iDusidusi ni iVola ni Soqoni ni Bula vaKarisito kei na Cakacaka Vakaitalatala

FEPERUERI 5-11

Vakekeli ena Vosa ni Kalou

ivakamacala ni vosa (nwtsty study note) ena Mac 12:20

vauvau ni cina e kubou wale ga: E dau vakayagataki na cina lailai e tuli, e tawa kina na waiwai ni olive. E domica na vauvau na waiwai me waqa kina. Na matavosa vaKirisi “vauvau ni cina e kubou wale ga” e rairai dusia na vauvau sa kubou tiko, ia se laurai tiko na kena yameyame se sa boko. E parofisaitaki ena Aisea 42:3 na yalololoma i Jisu; ena sega ni bokoca na iotioti ni yameyame se na ka era vakanuinui tu kina na yalomalumalumu se o ira na bibivoro.

FEPERUERI 12-18

IYAU MAI NA VOSA NI KALOU | MACIU 14-15

ivakamacala ni vosa ena Mac 14:21

wili kina na yalewa kei na gone: O Maciu duadua ga e cavuti ira na yalewa kei na gone ena gauna e vola kina na cakamana qo. E kena irairai nira vakani vakacakamana e 15,000 vakacaca.

Vakekeli ena Vosa ni Kalou

ivakamacala ni vosa ena Mac 15:7

dau veivakaisini: Na vu vaKirisi hy·po·kri·tesʹ e dusi ira na kai Kirisi era vakaraitaki ena iyaloyalo (toso na gauna o ira na kai Roma) era dau vakamatavulo lelevu me veisautaka na domodra. E vakayagataki tale ga vakaivakatakarakara me dusia nona vunitaka e dua na nona inaki se vakalecaleca. O Jisu e vakatokai ira na iliuliu ni lotu Jiu mera “dauveivakaisini.”—Mac 6:5, 16.

ivakamacala ni vosa ena Mac 15:26

gone . . . luvenikoli: E manumanu dukadukali na koli ena Lawa e soli vei Mosese, e laurai na vosa qo ena iVolatabu me dusia na ka e beci. (Vns 11:27; Mac 7:6; Flp 3:2; Vta 22:15) Ia na vosa i Jisu ena ivola i Marika (7:27) kei na Maciu, e cavuti kina na vosa vaKirisi e kena ibalebale “luvenikoli” se “koli ni vale,” me vakamamadataka. De dua e vakamacalataka tiko o Jisu na nodra lomani na manumanu ni vale ena nodra itikotiko na sega ni Jiu. Ni vakatauvatani ira na Isireli mera “gone,” kei ira na sega ni Jiu mera “luvenikoli,” e vinakata o Jisu mera kila na ka me liu. Na vuvale era tiko kina na gone kei na koli, mera vakani e liu na gone.

FEPERUERI 19-25

Vakekeli ena Vosa ni Kalou

ivakamacala ni vosa ena Mac 16:18

iko Pita, . . . ena delanivatu qo: Na vosa vaKirisi peʹtros, ni cavuti vei ira na tagane, e kena ibalebale “e dua na tiki ni vatu.” Ena tikinivolatabu qo e cavuti me yaca i (Pita), na yaca vaKirisi ni Saimoni e vakatokai koya kina o Jisu. (Jn 1:42) Na ikarua ni vosa peʹtra ni cavuti vei ira na yalewa, e vakadewataki me “vatu,” e rairai dusia na vatu ena lomaniqele, barinivatu, se ibinibini vatu. E basika tale ga na vosa vaKirisi qo ena Mac 7:24, 25; 27:60; Lu 6:48; 8:6 Rom 9:33; 1Ko 10:4; 1Pi 2:8. A sega ni okati koya o Pita me vatu e tara kina o Jisu na nona ivavakoso, ni a vola ena 1Pi 2:4-8 ni o Jisu na “ivakadei ni tutunivale” a parofisaitaki makawa tu mai, ni digitaka sara ga na Kalou. E va tale ga qori na ka e vola na yapositolo o Paula me baleti Jisu, ni o koya na “yavu” kei na “vatu vakayalo.” (1Ko 3:11; 10:4) Koya gona a vosa vakaibalebale tiko o Jisu ni kaya, ‘O iko Pita, e Dua na Tiki ni Vatu, o kila vinaka na Karisito, ya na “delanivatu qo,” o koya sara ga ena yavu ni ivavakoso vaKarisito.

