Me Laurai ni Tarai Iko na ka o Tukuna

EDA kilai tani na tamata ni rawa nida vakaraitaka na lomada—eda tagi se dredre, eda marau se rarawa, eda lomadei se lomataqaya. Na veika oqo era tukuni keda, ena kilai kina se da tamata vakacava, eda raici ira vakacava na tani, se da raica vakacava e dua na ituvaki. Ia, e levu era dau kubuta lo voli na lomadra ena vuku beka ni drakidrakita ni bula era sotava—e so ena vuku ni ivakarau ni bula era tuberi mai kina. Ia, e vinakata o Jiova meda bucina e lomada na itovo vinaka, da qai vakaraitaka ena noda ivalavala.—Roma 12:10; 1 Ces. 2:7, 8.

De dua ena rawa ni kilai na lomada ena vosa eda vakayagataka. Ia, ke sega ni laurai oqo ena itautau ni noda vosa, e rawa ni kilai kina ni sega ga ni vu dina tiko mai lomada na noda ivakamacala. Ena yasana adua, ke o digia na vosa vinaka mo vakayagataka, qai vakilai tale ga ni tarai iko na nomu ivakamacala, ena taleitaki na ka o tukuna, ena tara tale ga na lomadra na vakarogoci iko.

Me Vu Dina Mai Lomamu. E dau vakilai ni vu dina sara ga mai lomada na ka eda tukuna nida dau raica lesu na nodra itovo vinaka na wekada se noda itokani dredre. Nida vakamacalataka tale ga na itovo uasivi i Jiova, vaka kina noda vakavinavinakataka nona yalovinaka, e dodonu me vakilai ena irogorogo ni domoda. (Aisea 63:7-9) Nida veivosaki tale ga ena cakacaka vakavunau, se da vosa mai na buturara, e dodonu me vakilai ena irogorogo ni domoda noda kauai dina.

Dua na gauna a lako mai vei Jisu e dua na vukavuka qai kerea me vakabulai. Vakasamataka mada na irogorogo ni domo i Jisu ni kaya vua: “Au sa vinakata; mo savasava mai.” (Mari. 1:40, 41) Raivakatayaloyalotaka tale ga na ka e yaco ni torovi Jisu lo mai e dua na marama e turidra balavu me 12 na yabaki, qai tara na tutu ni nona isulu. Ni kila ni sa na sega tale ni vunitaki koya rawa, sa qai cuva sobu ena mata ni Jisu ena sautaninini, qai vakaraitaka vei ira na lewevuqa na vuna e tara kina na nona isulu, kei na nona sa vakabulai. Vakasamataka mada na malumu ni itautau ni vosa i Jisu ena nona kaya vua: “Na luvequ-yalewa, mo vakacegu; sa vakabulai iko na nomu vakabauta.” (Luke 8:42b-48) Na yalololoma e vakaraitaka o Jisu ena veigauna oya e guiguilecavi dredre dina me yacova tiko mai oqo.

Ni tuburi keda na yalololoma me vaka a tuburi Jisu, da qai via veivukei dina, ena laurai sara ena itautau ni noda vosa. Na ka eda tukuna ena vu sara ga mai lomada, ena sega ni lako toka ga mai tebenigusuda. Oqo ena vakarawarawataka sara ga na nodra rogoci keda na tani. Qai levu ga na ka eda tukuna ena cakacaka vakavunau eda na tukuna ena dela ni veikauaitaki dina, vakauasivi nida saga meda vakaraitaka vei ira na rogoci keda e dua na ka era lecava, nida veivakayaloqaqataki, nida veivakadreti, vaka kina nida duavata kei ira ena nodra leqa.

Me laurai ena irairai ni matamu na loloma dina. Era na kauai tiko ga na vakarorogo ke ra vakila ni tarai iko dina na ka o tukuna. Ke sega, e rawa nira nanuma ni o sega ni kauaitaki ira. Nomu veikauaitaki e dodonu me vu mai lomamu, e sega ni dodonu me vaka na matavulo me darami wale tu ga.

