Vakabauti Nomu iVakamacala

NI O tukuna e dua na itukutuku e kena ivakarau mera veinanuyaka na vakarorogo se dina beka na ka o tukuna se sega? Na yavu cava me vakabauti kina? Ni o qasenivuli, e nomu itavi mo sauma na taro vaka oqori, se mo vukei ira na rogoci iko mera raica vakataki ira na kena isau. Ke tiki bibi ni nomu ile e dua na tikina o kila era na lomatarotarotaka na vakarorogo, e vinaka mo vakamatatataka me rawarawa kina nodra ciqoma. Oqo ena vakarawarawataka nomu rawai ira na rogoci iko ena nomu ivakamacala momona.

E dau saga tale ga o Paula me rawai ira na rogoci koya ena nona ivakamacala. E dau saga me veisautaka na nodra vakasama ena nona vakayagataka na ivakamacala momona, vosa vakaibalebale, kei na vosa ni veivakadreti. E ivakaraitaki vinaka dina vei keda. (Caka. 18:4; 19:8) Ia, e so era dau vakayagataka na vosa momona mera veivakacalai kina. (Maciu 27:20; Caka. 14:19; Kolo. 2:4) Era na yavutaka beka nodra ile ena dua na itukutuku lasu, ra kauta mai na nodra ivakamacala na tamata e qiqo nodra rai me tokona nodra ivakamacala, ia era vakalecalecava na ivakamacala matata e so e sega ni tokona nodra nanuma, ra qai vakayagataka ga na ka e mositi ira na vakarorogo mera rawai ira kina. E dodonu meda qarauna meda kua ni muria na iwalewale vaka oqo.

Yavutaki ena Vosa ni Kalou. E sega ni dodonu meda vakavulica na ka ga eda nanuma. E noda inaki meda wasea na ka eda vulica mai na iVolatabu. Na tikina oqo e vukei keda kina vakalevu na ivola e vakarautaka na dauveiqaravi yalodina ka vuku. Na ka eda wilika ena ivola e vakarautaka e uqeti keda meda dau dikeva vinaka na Vosa ni Kalou. E uqeti keda tale ga meda vukei ira na rogoci keda mera rai ina iVolatabu—sega ena noda vinakata wale ga me tokoni na noda ile—ia noda vinakata mera raica sara ga na ka e tukuna. Eda duavata kei Jisu ena ka a tukuna ena masu vei Tamana: “Sa ka dina na nomuni vosa.” (Joni 17:17) Na Dauveibuli duadua ga o Jiova e ivurevure ni ka dina kece ga. O koya gona, ena momona dina noda ivakamacala, ena vakabauti tale ga kevaka wale ga e yavutaki ena nona Vosa.

Tiko beka na gauna o na veivosaki kei na dua e sega ni vakabauta na iVolatabu, e sega ni vakadinata ni Vosa ni Kalou. Mo na lewa vinaka sara na gauna kei na sala mo na kauta cake mai kina e dua na tikinivolatabu. Ia, me nomu inaki tiko ga mo na vakamuai koya ina iVolatabu ena kena gauna totolo.

E kena ibalebale beka oqo ni sa na veirauti ga nomu wilika e dua na tikinivolatabu me sa ivakadinadina ni nomu ile? So beka na gauna. Vakalevu ena gadrevi mo dusia na veitikina e yavolita na tikinivolatabu o wilika mo vakaraitaka kina ni tokona dina na nomu ile. Ke o via kauta cake mai e dua na ivakavuvuli mai na dua na tikinivolatabu ia e duatani na ka e vakamacalataka na veitikina e yavolita, ena gadrevi beka me so tale na ivakadinadina o vakarautaka. De dua ena gadrevi mo vakayagataka sara ga e vica tale na tikinivolatabu e tara vakadodonu na ivakavuvuli o vakamacalataka tiko me kila kina o koya drau veivosaki ni ka o tukuna e yavutaki dina ga mai na Vosa ni Kalou.

Kua ni vakatubutaka nomu vosa mo lai tukuna e dua na ka e sega ni tukuna na tikinivolatabu. Wilika vinaka na tikinivolatabu. De dua na tikinivolatabu o wilika e vosa raraba tu ga, e dina ni o kaya ni baleta na ka o vakamacalataka tiko. Ia, ena vakabauti ga nomu ivakamacala ke ra raica na vakarorogo ni ka o tukuna e vakadinadinataki sara ga ena tikinivolatabu oya.

Tokoni ena So Tale na iVakadinadina. So na gauna, ena yaga me taurivaki tale ga e so na ivakadinadina mai na taudaku ni iVolatabu mera raica kina na rogoci keda na dina ni ka e kaya na Vosa ni Kalou.

