“Caka Sara Vaka Vinaka ka Tuvalaki Vakamatau”

¹ Ena rawa vinaka wale ga e dua na soqo ni tikina ke levu era veitauriligataka na cakacaka. Na tabana e qarava na soqo ni tikina ena raica na vanua veiganiti me caka kina na soqo, vaka kina na icili. Na tamata yadua kei na veivuvale mera lalawataka rawa oqo na nodra ilakolako kei na nodra icili. Era duavata ena bolecakacaka na ivavakoso mera vakaitavi ena levu na dui tabana me cicivaki vinaka kina na soqo. E vinakati gona me “caka sara vaka vinaka ka tuvalaki vakamatau.”​—1 Kor. 14:40, VV.

² Ni oni cakacaka vata kei ira na cicivaka na soqo, mo ni nanuma tiko ni taura toka na gauna na vakavakarau. Levu na mataveitacini sa dede na gauna na nodra vakavakarau tiko. Wili kina na kena qarai na vanua ni soqo, vakarautaki na iyaya me na vakayagataki, kei na nodra kerei o ira mera na mai cakacaka. Na vakavakarau vakailiu eda na vakalougatataki kece kina vakayalo. Na cava eda rawa ni veivuke kina?

³ Vanua kei na Tikinisiga ni Soqo: Ena vakayacori tiko na soqo ena yabaki oqo e Suva, Labasa, kei Lautoka. Na soqo e Suva ena vakayacori tiko ena National Stadium, ena 28-30 Sepiteba. Ena rogoci na porokaramu taucoko ena vosa vakavalagi kei na vosa vakaviti. Ena sega ni rogoci ena dua tale na vanua ni soqo na porokaramu kece ena vosa vakavalagi, oni kerei gona na via rogoca na porokaramu ena vosa vakavalagi mo ni na tiko ena kena oqo. Ena vakayacori na soqo e Labasa ena Subrail Park, ena 12-14 Okotova, ena rogoci ga vakalevu na porokaramu ena vosa vakaviti. Ena vakayacori na soqo e Lautoka ena Churchill Park, ena 26-28 Okotova. Ena rogoci ena soqo oqo na porokaramu taucoko ena vosa vakaviti kei na vosa vakaidia.

⁴ Na ivavakoso yadua e kerei me na tiko ga ena soqo e voleka kina. Na ivavakoso kece mai Navua me yaco i Korovou era kerei mera na tiko ena soqo e Suva. Na vo ni ivavakoso kece e Viti Levu mera na tiko ena soqo e Lautoka. Na ivavakoso kei na iwasewase lalai e Vanua Levu, kei ira na veiyanuyanu lalai era volekata, mera na tiko ena soqo e Labasa. O ira na tacida mai Rotuma kei ira ena veiyanuyanu lalai tale e so mera na tiko ena soqo ga e rawarawa vei ira.

⁵ Tokona na iTuvatuva: E bibi meda tokona kece na ituvatuva ni soqo. Meda nanumi ira vakayalololoma na tacida da ‘kua ni nanumi keda ga, da nanumi ira tale ga na tani.’​—Fpai. 2:4.

⁶ Vakarautaki ni iCili: Ke oni vakaicili vei ira na nomuni itokani se vei ira na wekamuni, e kerei mo ni qai veivosakitaka ga. E vaka tale ga kina o ira era na vakaicili ena otela. Me kua ni guilecavi, ke gadreva na otela e dua na ilavo me ivakadei ni nomu rumu, mo vakauta ga vakadodonu oqo ina otela. Ia ke mani yaco e muri mo via veisautaka na nomu icili ena otela, yalovinaka tukuna tale vei iratou me kua kina ni maumau na vakalalai tu ni rumu. Eda sega ni via vakarogorogocataki keda na tamata i Jiova, se meda cakava na ka me vosa vakacacataki kina na yaca tabu ni Kalou.

⁷ E kaya na manidia ni dua na otela: “Au sega ni se bau sotava e dua na ilawalawa levu mera mai vakaicili e ke mera bulataka sara ga na ka era vakabauta me vakataki ira na iVakadinadina i Jiova. Au nuitaka tu ni oni na lesu tale mai.” Na vosa oqo e vakaraitaka ni itovo vinaka e sega wale ga ni vakamarautaki keda, e vakamarautaki ira tale ga e levu era vakararai tu.

⁸ Nida dauveiqaravi ni Kalou o Jiova, eda na vakaraitaka na nona itovo ena ka kece eda cakava. E wili kina na noda vakavakarau kei na noda tiko ena soqo e cavuti kina na yaca ni Kalou. Kua ni guilecava, “ni sa sega ni vu ni veisei na Kalou, sa vu ni vakacegu ga.” (1 Kor. 14:33) O koya gona, meda vakadeitaka mada ga ni o ira kece na vakararai tu era na rawa ni kila na itovo i Jiova ena ka era raica vei keda​—na noda itovo, nida lalawataka tiko meda na tiko ena soqo ni tikina na “Qasenivuli ni Vosa ni Kalou.” Mera mai kila mada ga na tamata lomadina era vakararai tu ni o ira na isoqosoqo tamata i Jiova era dau “caka[va] sara vaka vinaka” na ka ra qai “tuvalaki vakamatau.”​—Same 68:26.