ivavakoso: Qo na imatai ni vanua e basika kina na vosa vaKirisi ek·kle·siʹa. E vu mai na rua na vosa vaKirisi, ek, kena ibalebale “mai,” kei na ka·leʹo, kena ibalebale “kacivi.” E dusia e dua na ilawalawa e kacivi se kumuni vata ena dua na inaki se itavi. (Raica na iVakamacala ni Vosa ena iVolatabu.) Ena ikotokoto qo, e tukuna o Jisu na kena tauyavu na ivavakoso vaKarisito era lewena na lumuti, o ira na “vatu bula” era “tarai cake [mera] vale vakayalo.” E vakayagataki vakalevu na vosa vaKirisi qo ena Septuagint ni tautauvata kei na vosa vakaIperiu e vakadewataki me “ivavakoso,” e dau dusi ira kece na tamata ni Kalou. (Vkr 23:3; 31:30) Ena Cak 7:38, na “ivavakoso” e dusi ira na Isireli era kacivi mai Ijipita. E va tale ga qori o ira na lotu vaKarisito era “kacivi . . . mai na butobuto,” era “digitaki . . . mai vuravura” mera “ivavakoso ni Kalou.”—1Pi 2:9; Jn 15:19; 1Ko 1:2.

ivakamacala ni vosa ena Mac 16:19

ki ni Matanitu vakalomalagi: Ena iVolatabu, o ira na taura na ki dina se vakaivakatakarakara, era nuitaki ena so na ka mera lewa. (1Ve 9:26, 27; Ais 22:20-22) Na vosa “ki” e dusia na lewa kei na itavi. E vakayagataka o Pita na “ki” e tataunaki vua me vunau vei ira na Jiu (Cak 2:22-41), kai Samaria (Cak 8:14-17), kei ira na Veimatanitu (Cak 10:34-38) me sobuti ira tale ga na yalo tabu mera lewe ni Matanitu vakalomalagi.

FEPERUERI 26–MAJI 4

IYAU MAI NA VOSA NI KALOU | MACIU 18-19

ivakamacala ni vosa ena Mac 18:6

na vatuniqaqaqi . . . e dau dreta na asa: Se “vatuniqaqaqi levu.” vaKirisi, “na vatuniqaqaqi ni asa.” Na vatuniqaqaqi qo e rawa ni 1.2 ina 1.5 na mita (4-5 na fiti) na kena raba, ni rui bibi e vinakati gona me dreta na asa.

nwtsty iyaloyalo

Vatuniqaqaqi

Na vatuniqaqaqi e dau qaqi kina na covuata kei na olive me rawa kina na waiwai. Na kena e lalai eda taura ga e ligada, ia eso tale e dreta na manumanu ni sa rui lelevu. Kena irairai ni tautauvata kei na vatuniqaqaqi levu qo na kena e biliga o Samisoni me baleti ira na kai Filisitia. (Dvl 16:21) E sega ni dau vakayagataki ga e Isireli na vatuniqaqaqi e dreta na manumanu, e vakayagataki tale ga vakalevu ena veivanua e Roma.

Kena vatu e cake, vatuniqaqaqi e dabe i ra

Na vatuniqaqaqi levu e laurai toka qo ena dreta ga na manumanu me vaka na asa, e dau qaqia na covuata kei na vua ni olive. Na kena vatu e cake ena rairai 1.5 na mita (5 na fiti) na kena raba, ena vakayagataki ga ena vatuniqaqaqi levu e dabe.

ivakamacala ni vosa ena Mac 18:7

ka e veivakatarabetaki: Na ibalebale ni vosa vaKirisi taumada na skanʹda·lon, e vakadewataki me “ka e veivakatarabetaki,” e tiko kina na vakasama ni dai; era tukuna eso ni dusia na kau e tiko ena dai me biu kina na baca. Ia nikua, e dusia e dua na ka ena vakatarabetaka e dua se bale kina. Ena vakasama vakayalo, e dusia na itovo se ituvaki ena rawai kina e dua ena sala ca, me tarabe se bale ina ivalavala ca. Ena Mac 18:8, 9, na kena vu veiwekani na skan·da·liʹzo, e vakadewataki me “vakatarabetaki,” e rawa tale ga ni tukuni me “icori; ivalavala ca.”

