TARO NA DAUWILIWILI
Na cava a tagi kina o Jisu ni bera ni vakaturi Lasarusa, me vaka e tukuni ena Joni 11:35?
▪ E kena ivakarau ga meda dau tagi ni takali e dua na wekada lomani, nida nanumi koya vakalevu. A lomani Lasarusa vakalevu o Jisu, ia na nona tagi a sega ni baleta na nona takali o Lasarusa. A tagi ga ena vukudra na wekai Lasarusa, me vaka e vakamacalataki ena veitikina yavolita a vola o Joni.—Joni 11:36.
Ena gauna se qai rogoca kina o Jisu ni tauvimate o Lasarusa, a sega ni lai raici koya sara vakatotolo me lai vakabulai koya. E tukuni ena iVolatabu: “Ni rogoca [o Jisu] ni tauvimate o Lasarusa, e sega ni mani lako sara, e tiko tale e kea me rua na siga.” (Joni 11:6) Na cava a sega ni lai raici Lasarusa kina vakatotolo o Jisu? E tiko na vuna e cakava kina qori. E tukuna: “Ena sega ni mate o koya ena tauvimate qo, ia ena vakalagilagi kina na Kalou. Ena vakalagilagi tale ga kina na Luve ni Kalou.” (Joni 11:4) Na nona tauvimate o Lasarusa e “vakalagilagi kina na Kalou.” Ena sala cava? Ena vakarau cakava o Jisu e dua na cakamana vakatubuqoroqoro, oya na nona vakaturi nona itokani lomani mai na ibulubulu.
Nona veivosaki o Jisu kei ratou na nona tisaipeli a vakatauvatana na mate ina moce. Oya na vuna a tukuna kina vei ratou ni na ‘lako me lai vakayadrati koya [Lasarusa].’ (Joni 11:11) O Jisu e vakatauvatana na nona vakaturi Lasarusa ina dua na itubutubu e lai vakayadrati luvena a moce tu. A sega gona na vuna me lolositaka kina o Jisu na nona takali o Lasarusa.
Ia na cava ga a qai tagi kina? Meda raica tale mada na veitikina yavolita me kilai kina na kena isau. Ena gauna a raici Meri kina na ganei Lasarusa kei na so tale nira tagi tiko, a ‘vusolo na lomai’ Jisu, a tarai koya sara ga na nodra lolosi. Oya na vuna a ‘tagi kina.’ E mositi Jisu sara ga na nona raica na nodra lolosi na nona itokani lomani.—Joni 11:33, 35.
E kilai mai na ivolatukutuku qori ni tu vei Jisu na kaukaua me vakaturi ira na wekada lomani era sa mate, mera bulabula vinaka tale ga ena vuravura vou sa roro tiko mai. E laurai tale ga kina ni kila vinaka o Jisu na rarawa era vakila o ira sa takali na wekadra lomani ena vuku ni ivalavala ca i Atama. Dua tale na lesoni eda rawa ni vulica kina ni dodonu meda dau kauaitaki ira vakayalololoma o ira era lolositaka tiko na nona takali e dua na wekadra lomani.
A kila o Jisu ni na vakaturi Lasarusa. Ia a tagi ena levu ni nona lomani ira na nona itokani kei na nona kauaitaki ira vakayalololoma. Na noda veikauaitaki vakayalololoma ena uqeti keda tale ga meda “tagi vata kei ira era tagi.” (Roma 12:15) Ni lolosi va qori e dua, e sega ni kena ibalebale ni sega ni vakabauta na inuinui ni veivakaturi. E ivakaraitaki vinaka kina o Jisu ena nona tagi me vakaraitaka na nona kauaitaki ira vakayalololoma na wekai Lasarusa, dina ni na vakarau vakaturi koya.
[iYaloyalo ena tabana e 32]