Vakatudaliga Ina Vosa ni Kalou

¹ E sega ni gadrevi meda kauai ena vosa kece era cavuta na tamata. Ia ni vosa na Kalou, e bibi meda vakarorogo. (Vkru. 28:1, 2) Eda marau gona kina nira a uqeti e so mera vola “na vosa ni Kalou,” me yaga vei keda. (Roma 3:2) Ena baci dua tale na gauna talei na soqo ni tikina sa roro tiko mai oqo meda lai rogoca kina na kena wiliki, kei na kena vakamacalataki na Vosa oqo. Na sala cava o na rawa ni vakatudaliga vinaka kina?

² Yaco Totolo Yani Ena Veimataka: Vakasamataka mada na nodra a maqusa na Isireli ni tukuni vei ira mera na lai veitata kei Jiova ena ulunivanua o Saineai mera rogoca na nona Lawa! (Lako 19:10, 11, 16-​19) Ke vakatale ga oya na nomu rai me baleta na nomu na ciqoma na ivakasala i Jiova ena soqo ni tikina, o na tuvanaka mo na yaco totolo yani ena veisiga. E sega ni rawa nida na rogoca na porokaramu taucoko ke da yaco bera yani, da qai vakasosani ira na kena vo ena noda vaqara idabedabe. Sa na dola tu na matamata ni vanua e caka kina na soqo mai na 8:00 ena mataka, ena tekivu na porokaramu ena 9:30 ena mataka ena veisiga yadua.

³ E so era yaco totolo yani, ia era sega ni se dabe ena gauna e tekivu kina na porokaramu. Na cava na vuna? Sa rui taladrodro na nodra veitalanoa kei ira na nodra itokani, era qai gole ga ina nodra idabedabe ni sa kacivaka o jeameni na sere me tekivu kina na porokaramu. Meda nanuma tiko, ni vo e vica na miniti me lagati na sere me tekivu kina e dua na iwase ni porokaramu, sa na dabe rawa tu na jeameni ena buturara, sa na rogoci tale ga na ivakatagi ni noda sere e dau vakatagitaki taumada. Oya na gauna meda sa dabe rawa kina! Ni qai lagati na itekitekivu ni sere eda sa na veitomani ena lagasere me vakacaucautaki kina o Jiova.

⁴ Dou Vakarorogo Vakavuvale: Nira a soqoni na Isireli me wiliki vei ira na Vosa ni Kalou, e vinakati mera rogoca, ra vuli kina vakavuvale, okati tale ga kina o ira na “gone lalai.” (Vkru. 31:12) E vaka kina ena noda soqo, me kua nira ‘biu wale tu mera veitalia’ na lalai. (Vkai. 29:15) Ra itubutubu, mo ni tuvanaka mo ni dabe vata vakavuvale​—okati kina o ira sa itabagone. E so na itubutubu era dau qai kauti ira na nodra lalai i vale ni vakacegu ni sa lagati na itekitekivu ni sere. Ia oqo ena sega nira vuli kina na lalai mera kila na bibi ni sere kei na masu ena noda sokalou. Ke rawa, de na vinaka mera se tei kau rawa i vale ni vakacegu ni bera ni tekivu na porokaramu!

⁵ Eda na vakarorogo vinaka tale ga ke veirauti vinaka na noda vakacegu ena bogi, me kua tale ga ni bibi na ka eda kania ena loma ni siga. Rogoca vinaka na ka e tukuna tiko o koya e vunau. Saga me kua ni ciriyawa tu na nomu vakasama. Cega na nomu iVolatabu ni wiliki na tikinivolatabu. Vola vakaleleka e so na ka o rogoca. Ni ia tiko na vunau, vakasamataka na cava e tukuni tiko, kei na sala cava e rawa ni yaga kina vei iko. Ni sa cava e dua na siga, dou veivosakitaka vakavuvale na porokaramu ni siga oya. Na tikina cava dou dui taleitaka? Ena yaga vinaka vakacava vei kemudou vakavuvale na ka dou rogoca oqo?

⁶ Vakaraitaka ni O Doka na Vosa ni Kalou: Na noda gauna ni soqo e gauna vinaka tale ga ni noda veitalanoa kei ira na noda itokani, da taravaki cake ena noda veimaliwai. Ke da yaco totolo yani e rawa nida lai veitalanoa ni bera ni tekivu na porokaramu. Ia e so era se dau veitalanoa ga ni vakacagau tiko na porokaramu, ra qai nanuma ni sega nira veivakasosani ni vanua levu eda vakarorogo tiko kina. Ke loma levu mada ga na vanua eda soqoni tiko kina, e dodonu ga meda vakarorogo me vaka ga ena noda dau soqoni ena Kingdom Hall. Me kakua tale ga ni veivakasosani na kena vakayagataki na mobile phone, na itaba se so tale na iyaya vaka oya ni vakacagau tiko na porokaramu.

⁷ Ena gauna a ciqoma kina o Mosese na Lawa mai vei Jiova, “a sa sega ni kania e dua na kakana, se gunu wai.” (Lako 34:28) E kena ibalebale ni sega tale ga ni veiganiti meda kana se gunu ena gauna e vakacagau tiko kina na porokaramu. Me waraki ga na kena gauna dodonu, vakavo ga ke vauci tiko kina e dua na tauvimate bibi.​—Dauv. 3:1.

⁸ Ena so na vanua ni soqo era se dau yavoki vakaveitalia tiko ga e daku ni vanua ni soqo e levu na tacida yalewa, tacida tagane sara tale ga ni vakacagau tiko na porokaramu, ra okati tale ga kina na lalai. E nodra itavi na dauveivukei mera kerei ira oqo mera dui lai dabe. Vei ira na bolecakacaka ena dui tabana, ni oti ga na nodra itavi mera dui lai dabe mera vakarorogo. E dodonu vei ira na bolecakacaka mera dabe tale ga mera vakarorogo, vakavo ga ke lesi mera qarava e so na taba ni cakacaka bibi ena gauna e vakacagau tiko kina na porokaramu. Me kua nira vakaoti gauna tiko ena nodra dui tabana, se ra veitalanoa wale ni vakacagau tiko na porokaramu.

⁹ Me tiko mada ga vei keda na “daliga rogo” nida vakarogoca na Vosa ni Kalou. (Iper. 5:11) Meda vakadeitaka mada ga nida na vakaraitaka na noda doka na Vosa i Jiova ena noda na vakatudaliga ina kena vakamacalataki ena noda soqo ni tikina sa roro mai oqo.