Ni o sarava tiko na itaba ni brochure qo, o siqema rawa na maqosa ni nodra isulusulu na iVakadinadina i Jiova nira tiko ena soqoni? Na cava keimami dau kauaitaka kina na keimami irairai?

E vakaraitaka ni keimami doka na neimami Kalou. E sega ni dau raica ga o Jiova na irairai e sau. (1 Samuela 16:7) Ia ni keimami sokaloutaki koya, keimami vinakata sara ga me keimami dokai koya kei ira keimami sokalou vata. E vaka ga nida tu ena mata ni dua na tui se peresitedi, eda na kauaitaka vakabibi meda tokara na isulu e rakorako nida rokovi koya. E va tale ga qori na neimami kauaitaka na keimami irairai ena soqoni, qori e vakaraitaka ni keimami rokovi koya “na Turaganilewa ni vuravura taucoko,” na Kalou o Jiova, vaka kina na vanua keimami sokaloutaki koya kina.​—Vakatekivu 18:25.

E vakaraitaka na ivakavuvuli keimami muria. Na iVolatabu e uqeti ira na lotu vaKarisito mera dara na isulu “e rakorako, me laurai kina na yalomatua.” (1 Timoci 2:9, 10) Na isulu “e rakorako” keimami dara e sega ni mataqali isulu e vakaraitaki kina na yago se veivagarogaroi. Keimami vakaraitaka tale ga na “yalomatua” ena neimami digia na isulu e rairai vinaka, ia e sega ni sakulevu. E laurai ena ivakavuvuli qo ni tu e levu na isulu e rawa ni keimami digia. Na maqosa ni keimami irairai e rawa ni ‘vakacaucautaki kina na ivakavuvuli ni neimami iVakabula’ qai “vakalagilagia na Kalou.” (Taito 2:10; 1 Pita 2:12) Na nodra rai eso tale me baleta na sokalou vei Jiova e vakatau tale ga ena maqosa ni keimami irairai ena soqoni.

Ke sega mada ga ni dua nomu isulu ni lotu, o sureti mo mai tiko mada ga ena soqoni. E sega ni gadrevi sara me voli na isulu saulevu me rakorako kina na neimami isulusulu.

• Na cava e bibi kina neimami isulusulu ena neimami sokalou?

• Na ivakavuvuli cava keimami muria me baleta na keimami irairai?

Ke o vuli iVolatabu tiko kei na dua na iVakadinadina i Jiova, o na rairai vakarautaka taumada na ulutaga o na vulica. E bibi tale ga mo cakava qori ni o vakavakarau ena soqoni. Ena yaga sara ke dua na noda ituvatuva vinaka.

Vakadeitaka na gauna kei na vanua mo vakavakarau kina. Na gauna cava o kila ni o rawa ni vakavakarau vinaka kina? Ena mataka lailai ni bera ni o cakacaka, se na bogi ni ratou sa moce na gone? Ke o sega mada ga ni rawa ni vuli vakabalavu, vakadeitaka na levu ni gauna mo vakayagataka kina, me kua ni vakalatilati e dua na ka. Mo vuli ena dua na vanua e vakanomodi, bokoca na retio, tivi, se talevoni me kua ni dua na ka e veivakasosani ena gauna o vuli tiko kina. Ni o masu ni bera ni o vuli o na sega kina ni lomaocaoca, o na rawa ni vakamua vakatabakidua na nomu vakasama mo vulica na Vosa ni Kalou.​—Filipai 4:6, 7.

Makataka na ka ena vulici, qai vakavakarau mo saumitaro. Mo kila mada e liu na uto ni vakasama ni vuli. Vakasamataka na ulutaga ni vuli se wase, vakasamataka na sala e veisemati kina na ulutaga lalai kei na ulutaga levu, vakaraica na iyaloyalo kei na taro ni railesuvi e veivosakitaki kina na veitikina bibi. Oti qori mo wilika sara na parakaravu yadua, qai vaqara na isau ni taro. Cega qai wilika na tikinivolatabu e sega ni lavetaki, qai raica se tokona vakacava na ulutaga. (Cakacaka 17:11) Ni o sa raica na isaunitaro, makataka e vica ga na matavosa ena parakaravu ena rawa ni vukei iko mo nanuma tale na isaunitaro ena gauna ni soqoni. Ni sa vakacagau tiko na soqoni, o rawa ni laveliga mo saumitaro vakalekaleka ena nomu vosa ga.

Ni o vakarautaka na veiusutu ena veivosakitaki e veimacawa ena soqoni, o na vakalevutaka kina na nomu “valeniyau” ni kilaka vakaivolatabu.​—Maciu 13:51, 52.

• Na ituvatuva cava o rawa ni muria ni o vakavakarau ena soqoni?

• O rawa ni vakarautaka vakacava na nomu isaunitaro ena soqoni?

E vinakata sara ga o Jiova ena gauna vakaivolatabu mera dau soqoni vata na vuvale yadua, mera veivolekati kina kei koya ra qai veivolekati vakavuvale. (Vakarua 6:6, 7) Qori na vuna era vakatikitikitaka kina e dua na gauna e veimacawa na iVakadinadina i Jiova mera sokalou vakavuvale. Era marautaka kina nodra veivosakitaka na usutu vakaivolatabu e ganita sara ga na vuvale. Ke o tiko taudua, qori e gauna vinaka mo volekati koya kina na Kalou ena nomu vulica e dua na usutu vakaivolatabu.

Gauna meda toro voleka kina vei Jiova. “Toro voleka vua na Kalou ena qai toro voleka mai vei kemuni o koya.” (Jemesa 4:8) Nida vulica ena iVolatabu na veika matailalai me baleta na itovo i Jiova kei na veika e cakava, eda na kilai koya vinaka. Dua na sala me tekivu rawa kina na sokalou vakavuvale, oya na kena wiliki vakadomoilevu na iVolatabu, de dua ni muri na ituvatuva ni wili iVolatabu vakamacawa ena Soqoni ni Bula vaKarisito kei na Cakacaka Vakaitalatala. E rawa ni lesi e vica na tikina me ratou wilika na lewe ni vuvale yadua qai veivosakitaki na ka e vulici kina.

Gauna ni veivolekati vakavuvale. Ni vulici vakavuvale na iVolatabu ena kaukaua na kedratou ivau, o rau na veiwatini, itubutubu kei ratou na gone. Qo me gauna marautaki, veivakacegui qai gauna namaki duadua ena dua na macawa. Mera digia na itubutubu na ulutaga ena yaga me veivosakitaki qai veiganiti kei na nodratou dui yabaki ni bula na gone me vaka na ulutaga eso mai Na Vale ni Vakatawa kei na Yadra! se na noda website na jw.org. Rawa ni veitalanoataki na ituvaki dredre eratou sotava e koronivuli na gone, kei na sala me wali kina. Vakacava mo dou sarava na porokaramu ena JW Broadcasting (tv.jw.org) dou qai veivosakitaka? Ena marautaki sara ke dou vakatovotovotaka na sere ena lagati ena soqoni, dou qai vakayagataka vata eso na ivakalomavinaka ni sa cava na nomudou sokalou vakavuvale.

Na sokalou vakavuvale e veimacawa ena vukei kemudou vakavuvale mo dou taleitaka na Vosa ni Kalou, ena vakalougatataka tale ga vakalevu o Jiova na nomudou sasaga.​—Same 1:1-3.

• Na cava keimami vakatikitikitaka kina e dua na gauna ni sokalou vakavuvale?

• Na cava mera cakava na itubutubu me marautaki kina na sokalou vakavuvale?