Kena ivakaraitaki, o na dusia beka na veika era sowiri tu mai lomalagi kei na veika era tu e vuravura me ivakadinadina ni tiko e dua na Dauveibuli. O na vakaraitaka sara beka ni tiko na lawa e vauci ira na veika oqo, me vaka na lawa e vauca na idre ni vuravura se na gravity, o qai dusia ni oqo e vakaraitaka ni tiko e dua na Daubulilawa. Ena momona na nomu ivakamacala ke salavata kei na ka e tukuni ena Vosa ni Kalou. (Jope 38:31-33; Same 19:1; 104:24; Roma 1:20) E yaga noda kauta mai e so na ivakaraitaki vaka oqo baleta e kilai kina ni itukutuku ena iVolatabu e salavata kei na ka eda raica.

Vakacava ke o via vukea tiko e dua me raica ni iVolatabu e Vosa dina ni Kalou? O na via kauta cake beka mai e so na ka era tukuna na tamata rogo ena nodra vakadinata ni iVolatabu e Vosa ni Kalou. Ia, sa o koya beka ga oya? Ena vakatau oqo ke ra kilai, ra dokai na tamata rogo oqo vei ira era rogoci iko tiko. Rawa beka ni o vakayagataka na saenisi mo vakadinadinataka kina ni vakavuna na Kalou na iVolatabu? Ke o nanuma mo sa yavutaka ga nomu ivakamacala ena nodra vakadidike na saenitisi o sa tarataravaki tiko ena dua na yavu malumalumu, baleta era tamata ga na saenitisi. Ena yasa adua, ke o tekivu ena Vosa ni Kalou o qai dusia na kena tokoni mai na vakadidike vakasaenisi, o sa tauyavutaka tiko nomu ile ena dua na yavu dei.

Se ile cava ga o via vakamacalataka, e dodonu me so na kena ivakadinadina vinaka. Ena vakatau tale ga na levu ni nomu ivakadinadina ena ka e kila o koya e rogoci iko. Kena ivakaraitaki, ke o vakamacalataka tiko na “veisiga mai muri” e cavuti ena 2 Timoci 3:1-5 (VV), o na via dusia beka vua e dua na itukutuku kilai levu e vakaraitaka votu na kena sa ‘sega na itovo vakatamata.’ E dua beka ga na ivakaraitaki oya e sa rawa ni vakadinadinataka na kena sa vakayacori na tiki ni parofisai oqo.

E rawa tale ga ni yaga na vakayagataki ni dua na ivakarau ni vosa na analogy, oqo e okati kina na vakatauvatani ni rua na ka. Ena sega beka ni veirauti oqo me vakadeitaki kina nomu ile; ni rawa ni qai vakadeitaki ga oqo ena ka e kaya na iVolatabu. Ia, ena vakarawarawataka nodra raica na vakarorogo na dina ni dua na vakasama. Na vakatautauvata vaka oqo e rawa ni vakayagataki me vakamacalataki kina ni Matanitu ni Kalou e dua dina na matanitu. O rawa ni vakamacalataka ni Matanitu ni Kalou, me vaka ga na matanitu ni tamata, e tiko o ira era veiliutaki kina, ira na lewena, na kena lawa, kei na kena porokaramu ni veivakavulici.

E rawa ni vakayagataki e so na italanoa dina me vakaraitaki kina na vinaka ni kena muri na ivakasala vakaivolatabu. Rawa ni o tukuna sara ga na ka e baleti iko me tokoni kina e dua na nomu ivakamacala. Me kena ivakaraitaki, ni o dusia tiko vua e dua na bibi ni kena wiliki kei na kena vulici na iVolatabu, e rawa mo vakamacalataka na ka vinaka o sotava ena nomu vakayacora oqo. Ena nona via vakayaloqaqataki ira na mataveitacini na yapositolo o Pita, sa qai vakamacalataka na vakamataliataki i Karisito—na ka a raica sara ga e matana. (2 Pita 1:16-18) E dau talanoataka tale ga o Paula na ka e sotava. (2 Kor. 1:8-10; 12:7-9) Ia, me kua ni sivia tale nomu vakayacora oqo de lakolako e nanumi ni o dau tukutukuni iko.

Eda duidui o keda, duidui tale ga na noda vakasama, na ka gona ena lomavakacegu kina e dua e rawa ni sega ni lomavakacegu kina e dua tale. E vinakati kina mo kila na nodra nanuma na vakarogoci iko ni o digia tiko na ile o na vakayagataka kei na kena itukutukuni. E kaya na Vosa Vakaibalebale 16:23 (NW): “Ena kilai na tamata yalomatua ena vosa e lutu mai gusuna, ia na tebenigusuna ena vure mai kina na ivakasala momona.”