Toro Voleka Vua Na Kalou

“Mo ni Nanumi Au, Kemuni na Noqu Kalou, Me’u Vinaka Kina”

“AU VAKASAMATAKA ni kilai au vinaka o Jiova, ena sega sara ga ni lomani au se vakadonui au.” E tukuna qori e dua na yalewa lotu vaKarisito yalodina e yalolailai. O dau vakila tale ga qori, mo nanuma ni sa sega tu ga ni kauaitaki iko na Kalou se vakadonui iko? Ke vaka kina, ena vakayaloqaqataki iko na ka e tukuni ena Niemaia 13:31.

A saga ena nona vinaka taucoko o Niemaia na nodra kovana na Jiu ena ikalima ni senitiuri B.S.K., me cakava na ka e vakamarautaka na Kalou. E liutaka na taravaki tale ni lalaga ni valenisoro e Jerusalemi, dina nira veitusaqati na meca. A raica tale ga me muri na Lawa ni Kalou, nodra qaravi na vakaloloma, kei na nona dau saga me tara cake nodra vakabauta na wekana na Isireli. A kauaitaka beka na Kalou na veika vinaka e cakava na turaga yalodina qo? A vakadonui Niemaia o Jiova? Eda na kila na kena isau nida dikeva na itinitini ni ivola e vakayacani vua.

E masuta o Niemaia: “Mo ni nanumi au, kemuni na noqu Kalou, me’u vinaka kina.”a A leqataka beka o Niemaia ni na sega ni kauaitaka na Kalou na nona cakacaka vinaka, se na guilecavi koya? Sega. E kila vinaka tu o Niemaia na ka era kaya na dauvola iVolatabu e liu me baleta na nona dau kauaitaki ira na nona dauveiqaravi yalodina o Jiova kei na nodra cakacaka vinaka. (Lako Yani 32:​32, 33; Same 56:8) Ia na cava ga e kerea tiko me cakava na Kalou? E kaya e dua na ivola, ni vosa vakaIperiu e vakadewataki me “nanuma” e vakaibalebaletaka “e dua na ka e taleitaki se maroroya e yalona.” Nona vakabauta na mana ni masu o Niemaia, a kerea kina vua na Kalou me nanumi koya, me vakalougatataki koya tale ga.​—Niemaia 2:4.

Ena rogoca beka o Jiova na kerekere i Niemaia me nanumi? Ena dua na yasana, e nanumi koya o Jiova. E vakadeitaka vei keda qori ni raica sara ga me lewe ni ivola e uqeti vakalou na masu i Niemaia. Ena sega wale ga ni sauma o koya e “daurogoca na masu” na kerekere i Niemaia mai vu ni lomana.​—Same 65:2.

O koya gona na Kalou ena vakaicovitaki Niemaia ena veika vinaka e cakava ena vuku ni sokalou savasava. (Iperiu 11:6) Ena vuravura vou ni yalododonu e yalataka o Jiova, ena vakaicovitaki Niemaia ena nona vakaturi koya.b (2 Pita 3:​13; Vakatakila 21:​3, 4) Na nona inuinui me bula tawamudu ena parataisi e vuravura, sa na qai kila kina o Niemaia ni nanumi koya dina o Jiova.

Na masu i Niemaia e vakadeitaka na dina ni vosa i Tui Tevita: “Sai kemuni, Jiova, ena vakalougatataka na yalododonu; ko ni na vakavolivoliti koya e na loloma me vaka e nai sasabai.” (Same 5:​12) Io, na Kalou e kila qai mareqeta na noda sasaga ena yalodina meda vakamarautaki koya. Koya gona, ni o qaravi koya ena nomu vinaka kece, o na nuidei ni na nanumi iko, ena vakalougatataki iko tale ga.

Wili iVolatabu e Vakatututaki ena Feperueri:

◼ Niemaia 1-​13

[iVakamacala e ra]