“Era Sega ni Kauai”

E RAWA ni veivakaleqai na tauri vakamamada ni ivakasala.

Ni vakavakarau tu na siti o Darwin, mai Ositerelia, ina gauna ni marau ena 1974, sa qai rogo mai na sici me vakaraitaka ni sa vakarau laba e dua na cava. Ia e se sega ni bau vakacaca e dua na cava e Darwin ena loma ni 30 na yabaki. Na cava me kauaitaki kina na kena oqo? Levu na lewenisiti era sega ni taura vakabibi na cava oqo me yacova ni sa cecega na delavuvu na bati ni cagi kaukaua qai basuraka na lalaga ni vale era vakaruru tiko kina na lewenivale. Ena mataka e tarava, e sega ni tukuni rawa na vakaitamera ni vakacaca.

Mai Colombia, e kacabote kina e dua na ulunivanua ena Noveba 1985. E vakawaicalataka na waicevata qai biliga sobu mai e dua na iwase ni qele vakaitamera era tabulu kina e sivia e 20,000 na lewenitauni o Armero. A soli beka na ivakasala? Sa vica na vula na yavavala toka ni ulunivanua. Ia, e levu na lewe i Armero era sega ni kauai ni sa matau na nodra toka volekata na ulunivanua oya. A tukuni vei ira na vakailesilesi ni matanitu ni sa vakarau kacabote na ulunivanua, ia era sega ni vakasalataki ira na lewenitauni. Era kacivaka ga ena retio me kua ni dua e lomaleqa. E vakayagataki na iyaya ni kaburaki vosa ni valenilotu me tukuni vei ira na lewenitauni mera kua ni taqaya. E kacabote vakarua na ulunivanua ena bogi oya. Ke o a bula ena gauna oya, o na biuta tu beka na veika o taukena o qai dro? Era le vica ga era cakava vaka kina ia e levu era vukibera.

Dau vakalevu me yaco dina na uneune ena vanua era kacivaka na dauvakadidike. Ia e dredre mera tukuna na gauna sara ga ena yaco kina. Ena 1999, na uneune e veiyasa i vuravura e vakamatei ira e rauta ni 20,000. E levu era mate era a sega ni nanuma nira na vakamatei.

Cava O na Cakava ni Veivakasalataki na Kalou?

Sa dede na nona vakamacalataka tu mai na iVolatabu na veika ena vakatakilakilataka na iotioti ni veisiga. Me salavata kei na tikina oqo, e vakasalataki keda tale ga meda vakasamataka na “siga i Noa.” “Ni sa bera na waluvu,” era ogataka ga na nodra bula ni veisiga na tamata, dina ga nira rairai lomaleqataka na itovo kaukaua e vakayacori tiko. Me baleta na ivakasala ni Kalou e vakadewataka vei ira o Noa​—na dauveiqaravi ni Kalou​—“era sega ga ni kauai me yacova ni sa coka mai na waluvu, qai kauti ira kece yani.” (Maciu 24:37-39, NW) O na rogoca beka na ivakasala ni Kalou ke o a bula ena gauna oya? O sa rogoca tiko o qai muria na nona ivakasala ena gauna oqo?

Vakacava mada ke o bula tiko mai Sotoma, volekata na Waitui Mate, ena gauna i Loti, na vugo i Eparama? Na vanua oya e vaka toka na parataisi. E koro vutuniyau, ra qai nanuma na lewenikoro ni sega na ka mera leqataka. Ena gauna i Loti, “era kana tiko, era gunu, era veivoli, era teitei, era tara vale.” E vakasisila tale ga na ivakarau ni nodra bula. O na kauaitaka beka na ivakasala i Loti me baleta na ca ni itovo velavela? O na vakabauta beka na nona tukuna vei iko ni sa vakarau vakarusa na Kalou na koro o Sotoma? Se o na taura ga me ka ni lasa me vakataki rau na tagane me rau na vugoi Loti? Se o na tekivu dro beka, ia o qai rai lesu me vakataki wati Loti? E dina nira sega ni kauaitaka o ira era bula ena gauna oya na ivakasala, ia ena siga sara ga e dro kina o Loti mai Sotoma, “sa qai tau mai lomalagi na buka waqa kei na sulifure, ka vakamatei ira kecega.”​—Luke 17:28, 29.

E levu ena noda gauna oqo era sega ni kauaitaka na ivakasala ni Kalou. Ia e maroroi tu na ivakaraitaki oya ena nona Vosa me idusidusi vei keda, me uqeti keda tale ga meda YADRA TIKO!

[Kato/iYaloyalo ena tabana e 22]

A Luvuci Dina na Vuravura?

Era kaya e levu na dauvakalelewa ni sega. Ia, e kaya na iVolatabu ni yaco dina.

E vakamacalataka sara ga o Jisu Karisito baleta ni a sarava tiko mai lomalagi na ka e yaco.

[Kato/iYaloyalo ena tabana e 23]

Rau a Vakarusai Dina o Sotoma kei Komora?

Era vakadeitaka na dauvakekeli.

E volatukutukutaki.

E vakadinadinataka o Jisu Karisito, e cavuti tale ga ena 14 na ivola ena iVolatabu.