Toro Voleka Vua na Kalou
“Ko ni na Vinakata”
E MOSIMOSI dina nida raica e dua na wekada lomani e tauvimate qai mate. Eda dau rarawataka sara ga ni yaco qori. Ia e veivakacegui nida kila ni o koya na Dauveibuli, na Kalou o Jiova e kila vinaka na noda lolosi. Kuria, e vinakata me vakayagataka na nona kaukaua me vakaturi ira kina na sa takali. Raica mada na vosa i Jope me baleta na inuinui e vakamacalataki ena Jope 14:13-15.
Vakasamataka mada na ka a yaco. A vakatovolei vakaca o Jope, na turaga e vakasakiti na nona vakabauta—okati kina nona vakayalia na veika vakayago e taukena, nodratou mate kece na luvena lomani, qai tauvi koya e dua na mate vakaloloma. Ena levu ni nona rarawa e kerea kina vua na Kalou: “Mo ni vunitaki au mada e nai bulubulu.” (Tikina e 13) E kila o Jope ni na oti na nona rarawa ena ibulubulu. E vaka e vunitaka tu e kea na Kalou e dua na iyau talei, oya ni sa na sega ni vakilai kina na dredre ni bula kei na rarawa.a
Ena tu beka ga ena ibulubulu o Jope? A sega ni vakabauta qori o Jope. Ni tukuna ena nona masu: “Mo ni . . . lokuca vei au e dua na siga, ka nanumi au!” E vakabauta dei ni na lekaleka ga na nona tiko ena ibulubulu, ena sega tale ga ni guilecavi koya o Jiova. A vakatauvatana o Jope ni gauna e tiko kina ena ibulubulu e vaka na ‘siga sa loku’—me wawa kina. Ena vakacava na kena dede? E kaya: “Me yacova na noqu vakacegui.” (Tikina e 14, NW) Qori e vakaibalebaletaka nona sereki mai na ibulubulu—se dua tale na kena itukutukuni, nona na vakaturi!
Na cava e vakabauta dei kina o Jope ni na vakaturi? E kila vinaka ni dau kauaitaki ira na nona dauveiqaravi yalodina era sa takali na Dauveibuli yalololoma. E kaya o Jope: “Ko ni na kaci mai, ka’u na rogo yani vei kemuni: Ko ni na vinakata na cakacaka ni ligamuni.” (Tikina e 15) E kila tale ga ni a buli koya na Kalou. Ni a vakavuna na nona kunekunetaki, ena rawa tale ga me vakaturi koya.—Jope 10:8, 9; 31:15.
Eda vulica ena vosa i Jope ni dau yalololoma o Jiova: E dau volekati ira era vakataki Jope nira biuti ira sara ga ena ligana me tuli ira ena sala mera talei kina e matana. (Aisea 64:8) O Jiova e mareqeti ira era sokaloutaki koya ena yalodina. Vei ira gona na yalodina era sa takali e “vinakata” sara ga o koya me cakava vei ira e dua na ka. Na vosa vakaIperiu e tauri mai kina na vakasama qo e kaya e dua na vuku: “Sega ni vakabekataki ni qo e dua na vosa e vakaraitaka na ka e vinakata sara ga.” Io, o Jiova e sega ni nanumi ira wale ga era sokaloutaki koya, ia e vinakata sara ga me vakaturi ira.
Na ivola i Jope e dua vei ira na ivola a volai e liu ena iVolatabu, qai marautaki ni a vakatakila kina o Jiova na nona inaki me vakaturi ira sa takali.b E taleitaka gona o Jiova mo raici ira tale na wekamu era sa takali. Na vakasama qo ena vakacegui iko ena nomu lolosi. Vakacava mo vulica e levu tale na ka me baleta na Kalou yalololoma qo qai vakatara me tuli iko ena ivalavala e vakadonuya mo na raica kina na vakayacori ni nona inaki?
Wili iVolatabu e Vakatututaki ena Maji:
_______
[iVakamacala e ra]
a E tukuna e dua na ivola ni vosa i Jope, “tabonaki au,” e vakaibalebaletaka “biuti [au] ena vanua au na taqomaki vinaka kina.” Dua tale na ivola e kaya ni vosa qori e tukuna tiko me “vunitaki au me vaka e dua na iyau talei.”
b Mo kila eso tale na ka me baleta na veivakaturi ena vuravura vou ni yalododonu e yalataki tu ena iVolatabu, raica na wase 7 ni ivola Na Cava Eda na Vulica ena iVolatabu? tabaka na iVakadinadina i Jiova.