Kabita na iSoqosoqo i Jiova

E VOLA na tisaipeli o Jemesa: “Toro voleka vua na Kalou ena qai toro voleka mai vei kemuni o koya.” (Jeme. 4:8) Eda tamata ivalavala ca, ia e sega ni rui cecere o Jiova se rui yawa me dredre ni rogoca noda masu. (Caka. 17:27) Eda na toro volekati Jiova vakacava? Eda na vakayacora qo nida vaqaqacotaka noda veiwekani kei koya, e okati kina noda dau torovi koya ena masu. (Same 39:12) Eda na veivolekati tale ga kei na Kalou nida vulica wasoma nona vosa na iVolatabu. Eda na kilai koya vinaka kina, nona inaki, kei na ka e vinakata vei keda. (2 Tim. 3:16, 17) Sa rawa nida lomani koya da qai sega ni cakava na ka me rarawa kina.—Same 25:14.

² E rawa ga nida volekati Jiova ena vuku i Luvena, o Jisu. (Joni 17:3; Roma 5:10) O Jisu duadua ga e rawa ni vakaraitaka vinaka vei keda na ivakarau ni vakasama kei na rai i Jiova. Na nona veivolekati kei Tamana e rawa ni tukuna kina: “E sega ni dua e kila na Luvena, o Tamana ga, e sega tale ga ni dua e kila na Tamana, o Luvena ga, kei koya ena vinakata na Luvena me vakatakilai Tamana vua.” (Luke 10:22) Nida vulica gona ena Kosipeli na ivakarau ni vakasama i Jisu kei na ivakarau ni lomana, eda sa vulica sara tiko ga na ivakarau ni vakasama kei na ivakarau ni loma i Jiova. Ena uqeti keda qori meda toro voleka vua na noda Kalou.

³ Ena vakavolekati keda tale ga vei Jiova na noda vakamalumalumu ena veiliutaki i Luvena, qo nida kabita na nona isoqosoqo. Me vaka e tukuni ena Maciu 24:45-47, e lesia na Turaga o Jisu Karisito na “dauveiqaravi yalodina e vuku” me vakarautaka na “kakana ena kena gauna donu” vei ira na lewe ni nona vuvale. Nikua, e vakarautaka na dauveiqaravi yalodina na magiti vakayalo. E vakayagataka o Jiova na ilawalawa qo me vakasalataki keda meda wilika e veisiga na iVolatabu, tiko wasoma ena soqoni vaKarisito, meda gumatua tale ga ni vunautaka na ‘itukutuku vinaka ni Matanitu ni Kalou.’ (Maciu 24:14; 28:19, 20; Josua 1:8; Same 1:1-3) Meda kua ni raica vakatamata na dauveiqaravi yalodina. Meda saga gona meda kabita na isoqosoqo rairai i Jiova da qai muria na kena veidusimaki. Qo ena vakavolekati keda vua na noda Kalou o Jiova, ena vakayaloqaqataki keda, ena taqomaki keda tale ga nida vakatovolei.

VUNA E LEVU KINA NA VEIVAKATOVOLEI

⁴ Ke o sa dede ena dina, o sega ni vulagi ena veivakatovolei. Ke sega mada ga ni dede nomu kilai Jiova kei na nomu veimaliwai kei ira nona tamata, o vakadinadinataka ni o Setani na Tevoro e dau saqati ira kece era vakamalumalumu ina veiliutaki cecere i Jiova. (2 Tim. 3:12) Ia se mani vakacava na levu ni nomu vakatovolei, mo kua ni rere se yalolailai ni yalataka o Jiova ni na vakaukauataki iko. E yalataka tale ga na bula tawamudu me icovi ni nomu yalodina.—Iper. 13:5, 6; Vkta. 2:10.

