Ena Tini e Vei na Vuravura Oqo?

E ulutaga ni itukutuku ena veiyasa i vuravura e veisiga na itukutuku vakarisikete ni leqa lelevu kei na veika rerevaki! Cava era dusia na veika oqo?

NODA TAQOMAKI: Kacabote na bomu ena makete. Ra lauvana na qasenivuli kei na gone e koronivuli. Drotaki na gone ni vakanadaku o itubutubu. Ra moku qai butakoci nodra iyau na marama kei na kena turaga ena sigalevu tutu.

ITUVAKI NI LOTU: Tokona na lotu na saqati ni matanitu. Beitaki na italatala ena labakawa. Ra vakacacani ira na gone na bete qai galuvaka na lotu. Sa lala na veivalenilotu; volitaki na veivalenilotu.

NODA ITIKOTIKO: Musu vakaveitalia na kau me volitaki. Qeavu na veikau ena levu ni nodra ta buka na dravudravua. Benuci na wai, sega ni gunuvi rawa. Vakaleqai na qoli ena so na ivakarau vovou ni qoli kei na kena vakadrodroi i wai na wai ca. Benuci na maliwa lala ena cagi duka.

CAKACAKATAKI NI BULA E VEISIGA: Vakaloloma dina na kedra isau ena dua na yabaki na tamata cakacaka ena so na vanua e Esia. Lusi na kabani ena nodra kocokoco na kena vakailesilesi, ra sega ni cakacaka kina e vica na udolu. Na veidabui e vakavuna me yali tawamacala na nodra ilavo o ira na daumaroroi ilavo dede tu mai.

LEQA NI KAKANA: Rauta ni 800,000,000 era kana vakaca.

IVALU: Sivia na 100,000,000 era mate ena ivalu ena ika20 ni senitiuri. Rawa ni vakamatea vakavica na kawatamata na iyaragi vakaniukilia sa tu. Ra veivaluvaluti na kai vata. Tetevi vuravura nodra vakacaca na batikadi.

MATEDEWA KEI NA TAUVIMATE: Vakamatea e 21,000,000 na matetaka levu me tekivu mai na 1918. Yaco na AIDS me mate e “veivakamatei vakalevu duadua ena itukutuku ni kawatamata.” Lolosi o vuravura ena vuku ni kenisa kei na mateniuto.

Ni o raica se rogoca na itukutuku ni veika sa yaco tu nikua vakasamataka mada, era yaco beka vakavudua ena dua ga na vanua, se ra sa tiki ni bula ena veiyasa i vuravura e dusia e dua na ka bibi sa vakarau yaco?

[Kato/iYaloyalo ena tabana e 5]

E Kauai Dina Beka na Kalou?

Nira nuiqawaqawa ena veika era sotava se leqa levu e tarai ira, e levu era taroga se cava e sega ni takoso mai kina na Kalou me tarova na veika vaka oqo.

E kauai dina na Kalou. E solia vei keda na ivakasala e yaga, e vakacegui keda tale ga ena gauna oqo. (Maciu 11:28-30; 2 Timoci 3:16, 17) Sa nakita tu me na vakaotia vakadua na itovo kaukaua, tauvimate, kei na mate. Ena sega ni vakalougatataka na lewe ni dua ga na matanitu, ia ena vakalougatataki ira na lewe ni veimatanitu kece, kei na veiyavusa, kei na duivosavosa.—Cakacaka 10:34, 35.

E vakacava noda kauai o keda? O kila se o cei e bulia na lomalagi kei na vuravura? O cei na yacana? Na cava e nona inaki? E saumi ira na taro oqo na Kalou ena iVolatabu. E tukuni tale ga ena iVolatabu na veika ena cakava me muduka kina na itovo kaukaua, tauvimate, kei na mate. Meda rawata na veivakalougatataki oqo, na cava e vinakati meda cakava? Meda vulica na veika e baleti koya kei na nona inaki. Ena yaga vakacava vei keda na veika e vakarautaka kevaka eda sega ni vakabauti koya? (Joni 3:16; Iperiu 11:6) Dodonu tale ga meda muria na nona ivakaro. (1 Joni 5:3, VV) E rawa ni o cakava na veika oya me vakaraitaka nomu kauaitaka dina na Kalou?

Meda kila na vuna e se sega ni muduka kina na Kalou na veika rarawa e yaco tiko, e dodonu meda kila e dua na vakalelewa bibi a yaco. E vakamacalataki ena iVolatabu na vakalelewa oqo. Ena matata vei iko na veika e vauci kina ni o dikeva na tabana e 15 ni ivola oqo.