Mo iVakaraitaki ena Cakacaka Vinaka
1. Na cava meda qarauna kina na noda itovo kei na noda isulusulu vaka kina na keda irairai ena soqo ni tikina?
1 Era na raica votu na tamata na noda itovo kei na noda veimaliwai kei ira e so tale ena gauna eda soqo yani kina ena soqo ni tikina. E dodonu gona vei keda yadudua meda taura vakabibi na veivakadreti oqo ena iVolatabu: ‘Lewai iko vakavinaka. Mo ivakaraitaki vinaka ena ka kece ga.’ (Taito 2:6, 7, VV) Eda rawa tale ga ni vakaraitaka noda rerevaki Jiova kei na noda taleitaka na nona isolisoli vakayalo ena noda isulusulu vaka kina na keda irairai.—Same 116:12, 17.
2. Na cava e bibi kina me savasava qai rakorako na keda irairai?
2 Savasava Qai Rakorako: Me vakaraitaka na keda irairai na ivakatagedegede ni Kalou, ni savasava qai rakorako o koya. (1 Kor. 14:33; 2 Kor. 7:1) E dodonu meda savasava vaka kina na drauniuluda kei na itaukuku qai rakorako na keda irairai. Me vaka ga nida na dara tiko na noda ivakatakilakila ni soqo, e dodonu tale ga meda vakaisulu me vaka e dua na italatala lotu Vakarisito. Ke da vakatotomuria na isulusulu sa takalevu tu edaidai, ena dredre vei ira na lewenivanua mera kila se o cei era qarava dina tiko na Kalou, o cei e sega.—Mala. 3:18.
3, 4. Eda na vakadeitaka vakacava nida sa muria tiko na ivakasala ena 1 Timoci 2:9, 10, VV?
3 Vakaisulu me Vaka na iTalatala Lotu Vakarisito: Ni volavola na yapositolo o Paula vua na ivakatawa lotu Vakarisito o Timoci, e uqeta kina mera “vakaisulutaki ira vakavinaka e na i sulu matau ka rakorako na yalewa. . . . Me ra vakaitovotaki ira e na vei i tovo vinaka kece ga me vaka sa kilikili kei ira na yalewa era kaya ni ra sa lotu.” (1 Tim. 2:9, 10, VV) Ena gadrevi me na vakasamataki sara vakavinaka na isulusulu e rairai matau. E dodonu me rairai savasava qai rakorako na isulu e daramaki yani—me kua ni sivia tale se me veivagarogaroi.—1 Pita 3:3.
4 E vakasalataki ira tale ga o Paula me kua ni vakasivia sara na kena “tali na drau ni uludra se tokara na i ukuuku koula, mataniciva se i sulu i sau dredre.” (1 Tim. 2:9, VV) E ka vakayalomatua vei ira na yalewa lotu Vakarisito me veiraurau ga na nodra iukuuku, na nodra sauni ira kei na so tale na ka era dau dara. (Vkai. 11:2) Era wili tale ga ena ivakasala oqori i Paula na tagane lotu Vakarisito. Mera qarauna na tacida tagane na isulusulu kei na sasauni e kilai kina na vakasama vakavuravura.—1 Joni 2:16.
5. Era na vakacaucautaki Jiova vakacava na gone, qai cava tale ga e nodra itavi na itubutubu?
5 iTubutubu kei na Gone: Ena vakacaucautaki o Jiova kei na nona isoqosoqo ni duidui vakalevu na nodra itovo na luveda ni vakatauvatani kei ira na itabagone itovo ca era sa bini tu nikua. Ia, e dau yaco ena so na gauna na leqa nira sega ni vakaraici vinaka na gone. (Vkai. 29:15) Mera kua ni vakalaivi ira na luvedra na itubutubu mera lewa tu ga na vanua era via lako kina, vakauasivi ena vanua ni soqo ni tikina. Era dikeva e so na itubutubu ni veivuke vakalevu nodra dau veivosakitaka rawa kei ira na luvedra na itovo me na namaki vei ira ni bera na soqo ni tikina. (Efeso 6:4) Era vukei ira na luvedra mera kila ni “sega ni cakava na ka sa sega ni kilikili” se “qara na ka me nona ga” na loloma vakarisito. (1 Kor. 13:5) Na soqo ni tikina e dua na gauna e biu vakatikitiki meda vakavulici kina vei Jiova, era na rawa ni vakaraitaka gona ena nodra itovo ena vanua ni soqo kei na so tale na vanua na gone vaka kina na qase nira doka na ituvatuva oqo.—Aisea 54:13.
6. Ena yaga vakacava vei ira e so tale na noda itovo, isulusulu, kei na sasauni?
6 Na noda itovo kei na isulusulu e rawa ni kauta laivi na nodra rai cala e so qai dreti ira mai ena sokalou dina. (Maciu 5:16; 1 Pita 2:12) Mera na vakadinadinataka mada ga e levu era na mai tiko ena soqo ni tikina na vinaka ni noda itovo kei na noda veimaliwai kei ira. Ena sala oqori eda sa ‘ivakaraitaki tiko ena cakacaka vinaka’ da qai vakacerecerei Jiova tale ga kina.—Taito 2:7.