⁵ Eda rawa ni vakatovolei kece ena gauna se vo tiko qo. Tekivu mai na gauna e tauyavu kina na Matanitu ni Kalou ena 1914, e sega ni qai vakadonui me lesu i lomalagi o Setani. Sa kolotaki sobu mai vuravura kei ira nona agilosi ca. Na levu ni ca e vuravura kei na nodra vakatovolei vakalevu na tamata yalayala i Jiova e dusia na cudru i Setani, e dusia tale ga nida bula tiko ena iotioti ni veisiga ni nona veiliutaki ca.—Vkta. 12:1-12.

⁶ E vakararawataki Setani na ituvaki lolovira sa tu kina, e kila tale ga ni sa lekaleka nona gauna. Ena nodra veitokoni na nona timoni, e saga ena nona igu kece me tarova na noda cakacaka vakavunau, me vakaleqa tale ga na noda duavata. E dodonu gona meda vala na tamata i Jiova, “nida sega ni veivala wale ga kei ira na vakalewe ra qai vakadra, ia eda veivala kei ira na veimatanitu, o ira na iliuliu, o ira na lewa tu na vuravura butobuto qo kei ira na yalo ca tawarairai ena veiyasana vakalomalagi.” Ke da vinakata meda qaqa nida to vei Jiova, meda kua sara ni vakamalumalumu, ia meda dara tiko ga na noda iyaragi kece vakayalo meda “vorata kina na ivadi qaseqase” ni Tevoro. (Efeso 6:10-17) E bibi gona meda dau vosota.

VULICA MO DAU VOSOTA

⁷ O koya e dau vosota e sega ni dau yalolailai se cudru ni tusaqati se sotava na veika dredre. Ena vakasama vakayalo, na vosota e dau cavuti vei koya e dei ni cakava na ka dodonu ni sotava na veika dredre, veitusaqati, veivakacacani, se so tale na sala me kua ni yalodina vua na Kalou. Bibi meda vulica na lotu vaKarisito yadua na vosota. Qo ena taura na gauna. Eda na vosota vakalevu nida matua vakayalo. Nida vosota na veika lalai e vakatovolei kina noda vakabauta nida se qai tekivu muria na sala vaKarisito, ena vakaukauataki keda, ena rawa tale ga nida vosota na veivakatovolei dredre. (Luke 16:10) Meda kua ni waraka na veivakatovolei lelevu meda qai vakaraitaka nida via dei ena dina. E dodonu meda vakadeitaka rawa na ka meda cakava ni bera nida vakatovolei. E vakaraitaka na yapositolo o Pita ni dodonu meda vulica eso tale na itovo vaKarisito me sala vata kei na vosota, e vola: “Saga vagumatua me vakaikuritaki na nomuni vakabauta ena ivalavala vinaka, na nomuni ivalavala vinaka ena kilaka, na nomuni kilaka ena nomuni lewa vinaka, na nomuni lewa vinaka ena vosota, na nomuni vosota ena nomuni qarava na Kalou, na nomuni qarava na Kalou ena nomuni veilomani vakaveitacini, kei na nomuni veilomani vakaveitacini ena loloma.”—2 Pita 1:5-7; 1 Tim. 6:11.

⁸ E vakaraitaka tale ga o Jemesa na bibi ni vosota ni vola: “Moni marau na taciqu ni oni sotava na veimataqali veivakatovolei, oni kila ni vakatubura na vosota na vakatovolei ni nomuni vakabauta ena sala qo. Ia me tini vinaka na cakacaka ni vosota moni taucoko kina, moni vinaka ena ka kece, me kua ni dua na ka e yali vei kemuni.” (Jeme. 1:2-4) E kaya o Jemesa ni dodonu meda namaka na lotu vaKarisito na veivakatovolei, meda marautaka tale ga, nida vulica kina meda dau vosota. O duavata kina? E vakamacalataka o Jemesa na yaga ni vosota, oya ni vakavinakataka noda itovo me vakadonui keda kina na Kalou. Io, eda vulica e veisiga na vosota ena gauna eda vakatovolei kina da qai sega ni yalolailai. Na noda vosota ena basika tale kina eso na itovo talei e dodonu meda vakaitovotaka.

