“Me Cila Vaka Kina na Nomudou Rarama”
1 Na vuravura eda bula tu kina oqo e butobuto tu vakayalo, e butobuto tale ga na kena itovo. Na rarama ni ka dina e vakaraitaka votu “nai valavala butobuto sa sega ni yaga,” meda kua gona ni sikalutu ena veika e dau veivakatarabetaki oqo nida na mate kina. Ena vuku ni ka oqo, e uqeti keda kina na lotu Vakarisito o Paula: “Dou ia tiko nai valavala ni gone ni rarama.”—Efeso 5:8, 11.
2 ‘Na vua ni rarama’ e veibasai sara ga kei na butobuto ni vuravura oqo. (Efeso 5:9) Ena laurai nida vuataka na vua oqo ke da ivakaraitaki vinaka ena noda bulataka na bula vakarisito, meda mataqali tamata e vakadonuya o Jisu. Meda vakaraitaka tale ga na itovo me vaka na yalodina, yalogu, qai vu mai lomada na noda tutaka na ka dina. Na vua oqo ena gadrevi me bulataki e veisiga vaka kina ena noda cakacaka vakaitalatala.
3 Cila ena Gauna Kece Ga: E kaya vei iratou nona tisaipeli o Jisu: “Me cila vaka kina na nomudou rarama e matadra na tamata.” (Maciu 5:16, VV) Nida vakatotomuri Jisu, eda vakacaudreva kina na rarama i Jiova ena noda vunautaka na Matanitu ni Kalou kei na nona inaki. Meda cila me vaka na cina nida sikovi ira e nodra vale, da qai wasea na ka dina e vanua ni cakacaka, koronivuli, vei ira eda tiko veitikivi, se vanua cava ga eda sotavi ira kina na tamata.—Fpai. 2:15.
4 E kaya o Jisu ni so era na cata na rarama. (Joni 3:20) Meda kua gona ni yalolailai ni levu era besetaka “ni cilavi ira na rarama ni tukutuku-vinaka ni serau i Karisito.” (2 Kor. 4:4) E kila o Jiova na loma ni tamata qai sega ni vinakati ira na ivalavala tawadodonu me kune ena kedra maliwa na nona tamata.
5 Nida muria tiko na sala i Jiova da qai marautaka tiko na noda vakararamataki vakayalo, meda qai vakacilava tale mada ga yani. Ke ra raica ena noda itovo ni ‘tiko vei keda na rarama ni bula,’ ena rairai uqeti ira oqori mera veisautaka nodra itovo mera dua tale ga na dauvakacila rarama.—Joni 8:12.
6 Nida vakacilava tiko na noda rarama, eda vakacaucautaka tiko kina na noda Dauveibuli, eda vukei ira tale ga na lomadina mera kilai koya me nodra tale ga na inuinui ni bula tawamudu. (1 Pita 2:12) Ni tiko vei keda na rarama, meda vakayagataka mada ga ena noda vukei ira tale e so, meda tuberi ira tani mai na butobuto vakayalo, ra qai mai vakaitovotaki ira ena itovo ni rarama.