Noda iTovo Rakorako Eda na Vakacaucautaki Kina!
1 “E vakilai na nodra lomavakacegu, na ka e sega ni vakilai ena so tale na matalotu.” “E ka ni marau na qaravi ira na ilala oqo.” Oqo na vosa ni veivakacaucautaki era kaya na vakararai tu ni oti na soqo ni tikina ena yabaki sa oti, e vakadinadinataka ni totoka na keda irogorogo vakaisoqosoqo. (Vkai. 27:2; 1 Kor. 4:9) Vakauasivi ni vakacaucautaki ga kina o Jiova. (Maciu 5:16) E dua tale na gauna vinaka meda vakacaucautaki Jiova kina sa voleka, oya na soqo ni tikina ena yabaki oqo na “Qasenivuli ni Vosa ni Kalou.”
2 Eda dau vakasalataki vakayalololoma e veiyabaki me baleta na itovo rakorako ena soqo ni tikina. Baleta? Ni torosobu tiko ga na rai ni vuravura, isulusulu, kei na kena itovo, eda bese gona ni muria na nodra ivalavala. Eda sega ni vinakata me ca na keda irogorogo. (Efeso 2:2; 4:17) Meda nanuma matua e vica na ka oqo.
3 iTovo Rakorako—Ena Otela: Era druka na vakararai tu nira raici ira na noda lalai ena rakorako ni nodra itovo. (Efeso 6:1, 2) Ni yalovinaka ra itubutubu, ni raici ira vinaka na luvemuni mera kua ni dau veivakasosataki, okati e ke na nodra sisili ena tobu ni sisili, se ra vakayagataka e so tale na iyaya ni qito ena otela. Me kua ni cabolo na isogo ni katuba vakabibi ena gauna ni moce.
4 iTovo Rakorako—Ena Vanua ni Soqo: E laurai ni so era sega ni dau tokoni ira na dauveivukei, qai sega ni vakarisito na nodra ivosavosa. Nira sega ni rogoca na nodra ivakaro na dauveivukei, ra vakelea kina nodra motoka ena vanua e sega ni dodonu me kele kina, vakavuna mera tuya tani kina na nodra motoka na ovisa. O koya gona, na yalo ni nanumi koya ga e sega ni ivakaraitaki ni itovo vinaka, se me vakacaucautaki kina na Kalou o Jiova. Meda dau veilomani mada ga, vosovoso, da qai dau veitokoni.—Kala. 5:22, 23, 25.
5 Ena uqeti keda na loloma vakarisito meda na biuta tu na idabedabe “vinaka duadua” vei ira na tacida era sa qase se o ira era tauvimate. Meda kua tale ga ni guilecava meda kauta ga mai na kakana mamada me ivakasigalevu, sega ni dua na kakana levu. E laurai ni so era sa dau kanavoro ra qai sega ni dau vakarorogo vinaka ena porokaramu ena yakavi. Eda sa na sega gona kina ni vakaraitaka na noda doka na kakana vakayalo e vakarautaki mai.
6 Rakorako—Noda iSulusulu kei na Sasauni: Ni oti e dua na soqo ni tikina ena yabaki sa oti, e vola e dua na edita ni dua na kabani levu ni niusiveva: “Sa bau veivakadrukai dina na nodra itovo wale mada ga na iVakadinadina. E vakavumarau nida raica e levu na tamata nira rakorako ra qai dau veidokai. Totoka vakaoti na nodra isulusulu, e vica vata na drau na vuvale duikaikai mai na veimatanitu era yabe yani i rara. E duidui vakalevu na nodra itovo kei ira e levu na dau lako mai ke. Era duidui ga vakalevu na iVakadinadina mai vei ira na lewenivanua raraba. Sa matau na raica na itovo tawakilikili e matanalevu. . . . Ia era vakavumarau na iVakadinadina.” Me kua mada ga ni vakacaraka na noda soqo vakayalo na noda isulusulu kei na noda sasauni se na noda itovo.—Fpai. 1:10; 1 Tim. 2:9, 10.
7 Rakorako—Ena Papitaiso: Mera doka na vakarau papitaiso na nodra papitaiso. Na rakorako ni nodra isulusulu ena gauna oqo e vakaraitaka nira doka na bibi ni papitaiso. Ena yaga sara vakalevu ke ra veivosakitaka na qasenivuli vei ira na nodra gonevuli na ulutaga “Taro na Dauwiliwili” ena ilavelave ni Vale ni Vakatawa, 1 Epereli, 1995, ni bera na soqo ni tikina.
8 Na keda irairai kei na noda itovo vakalou e vakadinadinataka na noda vakabauta vakarisito qai vakarawarawataka vei ira na tamata lomadina mera kila na ka dina. O koya gona, me dau rakorako tiko mada ga na noda itovo meda na vakacaucautaki kina ena noda tiko ena soqo ni tikina na “Qasenivuli ni Vosa ni Kalou.”—Roma 13:3.