⁹ E marautaka o Jiova na noda vosota, ena vakaicovitaki keda ena bula tawamudu. E kaya tale o Jemesa: “E marau o koya e vosota tiko na veivakatovolei, ena gauna e vakadonui kina ena soli vua na isala ni bula a yalataka o Jiova vei ira na lomani koya tiko ga.” (Jeme. 1:12) E bibi na vosota ni vauci kina noda bula. Oya na vuna eda dei kina ena dina. Ke da vakamalumalumu ena veivakatovolei, eda na suka tale i vuravura. Ke dredre meda vosota, ena sega ni tokoni keda na yalo tabu i Jiova, eda na sega tale ga ni vuataka na vua ni yalo tabu.

¹⁰ Ke da vinakata meda vosota tiko ga ena gauna dredre qo, e bibi me donu tiko noda rai me baleta na veika rarawa. Kua ni guilecava ni vola o Jemesa: “Moni marau.” Ena sega ni rawarawa qo ke da vakararawataki se lomabibi. Ia nanuma tiko ni na vakatau kina na noda bula ena gauna se bera mai. Na ka eratou sotava na yapositolo e uqeti keda meda marau tiko ga nida vakararawataki. E volatukutukutaki qo ena ivola na Cakacaka: “Era kacivi ratou na yapositolo, warolaki ratou, ra qai vakaroti ratou me ratou kua tale ni vosa ena yaca i Jisu, oti era sa qai laivi ratou me ratou lako. Eratou mani biubiu mai na matadra na Sanadrini. Dua na ka nodratou marau ni vakadonuya na Kalou me ratou vakacacani ena vuku ni yaca i Jisu.” (Caka. 5:40, 41) Eratou kila na yapositolo ni rarawa eratou sotava e ivakadinadina ni ratou talairawarawa ina ivakaro i Jisu, ni vakadonui ratou tale ga o Jiova. Oti tale e vica na yabaki ni vola tiko na yapositolo o Pita na imatai ni nona ivola ena iVolatabu, e vakamacalataka kina na yaga ni veika rarawa e dau sotavi ni caka na ka e dodonu.—1 Pita 4:12-16.

¹¹ Erau vakararawataki tale ga o Paula kei Sailasa. Rau vesu ni rau kaulotu tiko e Filipai, rau beitaki ni rau vakavuleqa ena koro, rau vakavulica tale ga eso na ivalavala e sega ni dodonu. Rau mokulaki sara vakaca, rau bala tale ga e valeniveivesu. E kaya na iVolatabu ni rau tiko e valeniveivesu ena “lomaloma ni bogi, erau masu rau qai vakacaucautaka na Kalou ena sere o Paula kei Sailasa, era vakarogoci rau tiko na kaivesu.” (Caka. 16:16-25) E donu nodrau rai o Paula kei Sailasa, rau raica ni nodrau vakararawataki ena vuku i Karisito e ivakadinadina ni nodrau yalodina ena mata ni Kalou kei na mata ni tamata, e dua tale ga na sala me rau vunau kina vei ira era via rogoca na itukutuku vinaka. E vauci kina nodra bula eso tale. E qai vakarorogo ena bogi qori na ovisa ni valeniveivesu kei na nona vuvale, eratou mai dua tale ga na tisaipeli. (Caka. 16:26-34) O Paula kei Sailasa erau nuitaki Jiova kei na nona kaukaua, rau nuitaki koya tale ga ni na vukei rau ena gauna rau vakararawataki kina. Rau sega ni vakanuinuikara.

