa vulica mai ni levu na isoqosoqo lotu era kaya nira lotu vaKarisito. O cei gona ena digitaka qai lesia o Jisu me dauveiqaravi yalodina? A saumi na taro qori ena gauna erau dikeva oti kina o Jisu kei Tamana na valenisoro, se ituvatuva vakayalo ni sokalou, qori mai na 1914 ina itekitekivu ni 1919.c (Mala. 3:1) Erau marautaka na ka erau raica vei ira na ilawalawa lailai ni Gonevuli ni iVolatabu era lomani Jiova kei na nona Vosa mai vu ni lomadra. A vinakati mera vakasavasavataki, ia era yalomalumalumu ni ciqoma qori ena gauna lekaleka era vakatovolei qai vakasavasavataki kina. (Mala. 3:​2-4) O ira na Gonevuli ni iVolatabu yalodina qori era lotu vaKarisito dina era vaka na witi. A gauna ni veivakabulabulataki vakayalo na 1919, a digitaka kina o Jisu eso na tacida lumuti nuitaki mai na ilawalawa qori mera dauveiqaravi yalodina e vuku, a lesia tale ga mera qaravi ira na nona tamata.

13. O cei era okati mera tamata ena vosa vakatautauvata i Jisu, na cava na vuna?

¹³ O cei gona na tamata ena vosa vakatautauvata i Jisu? Kena isau rawarawa ga, qo o ira mera vakani. Ena itekitekivu ni iotioti ni veisiga, era lumuti kece na tamata qori. E muri, era sa mai okati tale ga kina na isoqosoqo levu ni so tale na sipi. Dua na iwiliwili levu ni “dua ga na qelenisipi” era vakarurugi ena veiliutaki i Karisito era so tale na sipi. (Joni 10:16) E yaga ruarua vei ira na ilawalawa qo na kakana vakayalo ena kena gauna donu e vakarautaka na dauveiqaravi yalodina. Vakacava o ira na lewe ni iLawalawa Dauvakatulewa nikua era dauveiqaravi yalodina e vuku? Ena vinakati tale ga mera vakani vakayalo. Koya gona, era vakadinata ena yalomalumalumu ni o ira yadudua era okati tale ga mera tamata ena vosa vakatautauvata me vakataki ira na vo ni imuri dina i Jisu.

14. (a) Na itavi cava e lesi vua na dauveiqaravi yalodina, na cava e okati kina? (b) Na ivakasala cava e tukuna o Jisu vua na dauveiqaravi yalodina e vuku? (Raica na kato “Ke . . . Dauveiqaravi Ca.”)

¹⁴ E lesia o Jisu vua na dauveiqaravi yalodina e vuku e dua na itavi bibi. Ena gauna vakaivolatabu, na dauveiqaravi se dauniyau nuitaki e dau qarava na ka kece ena dua na vale. (Luke 12:42) E nona itavi gona na dauveiqaravi yalodina e vuku me qarava na lewenivuvale vakabauta. Qori e okati kina nona qarava na iyau vakayago, na cakacaka vakavunau, porokaramu ni soqo cokovata kei na soqo ni tikina, na tabaki ni ivola vakaivolatabu me vakayagataki ena cakacaka vakaitalatala, vuli vakataki keda kei na vuli vakaivavakoso. Era vakanuinui na tamata mera vakani ena kakana kece vakayalo e vakarautaka na dauveiqaravi.

LESI NINAICA ME LEWA NA KA KECE E TAUKENA NA TURAGA?

15, 16. E lesia ninaica o Jisu na dauveiqaravi yalodina me lewa na ka kece e taukena?

¹⁵ Na gauna cava e lesia kina o Jisu na ikarua ni nona itavi na dauveiqaravi, oya me lewa “na ka kece e taukena”? A kaya o Jisu: “Ena marau na dauveiqaravi ya ke cakava tiko na nona itavi ena gauna e yaco mai kina nona turaga! Au tukuna vakadodonu vei kemudou, ena lesi koya na nona turaga me lewa na ka kece e taukena.” (Maciu 24:​46, 47) Me nanumi tiko ni lesia o Jisu na ikarua ni nona itavi na dauveiqaravi ena gauna e yaco mai kina, qai raica ni “cakava tiko” ena yalodina na nona itavi me vakarautaka na kakana vakayalo. Koya gona, ena oti toka e dua na gauna mai na nona lesia na imatai ni itavi sa qai lesia na kena ikarua. Me rawa nida kila na sala kei na gauna a lesia kina o Jisu na dauveiqaravi me lewa na ka kece e taukena, ena vinakati meda kila mada e rua na ka: na gauna e yaco mai kina kei na cava e okati ena veika e taukena.

