Vakarogotaki Donu na Vosa

SEGA ni lotu Vakarisito kece e vuli vinaka. Na yapositolo mada ga o Pita kei Joni e tukuni ni rau “sega so ni vuku, se tamata vuli.” (Caka. 4:13) Ia, se da vuli vinaka se sega, e bibi ga meda qarauna meda dau cavuta vinaka noda vosa, me kua kina ni vakawaletaki na itukutuku vakaivolatabu eda vakasavuya.

Me Nanumi. E duidui na lawa e vauca na icavucavuti ni veimataqali vosa e vuravura. Era vakayagataka kece na matuavosa, duidui ga na kedra matanivola. E vakayagataki vakalevu na matanivola ni matuavosa vakaroma, sa qai tiko na matanivola ni matuavosa vakaarapea, vakirisi, kei na vakaiperiu. Ia, e duatani sara na matanivola ni matuavosa vakajaina. Na matanivola ni matuavosa vakajaina e tukuna na ibalebale ni vosa, sega ni kena rorogo; na matanivola ni matuavosa tale e so e tukuna na rorogo ni vosa, sega ni kena ibalebale. E vakayagataki tale ga ena vosa vakajapani kei na vosa vakorea na matanivola ni matuavosa vakajaina, ia e rawa ni duatani sara na kena rorogo, duidui tale ga na kena ibalebale.

Ke o vinakata mo vakarogotaka donu na vosa ni dua na vanua, e dodonu mo kila na rorogo ni kena matanivola. E so na vanua e sega ni veiveisau na lawa e vauca na icavucavuti ni kena vosa me vaka na vosa vakirisi, vakasipeni, kei na vosa vaka Zulu, e rawarawa sara vei ira era via vosataka. Ia, ni curu ina dua na vanua e dua na vosa vulagi, e rawa ni duatani na kena rorogo. Rawa ni yaco kina me levu na icavucavuti ni dua tiko ga na matuavosa, se sega sara ga ni vakarogotaki. De na vinakati mo nanuma toka na icavucavuti ni vosa vou vaka oqo, qai dau vakayagataka ena nomu veivosaki. Ena vosa vakajaina, o na saga mo nanuma e vica vata na udolu na kena matanivola mo rawa ni qai vakarogotaka donu na kena vosa. Ena so na vanua, e veisau vakadua na ibalebale ni dua na vosa ni veisau ga vakalailai na kena rorogo. O koya gona, e rawa sara ga ni o vakasavuya e dua na itukutuku cala ke o sega ni qarauna mo vakarogotaka donu nomu vosa.

Ena vosa e vakayagataki kina na matanivola vakaroma, e yaga me vakabibitaki ga na iwasewase ni vosa e dodonu me vakabibitaki. E levu na vosa e sa dau duadua tu ga na kena rorogo, sega ni veisau. Ia, ni dua na vosa e levu na kena ibalebale, qai kilai na duidui oqo mai na kedra rorogo, e so era dau vakatakilakilataka ena so na itoqa me vakarawarawataka nodra vakarogotaka donu nira wiliwili. Ia, e sega ni dodonu me leqa levu sara oqo ena vosa vakaviti baleta ni sa na rawa ga nida vakarogotaka donu e dua na vosa nida raica na vanua e vakayagataki kina. Kena ivakaraitaki na vosa “mama.” E cavuti lekaleka ruarua na “a” me vaka ena iyatuvosa, “daramaka na mama.” Ia, e yara na ikarua ni “a” ena iyatuvosa oqo: “Mo mama vinaka na kemu.” Ena iyatuvosa tale oqo, “E sega ni bibi, e mama,” e yara ruarua na “a.” Sa na qai dui vakatau vei keda ke da via tosia e so na itoqa ena dela ni matuavosa eda kila ni dodonu me bi se yara me vakarawarawataka noda vakarogotaka donu.

Ia, ena noda via vakarogotaka donu na vosa, e tiko e so na ka meda qarauna. Ena rogo mawi qai malewa noda vosa ke sega ni vaka na vosa ni veisiga na kena itautau, se sa rui yara tale vakasivia me sega ni muria na ivakarau dina ga ni noda vosa. Ena vaka tale ga oqo ke da vakayagataka e so na itautau ni vosa eda sega ni dau vakayagataka e veisiga. Oqo ena vakavuna me kauaitaki o koya e vosa, sega ni kauaitaki nona itukutuku. Ena yasana adua, me qarauni tale ga me kua ni sabalia noda vosa se kena itautau. E so na vakasama oqo era sa vakamacalataki oti ena ulutaga, “Cavuti Vakamatata na Vosa.”