¹² Nikua, e vakarautaka o Jiova na ka kece meda tudei kina nida vakatovolei. E vinakata meda vosota. E vakarautaka na iVolatabu meda kila kina vakavinaka na veika kece e vauca na nona inaki. Qo e vaqaqacotaka noda vakabauta. E rawa nida veimaliwai kei ira na tacida da qai qarava na itavi dokai e lesi vei keda. E ka dokai tale ga nida rawa ni toro voleka vei Jiova ena masu. E rogoca noda vosa ni veivakacaucautaki kei na kerekere meda savasava tiko ga e matana. (Fpai. 4:13) Meda kua ni guilecava ni vakaukauataki keda tale ga nida raica dei na inuinui e tu e matada.—Maciu 24:13; Iper. 6:18; Vkta. 21:1-4.

VOSOTA NA VEIVAKATOVOLEI

¹³ Na ka eda vakatovolei kina ena gauna qo e via tautauvata kei na kena era sotava na tisaipeli taumada i Jisu Karisito. Ena gauna qo, eda dau vosataki na iVakadinadina i Jiova, ra qai vakalolomataki keda na dauveivakacacani lecaika. Me vaka ena nodratou gauna na yapositolo, e levu na veivakacacani era bukana na iliuliu ni lotu yalodua ni vakavotui ena iVolatabu na nodra ivakavuvuli lasu. (Caka. 17:5-9, 13) Ena so na gauna, eda taqomaki na tamata i Jiova nida vakayagataka na dodonu vakalawa era vakarautaka eso na matanitu vakapolitiki. (Caka. 22:25; 25:11) Ia eso tale ga na iliuliu ni matanitu era vakatabuya na noda cakacaka nira via tarova na noda vakaitavi ena vunau. (Same 2:1-3) Ena ituvaki qo, eda na muria ena doudou na nodratou ivakaraitaki na yapositolo yalodina ni ratou “talairawarawa ga vua na Kalou ni iliuliu, sega vua na tamata.”—Caka. 5:29.

¹⁴ Ni takalevu e vuravura nikua na yalo ni boletaki vanua, e levu sara na ka dredre eda sotava meda kua kina ni vakaitavi ena cakacaka vakaitalatala. Eda sega ni lecava na ivakasala ena Vakatakila 14:9-12 me baleta na “manumanu kila kei na kena ivakatakarakara.” Eda kila vinaka na ibalebale ni vosa i Joni: “Qo na vuna e vinakati kina vei ira na yalosavasava na vosota, nira muria na ivunau ni Kalou, ra qai dei ena nodra vakabauti Jisu.”

¹⁵ E rawa ni vakadredretaka noda sokalou ena galala na ivalu, vuaviri, vakacacani kei na vakatatabu vakamatanitu. De dua eda na sega ni soqoni vata vakaivavakoso, se veitaratara kei na valenivolavola ni tabana. Ena sega ni sikovi keda na ivakatawa ni tabacakacaka. Ena sega ni yaco mai na ivola ni isoqosoqo. Na cava o na cakava ke yaco na ituvaki qo?

¹⁶ Qo na kena isau: Cakava na ka o rawa ni cakava ena kena levu duadua o rawata. O se rawa tiko ga ni vuli vakataki iko. Rawa nira sota vata e lewe vica ena dua na vale mera vuli kina. E rawa ni vulici ena soqoni na ivola sa vulici oti se iVolatabu mada ga. Kua ni lomaleqa se taqaya. Ena raica na iLawalawa Dauvakatulewa na sala me veitaratara kina kei ira na veiqaravi ena ivavakoso ena gauna totolo.

¹⁷ Ke mani dredre na ituvaki o qai yawaki ira na tacimu vakayalo, kua ni guilecava ni rau volekati iko o Jiova kei na Luvena, o Jisu Karisito. Kua ni yalolailai, mo yalodina tiko ga. Ena rogoca o Jiova nomu masu, ena vakaukauataki iko na yalona tabu. Rai vua me dusimaki iko. Nanuma ni o tamata i Jiova, o tisaipeli i Jisu Karisito. Mo gumatua gona ni vunau. Ena vakalougatataka o Jiova na nomu sasaga mera tomani iko eso tale ena sokalou savasava.—Caka. 4:13-31; 5:27-42; Fpai. 1:27-30; 4:6, 7; 2 Tim. 4:16-18.

