Na Cava Keimami Vakatokai Kina me iVakadinadina i Jiova?

E levu era nanuma ni iVakadinadina i Jiova e yaca ni dua na lotu vou. Ia ena sivia na 2,700 na yabaki sa oti, era vakatokai na dauveiqaravi ni Kalou dina mera nona “ivakadinadina.” (Aisea 43:10-12) Me yacova na yabaki 1931, keimami se kilai tiko ena yaca Gonevuli ni iVolatabu. Na cava keimami sa vakatokai kina me iVakadinadina i Jiova?

E kilai kina na neimami Kalou. E kune vakavica na udolu na yaca ni Kalou o Jiova ena ivolavivigi makawa ni iVolatabu. Ena levu na vakadewa sa sosomitaki na yaca qo ena icavuti, Turaga se Kalou. Ia e tukuna sara ga na Kalou dina vei Mosese ni yacana o Jiova, qai kaya: “Qo na yacaqu me tawamudu.” (Lako Yani 3:15) Ena sala qo e vakaduiduitaki koya kina mai vei ira na kalou lasu kece. E ka dokai me keimami vakayacani ena yaca tabu ni Kalou.

E kilai kina na neimami cakacaka. E dua na ilala levu ena gauna makawa, tekivu mai vua na turaga yalodina o Epeli, era vakadinadinataka nodra vakabauti Jiova. Ena veisenitiuri sa sivi era mai lewe tale ga ni “ivakadinadina era vaka na o” qo o Noa, Eparama, Sera, Mosese, Tevita, kei na levu tale. (Iperiu 11:4–12:1) Me vaka ga na nona soli ivakadinadina ena mataveilewai e dua ena vukui koya e sega ni cala, keimami na tukuna tale ga na ka dina me baleta na neimami Kalou.

Keimami vakatotomuri Jisu. E vakatokai koya na iVolatabu me “ivakadinadina yalodina e daudina tale ga.” (Vakatakila 3:14) A tukuna sara ga o Jisu ni a ‘vakatakila na yaca ni Kalou’ qai ‘tukuna tiko ga na ka dina’ me baleta na Kalou. (Joni 17:26; 18:37) O ira tale ga na imuri dina i Karisito e dodonu mera vakatokai ena yaca i Jiova ra qai tukuna vei ira tale eso. Qo sara ga na ka era cakava tiko na iVakadinadina i Jiova.

• Na cava era vakatokai kina na Gonevuli ni iVolatabu ena yaca iVakadinadina i Jiova?

• Gauna cava sa ra tu kina e vuravura o ira era vakadinadinataki Jiova?

• O cei e iVakadinadina levu duadua i Jiova?