iVola mai na iLawalawa Dauvakatulewa

Raveitacini:

E marautaki dina me keitou volavola yani vei kemuni! A kaya na yapositolo o Joni ni ‘lomani ira dina’ na nona itokani ena vakabauta qai marau nira “dau muria nai vakavuvuli . . . dina,” e va tale ga qori na neitou rai. (2 Joni 1, 4) E ka ni veivakalougatataki vei keda kece na ka dina! Eda sereki kina mai vei Papiloni na Kalevu, na kena ivakavuvuli kei na itovo e beci kina na Kalou. Nida talairawarawa vua na Kalou, e rawa nida dauloloma, yalovinaka, da yalololoma tale ga. E rawa ni vakadonui keda kina na Kalou da qai nuitaka na bula tawamudu.

Eda vakavinavinaka tale ga ni dusimaki qai vakaukauataki keda e veisiga na yalo tabu i Jiova! E nuitaki ni oni taleitaka na kena vakamacalataki qori ena Soqo ni Tikina sa oti e kena usutu ‘Dusimaki ena Yalo ni Kalou.’ Ni sa qai torosobu ga na ituvaki e vuravura, e bibi meda nuitaka na yalo tabu i Jiova me dusimaki keda ena veisiga dredre sa tu qo e matada.

Ni o wilika na Yearbook, sega ni vakabekataki ni tara sara ga na lomamu na itukutuku me baleti ira na tacida era vosota na veika dredre ena vuku ni nodra vakabauta. E vakatubuqoroqoro ni levu vei ira na yalodina qo era se qai papitaiso ga se ra sa bera ni papitaiso ena gauna ra sotava kina na ituvaki dredre. Eda lomani ira dina ena vuku ni nodra yalodina kei na nodra dei ena ivalavala dodonu! Io, na nodra ivakaraitaki vinaka e uqeti keda meda saga meda yalodina tiko ga ina Matanitu ni Kalou se mani leqa cava e basika.—1 Ces. 1:6-8.

Raveitacini, keitou kila ni oni sotava na leqa vakailavo kei na so tale, ia oni vosota qori ena nomuni saga mera veilomani tiko ga nomuni vuvale. Ena ka ni sasaga vei kemuni eso me wasoma nomuni vunautaka na Matanitu ni Kalou kei na nomuni dau tiko ena soqoni. Ni oti gona na kena veivosakitaki lako vata kei na masu, sa vakatulewataki kina me caka eso na veisau ena soqoni vakaivavakoso me tekivu ena 1 Janueri, 2009. Ena vuku ni veisau qo, e nuitaki ni oni na vakayagataka vakalevu nomuni gauna ena vuli vakataki kemuni kei na vuli vakavuvale.

E marautaki tale ga nida raica e levu era rawata na ivakatagedegede mera papitaiso ena soqo siga dua, soqo ni tabacakacaka kei na soqo ni tikina. Eso vei ira qo era se gone sara. Oni vakacaucautaki na itubutubu ena nomuni tuberi ira na luvemuni mera taleitaka na ka dina kei na nomuni uqeti ira mera qaravi Jiova nira se gone ena nodra yalataka vua nodra bula. E levu sara na ka dredre era sotava e koronivuli, ia nodra vakadonui mera papitaiso e vakaraitaka na vinaka ni veituberi mai vale.—Same 128:1-6.

E vakavinavinakataki tale ga na tubu ni vuli iVolatabu—era ogaoga vakalevu kina na daukaulotu kei ira na painia lavotaki. Keitou marautaka na ilesilesi bibi oni vakaitavi kina na mataveitacini e vuravura raraba ena nomuni kaya vei ira na yalomalumalumu, “Lako mai!” kei ira kece na via gunu mera mai “gunuva walega na wai ni bula.” (Vkta. 22:17) Eda kidavaki ira na le 289,678 ina ivavakoso e vuravura raraba era vakaraitaka nodra yalayala ena nodra papitaiso ena yabaki sa oti!

E vinaka meda dau nanuma na nona vosa na yapositolo o Joni, e kaya: “Ko vuravura sa lako tani yani, kei na kena gagadre talega; ia ko koya sa cakava na ka sa vinakata na Kalou, sa tu dei ga ka sega ni mudu.” (1 Joni 2:17) Meda vakasamataka tiko ni sa voleka sara na gauna me “lako tani yani” na veika ni vuravura qo! E ka vakayalomatua ‘meda yadra tiko’ da qai vakaliuca na loma ni Kalou. (Maciu 24:42) Ke da cakava ya eda na sega ni veivutunitaka, eda na tauca dina na yaga ni yalololoma i Jiova.—Aisea 63:7.

Na itukutuku veiuqeti mai na veivanua ena Yearbook, e nuitaki ni na vakayaloqaqataki kemuni kece moni vakaliuca tiko ga na Matanitu ni Kalou. Moni nuidei ni keitou dau nanumi kemuni ena masu qai lomani kemuni vakalevu. Me vakalougatataki kemuni mada ga o Jiova.

Tacimuni,

iLawalawa Dauvakatulewa ni iVakadinadina i Jiova