Na Cava e Kedra iBalebale?

A KAYA o Jisu Karisito: “Na iotioti ni veisiga ni ituvaki kei vuravura” ena vakatakilakilataki ena ivalu, dausiga, mate ca, kei na uneune.​—Maciu 24:1-8, NW; Luke 21:10, 11, NW.

Me tekivu mai na 1914, e sa vakaleqa voli mai na nodra bula e levu na nodra veivaluvaluti na veimatanitu kei na vala vakayavusa, e yaco vakalevu oqo ena nodra vakaitavi ena politiki na italatala ni lotu, kei na nodra vakacaca na batikadi me vaka eda sa vakadinadinataka tiko ena gauna oqo.

Dina nira sa vukea me levu na kakana na saenitisi, ia e vica vata na drau na milioni ena veiyasa i vuravura era se leqa tu ga ena kakana. E vica vata na milioni era mate e veiyabaki baleta ga ni lailai na kakana.

Na matedewa e tiki tale ga ni ivakatakilakila e tukuna o Jisu. Ni oti na iMatai ni iValu Levu, a vakamatei ira e sivia na 21,000,000 e dua na matetaka vakaitamera. Na matetaka oqo e sega ni vaka na veimate a veitauvi ga ena so na vanua, ia e veitauvi ena veiyasa i vuravura, okati kina na veiyanuyanu lalai. Nikua, na AIDS sa veitauvi raraba tiko e vuravura, e veivakaleqai tale tiko ga ena veivanua e se vakatorocaketaki tiko na matenigacagaca, malaria, na taifoiti, kei na deqi.

E kainaki ni vicasagavulu na udolu na uneune, e duidui na kedra kaukaua, e kurea na veiyasa i vuravura e veiyabaki. Se mani vinaka sara vakacava na misini e vakarautaka na kaukaua ni uneune kei na iwalewale vovou ni kena vakadidike, e se kacivaki raraba tu ga na nodra dau yanaraki ena uneune na veivanua e tawani vakalevu.

E parofisaitaka tale ga na iVolatabu: “Mo kila talega na ka oqo, ni na yaco eso na gauna ni veivakararawataki e na veisiga maimuri [“gauna lewalewai dredre ena iotioti ni veisiga,” NW]: ni ra na daulomani ira walega na tamata, era na dauvinakata nai lavo, era na daubole, era na viavialevu, era na dauvosavakacaca, era na talaidredre kivei ira na nodra qase, era na sega ni vakavinavinaka, era na sega ni yalosavasava, era na caca veiwekani, era na dauyalayala ka lasu tale, era na dauveibeitaki vakailasu, era na sega ni daurawa na yalodra, era na daucudrucudru, era na daucati ira na tamata vinaka, era na dauveisoliyaki me mate, era na qaqa sodrosodro, era na yalolevu, era na lomana vakalevu na marau a ra na lomani koya na Kalou vakalailai; sa nodra ga na lotu vakarairai, ka sega vei ira na kena dina: ia mo lako tani maivei ira era sa vakaoqo.”​—2 Timoci 3:1-5.

O sega li ni vakadinata nida sa bula tiko ena “gauna lewalewai dredre”?

O sega li ni raica ni sa qai kaukaua ga na nodra lomani ira vakai ira na tamata, daulomana na ilavo, ra qai dokadoka?

O cei e rawa ni vakalasuya na nodra sa sinai tu e vuravura na tamata era vinakata me yaco ga na lomadra ra qai sega ni dau vakavinavinaka, era dauyalayala lasu, ra sega ni yalosavasava?

O sa vakila tiko nira sa qai talaidredre ga na gone vei ira nodra qase, salavata kei na levu ni caca veiwekani ena veiyasa i vuravura?

E sega ni vakabekataki ni o vakila nida sa bula tiko ena vuravura e lomana ga vakalevu na marau, sega ni lomana na veika e vinaka. Oya na ka e kaya na iVolatabu me baleta na itovo ena laurai ena “iotioti ni veisiga.”

E vinakati tale beka e so na ivakadinadina me dusia na gauna eda bula tiko kina oqo? A parofisaitaka o Jisu ni na vunautaki tale ga na itukutuku ni Matanitu ni Kalou ena veiyasa i vuravura ena iotioti ni veisiga. (Maciu 24:14) Sa vakayacori tiko beka?

Na Vale ni Vakatawa, na ivoladraudrau e yavutaki ena iVolatabu qai kacivaka vakatabakidua na itukutuku vinaka ni Matanitu i Jiova, e tabaki wasoma qai levu duadua na vosa e tabaki kina ni vakatauvatani kei na dua tale na ivola.

