Tekivutaki na Veivosaki ni Vakayagataki na Ulutaga “Cava e Kaya na Vosa ni Kalou?”
1. Na cava eda rawa ni vakayagataka ena cakacaka vakaitalatala?
1 Na Vakadewa ni Vuravura Vou e vakavoutaki e tiko kina na ulutaga Cava e Kaya na Vosa ni Kalou? ena itekitekivu. Eda na vakayagataka vakacava na ulutaga qo nida vakavakarau ena cakacaka vakaitalatala? E biuta vata na tikinivolatabu me baleta na ulutaga vakaivolatabu, me vaka e laurai ena ivola na Reasoning. Ena yaga sara me tekivutaki kina na veivosaki.
2. Rawa ni vakayagataki vakacava na ulutaga “Cava e Kaya na Vosa ni Kalou?” ena cakacaka vakaitalatala?
2 O na rairai vakayagataka na taro 8 qai kaya: “Keimami veitalanoa tiko kei ira ena yasayasa qo ni levu era dau vaqaqa, ‘Vakacava, me beitaki na Kalou ena noda rarawa?’ [Ena so na yalava, ena laulau ni vakaraitaki na taro vei itaukeinivale.] Na cava oni nanuma? [Waraka me sauma.] E veivakacegui na ka e tukuna na iVolatabu me baleta na taro qori.” Wilika mai na iVolatabu e dua se vica na tikinivolatabu e tiko ena ulutaga qori, oti drau veivosakitaka. Ke tataleitaki na itaukeinivale, rawa ni o vakaraitaka vua na 20 na taro qai tarogi koya me digitaka e dua e vinakata me veivosakitaka ena veisiko tarava. Se mo solia vua e dua na ivola ni vuli e tiko kina eso tale na itukutuku ena ulutaga drau veivosakitaka tiko.
3. Eda na vakayagataka vakacava na ulutaga “Cava e Kaya na Vosa ni Kalou?” me tekivutaki kina na veivosaki ena yalava era tiko kina na sega ni lotu vaKarisito?
3 Na taro naba 4 kei na naba 13 ina 17 ena yaga vakalevu nida vunau ena yalava era tiko kina o ira na sega ni lotu vaKarisito. Kena ivakaraitaki, o rawa ni vakayagataka na itukutuku ena taro naba 17 qai kaya: “Keimami veivosakitaka tiko mai e dua na ulutaga ena yaga ena vuvale. Vakacava na levu ni leqa era sotava nikua na vuvale? [Waraka me sauma.] Levu na veiwatini era raica ni yaga na vosa qo: “Na yalewa me dokai watina vakalevu.” [Sega ni vinakati mo tukuna ni qo e yavutaki ena Efeso 5:33. Ke o vosa vua e dua na yalewa, o rawa ni wiligusutaka na Efeso 5:28.] O nanuma ni yaga na ivakasala qo ena bula vakawati?”
4. Na cava o rawa ni cakava ni voleka ni oti nomudrau veivosaki kei na dua e sega ni lotu vaKarisito?
4 Ni voleka ni oti nomudrau veivosaki, tuvanaka me mai tomani ena dua tale na gauna. De dua o navuca mo drau veivosakitaka e dua tale na tikinivolatabu ena taro drau a veivosakitaka. Mo vakaraitaka vei itaukeinivale ni ka o wasea vua e yavutaki ena iVolatabu, rawa ni o cakava qo ena gauna veiganiti. Solia e dua na ivola o nanuma ni na taleitaka, qo e vakatau ena ka drau veivosakitaka mai kei na nona rai me baleta na iVolatabu.—Raica na itoma ena Noda Cakacaka Vakaitalatala ni Tiseba 2013.