O na Tini e Vei ena Sala o sa Muria Tiko?
• Levu era rui ogataka na nodra bula e veisiga me sa lai vakavuna mera sega ni kauaitaka na vanua era na lai tini kina.
• E tukuna vei keda na iVolatabu na veika totoka e se bera mai. Ia, e vakasalataki keda tale ga ni na yaco e dua na veisau vakaitamera ena veika kece e liutaki vakatamata. Me yaga vei keda na noda kila na veika e tukuna na iVolatabu me rawa nida qai vakabulai, e dodonu meda vakatulewa vakatotolo.
• So era kila na ka e kaya na iVolatabu ra qai saga mera bulataka, ia era vakalaiva na lomaocaocataki ni bula me vakamuai ira tani.
• O na lai tini vinaka beka ena sala o sa muria tiko? Ni o lalawataka na veika mo cakava, o dau vakasamataka se na lai tara vakacava na isausau lelevu o vinakata mo sauva?
[Kato/iYaloyalo ena tabana e 9]
Na Cava e Bibi Dina Vei Iko?
E vakacava na nomu raica na veika oqo? Tuvani ira me vaka na kedra bibi.
Era na tiki ni noda bula na veika oqo, ia na cava o digia me ka bibi duadua? kena ikarua? kei na kedra veitarataravi.
․․․ Ka ni veivakalasai/ka ni veivakamarautaki
․․․ Noqu cakacaka saumi
․․․ Noqu bula
․․․ Noqu marau
․․․ Na watiqu
․․․ Noqu itubutubu
․․․ O ira na luvequ
․․․ Na vale vinaka, isulu totoka
․․․ Meu kenadau ena veika au cakava
․․․ Qarava na Kalou
[Kato ena tabana e 10, 11]
Ena Kauti Iko Beka ina Vanua O Vinakata na Veika O Digitaka?
VAKASAMATAKA NA VEITARO OQO
KA NI VEIVAKAMARAUTAKI SE KA NI VEIVAKALASAI: E vakabulabulataki au beka na ka ni veivakamarautaki au digitaka? E oka beka kina na sasaga se mataqali qito e rawa ni vakaleqai au se vakavuna meu lokiloki ena vo ni noqu bula? E vakamarautaki au beka ga ena vica na aua, ia ena rawa ni vakavuna meu rarawa tu ena dua na gauna balavu? Ke mani vinaka na ka ni veivakamarautaki au digia, sa rui levu beka na gauna au vakayagataka kina meu sa sega ni cakava kina na veika e bibi cake?
NOQU CAKACAKA SAUMI: Au cakacaka ga me rawa kina na bula seu sa bobula tale kina? E vakaogai au beka vakalevu me sa lai vakavuna meu tautauvimate? E vinaka cake meu cakacaka bera se meu vakayagataka na gauna oya vei watiqu se luvequ? Ke vinakata na noqu boso meu cakava na cakacaka e vakaleqa na noqu lewaeloma se vakaleqa na noqu bula vakayalo, au na bolea beka ga na cakacaka oya meu kua kina ni sake?
NOQU BULA: Au vakasabusabutaka, seu dau qarauna? E wewenigusuqu tu ga na veika e baleta noqu bula? E vakaraitaka beka na noqu kauaitaka noqu vuvale na noqu qarauna na noqu bula?
NOQU MARAU: Oqo beka na ka au kauaitaka vakalevu duadua? E bibi cake beka mai na marau nei watiqu se na noqu vuvale? E veiganiti beka kei na noqu qarava na Kalou dina na ka ni marau au dau qara?
NA WATIQU: Au raici watiqu me kequ isa ena gauna ga e ganiti au kina? Au dau dokai watiqu baleta ni kilikili dina ga me dokai? E laurai beka ena veika au cakava vei watiqu noqu vakabauta na Kalou?
NOQU ITUBUTUBU: Keu se gone, au dau talairawarawa vei rau noqu itubutubu ena noqu rogoci rau ena vakarokoroko, cakava na itavi e lesi vei au, suka mai vale ena gauna erau lokuca, kua ni vakailala ca se dua ga na ka erau sega ni vakadonuya? Keu sa uabula, au dau rokovi rau noqu itubutubu, au dau vukei rau tale ga ena gauna erau gadreva kina? E dau vakatau beka ga vei au na ka au cakava vei rau, se vakatau ena ka e kaya na Vosa ni Kalou?
O IRA NA LUVEQU: Au raica me noqu itavi na nodra vakavulici na luvequ ena itovo vinaka, seu namaka me vakavulici ira na koronivuli? Au dau solia noqu gauna vei ira na luvequ, seu sosomitaka oqori ena noqu solia na iyaya ni vakatatalo, retioyaloyalo, se na kompiuta? Au dau vakadodonutaki ira na luvequ nira beca na lawa ni Kalou, se gauna ga au cudru kina?