¹⁶ Gauna cava e yaco mai kina o Jisu? E saumi qori ena veitikina yavolita. Me nanumi tiko ni bera ni vakamacalataka na dauveiqaravi, a cavuta o Jisu nona “lako mai,” qori e dusia na gauna ena lako mai me vakarogoya qai veivakarusai ena icavacava ni ituvaki qo.d (Maciu. 24:​30, 42, 44) E laurai gona ena vosa vakatautauvata ni dauveiqaravi yalodina, ni na qai “yaco mai” se “lako mai” o Jisu ena veivakararawataki levu.

17. Na cava soti e taukena o Jisu?

¹⁷ Na cava e okati ena “ka kece e taukena [o Jisu]”? Ni vakayagataka o Jisu na vosa “kece,” a sega ni vakaibalebaletaka tiko ga na ka e taukena e vuravura, ni levu na lewa e soli tu vua e lomalagi. E kaya: “Sa soli vei au na lewa kece mai lomalagi kei vuravura.” (Maciu 28:18; Efeso 1:​20-23) Na ka e taukena ena gauna qo e okati kina na Matanitu vakaMesaia, a soli vua ena 1914, ena veiliutaki vata kei ira nona imuri lumuti ena matanitu qori.​—Vkta. 11:15.

18. Na cava e marautaka kina o Jisu me lesia vua na dauveiqaravi na ka kece e taukena?

¹⁸ Na cava eda sa vulica mai? Ni lako mai o Jisu me veilewai ena veivakararawataki levu, ena raica ni vakarautaka vinaka tiko na dauveiqaravi yalodina na kakana vakayalo ena kena gauna donu vei ira na tamata. Ena marautaka o Jisu me lesia vua na ikarua ni itavi​—me lewa na ka kece e taukena. Ena qai lesi qori vei ira era cakava tiko na itavi ni dauveiqaravi yalodina nira sa rawata na nodra icovi e lomalagi, mera veiliutaki kei Karisito.

19. Vakacava ena vakaicovitaki vakalevu e lomalagi na dauveiqaravi yalodina ni vakatauvatani kei ira na vo ni lumuti? Vakamacalataka.

¹⁹ Vakacava ena vakaicovitaki vakalevu e lomalagi na dauveiqaravi yalodina ni vakatauvatani kei ira na vo ni lumuti? Sega. Na icovi e yalataki ina dua na ilawalawa lailai e rawa nira okati kina eso tale. Kena ivakaraitaki, raica mada na ka e tukuna o Jisu vei ira na 11 na nona yapositolo yalodina ena bogi ni bera ni mate. (Wilika Luke 22:​28-30.) A yalataka o Jisu vei ratou na ilawalawa lailai qori ni ratou na vakaicovitaki ena vuku ni nodratou yalodina. Eratou na veiliutaki vakatui kei koya. Ia ni oti e vica na yabaki, a tukuna o Jisu ni o ira kece na 144,000 era na dabe ena idabedabe vakaturaga mera veiliutaki vata kei koya. (Vkta. 1:1; 3:21) E yalataka tale ga ena Maciu 24:47 ni na lesia e dua na ilawalawa lailai, qori o ira na tagane lumuti era dauveiqaravi yalodina, mera lewa na ka kece e taukena. Kena ibalebale nira na vakaivotavota kece na 144,000 ena veiliutaki e lomalagi.​—Vkta. 20:​4, 6.

20. Na cava e lesia kina o Jisu na dauveiqaravi yalodina, na cava mo nakita dei?

²⁰ Nona vakayagataka o Jisu na dauveiqaravi yalodina e vuku, e muria kina na ituvatuva vata ga ena imatai ni senitiuri, qori nodra vakani e levu ni vakayagataki ira na le vica. A lesia na dauveiqaravi yalodina o Jisu me vakarautaka tiko ga na kedra kakana vakayalo nona imuri dina ena kena gauna donu ena iotioti ni veisiga qo​—se ra mani lumuti se so tale na sipi. Meda nakita dei mada ga meda vakavinavinakataki ira na tacida lumuti era dauveiqaravi yalodina e vuku ena noda tokoni ira tiko ga.​—Iper. 13:​7, 17.