ivakamacala ni vosa ena Mac 18:9

Qiena: Na vosa qo e vu mai na vosa vakaIperiu na geh hin·nomʹ, kena ibalebale “buca o Inomi,” e toka ena Ra kei na Ceva kei Jerusalemi makawa. (Raica na iKuri B12, mape “Jerusalemi kei na Vanua Volekata.”) Me yacova na gauna i Jisu, e dau kama na benu ena buca qo. Na vosa gona “Qiena” e veiganiti kei na kena ibalebale, rusa vakadua.

nwtstg iVakamacala ni Vosa ena iVolatabu

Qiena

Yaca vaKirisi ni Buca o Inomi, ena ceva kei Jerusalemi makawa donuya na ra. (Jr 7:31) Parofisaitaki ni na veidavori na yagonimate ena vanua qo. (Jr 7:32; 19:6) Sega na ivakadinadina nira kolotaki i Qiena na manumanu se tamata mera vakamai bulabula se vakararawataki kina. Sega ni vakatakarakarataka e dua na vanua tawarairai ni veivakararawataki ena bukawaqa. Ia e vakaibalebaletaka o Jisu kei ratou nona tisaipeli na Qiena me veitotogitaki tawamudu ni “ikarua ni mate,” oya na rusa vakadua.—Vta 20:14; Mac 5:22; 10:28.

ivakamacala ni vosa ena Mac 18:10

era dau tu ga ena mata i Tamaqu: Se “torovi Tamaqu.” Nira dau tu ena mata ni Kalou na kabula vakayalo, o ira ga e rawa nira raica na matana.—Ly 33:20.

Vakekeli ena Vosa ni Kalou

ivakamacala ni vosa ena Mac 18:22

vaka77: vaKirisi, “vakavitusagavulu na vitu.” Na vosa vaKirisi qo e rawa ni kena ibalebale na “70 kei na 7” (vaka77) se “vakalevutaki vaka7 na 70” (490 na gauna). E basika tale ga na vosa qo ena Vte 4:24 ena Septuagint, e vakadewataka na vosa vakaIperiu “vaka77,” e tokona na “vaka77 na gauna.” Se mani cava na kena ibalebale, na veitaravi ni naba vitu e dusia ni “tawavakaiyalayala” se “sega ni mudu.” Ni tukuna o Jisu me vaka77 na 7 e cavuta o Pita, e vakavulici ira tiko na nona imuri me kua ni vakaiyalayala na nodra veivosoti. E veibasai qori kei na ka e kaya na Babylonian Talmud (Yoma 86b): “Ke cala e dua, ena vosoti ena imatai, ikarua, kei na ikatolu ni gauna, ena sega ni vosoti ena kena ikava.”

ivakamacala ni vosa ena Mac 19:7

ivola ni veisere: Ni dua na tagane e via sereki watina, ena vinakati me vakarautaka na kena ivola vakalawa, me raici ira tale ga na qase. Na Lawa ena solia vua na gauna me vakasamataka vinaka na vakatulewa bibi qori. Na inaki ni Lawa me kua ni caka vakariri na veisere, mera taqomaki tale ga vakalawa na yalewa. (Vkr 24:1) Ia ena gauna i Jisu era vakarawarawataka na veisere na iliuliu ni lotu. O Josephus, na daunitukutuku makawa ena imatai ni senitiuri, e Farisi, sa sereki watina tale ga, e tukuna ni rawa na veisere “ena yavu kece ga (levu na gauna e yaco qo vei ira na tagane).”

nwtsty iyaloyalo

iVola ni Veisere

Sa tu na ivola qo ena 71 se na 72 G.V, e volai vakaArame. E kune ena vualiku ni Waimaca o Murabbaat, ena vanua dravuisiga e Jutia. E tukuni kina ni ikaono ni yabaki ni nodra vakaduiduile na Jiu, o Joseph na luvei Naqsan e sereki Miriam, na luvei Jonathan e tiko ena korolevu o Masada.