Me Vinaka na Noda iVakarau me Vakalagilagia na Kalou
1 E veitalia se e vei eda tiko kina, ena tukuni keda kei na Kalou eda qarava na noda ivakarau, na noda isulusulu kei na noda sasauni. E vakilai sara vakalevu oqo ena noda soqoni lelevu na tamata ni Kalou, nida laurai levu kina. Ke da ivakaraitaki vinaka, ena vakalagilagi kina na yaca i Jiova. (1 Pita 2:12, VV) Ia na nodra itovo ca, kei na nodra ivalavala tawaveinanumi e lewe vica wale mada ga, ena vakaboicataka na yaca ni Kalou kei na yacadra na nona tamata. (Dauv. 9:18b) Meda nanuma tiko ni na vakatau ina noda ivakarau na nodra na vosa vakavinakataka, se vosacataka na tani na noda isoqosoqo kei na Kalou eda qarava, oqo e dodonu me uqeti keda meda “kitaka [na ka] kecega me vakarokorokotaki kina na Kalou.”—1 Kor. 10:31.
2 iValavala Rakorako Ena Soqo: Meda raica na vanua ni soqo me vaka e dua na Kingdom Hall levu, veitalia se vanua vakacava eda vakayagataka. Me rakorako gona na noda isulusulu kei na noda sasauni me vaka ga ena noda dau tiko ena soqoni ni noda ivavakoso. Ena gauna ni soqo, vaka kina ni suka, meda kua ni dara na isulu tawakilikili, e sega ni rairai matau, ni oqo e laurai kina na yalo ni vuravura, e sega tale ga ni vakaduiduitaki keda. Mera qarauna na tacida yalewa me kilikili na iculacula kei na balavu ni nodra isulu. (1 Tim. 2:9, 10) Se da tiko ena soqo, ena otela, eda lai kana e valenikana, se da lai volivoli ena sitoa, me laurai vei keda nida italatala ni Kalou, meda kua ni veivakatarabetaki.—2 Kor. 6:3.
3 Ena vakayacori tiko ena soqo na papitaiso ena mataka ni Vakarauwai. Na Vale ni Vakatawa, 1 Epereli, 1995, taqana 30, e vakamacalataka na rai me tiko vei keda ena gauna ni papitaiso. E kaya meda “raica vakabibi na papitaiso. E sega ni mai gauna me ia kina na kaikaila, me caka kina na kana kei na gunu, se me gauna ni lasa. E sega tale ga ni gauna me raici tu me vaka na gauna ni vakaloloku, me sa lai vakabibitaki tale vakasivia.” Ena sega ni veiganiti kina vei ira na papitaiso mera dara na isulu e mamare, se ra tagane se yalewa. O koya gona, me vakilai vei keda kece na noda rokova, kei na noda marautaka tale ga na papitaiso vakarisito.
4 E vakadreti keda o Pita meda vakarautaka ‘na ivalavala e kilikili kei keda, na ivalavala savasava kei na daulotu.’ (2 Pita 3:11) Me vukei ira mada ga na tamata lomadina era na raici keda ena soqo ni tikina na “Muria na Vosa ni Kalou” na noda vosa kei na noda ivalavala mera mai kila, ra mai qaravi koya kina na noda Kalou levu sa dodonu ga me ia vakatabakidua vua na veidokai, kei na vakarokoroko.—1 Kor. 14:24, 25, VV.