Vakalougatataki na Vunau ena Yalava e Sega ni Lesi

1. Na cava na rai i Jisu me baleti ira e sotava ena cakacaka vakaitalatala?

¹ Na cava na rai i Jisu me baleti ira e sotava ena cakacaka vakaitalatala? “Ni raici ira na ilala levu, e lomani ira nira vakaloloma ra qai sega ni kauaitaki tu me vaka na sipi e sega na kena ivakatawa.” (Maciu 9:35,36) A tarai Jisu na vakaloloma ni kedra ituvaki vakayalo, mani tukuna vei ratou na nona tisaipeli: “Io, e levu sara na ka me tamusuki, ia era lewe lailai ga na tamata cakacaka. O koya gona, dou kerea na Turaga ni tatamusuki me tala mai eso tale na tamata cakacaka ina nona tatamusuki.” E tiko tale beka ga vei iko na rai i Jisu ni o raica na yalava ni cakacaka e Viti?

2. Na ituvatuva cava me muri nida via cakacaka na ena yalava e sega ni lesi?

² Kerea e Dua na Yalava: A kila o Jisu ni dua na vanua levu ena vinakati me vunau kina. (Luke 4:43) Eda na vakatotomuria vakacava na nona rai me baleta na nona yalava? Eda rawa ni kerea vei ira na qase ni ivavakoso na fomu ni cakacaka ena yalava e sega ni lesi. A vakarogoi ena ivavakoso kece ena vica na vula sa oti na ituvatuva vou me cakacakataki vinaka kina na yalava kece e sega ni lesi e Viti. (1 Kor. 14:33, 40) Nida muria na ituvatuva matau qori da qai sega ni caka noda ga, eda sa vakaraitaka tiko nida doka na veidusimaki ni Kalou, eda na vakalougatataki tale ga kina.

3. Era vakalougatataki vakacava o ira na gole ina yalava e sega ni lesi?

³ Rawa Nida Vakalougatataki: A vakadonui ena vica na vula sa oti mera gole eso ina yalava e sega ni lesi. Era vakalougatataki kina vakacava? Era tauyavutaka e 42 na vuli iVolatabu na tacida era gole ina yanuyanu o Moce, e 40 na vuli iVolatabu era tauyavutaka o ira na gole i Kadavu. E dua tale na ilala era gole ena dua na yalava e sega ni lesi e Vanua Levu, era sotavi ira kina e le ono era sa sega tu ni dautukutuku, era marautaka na nodra vukei kei na nodra vakayaloqaqataki. Era tuvanaka na tacida mai Labasa me vakayacori ena yalava qori na iVakananumi nira kune kina e levu na tataleitaki. E tukuna e dua na tacida e gole ina dua na yalava e sega ni lesi: “Au raica rawa ni dodonu meu cakava e dua na ka meu veivuke kina.” E tukuna e dua tale: “Dua na ka na noqu lomani ira na tu ena yalava.”

4. Na gauna veiganiti cava o rawa ni lai veivuke kina ena dua na yalava e sega ni lesi?

⁴ E levu na yalava e Viti e sega tu ni lesi. Vakacava o rawa ni lai veivuke kina? De dua o rawa ni lai vunau ena nomu yanuyanu, nomu koro se dua na yalava e sega ni lesi e voleka ena nomu itikotiko. O rawa beka ni vakayagataka na nomu gauna ni gade se sereki ni vuli mo dou gole kina vakavuvale ina dua na yalava e sega ni lesi? Eda na vakalougatataki tu ga ke da soli keda meda vukei ira eso tale. Dou saga mada ga vakavuvale mo dou lai cakacaka ena dua na yalava e sega ni lesi, mo dou ‘tovolea dou raica tale ga kina na vinaka i Jiova.’—Same 34:8.