E rawa ni duidui na icavucavuti ni vosa mai na dua na vanua ina dua tale, so na gauna e duidui na icavucavuti ni vosa ena dua tiko ga na vanua. E rawa ni cavuta noda vosa e dua mai valagi, ia e rawa ni duatani toka na kena irogorogo. E rawa ni volai ena ivolavosa e vica na icavucavuti ni dua tiko ga na vosa. Ia, ena yaga vua e dua me vakarogoci ira na vosataka vinaka nona vosa, qai saga me vakamurimuri ira, vakauasivi ke sega ni vuli vinaka sara, se sa mai vosataka tiko e dua na vosa e sega ni nona vosa dina. Noda itukutuku na iVakadinadina i Jiova e itukutuku dokai, o koya gona eda na qarauna na itautau ni noda vosa, me matata qai rogo vinaka vei ira ena noda yalava.

Ena nomu veivosaki e veisiga, e vinaka mo vakayagataka na vosa o kila vinaka. Vakalevu meda dau sega ni vakarogotaka cala e dua na vosa nida veivosaki. Ia, o rawa ni sotava e so na vosa o sega ni dau sotava ena nomu veivosaki e veisiga ni o wilivola. O keda na iVakadinadina i Jiova e noda cakacaka na wilivola. Eda wili iVolatabu vei ira na tamata eda vunau vei ira. So na tacida era dau lesi mera wilivola ena vuli Vale ni Vakatawa se na Vulivola ni iVavakoso. E bibi gona meda vakarogotaka donu na vosa nida wilivola me kua kina ni gole nodra vakasama na vakarorogo ena vosa eda cavuta cala.

E dau dredre beka mo cavuta e so na yaca ena iVolatabu? Ke vaka kina, raica vinaka na yaca ni o vakarautaka tiko nomu wilivola. De dua o na via wasewasea vakalalai mo qai makataka sara ga na iwasewase oqori me vakarawarawataka nomu wilika. Kena ivakaraitaki na yaca, Easuerosi. O na via wasewasea beka vaka oqo, E/a/su/e/ro/si, me vakarawarawataka nomu cavuta. Rawa tale ga ni o cavuta vakavica vata me yacova ni o sa qai rawa ni vakarogotaka donu.

Kena iCakacaka. Levu era sega ni kila ni sa nodra ivakarau mera dau vakarogotaka cala na vosa. Ke tukuna vei iko na ivakatawa ni koronivuli ni dodonu mo vakavinakataka nomu dau vakarogotaka na vosa, ciqoma nona veikauaitaki. Ia, ni o sa kila rawa na nomu leqa, na cava mo cakava?

Kena imatai, ni o lesi mo wilivola vei ira e lewe vica ga se lewe levu, vakayagataka na ivolavosa ke tiko e dua. Raica na vosa o sega ni kila. Ke o sega ni kila vinaka sara na ivakavakayagataki ni ivolavosa, wilika na imatai ni vica na taqana ni na tukuna vei iko na ibalebale ni so na ivakatakilakila e volai kina, e rawa tale ga ni o kerea e dua me vukei iko. Na ivolavosa ena vakaraitaka vei iko na iwasewase ni dua na vosa e dodonu me bi se yara, me vakatau ena ibalebale ni vosa. Oqo e dau laurai ena toqai ni matuavosa me vaka na a ena tātā (se taataa), na ikacikaci ni gone vei tamana, kei na tatā (se tataa), nona tatavi beka e dua ena wai, sega ni sili sara. E bibi oqo baleta ni rawa ni vakarogotaki vakavica e dua tiko ga na vosa, vakatau ena vanua e vakayagataki kina. Se vosa cava o cereka ena ivolavosa, cavuta vakavica e cake me yacova ni sa matau vei iko

Na ikarua ni ka mo cakava mo vakarogotaka donu kina na vosa oya mo wiliwili vua e dua—dua e dau cavuta donu na vosa—qai kerei koya me vakadodonutaki iko.

Na ikatolu ni ka mo cakava mo vakarogotaka donu kina na vosa oya mo vakarogoci ira na kenadau ena vosa. Ke tu vei iko e so na kaseti ni wilivola, dau vakarogoca. Ni o vakarorogo tiko, rogoca na icavucavuti ni vosa e vou vei iko. Vakavola, qai vakatovotovotaka me matau vei iko. Dua na gauna o sa na matau sara ena nomu vakarogotaka na vosa, oqo ena vakilai ena vinaka ni nomu vakamacala.