¹⁸ Ke dredre na ka o sotava qai voleka ni mate me vakataki ratou na yapositolo kei na so tale, vakararavi vua “na Kalou e dau vakaturi ira na mate.” (2 Kor. 1:8-10) Nomu vakabauta na veivakaturi ena vukei iko mo vosota na veika dredre. (Luke 21:19) E ivakaraitaki vinaka o Jisu Karisito, e kila ni na vukei ira eso tale mera vosota nona yalodina. Na nomu ivakaraitaki tale ga e rawa ni uqeti ira na tacimu.—Joni 16:33; Iper. 12:2, 3; 1 Pita 2:21.

¹⁹ Me ikuri ni veivakacacani kei na veitusaqati, eso tale na ituvaki dredre ena vinakati kina na vosota. Kena ivakaraitaki, era yalolailai eso nira sega ni via vakarorogo na tiko ena yalava. Eso tale era vosota na mate bibi se na lomabibi, se ra yalolailai ni vakaiyalayala ga na ka era rawata ena vuku ni kedra ituvaki. Na yapositolo mada ga o Paula e vosota voli e dua na ka e dau vakatovolei kina na nona cakacaka vakaitalatala ena so na gauna. (2 Kor. 12:7) O Epafirotaito tale ga e dua na lotu vaKarisito ena imatai ni senitiuri mai Filipai, e ‘yalolailai nira rogoca na nona itokani ni tauvimate.’ (Fpai. 2:25-27) Na noda malumalumu e rawa ni vakavurea eso na leqa ena dredre meda vosota rawa. Ni duidui na noda rai e rawa ni vakavuna meda sega ni veiyaloni kei ira na tacida se lewenivuvale. Ia na veika dredre qo era na vosota rawa o ira na muria na ivakasala ena vosa i Jiova.—Isik. 2:3-5; 1 Kor. 9:27; 13:8; Kolo. 3:12-14; 1 Pita 4:8.

YALODINA TIKO GA

²⁰ E dodonu meda kabiti Jisu Karisito ni lesia o Jiova me Ulu ni ivavakoso. (Kolo. 2:18, 19) E bibi meda cakacaka vata kei na “dauveiqaravi yalo dina e vuku” kei ira na lesi mera ivakatawa. (Iper. 13:7, 17) Nida muria voleka na ituvatuva vakalou da qai tokoni ira era liutaki keda, eda sa tokona tiko na cicivaki vinaka ni isoqosoqo e cakava na loma i Jiova. Meda vakayagataka vinaka na isolisoli ni masu. Nanuma tiko ni sega ni rawa ni tagutuva na noda veivosaki kei na Tamada vakalomalagi se vakaleqa noda veiwekani kei ira na tacida na bai ni valeniveivesu, se rumu o sogolati tu kina.

²¹ Meda vosota, yaloqaqa da qai gumatua ena cakacaka e lesia o Jisu Karisito vei ira na nona imuri: “O koya gona, ni lako moni vakavulici ira na lewe ni veivanua kece ga mera tisaipeli, ni papitaisotaki ira ena yaca i Tamada kei na Luvena kei na yalo tabu, vakavulici ira mera muria na ka kece au vakarota vei kemuni.” (Maciu 28:19, 20) Meda vakataki Jisu ena noda vosota, da qai vakanamata ina veivakalougatataki ni Matanitu ni Kalou kei na bula tawamudu. (Iper. 12:2) Nida tisaipeli i Karisito, e itavi dokai meda vakaitavi ena vakayacori ni nona parofisai me baleta “na ivakataotioti ni veika vakavuravura.” E kaya: “Ena vunautaki mada na itukutuku vinaka qo ni Matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava.” (Maciu 24:3, 14) Ke da solia noda vinaka kece ena cakacaka qo, eda na vakalougatataki meda bula tawamudu ena vuravura vou e vakarautaka o Jiova mera bula kina na yalododonu!