O Rawa Beka ni Veiqaravi ena Vanua e Gadrevi Kina Vakalevu na Veivuke?
1 O bau dau vakasamataka tu mo toki ina vanua e gadrevi kina vakalevu na dautukutuku ni Matanitu ni Kalou? Ke o sureti mo “lako mai . . . mo vukei keimami,” o na tu vakarau me vakataki Paula? (Caka. 16:9, 10) Ena levu na ivavakoso, e gadrevi kina vakalevu e so na vuvale matua vakayalo, o ira na painia mera veivuke ena kena tarai na yalava, se qase ni ivavakoso kei ira na dauveiqaravi vakaitalatala mera liutaka na cakacaka. E levu beka na veikoro era duitutu ena yalava e taudaku ni koro vakavalagi. E yawa sara tu beka na Kingdom Hall. Lailai beka na cakacaka. O na tu vakarau mo ciqoma na ka ni bolebole oqo? O na rawata vakacava?
2 Gadrevi na Vakabauta kei na Nuitaki Jiova: Ena veidusimaki ni Kalou, a biuta kina na nona vanua o Uri o Eparama kei na watina, vugona, kei na tamana sa kena turaga o Tira me ratou lakova e 1,000 na kilomita i Karana. (Vkte. 11:31, 32; Niem. 9:7) E mate o Tira ni sa yabaki 75 o Eparama, sa qai vakaroti Eparama o Jiova me biuti Karana kei ira na wekana me lako ina vanua ena vakaraitaka vua na Kalou. Eratou “sa lako” o Eparama, Serai, kei Loti. (Vkte. 12:1, 4, 5) Ia, a sega ni toki o Eparama me lai veiqaravi ena vanua e gadrevi kina vakalevu na italatala. E dua tale na ka e gadrevi ena nona toki. Na cava gona oya?
3 E gadrevi vei Eparama na vakabauta kei na nona nuitaki Jiova me rawa kina ni toki. Ena veisau na ivakarau ni nona vakasama kei na nona bula. E biuti ira na wekana, o ira era dau vakacegui koya ena gauna ni leqa. Ia e nuitaki Jiova me taqomaki koya kei na nona vuvale. E levu edaidai era vakaraitaka na nodra nuitaki Jiova ena sala vata oya.
4 Veiqaravi Vakalekaleka ena Nomu iLesilesi: O bau marautaka beka na veivakalougatataki levu e sotavi ena cakacaka ena yalava ribayawa? E liu e Viti, era dau volavola ina valenivolavola ni tabana e so na ivavakoso mera vakaraitaka kina na nodra tu vakarau mera lai vunau ena yalava ribayawa vaka oya, se mera vukea e so tale na ivavakoso ena cakacaka vakavunau ena so na yalava e dau tarai ga vakavudua. Ena levu sara kina na vodo basi se taubale. Ia e laurai ni yaga vakalevu. Na tarai ni yalava ribayawa e vu ni veivakalougatataki, me vaka e tukuni ena so na vakasavuirogorogo mai Mereke.
5 E vola e dua na tacida tagane mai Kalifonia a lai vunau i Utah: “Ni se qai tukuni vei au meu kauta e dua na ilala me keimami lai vunau ena dua na yalava e dau tarai vakavudua, a sega soti ni lomaqu. Ia au mani ciqoma ga na ilesilesi oya. Au sega wale ga ni marautaka, e veisautaka sara ga na noqu bula. Au vakavinavinakataki Jiova e veisiga ena itavi dokai meu bau vakaitavi tu ena ilesilesi oya.” E kaya e dua na tacida tagane mai Florida a lai vunau i Tennessee ni nona lako oya, e gauna guiguilecavi dredre duadua vua ena loma ni 20 na yabaki ni nona tiko ena dina! E kaya e dua na itabagone mai Connecticut a lako i West Virginia: “Oqo e gauna vinaka duadua au qai sotava ena noqu bula!” Era duavata e levu na dautukutuku ni veiqaravi mada ga vakalekaleka ena vanua e gadrevi kina vakalevu na veivuke e vakatitobutaka na nodra marautaka na cakacaka vakavunau. Veitalanoa kei ira era sa vakayacora oti. Era na kaya ga nira vakaukauataki kina vakayalo ra qai vinakata mera na cakava tale ke soli vei ira e dua tale na gauna.
6 Nomu ciqoma e dua na ilesilesi mo lai veiqaravi ga vakalekaleka ena vanua e gadrevi kina vakalevu na veivuke e rawa ni yaga ena dua tale na inaki. O ira era cakava oqo era rawa ni taro ivakasala me vukei ira mera “cakacakataka na kena i sau” ni bera nira toki ina dua tale na vanua.—Luke 14:28, VV.
7 E loma i Jiova me na vunautaki na itukutuku vinaka “e vuravura taucoko” ni bera na ivakataotioti. (Maciu 24:14) Kevaka gona o raica ni ganita na kemu ituvaki mo toki ina vanua e gadrevi kina vakalevu na veivuke, o na rawa beka ni toki? E levu sara na vanua e gadrevi kina na veivuke.
8 Toki ina Vanua e Gadrevi Kina Vakalevu na Veivuke: O sa vakacegu beka mai na nomu cakacaka? E vinaka tiko na nomu ituvaki vakailavo? Ke sega, vakacava mo cakava ga e so na nomu cakacaka lalai? O rawa beka ni bula ena vanua cava ga o toki kina, o na rairai lai teitei qai volitaka na nomu itei? Ke o sega ni rawa ni toki, o rawa beka ni vukea e dua ena nomu vuvale me lai veiqaravi ena dua tale na vanua?
9 Ke o sa masulaka oti, qai o vakadeitaka ni o rawa ni toki ina vanua e gadrevi kina vakalevu na veivuke, veivosakitaka kei na nomu vuvale kei iratou tale ga na qase ena nomu ivavakoso. Vola sara e dua na ivola, solia vei iratou na qase me ratou na vola tale ga na nodratou nanuma kei na ka eratou vakatura ni bera ni ratou vakauta nomu ivola ina valenivolavola ni tabana.
10 Na cava soti me tukuni ena nomu ivola? Nomu yabaki, tikinisiga ni nomu papitaiso, nomu itavi ena ivavakoso, vakawati se sega, se tiko e so na luvemu lalai. O kila tale e dua na vosa? Tukuna na vanua o via lai veiqaravi kina, me vakatau ena kemu ituvaki.
11 O dau gugumatua beka qai dau vakaliuliu ena cakacaka? E vakatara beka na kemu ituvaki mo lai veiqaravi ena vanua e gadrevi kina vakalevu na veivuke? Ke vaka kina, dikeva mada na nona sovaraka mai vakayauyau o Jiova na veivakalougatataki vei ira era nuitaki koya nira vakaraitaka na yalo ni cabori ira!—Same 34:8; Mala. 3:10.