Era sa tabaka tiko na ivola e vakamacalataka na iVolatabu ena rauta na 400 na vosa, ena vosa sara mada ga era wilika na lewe ni vanua e lailai ga na lewena. Era sa vunautaka tiko na itukutuku vinaka na iVakadinadina i Jiova ena veimatanitu kece sara; era sa vunau tale ga ena so na yanuyanu se vanua lalai era sega ni bau rogo. Ena levu na vanua, era sa vakayacora tiko kina e dua na porokaramu ni veivakavulici ena iVolatabu.

Io, sa vunautaki tiko na itukutuku vinaka ni Matanitu ni Kalou ena veiyasa i vuravura. E sega ni kena inaki mera veisautaki kece na lewe i vuravura, ia me ivakadinadina ga vei ira. Sa soli tiko na digidigi vei ira na tamata kece mera vakaraitaka nodra kauaitaka se sega na Dauveibuli ni lomalagi kei vuravura. Vaka kina nodra doka nona lawa kei na nodra lomani ira na wekadra.​—Luke 10:25-27; Vakatakila 4:11.

Sa voleka sara na gauna me kauta laivi na Matanitu ni Kalou na tamata dukadukali kece e vuravura ni bera ni vukici vuravura me parataisi.​—Luke 23:43.

[Kato ena tabana e 6]

iOtioti ni Veisiga ni Cava?

E sega ni iotioti ni veisiga ni kawatamata. E parofisaitaka na iVolatabu ni rawa mera bula tawamudu o ira na cakava na loma ni Kalou.​—Joni 3:16, 36; 1 Joni 2:17.

E sega ni iotioti ni veisiga ni vuravura qele. E yalataka na Vosa ni Kalou ni na taukeni na vuravura me tawamudu.​—Same 37:29; 104:5; Aisea 45:18.

Ia, e iotioti ni veisiga ni ituvaki kei vuravura ca tawayalololoma oqo vaka kina vei ira era kubeta matua tiko na kena itovo.​—Vosa Vakaibalebale 2:21, 22.

[Kato/iYaloyalo ena tabana e 7]

E Vosa Dina ni Kalou na iVolatabu?

Era dau vola wasoma na parofita ena iVolatabu: “Sa kaya vakaoqo ko Jiova.” (Aisea 43:14; Jeremaia 2:2) E bau tukuna tale ga o Jisu Karisito, na Luve ni Kalou, ni ‘vosa e cavuta e sega ni vu ga vua.’ (Joni 14:10, VV) E tukuna sara ga na iVolatabu: “Na Kalou sa vakavuna nai Vola Tabu kecega.”​—2 Timoci 3:16.

E vakaraitaka na United Bible Societies ni sa tabaki na iVolatabu ena sivia na 2,200 na vosa, e sega tale ni dua na ivola e vaka oqo na levu ni vosa e tabaki kina. Sega tale ni dua na ivola e levu cake na kena veisoliyaki, sa sivia na va na bilioni ena gauna oqo. Sega li ni o namaka oqori me baleta na itukutuku ni Kalou e volai vei ira na tamata kece ga?

Raica na brochure Noda iVola Kece, e tabaka na iVakadinadina i Jiova, ni na serelaki kina e levu tale na vuna me vakabauti kina ni Kalou e vakavuna na volai ni iVolatabu.

Ena yaga vakalevu vei iko ke o wilika na iVolatabu o qai vakabauta ni Vosa dina ni Kalou.

[Kato/iYaloyalo ena tabana e 8]

Na Cava na Matanitu ni Kalou?

Oqo na matanitu mai lomalagi e matataki koya na Kalou dina o Jiova kei na nona veiliutaki. E matataki koya e bulia na lomalagi kei na vuravura.​—Jeremaia 10:10, 12.

E vakaraitaka na iVolatabu ni lesia na Kalou na liutaki ni matanitu oqo vei Jisu Karisito. (Vakatakila 11:15) A laurai vei Jisu ena nona bula voli e vuravura na kaukaua veivakurabuitaki a solia vua na Kalou, rawa kina ni lewa na draki kei na wasawasa, vakabula na veimate kece ga, vakaturi ira sara mada ga na mate. (Maciu 9:2-8; Marika 4:37-41; Joni 11:11-44) E parofisaitaka na iVolatabu ni na solia tale ga na Kalou vua “na lewa, kei na vakarokoroko, kei na matanitu, me ra qaravi koya ko ira na tamata kece, kei na veivanua, kei na dui vosavosa.” (Taniela 7:13, 14) Na matanitu oya e vakatokai me Matanitu vakalomalagi. E veiganiti dina oqo ni sa veiliutaki tiko mai lomalagi o Jisu Karisito.

[iYaloyalo ena tabana e 7]

Sa vunautaki tiko na itukutuku vinaka ena veiyasa i vuravura

E veiyabaki, era vakayagataka na iVakadinadina i Jiova e sivia e duanabilioni na aua ena nodra vunautaka yani na Matanitu ni Kalou.