Ena Vuavuaivinaka Noda Cakacaka Vakavunau ke Yavutaki ena Loloma
1 “Dou lako mai vei au, . . . ka’u na vakacegui kemudou.” (Maciu 11:28) Na vosa oqo i Jisu e vakaraitaka na nona lomani ira dina na tamata. E dodonu tale ga meda vakatotomuri koya na lotu Vakarisito ena noda lomani ira dina e tarai ira tu na ivakarau ni bula tawayalololoma nikua. Eda na cakava vakacava oqo nida kacivaka na itukutuku vinaka?
2 Ena Noda Vosa: Nona lomani ira na tamata o Jisu e tu vakarau kina ena veigauna me vunautaka na itukutuku vinaka. (Joni 4:7-14) Ena uqeti keda tale ga na loloma dina meda kua ni tu vakasuka ni vunau tawalokuci. A cakava oqo e dua na goneyalewa yabaki ono, a vunau vua na marama a dabe tikivi koya toka ena vanua ni wawa e valeniwai. Na cava e uqeti koya me vunau? E tukuna na goneyalewa lailai oqo, “Noqu raici koya au kila ni dodonu me kilai Jiova.”
3 Noda matadredredre kei na rorogo ni domoda ena vakaraitaka nida kauaitaki ira dina na tamata. Noda vakatudaliga ina nodra vakamacala, kei na noda kauaitaka na ka era nuiqawaqawataka e vakaraitaka tale ga nida lomani ira. (Vkai. 15:23) Nida vakatotomuri Jisu, eda na vakabibitaka na itukutuku ni Matanitu ni Kalou kei na loloma i Jiova.—Maciu 24:14; Luke 4:18.
4 Ena Ka Eda Cakava: E laurai na kauai dina i Jisu ena nona raica na leqa qai cakava kina e dua na ka. (Maciu 15:32) Rawa tale ga nida cakava oqo ena cakacaka vakavunau. A raica e dua na tacida yalewa ni vosa tiko ena talevoni e dua na marama, qai sega ni taura rawa na ka e tukuni tiko mai yasana kadua. Bole sara na tacida yalewa oqo me rogoca na ka e tukuni tiko mai qai vakadewataka vua na marama oya. Nona veivukei vakayalololoma na tacida oqo e uqeta sara ga na marama oya me vulica na iVolatabu. Dua tale na tacida tagane a sikova lesu e dua na turaga, a raica sara ni saga tiko na turaga oya me curumaka ina nona katuba ni vale e dua na idabedabe balavu e bibi. Ni rau sa curumaka oti e vale, a dabe sara kina na tacida tagane qai vakavinavinakataki koya na turaga oya, rau tekivu vulica sara kina na iVolatabu.
5 Ena kilai na noda lomana na Kalou kei na noda lomani ira na wekada nida vakaitavi ena cakacaka vakavunau. (Maciu 22:36-40) Na noda vakaraitaka vaka oqo na noda loloma ena noda vosa kei na ka eda cakava, era na siqema rawa kina na wekada yalomalumalumu ni tiko vei keda na ka dina.