Me kilai tale ga ena irogorogo ni domomu ni tarai iko dina na ka o tukuna. Ena dredre beka oqo vei iko ke o domo kaukaua. Ia, kua ni yalolailai, o na rawata ke o saga. Ena yaga mo kila toka ni o ira era dau vosa vakalekaleka qai vakatotolo e dau kaukaua na domodra. Saga gona mo vosa vakamalua, me malumu tale ga na itautau ni nomu vosa, mera vakila kina na vakarorogo ni vu mai lomamu na ka o tukuna.

Ia, koya e bibi sara na vanua e gole tiko kina nomu vakasama ni o vosa. Ke o vakasamataki ira vakabibi na vakarogoci iko, o qai vinakata sara ga mo tukuna e dua na ka ena yaga vei ira, ena vakilai oqori ena itautau ni nomu vosa.

E dau veivakauqeti na vosa e bulabula, ia mo vakaraitaka tale ga ni o kauaitaki ira dina na vakarorogo. Vei ira eda veivosaki, meda kua ni uqeta wale ga nodra vakasama; meda saga tale ga meda tara sara na lomadra.

So Tale na Ka Meda Cakava. Nida sotava na ituvaki leqataki e dau laurai vei keda na yalobibi, yalorarawa, se na yalolailai. Ena yasana adua, e dodonu meda kilai vakalevu duadua nida tamata yalomamarau ena keda irairai, vakabibi ena noda ivosavosa. Ia, e tiko e so na ivakarau ni yalo meda saga me kua ni laurai vei keda. Na ivakarau ni yalo oqo e sega ni salavata kei na itovo vakarisito. (Efeso 4:31, 32; Fpai. 4:4) E rawa nida vakaraitaka na ivakarau ni yalo kece ga ena vosa eda cavuta, kena itautau, kena irogorogo, irairai ni matada, kei na noda ivukivuki.

Levu sara na ivakarau ni yalo e volatukutukutaka na iVolatabu. So na gauna e cavuta sara ga na yalomarau, yalorarawa, se yalobibi. So tale na gauna e talanoataka na ka e yaco se vola sara ga na ka e cavuta e dua me vakaraitaka kina na ivakarau ni yalona. Ni o wilika i cake na itukutuku vaka oqo, saga mo vakavotuya sara ga ena irogorogo ni domomu na ivakarau ni yalo e vakaraitaki tiko kina, oqo ena yaga vei iko kei ira era rogoci iko. Mo cakava rawa oqo, ena yaga mo biuti iko sara ga ena ituvaki i koya o na wilika na kena itukutuku. Ia, ni o wiliwili tiko mai na buturara, qarauna me kua ni sivia tale nomu ivukivuki, ena gauna vata oqori, saga me tarai ira sara ga na vakarorogo na ka o wilika.

Me Ganita na iVakamacala. Na itautau ni nomu vosa, me vaka e sa vakamacalataki oti me baleta na bulabula ni vosa, e vakatau vakalevu ena ka o tukuna.

Cega mada na Maciu 11:28-30, dikeva na ka e kaya. Oti, qai wilika nona vosataki ira na vunivola kei na Farisi o Jisu me vaka e volai ena Maciu wase 23. Ena cavuta beka vakamalua o Jisu na vosa kaukaua oqo? Sega sara!

Na cava o nanuma? Ena vakacava na irogorogo ni domomu ni o wilika na vakamamasu i Juta me baleti tacina o Penijamini, e volatukutukutaki ena Vakatekivu wase 44? Dikeva na nodratou rarawa e cavuti ena tikina e 13, na mosi ni yalo i Juta ena tikina e 16 ni tagicaka na vuna beka eratou sa mai sotava kina na leqa, kei na nona sa sega ni qai kinoci koya rawa tale o Josefa, e volai ena Vakatekivu 45:1.

O koya gona, me rawa ni taucoko sara na noda wilivola se vosa, meda kua ni kauaitaka wale ga na vosa, se vakasama, meda kauaitaka tale ga na ivakarau ni yalo me na lako vata kei na vosa se vakasama eda via vakadewataka.