NA VALE VINAKA, ISULU TOTOKA: E vakatau ina cava na levu ni gauna au vakayagataka ena kequ irairai kei na ka au taukena—na kequ irogorogo vei ira keimami tiko veitikivi? nodratou bula vinaka noqu vuvale? se baleta niu qarava na Kalou?
MEU KENADAU ENA VEIKA AU CAKAVA: Au kila beka ni dodonu meu cakava vinaka na ka? Au dau saga meu uasivi duadua? Au rarawa beka kevaka e dua e uasiviti au?
QARAVA NA KALOU: E bibi cake beka vei au na veivakadonui ni Kalou mai na nona vakadonui au o watiqu, o ira na luvequ, noqu itubutubu, se noqu boso? Meu rawa ni bula vakacegu, au na biuta beka na qarava na Kalou me ikarua ni ka ena noqu bula?
VAKASAMATAKA VINAKA NA IVAKASALA NI IVOLATABU
E vakacava na bibi ni nomu sokalou?
Dauvunau 12:13: “Rerevaka na Kalou, ka muria na nona vunau: ni sai koya ga oqo nai tavi taucoko ni tamata.”
TAROGI IKO: E laurai beka ena noqu bula ni vaka oya na noqu rai? E laurai beka ena noqu cakava na noqu cakacaka e vale, vanua ni cakacaka, se koronivuli niu talairawarawa ina vunau ni Kalou? Se vakatau ena veika au gadreva kei na ogaoga ni bula oqo na levu ni gauna au vakayagataka ena sokalou?
E vakacava nomu veiwekani kei na Kalou?
Vosa Vakaibalebale 3:5, 6: “Mo vakararavi vei Jiova e na vu ni yalomu: Ka mo kakua ni vakararavi ki na nomu yalomatua: Mo vakarogotaka vua na nomu sala kecega, ia ena vakadodonutaka na nomui lakolako ko koya.”
Maciu 4:10: “Mo vakarokoroko vei Jiova na nomu Kalou, ia mo qaravi koya duaduaga.”
TAROGI IKO: E vaka beka oya na noqu rai me baleti koya na Kalou? Au dau vakararavi beka vua na Kalou? Au dau nuitaki koya beka ena veika au cakava e veisiga kei na gauna au sotava kina e so na ituvaki dredre?
E bibi vakacava vei iko na nomu wilika kei na nomu vulica na iVolatabu?
Joni 17:3: “Sai koya oqo na bula tawa mudu, me ra kilai kemuni na Kalou dina duaduaga, kei Jisu Karisito ko koya ko ni a tala mai.”
TAROGI IKO: E laurai beka ena noqu vakabibitaka na wili iVolatabu kei na noqu dau vakasamataka vakatitobu niu vakadinata na tikina oqo?
E bibi vakacava vei iko na tiko ena soqoni ni ivavakoso vakarisito?
Iperiu 10:24, 25, VV: “Me da sa vakasamataka tale ga na sala me da dui veivakauqeti kina e na loloma kei na cakacaka vinaka. Me da sa kakua ni vakaweleweletaka na sosoqoni vata, . . . me vagumatuataki cake sara ni ko ni sa raica ni sa roro voleka tiko mai na Siga.”
Same 122:1: “Au a reki ni ra kaya vei au, tou mai lako ki na vale i Jiova.”
TAROGI IKO: E laurai beka ena ivakarau ni noqu bula niu vakavinavinakataka na ivakasala oqo ena Vosa ni Kalou? Ena vula sa oti, au sega ni lako beka ina dua na soqoni vakarisito baleta niu vakaliuca e dua tale na ka?
O dau gumatua ena nomu tukuni koya yani na Kalou kei na nona inaki?
Maciu 24:14: “Ena vunautaki mada e vuravura taucoko nai tukutuku-vinaka oqo kei na matanitu, mei vakadinadina . . . ; sa na qai yaco emuri nai vakataotioti.”
Maciu 28:19, 20, VV: “Dou lako yani ka qisi ira me ra noqu tisaipeli na lewe ni veivanua kece ga, . . . vakavulici ira me ra muria na veika kece ga au sa vakarota tu vei kemudou.”
Same 96:2: “Dou sere vei Jiova, dou vakavinavinaka ki na yacana; dou tukuna voli e na veisiga kece ni sa dauia na veivakabulai ko koya.”
TAROGI IKO: Sa veiganiti beka na noqu vakabibitaka tiko ena noqu bula na cakacaka oqo? E vakaraitaka beka noqu sasaga ni vakaitavi ena cakacaka oqo niu vakabauta dina na bibi ni gauna eda sa bula donuya tu oqo?