Na Cava na iNaki ni Kalou me Baleta na Vuravura?

1. Na cava e bulia kina na Kalou na vuravura?

E vakarautaka o Jiova na vuravura me noda itikotiko na kawatamata. Erau sega gona ni buli na imatai ni veiwatini o Atama kei Ivi me rau vakatawana na lomalagi, ni sa buli ira oti na agilosi na Kalou mera vakaitikotiko kina. (Jope 38:4, 7) Ia a kauta na imatai ni tagane qai vakatikori koya ena dua na parataisi totoka e vakatokai na were o Iteni. (Vakatekivu 2:15-17) E solia vua o Jiova kei ira na nona kawa na inuinui mera marautaka na bula e vuravura me tawamudu.​—Wilika Same 37:29; 115:16.

A parataisi duadua ga ena ivakatekivu na were o Iteni. E tukuni vei rau na imatai ni veiwatini me rau tawani vuravura kei na nodrau kawa. Toso na gauna me rau lewa na vuravura taucoko, rau qai vakatetea na parataisi. (Vakatekivu 1:28) Ena sega sara ni vakarusai na vuravura. Ena tiko dei kina na kawatamata.​—Wilika Same 104:5.

Sarava na vidio Na Cava e Bulia Kina na Kalou na Vuravura?

2. Na cava sa sega ni parataisi kina nikua na vuravura?

Erau talaidredre vua na Kalou o Atama kei Ivi, mani vakasavi rau mai na were o Jiova. Sa sega ni parataisi kina na vuravura, a sega tale ga ni dua na tamata e vakalesuya rawa mai. E tukuna na iVolatabu: “Sa soli tu na vuravura ena ligana na vunica.”—Jope 9:24.​—Wilika Vakatekivu 3:23, 24.

Vakacava sa guilecava o Jiova na nona inaki taumada me baleta na kawatamata? Sega! O koya e cecere duadua. Ena vakayacora dina nona inaki. (Aisea 45:18) Ena vakalesuya ina kawatamata na nona inaki taumada me baleti ira.​—Wilika Same 37:11, 34.

3. Ena vakalesui mai vakacava na Parataisi?

Ena vakalesui mai na Parataisi e vuravura ni sa veiliutaki o Jisu na Tui ni Kalou. Ena ivalu e vakatokai na Amaketoni, o Jisu ena liutaki ira na agilosi ni Kalou mera vakarusai ira kece era saqata na Kalou. Oti ena qai vesuki Setani o Jisu me 1,000 na yabaki. Era na bula na tamata ni Kalou ena gauna ni veivakarusai baleta o Jisu ena dusimaki ira, ena taqomaki ira tale ga. Era na marautaka na bula tawamudu ena Parataisi.​—Wilika Vakatakila 20:1-3; 21:3, 4.

4. Ena oti ninaica na rarawa?

Ena vakaotia ena gauna cava na Kalou na ca e vuravura? A tukuna o Jisu na “ivakatakilakila” me dusia ni sa voleka na icavacava. E leqataki na bula ni kawatamata ena ituvaki da donuya tu qo, e vakaraitaka tale ga nida sa bula tu qo ena “ivakataotioti ni veika vakavuravura.”​—Wilika Maciu 24:3, 7-14, 21, 22.

O Jisu ena vakaotia kece na rarawa ni sa liutaka mai lomalagi na vuravura ena loma ni 1,000 na yabaki. (Aisea 9:6, 7; 11:9) Ena sega wale ga ni Tui o Jisu, ena Bete Levu me bokoca na nodra ivalavala ca o ira era lomana na Kalou. Na Kalou ena vakayagataki Jisu me vakaotia kina na tauvimate, qase, kei na mate.​—Wilika Aisea 25:8; 33:24.

5. O cei ena bula ena Parataisi se bera mai?

O ira era talairawarawa vua na Kalou era na bula ena Parataisi. (1 Joni 2:17) O Jisu e talai ira na nona imuri mera vakasaqarai ira na yalomalumalumu, qai vakavulici ira ena sala me vakadonui ira kina na Kalou. O Jiova sa vakarautaki ira tiko nikua e vica vata na milioni mera bula ena vuravura Parataisi se bera mai. (Sefanaia 2:3) E vakavulici ena nodra Vale ni Soqoni na iVakadinadina i Jiova na sala me tagane vakawati qai tama vinaka kina e dua, kei na sala me yalewa vakawati qai tina vinaka kina e dua. Era sokalou vata kina na gone kei na itubutubu ra qai vulica na sala me yaga kina vei ira na itukutuku vinaka.​—Wilika Maika 4:1-4.