Vakatotomuria na iVakaraitaki i Neumi
1. Na cava eda vulica ena ivola i Neumi?
1 Na irusarusa kei Ninive makawa me vaka e parofisaitaka o Neumi e vakaraitaka ni dau veisausaumi o Jiova vei ira na kena meca, ena sega tale ga ni dua na meca rerevaki me tarovi koya rawa. (Neumi 1:2, 6) Ena yaga ena noda cakacaka vakaitalatala noda dikeva na parofisai i Neumi.
2. Me veivakauqeti vakacava noda itukutuku?
2 Tukuna na Vakacegu, kei na iNuinui: Nida dikeva ena imatai ni gauna na ivola i Neumi, eda na rairai wilika ga kina na itukutuku ni kena vakarusai o Ninive, na koroturaga kei Asiria. (Neumi 1:1; 3:7) Ia qori e itukutuku vinaka vei ira na tamata i Jiova. Na ibalebale ni yaca i Neumi oya na “Dauveivakacegui,” e vakadeitaka vei ira nona itokani Jiu ni sa voleka ni vakarusai na kedra meca! E tukuna tale ga ni o Jiova e ‘ivakaruru kaukaua ena siga ni rarawa.’ (Neumi 1:7) Nida vunau, meda kacivaka tale ga na itukutuku vinaka qai uqeti ira na tamata mera vakaruru vei Jiova.— Neumi 1:15.
3. Eda na vakatotomuri Neumi vakacava ena vakayagataki ni ivakaraitaki kei na vosa vakatautauvata?
3 Vakayagataka na iVakaraitaki kei na Vosa Vakatautauvata: E uqeti Neumi o Jiova me vakatauvatana na vakarusai i Ninive ina koroturaga kei Ijipita o Thebes (Noamoni), na koro a vakarusa taumada o Asiria. (Neumi 3:8-10) Nida vunautaka ni sa voleka ni vakarusai na ituvaki ca qo, meda vakamatatataka na parofisai vakaivolatabu e vakadeitaka ni na vakayacora dina o Jiova nona vosa ni yalayala. Kena ivakaraitaki, nira kaba na koro o Ninive na mataivalu ni Papiloni kei Mitia ena 632 B.G.V., na taubi ni uca e luvu kina na uciwai na Taikirisi vakavuna me kasura na bai kaukaua ni koro. Qori e vakarusai totolo kina o Ninive, me vaka ga a parofisaitaka o Jiova.—Neumi 1:8; 2:6.
4. Me matata qai kilai rawarawa vakacava noda cakacaka vakaitalatala?
4 Me Matata qai Kilai Rawarawa: Na ivakarau ni volavola i Neumi e kilai rawarawa qai taleitaki. E matata na veika e tukuna. (Neumi 1:14; 3:1) Meda vakayagataka tale ga na vosa e kilai rawarawa. (1 Kor. 14:9) Ni o sotava e dua ena cakacaka vakavunau, vakamacalataka vakamatata na inaki ni nomu veisiko. Ni o veivakavulici ena iVolatabu, uqeti ira nomu gonevuli mera vakabauti Jiova kei na nona Vosa, mera vakavinavinakataka tale ga na yaga ni veika era vulica.—Roma 10:14.
5. Na cava e vakadeitaka na parofisai i Neumi?
5 E laurai vakamatata ena ivola vakaivolatabu e vola o Neumi nona vakabauta ni na vakayacora dina o Jiova nona vosa. Sa voleka ni vakarusai na ituvaki ca i Setani, ia eda vakacegui ena lewa vaKalou qo: “Ena sega ni tubu vakarua na ka rawarawa.”—Neumi 1:9.