“Kakua ni Veitokani Vata Vakatani”

O RAWA ni raica e ke nodrau sega ni cakacaka rawa vakavinaka na kameli kei na bulumakau erau siviyara tiko. Na ivua e semati rau vata tiko a nakiti me baleta e rua na manumanu e tautauvata na kedrau levu kei na kaukaua, ia oqo erau sa mai logalogaca tiko kina. Nona kauai na Kalou ena nodra vakaivua vata na manumanu vaka oqori e kaya kina vei ira na Isireli: “Me rau kakua ni veiliwaitaki vata na pulumokau kei na asa me yarata nai siviyara.” (Vakarua 22:10) E vakayagataki tale ga na ivakavuvuli oqori ina bulumakau kei na kameli.

O ira na dauteitei era sega ni dau vakaoca na nodra manumanu. Ia, ke sega vei ira e rua na bulumakau, era na rairai vakaivuataka vata e rua ga na manumanu sa tu vei ira. Oqori gona na ka a cakava na dauteitei ena ika19 ni senitiuri ena ivakatautauvata oqo. Ni duidui na kedrau levu vaka kina na kedrau bibi, ena saga o koya e malumalumu me rau na toso vata tiko ga, ia ena vakavuna me oca na manumanu e kaukaua.

Na ivakatautauvata ni veitokani vata vakatani e vakayagataka o Paula eda vulica kina e dua na lesoni bibi. “Kakua ni veitokani vata vakatani kei ira era sa sega ni vakabauta,” e vola. “Sa veitokani vakaevei na yalododonu kei na tawa-yalododonu? se rau sa veiwekani vakaevei na rarama kei na butobuto?” (2 Korinica 6:​14) E rawa vakacava ni veitokani vata vakatani e dua na lotu Vakarisito?

Oya na nona digia e dua erau sega ni vakabauta vata me watina. Ena dredre vei rau vakaveiwatini baleta ni rau sa na sega ni duavata ena levu na veika bibi e vauca nodrau bula.

Na gauna a tauyavutaka kina na bula vakawati o Jiova e nona itavi na yalewa me “dauveivuke,” se “itokani.” (Vakatekivu 2:​18) Vaka tale ga kina na nona vosa vua na parofita o Malakai, e kaya na Kalou ni “[i]tokani” na yalewa vakawati. (Malakai 2:​14) E vinakata na noda Dauveibuli mera duavata vakayalo na veiwatini, mera colata vakatautauvata na kena icolacola vaka kina nodra tamusuka vakatautauvata na kena yaga.

Na lotu Vakarisito e vakamau “ga kei koya sa nona na Turaga” e doka na nona ivakasala na Tamada vakalomalagi. (1 Korinica 7:​39) Ena yavutaki sara ga kina na bula vakawati e maucokona, e vakacaucautaki qai dokai tale ga kina na Kalou ni rau qaravi koya ‘vakaitokani dina’ ena sala e kilaitani.​—Filipai 4:3.

[iTaba ni Credit Line ena tabana e 32]

Kameli kei na bulumakau: From the book La Tierra Santa, Volume 1, 1830